1 CORINTIOS 4:5 - Lengua Sur (Enxet) Nuevo Testamento

⁵ Nágkólteme aksa kélyekpelchémo kélmók kéxegke amonye ekwayam ekhem nelyekpelchamáxchexa; kólleyx ewata' Wese' egegkok, kólleyx nahan enegkenekxak neyseksa elseyexma m'a aksok ekhágko nak neyseksa ekyaktesakxaxma, kólleyx nahan elyekpelchásesók kéxegke ektémakxa nak ekmámenyého kalának egwáxok. Keñe sat egkések ekpayheykekxa apwáxok Dios apyókxoho énxet ekpayhawo nak exkak xa.

1 CORINTIOS 4:5 Referans Kwoze

SANTIAGO 5:7

Elyáxeg kólteme kéxegke megkólpekhésamaxche, ekwokmoho apkexyekmo Wese' egegkok. Enxet apkelané nak namyep, eleyxek aksa yetlo mepekhésamap ekwokmoho ekwakto mámeye, yeyk'ak agkok ma'a émha amonye ekmámeyekxal'a, keñe étak ektakmela apnakxo ekyexna.

2 CORINTIOS 5:10

Hakte negyókxoho sat ólmahagkok ma'a segyekpelchémókxa nak Cristo, yakwayam enxoho exkak cha'a enxama m'a aksok ekpehewayam nak yakwayam exka', cham'a ektahakxa enxoho apkelané aksok ektakmela esenhan ma'a ektahakxa enxoho apkelané aksok ekmaso neyseksa meyamasma axta m'a ektémakxa nak apyókxa.

1 CORINTIOS 3:13

Wánxa agkok, tásek sat eyke katnehek ekwetamaxche ekhem nelyekpelchamáxchexa sat xa, ektémakxa nak cha'a nentamheykha, hakte yetlo táxa sat katnehek ekwa'a enxoho xa ekhem nak, táxa sat nahan keykkónek ma'a ektémakxa nak cha'a nenlané nentamheykha.

HEBREOS 4:13

Yawanchek keyxánegkesek Dios ekyókxoho aksok ektaha axta apkelané, yáxñakxoho nahan katnehek apweté ekyókxoho aksok ma'a Dios, cham'a peya nak óltennásekxohok nentémakxa axta.

2 CORINTIOS 10:18

Hakte háwe énxet eyeymáxkoho appeywa exénakpekxoho apagko' ma'a ekpayhawo nak kalkohok kélwáxok aptémakxa, akke m'a énxet apxeyenma nak Dios aptaha ektakmela aptémakxa.

ROMANOS 2:16

cham'a ekhem yakwánxa sat etnehek apkelyekpelchémo Dios yetlo apchásenneykekxa Jesucristo m'a aksok appósamo nak énxet'ák, ekhawo ektémakxa nak seltenneykha cha'a ko'o tásek amya'a.

ROMANOS 2:1

Ekeso eñamakxa megkeytna exchep yakwánxa etnehek appeywa yátegmowagkok amya'a apxénamap, megkeyxek ma'a aptémakxa enxoho exchep, aptaha nak cha'a apyekpelchémo aptémakxa pók. Aptemék agkok cha'a exchep apyekpelchémo pók, apsexnánémap apagko' etnehek xép xa, hakte kaxhok xép xa apkelané aksok ma'a ektémakxa nak apkeláneyak énxet'ák.

APOCALIPSIS 20:12

Ekwet'ak axta ko'o apchakneyncha'a amonye ekyetnakxa taháno ektakmalma énxet'ák apkeletsapma axta, cham'a meyke kéláyo nak tén han ma'a ekyawe kéláyo nak. Kélmeykásegkek axta weykcha'áhak, axta anhan kélmeykásak ma'a mók weykcha'áhak eknaktáxésamaxchexa nak apkelwesey m'a peya nak elxawagkok ekyennakte apnenya'ák. Kéltemék axta sekxo' kélyekpelchémo énxet'ák, cham'a ektémakxa enxoho aksok apkeláneyak, keñe axta anhan kéltaha kélyekpelchémo m'a ektémakxa nak ekyetno weykcha'áhak eknaktáxésamaxche apkeltémakxa xa énxet'ák ektaha axta apkeletsapma.

