Yesaia 14:1 - Katɔti Ɔku Kedee

¹ Unwoti ɔdubo Israelƒuɔ kɔnyana bɔnu, na ɔsɔ ɔƒuna-ma, na ɔsɔku-ma utésie bana keliekɔ na bana kalɔ lɛlɔ. Baƒɔ badubɔsalaku-ma na bablaku Israelƒuɔ unwi.

Yesaia 14:1 Referans Kwoze

Kɔgya 102:13

Adubɔnu Sion kɔnyana ɔƒɛni amu. Ɔsika uwi ɔmmɔ údu na anwu na ɔdi mɛni.

Sakaria 1:17

Líse kenye lɛnɔ ka ala adubɔsɔ atɛku mina lɛma lɛmmɔ. Na Yerusalem ɔsɔ unwini mina ɔma ɔƒunadi, na lɛsia mina ɔma kedee ɔmmɔ bekyuli kɔnu.

Malakai 1:11

Ɔ́si ɔƒɛ katukɔ útédu ɔƒɛ kanukɔ ni, bekyuli badubumwi-mi lɛnyi na bakyula oloƒui na kadi biala bekyuli akɔ na kalɔ lɛlɔ, na badubɔbla akpala ani námanku bete-mi.

Yeremia 50:33

“Babilonƒuɔ bábla Israel ku Yuda kalala. Bɛ́kpanku-ma bɛ́tɔlɔku aani bekyuli beƒiedi na bíni bɛnii bɛɛɛdubo-ma kuƒi bute na benwini batɔlɔ.

Yesaia 49:13

Bɛsu katɔ ku kalɔ bɛnii beteedie lɛnu na bataatɔ ku ebiti. Na bibo ɔda bite abi ammɔ lɛnɔ ƒui bɛnii ama lɛnɔ bebunku na beteedie lɛnu. Ɔsika Unwoti bekyuli bébo abi nsu ɔƒɛni amu ɔ́nu-ma kɔnyana na ɔ́yala-ma kɔƒɔ.

Yeremia 29:14

Bina bɔkpa bɔdubɔyɔ-mi kaƒɔ, na ndubɔsala-mii ƒui lɛsiku lɛkɔkɔ lɛni kemmo na bɛkya na kadi bekyuli bani akɔ na lɛ́bɔku-mii ńtákya lɛsɔku liboku Yerusalem.

Yesaia 66:20

Na badubɔlɛku bina banwani bɔsiku kadi bekyuli ƒui kɔlɔ lɛlɔ beboku ami Unwoti aani akpala kalɛ na Yerusalem. Na badubulie bapɔnkɔ ku bebuo ala betine ku kɛɛkɛ lidu lidu ku bebuo ala betine ku keƒu lɛlɔ bebo. Badubo-ma bɔkpanku buboku aani kalɛ na Israelƒuɔ beeti bana kakpa edula etela taakya akyami ani na bédie bése sɛsɛɛ úte emeyi amɛni udu kemmo teeboku-mi na mina kakpakɔ.

Yesaia 49:7

Ɔmmɔ kama ni, Unwoti ɔni ndi Israel Katɔti Kedee ɔni lɛnɔ ndi bana ngba ɔƒɔne ɔ́su nwuna kabla ɔblane ɔni na bekyuli béni na beekisi-nwu kpakplaa ɔsu na únwini ɔɔbla-ma kabla ɔnini, “Baga badubɔnu-ɔ na bata benye na bagabi badubɔnu-ɔ na bakya-a lili kalɔ, ɔsika ami Israel Unwoti Kede ɔni náƒuna-a mɔɔdi mina litemi lɛlɔ.

Yesaia 44:1

“Israelƒuɔ, binu, ami náƒuna-mii aani mina kabla bablane.

Yesaia 41:8

“Nsu awɔ Israel, Yakob kaba, adi mina kabla ɔblane. Lɛ́ƒuna-mii na bɛdi mina ɔkpana Abraham kaba kemmo bebi.

Yesaia 27:6

Uwi ɔdubo ɔni mina kadi bekyuli badubo ligyiitu budie na Israel kadi bamɛni badubo bɔta na bedie evete na banwu ebi pii beyile kayawi.

Kɔgya 143:12

Ɔkɛnku kalɛ na aayɔ́-mi uwi biala ɔsu ni, yila mina bekisine ƒui udu. Ɔsika ƒula kabla ɔblane na ndi.

