2 TIMOTEO 1:12 - Lengua Sur (Enxet) Nuevo Testamento

¹² Cháxa keñamak seklegágkoho nak ko'o kaxwo' ekyókxoho xa aksok nak, wánxa agkok mamegkayhek eyke ko'o axének, hakte ekya'ásegkok ko'o m'a aptaha nak seyayókxa; nakso' nahan ektemesásak ko'o ekyetna apmopwána hetakmelchesesek ekweykmoho néxa ekhem ma'a sektamheykha apkeltamho axta alána'.

2 TIMOTEO 1:12 Referans Kwoze

2 TIMOTEO 1:8

Neymegké' aksa eltennaha apwesey Wese' egegkok, neymegké' aksa hélanok ko'o keso sekmáxko nak eñama Wese' egegkok. Yoho kawakxohok xép xa nenlegeykegkoho nak eñama m'a ektémakxa nak nenlegaso amya'a ektakmela, yetlo m'a apwaskápeykekxoho apmésamol'a cha'a exchep Dios.

SAN JUDAS 1:24

Yetneyk apmopwána Dios yakwayam eltakmelchesek kéxegke, yakwayam enxoho megkólpalegme', yakwayam enxoho anhan enaklakxak meyke ekyepetche xama aksok, yetlo ekyawe ekpayheykekxa kélwáxok ma'a aphamakxa nak yetlo apcheymákpoho, cham'a Dios aptaha nak wánxa xama apagko', aptaha nak han segwagkasamo teyp. Apcheymákpoho sat cha'a kóltemésesek Dios, tén han kóltemésesek meyke ekhémo, ekha apmopwána, tén han ekha kélyaheykekxoho, eñama m'a Jesucristo Wese' egegkok, eyeynamókxa m'a nano' axta, ekwokmoho s'e kaxwo' nak, megkamassegwomek nahan cha'a. Katnahagkok sat.

1 SAN PEDRO 4:19

Apkellegágkok agkok nápakha énxet'ák eñama enxoho Dios apmopmenyého katnehek, kéméxchek elenxanmohok aksa apkelané m'a apkeltémakxa ektakmela nak, tén han yásenneykxak Dios yakwayam etakmelchesek, cham'a Dios aptaha axta senlané, aptaha nak han mehegyenyaweykha.

2 TIMOTEO 4:8

Kaxwo' eyke, eltakmelchesesek ko'o selháxakxo ekpayhawo nak axkak ko'o, cham'a peya nak hegkések Wese' egegkok ekhem sat, aptaha nak segyekpelchémo ekpéwomo agko'. Háwe sat exakko' ko'o yakwayam hegkések xa, sat nahan elmésagkok ma'a apxámokxoho énxet'ák apkelhaxanma nak ewata' yetlo apchásekhayo.

HEBREOS 7:25

Ekeso eñamakxa apkepwagko nak Jesús elwagkasek teyp megkatnegwayam enéxa m'a énxet'ák apkelya'eykekxa nak Dios eñama m'a Jesús, hakte apheyk makham ma'a yakwayam enxoho yának epasmok Dios xa énxet'ák nak.

1 TIMOTEO 6:20

Xép, Timoteo, etakmelches ma'a aptamheykha apxaka axta exchep. Nágyeyxho aksa exchep ektémakxa nak amya'a eñama keso náxop ektaha nak han mékoho, nágyeyxho nahan ma'a kélya'ásegwayam megkamámnaksoho ekxénamaxkoho nak ektaha negya'ásegwayam.

ROMANOS 1:16

Mamegkayhek ko'o axének tásek amya'a, hakte cháxa Dios apmopwána xa, yakwayam enxoho elwagkasakpok teyp apyókxoho énxet apteme nak melya'áseyam, eyeynamókxa m'a énxet'ák judíos, wokmók eyke nahan ma'a énxet'ák metnaha nak judíos.

SAN MATEO 24:36

“Méko ekya'ásegkoho ekwánxa ekhem tén han ekwánxa hora, melya'ásegkok nahan ma'a Dios apkelásenneykha apheykencha'a nak néten, mey'ásegkok nahan ma'a Dios Apketche. Wánxa apya'ásegkoho m'a Apyap.

1 SAN PEDRO 1:5

Apkeltakmelchesegkek kéxegke Dios yetlo m'a ektémakxa nak apmopwána, eñama m'a ektémakxa nak megkólya'áseyam, yakwayam enxoho kólxawak kéxegke kélwagkásamáxche teyp, cham'a aptakmelchesesama nak kéxegke Dios, cháxa peya nak hegya'asásegwók ektemegwánxa néxa ekhem xa.

2 TIMOTEO 1:18

Wese' egegkok sat yemlekxohok ma'a ekhem nelyekpelchamáxchexa sat. Apya'ásegkok xép ma'a ektahakxa axta ekyawe sẽlpasmo negko'o m'a tegma apwányam Efeso.