1 SAN PEDRO 1:7

Hakte máxa sawo ekyátekto elyenma ekmomnáwa m'a ektémakxa nak megkólya'áseyam kéxegke: kéméxchek sekxo' kólyekkónek ma'a ektémakxa nak megkólya'áseyam, ektémol'a sawo ekyátekto elyenma ekmomnáwa kólyekkónek kólyenyók neyseksa táxa. Magya'áseyam elenmáxamáxkohol'a ektémakxa segyekkónma, yeykhágweykmók ma'a ekwánxa nak ekmomnáwa sawo ekyátekto elyenma étsagkasamáxkohol'a. Temegkek agkok ekyekkónamaxche megkólya'áseyam kéxegke xa ektaha nak, kalkohok sat kélwáxok kéltahakxa kéxegke, kóltemésesek sat kéleymáxkoho kéxegke, tásek sat nahan katnehek kélxénamaxche, cham'a senxekmowáseykpoho sat Jesucristo.

ROMANOS 2:29

Akke ekteme ekmámnaksoho nenteme judío m'a ekweykmoho nak kaño' agko' egwáxok, kélkahásek agkok apyempehek xama énxet, kawomhok nahan kaño' agko' apwáxok: háwe ektekkeso weykcha'áhak eknaktáxésamaxche xa, Espíritu eyke aptekkeso. Enxet ekyetnakxa enxoho xa kélkahaso ekweykmoho nak kaño' agko' apwáxok, kalkohok apwáxok Dios aptahakxa, keñe megkalchehek apwáxók ma'a énxet'ák.

2 CORINTIOS 4:2

Negyenyókek axta negko'o m'a aksok segmegkasamo apkelyexamakpoho axta cha'a apkeláneykegko énxet; manlanak nahan cha'a yetlo negmáheyo ólyexanchesha egnámokkok, Magyetnakháseykmok nahan cha'a m'a ektémakxa nak Dios appeywa. Wánxa agkok, ekmámnaksoho eyke nentémakxa nak cha'a negko'o nempeywa, cháxa ektahakxa nak cha'a ektakmela ekxeyenma apwáxók negko'o énxet'ák nápakto' Dios xa ektaha nak.

ROMANOS 14:4

¿Yaksak apkenagkama etnahak xep apmoko nak ématchesha pók wese' apkeláneykha? Tásek agkok aksok apkelané esenhan ma'a eyesagko enxoho aksok apkelané, wese' apagkok aksa ey'asagkoho'. Wánxa agkok, kalkohok sat eyke apwáxok Wese' apagkok, hakte yetneyk apmopwána Wese' egegkok etnésesek apchásekhayo wese' apagkok xa apkeláneykha nak.

SAN JUAN 5:44

Kélmenyék agkok cha'a kéxegke kóltehek kéláyo kélmók, ¿háxko katnehek heltehek mehelya'áseyam ko'o, megkólchetama enxoho m'a ektakmela senxeyenma nak Dios aptaha nak wánxa xama?

SANTIAGO 4:11

Elyáxeg, nágkólxén ekmaso kélmók. Hakte negko'o ektahakxa enxoho nenxeyenma ekmaso egyáxeg, esenhan nentaha enxoho negyekpelchémo, sagkek katnehek nenxeyenma m'a eltémókxa nak antehek segánamakxa, antehek nahan nenyekpelchémo m'a segánamakxa. Aptemék agkok xép apyekpelchémo m'a eltémókxa nak antehek segánamakxa, aptemesásamákpoho apagko' etnehek xép apyekpelchémo m'a segánamakxa, yakwayam nak eykhe etnehek apkelyaheykekxoho exchep.

