2 TIMOTEO 1:8 - Lengua Sur (Enxet) Nuevo Testamento

⁸ Neymegké' aksa eltennaha apwesey Wese' egegkok, neymegké' aksa hélanok ko'o keso sekmáxko nak eñama Wese' egegkok. Yoho kawakxohok xép xa nenlegeykegkoho nak eñama m'a ektémakxa nak nenlegaso amya'a ektakmela, yetlo m'a apwaskápeykekxoho apmésamol'a cha'a exchep Dios.

2 TIMOTEO 1:8 Referans Kwoze

ROMANOS 1:16

Mamegkayhek ko'o axének tásek amya'a, hakte cháxa Dios apmopwána xa, yakwayam enxoho elwagkasakpok teyp apyókxoho énxet apteme nak melya'áseyam, eyeynamókxa m'a énxet'ák judíos, wokmók eyke nahan ma'a énxet'ák metnaha nak judíos.

SAN MARCOS 8:38

Agkok exénak énxet aptaha sétleykha ko'o, tén han meltenneyncha'a enxoho amya'a ahagkok nápakta'awo' ma'a énxet'ák apyenseyam nak apkelyetlo Dios, tén han ma'a melya'asáxma nak, mexének sat nahan apwesey aptaha nak Apketche énxet ma'a, cham'a apwakto sat yetlo apcheymákpoho eñama Apyap, tén han yetlo m'a apkelásenneykha apkelpagkanamap nak.

2 TIMOTEO 4:5

Xép akke kéméxchek etakmelchesek xa ektémakxa nak apmopwána elanagkohok aptémakxa; elenmaxakpoho cha'a m'a nenlegeykegkoho nak, elána wánxa m'a apkeltenneykha nak tásek amya'a, etakmelchesho apkelané m'a ektémakxa nak aptamheykha.

APOCALIPSIS 12:11

Apkelmalanchek axta ẽlyáxeg'a xa eñama m'a apyegkenma axta éma apagkok Nekkések Apketkok eñama nahan ma'a apkellegaso axta amya'a ektakmela agko' xa énxet'ák nak; axta elayeyk eletsapok apmayheykegkok axta aksa eletsapok.

2 TIMOTEO 2:9

Elenmáxamaxkók ko'o seklegeykegkoho eñama xa tásek amya'a nak, weykmók nahan selnaktetcheso emék ekhawo kéltemésesamakxal'a énxet ekmaso aptémakxa, wánxa agkok, akke kólpextetmak ma'a Dios appeywa.

2 TIMOTEO 1:12

Cháxa keñamak seklegágkoho nak ko'o kaxwo' ekyókxoho xa aksok nak, wánxa agkok mamegkayhek eyke ko'o axének, hakte ekya'ásegkok ko'o m'a aptaha nak seyayókxa; nakso' nahan ektemesásak ko'o ekyetna apmopwána hetakmelchesesek ekweykmoho néxa ekhem ma'a sektamheykha apkeltamho axta alána'.

EFESIOS 3:1

Ekeso eñamakxa sekha nak kaxwo' ko'o sẽlpextétamakxa eñama Cristo Jesús, ko'o Pablo, eñama selané sektamheykha yakwayam apasmok kéxegke megkóltaha nak judíos.

FILIPENSES 3:10

Emenyék eyke eykpelchágwomhok ko'o m'a Cristo, tén han eykpelchágwomhok agko' ma'a ektémakxa axta apmopwána apxátekhágweykmo, tén han hewatámho ko'o m'a ektémakxa axta aplegeykegkoho, tén han kaxhok sétsapma m'a ektahakxa axta apketsapma,

SAN LUCAS 9:26

Agkok exénak énxet aptaha sétleykha ko'o, tén han meltenneyncha'a enxoho m'a amya'a ahagkok, mexének sat nahan apwesey m'a aptaha nak Apketche énxet, cham'a apwakto sat yetlo apcheymákpoho, tén han apcheymákpoho m'a Apyap, tén han yetlo m'a apkelásenneykha apkelpagkanamap nak.

2 TIMOTEO 1:16

Emenyék ko'o meyakmagkásekxék Wese' egegkok aptamhágkaxa m'a apheykha nak Onesíforo apxagkok, hakte hepeykesásekxohok axta cha'a ewáxok, axta emegkaktók selhéseykmo ko'o sẽlpextétamakxa.

EFESIOS 4:1

Ekmések ko'o sekpeywa kéxegke keso sekha nak kaxwo' sẽlpextétamakxa seltamho kóltehek kéxegke m'a eyéméxchexa nak antehek negko'o ektaha axta sẽlwoneykha Dios, ekhawo m'a ektahakxa axta apkelwónencha'a Dios kéxegke.