FILIPENSES 3:21

cham'a peya nak hegyakmagkasesek negyókxa ekmaso nak, yakwayam enxoho katnekxak negyókxa m'a ektémakxa nak apyókxa eyeymáxkoho. Elának sat Cristo xa eñama m'a apmopwána nak, cham'a apmopwána ekmowána nak kasawhekxohok eláneykha ekyókxoho aksok.

2 TIMOTEO 2:9

Elenmáxamaxkók ko'o seklegeykegkoho eñama xa tásek amya'a nak, weykmók nahan selnaktetcheso emék ekhawo kéltemésesamakxal'a énxet ekmaso aptémakxa, wánxa agkok, akke kólpextetmak ma'a Dios appeywa.

FILIPENSES 3:10

Emenyék eyke eykpelchágwomhok ko'o m'a Cristo, tén han eykpelchágwomhok agko' ma'a ektémakxa axta apmopwána apxátekhágweykmo, tén han hewatámho ko'o m'a ektémakxa axta aplegeykegkoho, tén han kaxhok sétsapma m'a ektahakxa axta apketsapma,

FILIPENSES 3:8

Mók sekxeyenma anhan. Maxneyásawok ko'o ekyókxoho aksok sekyetchásawo enxoho m'a ektémakxa nak negyekpelchágwayam Cristo Jesús Wese' ahagkok. Cristo nahan keñamak ekmassa ekyetna ko'o ekyókxoho aksok, máxa apák ektemesásak ko'o ekyókxoho aksok yakwayam enxoho atnehek Cristo énxet apagkok,

1 CORINTIOS 3:13

Wánxa agkok, tásek sat eyke katnehek ekwetamaxche ekhem nelyekpelchamáxchexa sat xa, ektémakxa nak cha'a nentamheykha, hakte yetlo táxa sat katnehek ekwa'a enxoho xa ekhem nak, táxa sat nahan keykkónek ma'a ektémakxa nak cha'a nenlané nentamheykha.

SAN JUAN 17:15

Maltamhok ko'o elwátésesek xép apheykha náxop xa énxet'ák nak, eltamhok eyke elmeyók neyseksa elenmexeykha m'a kelyekhama'.

SAN MATEO 12:21

Apxámokxoho énxet'ák sat etnahagkok melya'áseyam ma'a.”

ROMANOS 9:33

ekxeyenma nak eknaktáxésamaxche s'e: “Ekpekkenchek ko'o Sión xama meteymog, cháxa meteymog peya nak kalpelápagkasek énxet'ák xa; énxet ektahakxa enxoho apteme mey'áseyam ma'a meteymog nak, megkatnegwomek sat eyakhémo mey'áseyam.”

1 SAN PEDRO 4:16

Wánxa agkok, kéllegágkok agkok kélxama kéxegke eñama kélyetlo Cristo, kéméxchek megkólmegkayhe', wánxa aksa kóltemésesek apcheymákpoho m'a Dios eñama kélteme kélyetlo Cristo.

HEBREOS 12:2

Anlanok hana wánxa m'a Jesús, hakte cha'a keñamak magya'áseyam nak negko'o m'a, Jesús nahan apteme apteméseso ektakmela m'a magya'áseyam nak negko'o. Aplegágkók axta Jesús néten aksok ektegyéso, axta yenmexmók Jesús ma'a nétsapma segmegkasamo nak, hakte apya'ásegkok axta peya étak ekpayheykekxa apwáxok natámen aplegeykegkoho apketsapma; aphákxeyk axta anhan ma'a ekpayhókxa nak nelya'asamakxa nekha Dios aptaháno.

HEBREOS 2:18

kaxwo' apwanchek epasmok Jesús ma'a énxet ektahakxa enxoho ekyekkónma, hakte aplegeykegkók axta nahan ma'a, yekkónmeyk axta nahan.

1 TESALONICENSES 2:16

Negmokók agkok cha'a negko'o óltennasha amya'a eñama Dios ma'a énxet'ák metnaha nak judíos yakwayam enxoho nahan elwagkasakpok teyp, wánxa agkok, meheghók eyke cha'a énxet'ák judíos. Cháxa ektahakxa nak ekyeykhágwokmoho apteme melya'asáxma xa. Kaxwo' eyke, wa'ak yakwayam ellegásesagkohok ekmaso agko' Dios xa énxet'ák nak.

FILIPENSES 1:20

Awanhek ko'o sekmámenyého megyohok Dios amok sekmegkakto wánxa agkok, ewanchek sat eyke ko'o altennaha apwesey yetlo meyke ektamheykha ewáxok nápakta'awo' ma'a apxámokxoho énxet'ák nak. Ko'o sat makham kañék ekwetamaxche cha'a m'a ektémakxa nak ekyawe apmopwána Cristo, ekhawo m'a sektémakxa axta cha'a, megkeyxek ma'a sétsapa enxoho, esenhan ma'a magwatsapa enxoho.