SAN LUCAS 6:37

“Nágkólteme aksa kélyekpelchémo aptémakxa kélmók, keñe sat metnehek apyekpelchémo Dios kéltémakxa kéxegke, Nágkolána aksa kólegásesagkohok kélmók keñe sat mellegásesagkok kéxegke Dios. Nágkólyakmagkásekxa aksa aptemésesakxa kélmók, keñe sat meyakmagkásekxék kéltémakxa kéxegke Dios.

SAN MATEO 24:46

Apkeleñémo agko' énxet kélásenneykha apwetágweykxo enxoho wese' apagkok apkelana m'a apkeltamhókxa axta elána'.

APOCALIPSIS 1:7

Apkexyekmek sat agkok Cristo neyseksa yaphopé, apyókxoho énxet sat éta', kammohok sat apweté m'a ektaha axta apkelyetxakxo; apxámokxoho énxet'ák sat kallapwomagkok apheykha nak keso náxop, ellekxagwaha sat nahan, Cristo eñamakxa. Nakso', katnehek sat.

1 SAN PEDRO 5:4

Kéltemék agkok xa, kólxawak sat kéxegke aksok kélxawé naksa ekha nak eyeymáxkoho, cham'a aksok nenxawé naksa ektaha nak megkatsagkásamáxche, cham'a senxekmowáseykpoho sat ma'a aptaha nak apkemha apmonye keláneykha nekkések.

1 TESALONICENSES 5:2

Kélya'ásegkok ektakmela kéxegke yakwánxa nak katnehek apweykta Wese' egegkok, ewatak sat neyseksa megkólhaxneykha, ekhawo ektémakxal'a énxet apmenyexma ewak axta'a.

SAN JUAN 21:22

Aptahak axta apchátegmowágko Jesús se'e: —Emenyék agkok ko'o elenxanmohok makham apha xa énxet nak ekwokmoho sekwakto makham ko'o, ¿yaksak ektaha apkeltamho nak ey'asagkohok? Hetlawha exchep.

2 SAN PEDRO 3:4

Sat etnehek apkelmaxneyeykha s'e: “¿Háxko ektahakxa m'a appekkeneykekxo axta appeywa Cristo apxeyenma ewatak makham? Apkeletsepmeyk ma'a ẽlyepmeyk nano', makhemek makham ekteme m'a ektémakxa axta sekxo' elánamáxko keso náxop.”

SAN MATEO 25:23

Aptahak axta apcháneya wese' apagkok se'e: ‘Takmelakxoho, xép aptaha seláneykha ektakmela aptémakxa, apteme nahan meyenseyam aptamheykha; axámaseshok sat kaxwo' selméso exchep selyakye yakwayam heltakmelchesesek, hakte aptakmelchesek axta m'a selyakye étkok sekmésa axta exchep. Etex kañe', kalpayhekxak sat egwáxok.’

SAN JUDAS 1:14

Apxeyenmék axta anhan Enoc, aptaha axta siete Adán aptáwen neptámen xa, cham'a apxeyenma axta amya'a eñama Dios, aptéma axta apxeyenma énxet'ák se'e: “Ekwet'ak axta ko'o Wese' egegkok apxegakmo yetlo apxámokma apagko' apkelásenneykha apkeleñama néten,

2 SAN PEDRO 3:12

Kólleyx kéxegke kammok ekhem apxeyenmakxa nak Dios, kóllenxanmoho cha'a yakwayam enxoho kañehémhok kawak xa ekhem nak. Táxa sat kamasesók néten ekwa'a sat xa ekhem nak, ekyókxoho aksok sat kalpayhekxak neyseksa táxa eyálewe;

1 CORINTIOS 15:23

Wánxa agkok, enxama sat eyke cha'a hẽlxátekhásók sempehewákxexa enxoho, Cristo eyke sekxo' apmonye kélxátekháseyam, keñe sat apkexyekmo enxoho Cristo, enakxétekhágwók sat nahan ma'a ektaha nak Cristo énxet'ák apagkok,

1 CORINTIOS 11:26

Kéltokagkek agkok cha'a s'e pan nak tén han kélyenágko enxoho cha'a s'e aksok kélyeta nak egheykok, kéllegásek kéxegke m'a apketsapma axta Wese' egegkok, ekwokmoho m'a apkexyekmo sat makham.

