Ntɛ banine badivone na badi. Na si báni-mu békpi báwɔlɔ lɛni ni, na bana lɛyalɛ ku lɛsɔnɔdi ala lɛɛkɔ́-ma katɔ. Na baayɔ́ kɔƒa ala ammɔ teetulo bana kenyekɔ ku ɔbu ɔni na nka ɔkya-ma lɛlɔ mmɔ.
Unwoti ɔnini, “Amii Israelƒuɔ ku Yudaƒuɔ, bi na bɛnii mblaku-mii? Bina bɔyɔ bɔni na bibo bite-mi ni, buse kani buse aani ulɔyɔ iye ɔtanta amii ani mɔɔyii taakya si ɔƒɛ ɔ́tu na kadi kaata.
“Bɛnu kalɛ na Yerusalem ɔma ɔni kemmo na balawia ala basa basa balanu ɔƒɛni amu úbenwini aani ɔyalɛ ɔni kudɔ banana lidu lidu beeduo taalɛ. Ɔma ɔni kemmo na nka bátaadi mina etemila lɛlɔ ulu lɛlɔ ku ala bɔbla siin ni, ɔƒɛni amu bekyuli badune néyi-nwu kemmo tɛɛ.
Na ɔma umodi ɔmmɔ batɔnkune bénwini bekyuli bani mɔɔta teenye-mi lɛlɔ, na baadiku beyune kɔkpana, na baaƒɔ́ ala na bɔbɛ kemmo taasiku bekyuli kudɔ. Béni ka bekpo bete bekpinebi. Na bekpinele litemi ani lɛɛɛkɛ-ma munu munu.