LOS HECHOS 21:13

Wánxa agkok, aptahak axta segátegmowágko Pablo s'e: —¿Yaksak ektaha kéllekxagweyncha'a nak, tén han sellapwagkasa ko'o? Háwe ekwánxa agkok sekmakawo ko'o helnaktetchesek emék, ekmakawók nahan watsapok ma'a tegma apwányam Jerusalén eñama sekyetlo ko'o Wese' egegkok Jesús.

LOS HECHOS 13:50

Wánxa agkok, apkelpakhetcháseykpók axta eyke énxet'ák judíos ma'a kelán'ák elpéwomo axta eltémakxa nápakto' Dios, cham'a kelán'ák kelwese'e nak, apkelpakhetcháseykpók axta nahan énxet'ák judíos ma'a kelwese'e nak tegma apwányam, apkelyáteyagkók axta apkeltamho kólmenxenmakha Pablo tén han Bernabé, yakwayam enxoho kólántekkesek xa yókxexma nak.

LOS HECHOS 13:46

Apkeltennáha axta Pablo yetlo megyeye, tén han ma'a Bernabé. Aptahak axta apchátegmowágko s'e: —Neganeyaxcheyk axta negko'o anlegaksek kéxegke amya'a eñama nak Dios, kéxegke kéltaha nak énxet'ák judíos, wánxa agkok sat eyke kaxwo' ampehewakxak negko'o m'a énxet'ák metnaha nak judíos, hakte megkólmenyék kéxegke amya'a eñama nak Dios, megkaxénak nahan kélwáxok ekpayhawo yakwayam kólxawak kéxegke m'a ekyennakte egnenyek megkatnegwayam enéxa nak.

LOS HECHOS 9:16

Axekmósek sat ko'o yakwánxa katnehek ekyawe aplegeykegkoho m'a énxet nak, ko'o eñamakxa.”

LOS HECHOS 7:59

Neyseksa kélyetné meteymog axta aptahak nempeywa nelmaxnagko Esteban. Aptahak axta s'e: “Wese' Jesús, ema ko'o ehagák.”

SAN JUAN 6:44

Méko kawának hey'ótak ko'o mehentegkásento enxoho m'a Táta aptaha axta seyáphaso ko'o; axátekhásók sat ko'o ektemegwokmo sat néxa ekhem.

SAN LUCAS 23:46

Aptahak axta Jesús apyennaktésawo appeywa s'e: —¡Táta, eltamhok ko'o emok xép ehagak! Xama axta aptaha appeywa xa, keñe axta apketsapa.

1 TESALONICENSES 5:4

Elyáxeg, akke kólháha kéxegke neyseksa ekyaktesóxma, ékeso eñamakxa peya nak metaxnegwátamok Wese' egegkok ektémol'a kóltaxnegwakxohok apmenyexma, cham'a ekwokmo sat ekhem apweyktamxa Wese' egegkok.

SAN LUCAS 10:12

Eltennásek ko'o kéxegke peya kasagkohok agko' kéllegasáseykegkoho xa énxet'ák nak, cham'a ekhem nelyekpelchamáxchexa sat, megkaxók sat ma'a ekwánxa axta kéllegasáseykegkoho énxet'ák apheykha axta Sodoma.

SAN MATEO 7:22

Apxámok sat énxet etnehek heyának ekhem nelyekpelchamáxchexa sat se'e: ‘Wese', Wese' ahagkok, neltenneykha axta cha'a negko'o apwesey exchep, nelántekkesegkek axta negko'o kelyekhama' eñama apwesey exchep, nenláneyak axta nahan aksok sempelakkaso nak agweta' eñama apwesey exchep.’

1 CORINTIOS 1:8

Dios sat elyennaktésesek kéxegke kélteme megkólya'áseyam ekwokmoho ektemegwánxa néxa ekhem, yakwayam enxoho megkólxénchásekxók kéltémakxa kéxegke apwakto sat Jesucristo Wese' egegkok.

2 TIMOTEO 1:14

Etakmelches xép ma'a nelxekmowásamáxche ektakmela apxaka axta exchep eñama apméso Dios, yetlo appasmo Espíritu Santo apha nak egwáxok negko'o.

2 TIMOTEO 1:16

Emenyék ko'o meyakmagkásekxék Wese' egegkok aptamhágkaxa m'a apheykha nak Onesíforo apxagkok, hakte hepeykesásekxohok axta cha'a ewáxok, axta emegkaktók selhéseykmo ko'o sẽlpextétamakxa.

TITO 3:8

Ekmámnaksoho agko' xa, emenyék ko'o elenxanmohok apxeyenma exchep xa, yakwayam enxoho elanagkok apkeltamheykha ektakmela m'a énxet'ák apteme nak melya'áseyam Dios. Cháxa ektaha nak nentamheykha ektakmela xa, awanchek nahan hempasmok negyókxoho nak.