Kɔgya 98:3

Ɔ́sia nwuna litemi kama siin úte Israel kadi bekyuli na ɔɔyɔ́-ma uwi ndi uwi. Na kayawi bekyuli ƒui bánu na kesi kesii kalɛ ubo ɔyikun na ɔɔƒɔ́ bekyuli.

Ester 8:17

Na geen geen na kɔlɛkɛ kɔmmɔ lɛma linengudi ƒui kemmo ni, Yudaƒuɔ badi limeyi ku ebiti geen na kadi bamba bekyuli badi muedi béti lɛlɔ bénwini Yudaƒuɔ, ɔsika baayia-ma geen.

Luka 2:32

Ɔdi bukeye bɔni ndubudie ƒula lɛyɔla keyi ute bekyuli bani naaadi Yudaƒuɔ. Na ɔdubuti ɔbu uboku ƒula kadi bekyuli Israelƒuɔ akɔ.”

Luka 1:54

Nwuna anumi asia kenye kani na ɔ́su bula bati kuuku úse lɛlɔ, na úbo ɔnii ubebunku Israel kadi bekyuli ƒui.

Yesaia 41:9

Lɛ́kpanku-mii lɛ́siku kalɔ ɔgyu na kana kɔkunɔ ƒui líboku mɛni na lɛ́su-mii nnini, ‘Amii ndi mina kabla bablane baƒunadi na ńteni-mii.’

Yesaia 45:14

“Egyipteƒuɔ ku Kusƒuɔ ku Sebaƒuɔ bani nákuku kangya kangya mmɔ akɛla adubunwini amii adi. Na badubunwini bina kabla bablane na bibo-ma kɔgba bɛda bitaavinku na basiaku-mii kama. Badubɔkya lili kalɔ bete-mii na bevele-mii basu banini, ‘Sɔsɔ na ɔdi ka Katɔti ɔsiaku-mii na anwu lɛti lɛnɔ ndi Katɔti ɔmmɔ.’ ”

Yesaia 49:10

Na kɔka iye utukwɛ ulada-ma. Na ɔƒɛ ku kalɔ kakwiidi liwulu lilekeyi-ma. Mmomu anwu ɔni mɔɔnu-ma kɔnyana na ɔɔgyumana-ma ɔdubɔtɔnku-ma usienku kesii kani na abiɔ ntu bɔbuni bɔkya.

Yesaia 49:15

Nsu Unwoti údie kenye ɔnini, “Ubi uni ɔdi ɔdubɔkana na ɔyiƒala ubi ɔni nányimi-nwu lɛnyii? Munuu ɔdubuni na uláyɔ ubi ɔni nálɛ ɔ́si-nwu lɛlɔ kemmo? Ina ubi uni ɔdi ɔdubɔbla lɛni ni, ami lɛɛɛdubo-mii bɔyiƒala kudii.

Yesaia 49:25

Nsu Unwoti úse-bu kenye ka ɔdubukpo ute-bu na ɔƒɔ bula bebi ɔsiku bekyuli bekpidi bani ndi bula bekisine bayikune bani mbo kalala mmɔ enu kemmo.

Yesaia 54:3

Amii ku bina bawɔ ndubɔƒɔ kadi bamba bekyuli bammɔ kɔlɔ, na kunwini bina kɔdi. Na bana lɛma lɛni nábwɛ mmɔ linwini bina kuliekɔ.

Yesaia 55:7

Bɛda bina kalala ku likyulikpi ala bɔbla bɛya, na binwini kama bɛkya-nya na Unwoti ɔdubuti-nya ƒui ɔkyiɛ-mii.

Yesaia 56:3

“Na kadi bamba bekyuli bani ƒui mɔɔbu-mi na baakya-mi lili kalɔ ni, batasu banini, ‘Unwoti ɔɔɔdubo-bu buti bubunku nwuna bekyuli lɛlɔ.’ Na banana bani nsɔ naaadubo bɔkana bɔwɔ ni, basɔ batasu banini, ‘Abu búnwini ekyweni akwiidi bunye.’ ”

Yesaia 60:10

“Yerusalem, ƒula ɔma unengudi awodu ani náka ámana-nwu ni, baƒɔ ndubo-nya bɔsɔku bɔtu. Na bana baga benwini bina kabla bablane. Lɛ́ni-mii kɔtu na mina livoƒi kemmo nsu ɔƒɛni amu ndubɔnu-mii kɔnyana ku mina lɛƒɔndia.

