1 CORINTIOS 1:21 - Lengua Sur (Enxet) Nuevo Testamento

²¹ Dios, aptaha nak ekha apya'áseykegkoho, apkeltamhok axta mékpelchehek Dios énxet'ák apheykha keso náxop eñama m'a apkelya'áseykegkoho apancha'awo nak; xénchek axta eyke apwáxok elwagkasek teyp ma'a énxet'ák apteme nak apcháyo eñama m'a appeywa nak, neyseksók eykhe eyánemaxche amya'a ekyéháxma xa amya'a nak.

1 CORINTIOS 1:21 Referans Kwoze

SAN LUCAS 10:21

Yetlókók axta ekpayheykekxa agko' apwáxok Jesús eñama apméso m'a Espíritu Santo. Aptahak axta s'e: “Ektemésesek ko'o exchep apcheymákpoho Táta aptaha nak Wese' néten tén han Wese' keso náxop, hakte apxekmósek xép aksok ma'a énxet'ák ekmasextoho nak makham apkelya'áseyak, cham'a aksok mexekmósama axta exchep ma'a énxet'ák ekha nak apkelmopwána, tén han ma'a ekha nak apkelya'áseyak. Nakso' Táta, cháxa apkepmenyého axta katnehek xép xa.

SAN MATEO 11:25

Keñe axta aptaha anhan appeywa Jesús se'e: “Eltemésesek ko'o apcheymákpoho exchep Táta aptaha nak Wese' néten, tén han Wese' keso náxop, hakte apxekmósek xép aksok ma'a énxet'ák ekmasextoho nak makham apkelya'áseyak, cham'a aksok mexekmósama axta exchep ma'a énxet'ák ekha nak apkelmopwána, tén han ma'a ekha nak apkelya'áseyak.

EFESIOS 3:10

Temegkek axta xa yakwayam enxoho elya'ásegwók ekyókxoho ektémakxa apya'áseykegkoho Dios ma'a, Dios apkelásenneykha ekha nak apkelmopwancha'a, tén han ma'a ekha nak kélyaheykekxoho m'a néten eñama apxekmóso m'a Dios énxet'ák apagkok nak.

1 CORINTIOS 1:24

Keñe m'a énxet'ák ektaha nak apkelwóneykha Dios, aptemésesama Mesías apxekmóso Dios apmopwána, tén han ma'a ektémakxa nak han apya'áseykegkoho Dios, nepyeseksa énxet'ák judíos esenhan nepyeseksa m'a énxet'ák metnaha nak judíos.

ROMANOS 1:28

Mopmenyék elyekpelkohok Dios xa énxet'ák nak. Ekeso eñamakxa apkexaya axta aksa Dios yakwayam kayeykhágwomhok ekmaso elchetamso apwáxók, yakwayam enxoho anhan elanagkok ma'a aksok megkeyméxko nak anlána'.

ROMANOS 11:33

¡Xámok agko' aksok eltakmela eleñama nak Dios, magwanchek agya'asagkohok ekwánxa, tén han ma'a ektémakxa nak apya'áseykegkoho, cham'a ektémakxa nak han ekha apyekpelchémo, méko kawának kaxének ektémakxa enxoho aksok apmáheyo elának, méko nahan keykpelkohok apmáheyókxa nak etnehek!

SAN LUCAS 12:32

“Nágkólé' aksa kéxegke kéltaha nak seknaktóso nekkések; kélkántawók eykhe kéxegke, wánxa agkok, apmokók eyke egkések kéxegke aptémakxa nak Wese' apwányam ma'a Dios, aptaha nak Kélyap, eñama m'a apkelásekhayo nak.

SAN JUAN 12:31

Peyk kaxwo' kóltehek kélyekpelchémo apyókxoho énxet apheykha nak keso náxop, peyk nahan kaxwo' kóltekkesek ektéma nak wese' keso náxop.

1 CORINTIOS 1:18

Yának cha'a amya'a ekyéháxma kéltenneykha apketsapma axta Cristo néten aksok ektegyéso m'a énxet'ák apkelmahágko nak yakwánxa kólmasésók; wánxa agkok, negya'ásegkok eyke negko'o ektaha eñama Dios apmopwána xa amya'a nak, negko'o peya nak ólwagkasaxchek teyp.

1 CORINTIOS 1:23

Wánxa agkok, nenlegásek eyke negko'o m'a Mesías kélyepetchesama axta aksok ektegyéso. Cháxa ellókasa nak cha'a énxet'ák judíos xa, keñe m'a énxet'ák metnaha nak Judíos apkenagkama cha'a ekyéháxma neltenneykha;

1 CORINTIOS 1:25

Hakte aksok aptemésesamol'a Dios máxa ekyéháxma elanok énxet apheykha nak keso náxop, cháxa ektaha ekyeykhágweykmoho agko' ektémakxa nak apkelya'ásegwayam énxet keso náxop; keñe m'a aptemésesamol'a Dios máxa meyke ekyennakte, cháxa aksok ektaha ekyennakte agko' megkaxnawok ma'a ekwánxal'a apkelyennakte énxet keso náxop.