1 CORINTIOS 1:7

Ekeso eñamakxa eksawhexkoho nak ekyetna kéxegke m'a kélmowána Dios apméso nak, neyseksa kélhaxanma ekhem yakwánxa nak ewatak Jesucristo Wese' egegkok.

ROMANOS 2:7

Egkések sat Dios ekyennakte apnenyek megkatnegwayam enéxa m'a énxet'ák meyenseykmo axta apkeláneyak ma'a ekpayhawo nak anlána', cham'a apketamsama axta negeymáxkoho eñama nak Dios, tén han apketamsama m'a yakwayam nak etnésesek Dios ekha kéláyo, tén han apketamsama m'a mótsapma nak;

SAN MATEO 24:30

Keñe sat kataxchek néten aksok magkenatcheso apkexyeyam ma'a aptaha nak Apketche énxet, elyegweyk sat apyókxoho énxet apheykha nak keso náxop, ellekxagwaha sat nahan, étak sat nahan exyók néten neyseksa yaphopé m'a aptaha nak Apketche énxet, yetlo ekyawe apmopwána tén han apcheymákpoho.

1 CORINTIOS 3:8

Aphawók eyke pók ma'a énxet ektaha nak apkeneykekxa, tén han ma'a ektaha nak apkexpakhéyak yegmen aksok kélcheneykekxa. Dios sat egkések ekyanmaga xa ektémakxa nak apkeltamheykha.

SAN MATEO 25:21

Aptahak axta apcháneya wese' apagkok se'e: ‘Takmelakxoho, xép aptaha seláneykha ektakmela aptémakxa apteme nahan meyenseyam aptamheykha; axámaseshok sat kaxwo' selméso exchep selyakye yakwayam heltakmelchesesek, hakte aptakmelchesek axta m'a selyakye étkok sekmésa axta exchep. Etex kañe', kalpayhekxak sat egwáxok.’

SAN MATEO 10:26

“Nágkólé' aksa kéxegke énxet. Ekyókxoho aksok ekyexamaxche nak keyphogwatámhok sat, kólya'ásegwomhok sat nahan ma'a aksok ekpowásamáxkoho nak.

SAN JUAN 21:23

Ekeso eñamakxa ekpayhekxo axta amya'a nepyeseksa énxet'ák eyánemaxko megyetsepek ma'a énxet nak. Axta eyke exénak Jesús peya megyetsepe', axta eyke aptahak appeywa s'e: “Emenyék agkok ko'o elenxanmohok makham apha xa énxet nak ekwokmoho sekwakto makham ko'o, ¿yaksak ektaha apkeltamho nak ey'asagkoho?”

1 CORINTIOS 3:14

Apkelanak agkok enxama tegma megkamopwána nak emyetek, exkak sat ekyanmaga.

1 CORINTIOS 11:16

Apmokók agkok nahan exének énxet mók amya'a eñama nak xa, kéméxchek ey'asagkohok magya'ásegko negko'o m'a mók apkeltémakxa nak énxet, tén han melya'ásegko m'a Dios énxet'ák apagkok nak.

SANTIAGO 5:9

Elyáxeg, nágkólpakmésmakha aksa kóllának kélmók, yakwayam enxoho mékpelchásesók kéxegke Dios, hakte apwa'ak ma'a Dios aptaha nak segyekpelchémo, nekha átog apkenegwa'ak.

2 CORINTIOS 10:9

Momenyék ko'o kaxének kélwáxok sekmoko alyegwakkasek kéxegke ektahakxa nak sektáxéseso weykcha'áhak.