Yesaia 60:14

Na bekisine bani nékpoku-mii ni, bana bawɔ badubɔlɛ akɔnkɔ kalɔ na bina lɛgba akɔ na basu-mii banii, ‘Sion ɔdi Unwoti Israel Katɔti Kedee ɔma unengudi.’

Esekiel 47:22

Kadubo Israelƒuɔ kadi bunwini ku baƒɔ bani ƒui nkya-ma kudɔ na báwɔ béte Israelƒuɔ. Ɔdi ka banu baƒɔ bamɛni aani Israelƒuɔ bebi na bada-ma lɛni kani na bele kalɔ kammɔ

Kɔgya 102:14

Atabi ammɔ muedi áƒɔ abu ƒula kabla bablane kuye nsu kalɛ na bébo-nya bábwɛ bébile na ɔtumu ɔ́ƒɔ-nya lɛlɔ ɔɔdu-bu kaƒɔ.

Yesaia 19:18

Ɔmmɔ kama ni, Egyipteƒuɔ lɛma linengudi ɛlɔ badubɔtɛmi Kanaan lɛdi na badubuse kenye ka béti lɛlɔ béte Unwoti Katɔti kadi ƒui Unwoti. Na lɛma lɛmmɔ akɔ unwi baalɔ banii Ɔƒɛ ɔma unengudi.

Yesaia 21:1

Unwoti údie lɛla lɛdi ɔ́tina na ɔdanku Babel. Kalɔ kakwiidi kani nwi ɛpu kɔmadɔ mmɔ lɛlɔ aani ɔƒɛƒɛɛ kpakplaa ɔni mɔɔkya ligede na uukpó na kalɔ kakwiidi kani na kada kakɛ mmɔ lɛlɔ, ala ubilene ɔdi ɔ́si kalɔ kakwiidi ɔni kani mɔɔda liƒu mmɔ lɛlɔ ɔdubo, lɛni na lɛla lɛni ndubo libebile ala na Babel lɛ́ɛsi kalɔ kakwiidi kani bekyuli lɛlɔ mbo liƒu mmɔ lɛlɔ lɛdububo.

Yesaia 47:1

“Babel, awɔ ɔni nse aani ugblebi adagyaa, ta ƒula lɛgadi liboku lɛlɔ, na etélie ɔtumu akɔ, ɔsika ukyuli ɔdi ɔsɔ ɔɔɔdubo-ɔ bɔlɔ ɔnii ukyuli ɔni náƒɔ kuye na baabu-nwu.

Yeremia 16:15

Mmomu bɛdubɔlɔ-mi bɛnii Ngba Ƒui Katɔti ɔni nédie-bu ɔlɛku kalɔ kani na katɔ kakɛ kesii kani na lɛ́bɔku-mii ńtákya mmɔ bekyuli enu kemmo. Na ndubɔsɔku-mii liboku kalɔ kani na líte bina bati kuuku mɛni kemmo dii limeyi lɛdi.

Yeremia 30:8

“Ɔƒaani ni, bɛdi bekyuli bani mɔɔbla kadi bamba bekyuli kabla. Nsu ndubo ala nda-mii mmɔ ƒui bɔƒɛ budie-mii lɛlɔ. Na ndubɔƒɛ katuma kɔgba kɔni nda-mii mmɔ ɔsu na binye bɛɛbla bekyuli bamba kabla budie-mii lɛlɔ.

Yeremia 31:4

Bɛ́ƒɔ-mi uye geen. Anwuɔsu ndubɔsɔku bina kalɔ lɛtu. Na bɛdubo bɔsɔ bɔtɔ ku ebiti na bɛgya bina lɛbentaa.

Yeremia 51:51

“Kɔƒa kuukpó-mii na bɛɛnu bɛnii bina anumi éwi kalɔ ka baƒɔ béduo mina kakpakɔ kedee ɔsu.

Esekiel 16:60

Nsu mina anumi asia lɛla lɛni na línyimiku-ɔ uwi ɔni na átabi tɔ lɛlɔ mmɔ. Anwuɔsu ndubo-ɔ kenye kadi buse kani ndubuse kete uwi ƒui.