1 CORINTIOS 1:27

Apkelyésáha axta Dios énxet'ák apkelánémakpo nak elyéháxma keso náxop, yakwayam enxoho egkések apkelmegkakto m'a énxet'ák ekha nak apkelya'áseyak; apkelyésáha axta anhan Dios ma'a énxet'ák apkelánémakpo nak etnahak mékoho keso náxop, yakwayam egkések apkelmegkakto m'a énxet'ák apkelyennakte nak.

1 CORINTIOS 2:14

Enxet meyke nak apwáxok Espíritu megkamhek apwáxok aksok eleñama nak ma'a Espíritu apkeñama nak Dios, hakte ekyéháxma yána'. Mopwanchek nahan ey'ásegwomho', hakte Espíritu aksa cha'a etnehek apyekpelchémo xa.

1 CORINTIOS 4:10

Cristo keñamak nelánémaxko negko'o antahak sẽlyéháxma; keñe kéxegke kelánémaxko kaxnak kélya'áseyak, Cristo eñamakxa. Negko'o nenteme nelyelkamáxkoho, keñe kéxegke kélteme ekha kélyennakte. Mólasekhaxchék cha'a negko'o, keñe kéxegke apchekawo cha'a énxet.

1 CORINTIOS 6:2

¿Enxeykel'a kólya'ásegkok kéxegke Dios énxet'ák apagkok peya etnehek apyekpelchémo keso náxop? Peyk agkok kóltehek kéxegke kélyekpelchémo ektémakxa nak keso náxop, ¿yaksak ektaha megkólewagko nak kólyekpelkohok aksok ektaha nak ketsék agko'?

1 CORINTIOS 11:32

Enlegasásegkok agkok cha'a negko'o Wese' egegkok, yakwayam hẽltameyagkok eyke, keñe anhan mantehek nelsexnánémaxche xamo' ma'a énxet'ák apheykha nak keso náxop.

GÁLATAS 1:15

Wánxa agkok, Dios axta eyke selyéseykha ko'o amonye sekteyam, ewóneykha axta anhan eñama ekyawe seyásekhayo. Exekmósek axta Apketche, cham'a ekwokmo axta yakwánxa hexekmósek, yakwayam enxoho ko'o altennaha tásek amya'a nepyeseksa énxet'ák metnaha nak judíos. Axta ay'áyekmok xama énxet enxoho yakwayam heltennasagkohok ektémakxa;

GÁLATAS 4:8

Kelmomchek axta kéxegke aksok ekha elmowancha'a ekheyásamáxkoho nak dios, cham'a megkólya'áseykegkaxa axta Dios.

EFESIOS 1:9

Egya'asásegwokmek axta anhan ma'a ektémakxa nak apmopmenyého elána' ektaha nak ekpowásamáxkoho, cham'a apkeláneykekxa apagko' axta apmáheyo elána'.

COLOSENSES 1:19

Hakte leyawók axta apwáxok Dios keytek Cristo m'a ekyókxoho aptémakxa nak Dios.

HEBREOS 1:14

Hakte apyókxoho Dios apkelásenneykha apteme apkeleñamakxa apagko' ma'a néten, yakwayam enxoho elyahakxohok Dios, kóláphaksohok nahan cha'a yakwayam epasmok ma'a énxet'ák ektaha nak kélpagkancheso yakwayam elwagkasakpok teyp.

HEBREOS 2:3

¿Háxko sat antehek ólegketaxchek negko'o mantakmelchesa enxoho m'a nelwagkásamáxche teyp ektaha nak ektakmela agko'? Wese' egegkok Jesús apagko' axta ektaha aplegaso apmonye xa nelwagkásamáxche teyp nak, axta senxekmóso negko'o ektaha ekmámnaksoho m'a énxet'ák ektaha axta apkellegé.

HEBREOS 7:25

Ekeso eñamakxa apkepwagko nak Jesús elwagkasek teyp megkatnegwayam enéxa m'a énxet'ák apkelya'eykekxa nak Dios eñama m'a Jesús, hakte apheyk makham ma'a yakwayam enxoho yának epasmok Dios xa énxet'ák nak.

SANTIAGO 4:4

Kéxegke kéltaha nak kélyenseyam kélyetlo Dios, ¿yagkólya'ásegkok kéxegke ektaha enmexma Dios ma'a negásekhayo nak aksok keso náxop? Negko'o ektahakxa enxoho negmáheyo agásekhohok ektémakxa nak keso náxop, nenmexma antemekxak ma'a Dios.

SANTIAGO 5:15

Kélmaxnakkek agkok yetlo megkólya'áseyam, etakmelwók ma'a ektaha apháxamap. Wese' egegkok exneyásekxak néten; apkeláneyak agkok nahan mey'asáxma m'a ektahakxa enxoho apháxamap, megkólyakmagkásekxék sat eyke m'a ektémakxa nak mey'asáxma.

SANTIAGO 5:20

kólya'ásegwomho kéxegke m'a énxet ektahakxa enxoho apyakmagkaseso apwáxok pók ektahakxa enxoho apkelané m'a aptémakxa ekmaso nak, ewagkasek teyp yakwayam eykhe yetsapok xa énxet mey'asáxma nak, yának nahan meyakmagkásekxék Dios ma'a ektémakxa nak melya'asáxma énxet'ák.