APOCALIPSIS 1:9

Ko'o Juan sektaha nak may'áseykmoho xamo' kéxegke Cristo, Jesús sekyepetcheyo keñamak sewákxoho nahan ko'o xa sekteme señama nepyeseksa Dios énxet'ák apagkok tén han sewákxoho seklegeykegkoho xamo' kéxegke, tén han sewákxoho m'a ektémakxa nak kélwaskápeykekxoho, yakwayam enxoho alenmaxaxkohok seklegeykegkoho ko'o. Elhésekmek axta ko'o yókxexma étkok ekwesey Patmos, eñama seklegaso m'a amya'a eñama nak Dios, cham'a aptemésesama axta ekmámnaksoho Jesús.

SAN JUDAS 1:24

Yetneyk apmopwána Dios yakwayam eltakmelchesek kéxegke, yakwayam enxoho megkólpalegme', yakwayam enxoho anhan enaklakxak meyke ekyepetche xama aksok, yetlo ekyawe ekpayheykekxa kélwáxok ma'a aphamakxa nak yetlo apcheymákpoho, cham'a Dios aptaha nak wánxa xama apagko', aptaha nak han segwagkasamo teyp. Apcheymákpoho sat cha'a kóltemésesek Dios, tén han kóltemésesek meyke ekhémo, ekha apmopwána, tén han ekha kélyaheykekxoho, eñama m'a Jesucristo Wese' egegkok, eyeynamókxa m'a nano' axta, ekwokmoho s'e kaxwo' nak, megkamassegwomek nahan cha'a. Katnahagkok sat.

1 SAN PEDRO 1:5

Apkeltakmelchesegkek kéxegke Dios yetlo m'a ektémakxa nak apmopwána, eñama m'a ektémakxa nak megkólya'áseyam, yakwayam enxoho kólxawak kéxegke kélwagkásamáxche teyp, cham'a aptakmelchesesama nak kéxegke Dios, cháxa peya nak hegya'asásegwók ektemegwánxa néxa ekhem xa.

2 TIMOTEO 2:3

Yoho kawakxohok xépxa xa nenlegeykegkoho nak, ekhawo m'a ektémakxa nak apkellegeykegkoho Jesucristo sẽlpextétamo apagkok ektakmela nak apkeltémakxa.

1 TESALONICENSES 3:4

Neltennásek axta eykhe peya agwetak negko'o nenlegeykegkoho, cham'a, neyseksók negheykha axta kélnepyeseksa kéxegke, entemék axta negko'o xa, cháxa ektahakxa nak kélya'áseykegkoho kéxegke.

FILIPENSES 1:7

Payhawók agko' ko'o katnehek ekxeyenma ewáxok kélyókxoho kéxegke xa ektaha nak, hakte awanhok agko' ko'o selásekhayo kéxegke, hakte wákxók nahan kéxegkáxa kélxawé naksa m'a ektémakxa nak segemleykekxoho Dios, cham'a segkésa axta aksa ko'o, megkeyxek ma'a sekha enxoho sẽlpextétamakxa, esenhan selyentama enxoho nápakta'awo' ma'a kelwese'e ekha nak kélyaheykekxoho, yakwayam amyók tén han axének ektaha nakso' ma'a amya'a nelmeyamáxche nak.

EFESIOS 3:13

Ekeso eñamakxa seltamho nak ko'o megkalleklágwomek kéxegke eñama s'e seklegeykegkoho nak ko'o kéxegke eñamakxa, yakwayam kalpeykásekxak kélwáxok akke kéxegke xa seklegeykegkoho nak ko'o.

ROMANOS 16:25

Oltemésesek apcheymákpoho Dios, aptaha nak apmopwána etnésesek ekyennakte megkólya'áseyam kéxegke m'a ektémakxa nak tásek amya'a seltenneykha cha'a ko'o, tén han ma'a nelxekmowásamáxche ekxeyenma nak Cristo. Hawók ektémakxa aksok ekyexamaxche apkeláneykekxa axta Dios xa, cham'a senxekmósa axta, ekpowásamáxkoho axta cha'a nano' axta megkalánamáxchexa axta makham keso náxop,

1 SAN JUAN 4:14

Negko'o egagko' axta negweté xa, neltenneykha nahan nenxeyenma m'a apcháphásama axta Dios Egyap Apketche yakwayam elwagkasek teyp énxet'ák apheykha nak keso náxop.

2 TIMOTEO 4:17

Wánxa agkok, Wese' egegkok axta eyke epasmak ko'o, egkések axta sekyennakte, yakwayam enxoho wawának alenxanmohok seltenneykha tásek amya'a, tén han añeksek tásek amya'a m'a énxet'ák melya'áseyak nak Dios. Cháxa setnésesakxa axta semyawa Wese' egegkok keto' sekmatñamakxa xa.

FILIPENSES 4:13

Ewanchek ko'o ayeykhak ma'a ekyókxoho aksok nak, hakte Cristo aptaha sepasmo ko'o.

ROMANOS 9:33

ekxeyenma nak eknaktáxésamaxche s'e: “Ekpekkenchek ko'o Sión xama meteymog, cháxa meteymog peya nak kalpelápagkasek énxet'ák xa; énxet ektahakxa enxoho apteme mey'áseyam ma'a meteymog nak, megkatnegwomek sat eyakhémo mey'áseyam.”

LOS HECHOS 5:41

Apkelántekkek axta énxet'ák seykha amya'a apkelenyekto nápakta'awo' ma'a énxet'ák kelwese'e nak, hakte apcha'awók axta Dios ellegagkohok ekmaso agko' eñama apkellegaso Jesús apwesey.

APOCALIPSIS 19:10

Eltekxekkek axta ko'o etapnák náxop ekpayhókxa apkenmágkaxa Dios apchásenneykha, yakwayam alpeykesho', wánxa agkok, aptahak axta seyáneya s'e: “Ná etne aksa xa, ko'o sekteme Dios apchásenneykha, ekhawók ko'o exchep, ekhawók nahan ma'a apkelyáxeg'a ektaha nak melyenseyam apkeltenneykha Jesús apwesey. Elpeykesho m'a Dios.” Hakte, cháxa eyewáneseso énxet'ák ektaha nak apkellegaso Dios appeywa xa apkeltenneykha nak Jesús apwesey.

APOCALIPSIS 1:2

Apkeltennáha axta Juan ekmámnaksoho agko' ekyókxoho aksok ektahakxa axta apweté, cham'a aptaha nak han apxeyenma m'a amya'a eñama nak Dios, cham'a amya'a apkeltenneykencha'a axta anhan Jesucristo.

1 CORINTIOS 1:6

Hakte ekmámnaksoho temegwokmok ekyetno kélnepyeseksa kéxegke m'a amya'a ekxeyenma nak Cristo Jesús.

SAN JUAN 19:35

Cháxa énxet ektaha axta apweteykegkoho xa, ektaha nak han apxeyenma xa, ekmámnaksoho nahan apxeyenma; apya'ásegkok nahan aptéma ekmámnaksoho appeywa, yakwayam enxoho kóltehek kéxegkáxa megkólya'áseyam.

COLOSENSES 1:24

Payhekxeyk kaxwo' ko'o ewáxok seklegágkoho kéxegke eñamakxa, cháxa seksawhegwokmo ko'o eklegeykegkoho sekyókxa xa, cham'a eyéméxko nak eñegkohok Cristo, énxet'ák apagkok eñamakxa, ektaha nak han apyókxa.

EFESIOS 4:17

Elpakhetchesek ko'o kéxegke yetlo sekxeyenma Wese' egegkok apwesey, eltamhok ko'o megkóltemekxak makham ma'a apkeltémakxa nak énxet'ák melya'áseyak nak Dios, apkelyetleykekxo nak ma'a ektémakxa nak elchetamso apwáxók ektaha nak mékoho,

2 CORINTIOS 6:7

eñama anhan ma'a neltenneykha nak amya'a ekmámnaksoho, tén han eñama ekyetno negko'o m'a Dios apmopwána nak. Negmáha cha'a negko'o m'a ekpéwomo nak nentémakxa ektémol'a agmaha negmeykha, yakwayam nak agmaha nennapéxchexa enxoho, tén han antehek negahakkásamáxche.

ROMANOS 8:36

Ekhawo ektémakxa nak ekxeyenma eknaktáxésamaxche s'e: “Xép keñamak nentekyawa cha'a negko'o yókxoho ekhem; máxa ẽltemesásak negko'o nekkések kélyentameykekxal'a aptekyómakxa.”

SAN JUAN 15:27

Kéxegke sat nahan kóltehek kélxeyenma sekwesey, hakte selxegexma'a axta ektemék kéxegke sekxo' agko' sekmoma sektamheykha.

1 TIMOTEO 2:6

Hakte apmeyáseykpók axta apagko' Jesucristo yakwayam emátog yakwayam etnehek segyanmaga eñama nelwagkásamáxche teyp negyókxoho nak, cham'a senxekmósama axta Dios ekwokmo axta ekhem yakweykenxa katnehek ma'a aptémakxa axta appeywa.

COLOSENSES 1:11

Nelmaxnakkek negko'o Dios neltamho etnésesek kéxegke ekha kélyennakte eñama m'a apmopwána eyeymáxkoho nak; yakwayam enxoho kólewának kólenmaxaxkohok kéxegke ekyókxoho aksok, yetlo kélwaskápeykekxoho tén han kéllenxányam,

2 TIMOTEO 1:10

enxekmósek kaxwo' negko'o m'a segásekhayo nak, cham'a apwa'a axta Wese' egegkok Jesucristo aptaha nak segwagkaso teyp, aptaha nak han apmaséso m'a ektémakxa axta ekmowána nétsapma, cham'a appekkenákxo axta yáxñakxoho m'a ekyennakte egnenyek megkatnegwayam enéxa nak, eñama m'a amya'a ektakmela nak.

2 TIMOTEO 2:8

Kaxén apwáxok xép Jesucristo, cham'a apxátekhágweykmo axta nepyeseksa énxet'ák apkeletsapma axta, aptaha axta nahan wese' apwányam David aptáwen neptámen; cháxa tásek amya'a seltenneykencha'a nak cha'a ko'o xa.