Sakaria 2:10 - Katɔti Ɔku Kedee

¹⁰ Amii Sion ɔma unengudi bekyuli, bidie lɛnu na bɛdi limeyi! Ɔsika Unwoti úse kenye ka ɔdubo ubelieku-mii.

Sakaria 2:10 Referans Kwoze

Mateo 28:20

Na bɛtina-ma bɛnii badi ala ani ƒui na lɛ́tina-mii lɛlɔ. Na ndubɔkya-mii akɔ uwi ƒui utálɛ kayawi kawɔlɔkɔ.”

Sakaria 8:3

“Ndubɔsɔ linwini lisie Yerusalem na ntélie Sion Kɔbi kedee lɛlɔ. Na bekyuli ƒui badubɔnu Yerusalem bati aani mina ɔma ɔni nsiaku-mi kama siin. Na basu ka Sion ndi mina kɔbi kedee.

Yohane 1:14

Na Katɔti Litemi lɛmɛni líbo aani ukyuli ɔyawine, na úlie kalɔ lɛlɔ mɛni na bula akɔ. Na Katɔti lɛƒɔndia ku litemi geen lɛ́ƒɔ-nwu lɛlɔ kemmo ƒui. Na abu bɔ́nu kalɛ na uukeye ka ɔdi Katɔti ubidi unwi pɛ ɔsu.

Sakaria 9:9

Ukyuli biala ɔni nkya Sion ɔdi limeyi na ɔva momoomo ku ebiti banini, “Bɛnu! Bina ɔga ɔdubo-mii kudɔ. Use siin na ɔdanku bɔƒɔ. Uboku lɛlɔ kalɔ na ulie ebuo ala utine ubi lɛlɔ ɔdubo.

Seƒania 3:17

Unwoti Katɔti unye-mii kudɔ uwi ndi uwi. Ubo ɔyikun ka udie-mii. Na kalɛ na ɔɔyɔ́-mii ɔsu ni, ɔdubɔya na bɛkɛ bɔnwuna. Na amii ɔsu ni, uudie nwuna lɛlɔyɔ keyi ku lɛnu bɔtu.”

Esekiel 37:27

Ndubulie mina kadi bekyuli akɔ na lɛbla bana Katɔti.

Lewiƒuɔ Ɔda Bubo 26:12

Na ndubɔkya-mii akɔ na lɛbla bina Katɔti na amii lɛnɔ bɛbla mina bekyuli.

Budie Taatina 21:3

Na línu lɛdi bonwu lɛdi ɔ́si lɛgaboku lɛmmɔ kudɔ ka lɛɛsu lɛnini, “Bɛnu! Katɔti keliekɔ káyu kébo bekyuli akɔ. Ɔdubulie-ma kudɔ na ama benwini-nwu bekyuli. Na Katɔti ɔlati ɔkya-ma akɔ na ɔdi-ma Kɔti.

Yohane 14:23

Mmɔ na Yesu údie kenye ɔnini, “Ukyuli biala ɔni mɔɔyɔ́-mi ni, ɔdubɔdi mina ala ani mɔɔtina lɛlɔ. Na mina Ɔti ɔdubɔyɔ-nwu. Na ami ku mina Ɔti bɔdububo-nwu kudɔ na abu ku-nwu bɔsɔ bulie.

Yeremia 33:11

lɛlɔyɔ kɔvanu ku ebiti kasala lidu lidu. Na adubunu ka beeti beleku taawɛɛ-ma ku ebiti katɔ. Na si bekyuli bébo-mi kudɔ na mina kakpakɔ banii beeti etela babakpa bete-mi ni, adubunu ka baasu banini, “ ‘Buumwi-ɔ, Unwoti Ɔyikune Ƒui! Bɛgya Unwoti enu, ɔsika ɔdia na ɔɔyɔ́-bu uwi ndi uwi.’ Na kalɔ kammɔ kadubɔsɔ kadia edula.

Yeremia 30:19

Kadi bamba bekyuli badubo-mii bɔnu bɔƒalɛ na babu-mii. Na bebi badubɔƒɔ-mii kɔduli kemmo pii geen. Na bɛdubo limeyi bɔdi na bɛkɛ ebiti na bimwi-mi ku lɛlɔyɔ lɛnu.

Yesaia 66:14

Uwi ɔni na bɛdubɔnu ka ala amɛni aalɛ́ lɛni ni, bina kayi kadubɔyɔ buɛɛ na bɛlɛ lili aani kalɛ na livo lɛɛlɛ́ lili. Na bɛdubɔnu kalɛ na Unwoti ɔɔƒɛnimi kɔnu taakya nwuna kabla bablane bani mɔɔbu-nwu. Nsu nwuna bekisine bani mɔɔta teenye-nwu lɛlɔ ama ni, nwuna kɔnyi muubo-ma lɛlɔ.

Yesaia 51:11

Unwoti, ƒula bekyuli bani ngba na áƒɔ badubɔsɔ benwini na besie Yerusalem ku bumwi lɛnu si bakɛ ulu bésela. Na ebiti adubunwini aani kagabwa kebi-ma lili, ɔni na lɛbibo ku bukpoku bɔdi bɔsɔ bulebo-ma lɛlɔ, na beduo kɔnyana kemmo kudii.

Yesaia 12:6

Amii bani nkya Sion ƒui bidie ɔnu ku kudu momoomo, ɔsika Israel Unwoti Kedee úbomo na bina akɔ.”

Budie Taatina 2:1

Amu na ɔ́su ami Yohane ɔnini, “Nweni ɔku te Eƒeso baƒɔtaadine lɛkpa ɔtu anii, “Ami Yesu nda ayabi maatɛ na mina kɔdianu na muusié teebo na sika ugyiedi ligyii maatɛ lɛni lɛlɔ na asogya ɔɔsia mmɔ ntɛ. Na ami mɔɔsu kenye kamɛni.

Ƒilipiƒuɔ 4:4

Na mɔɔsu-mii nnii bɛya na lɛlɔ litaayɔ-mii na Blɔti kemmo. Na nsɔ mɔɔsia kama nnii bɛya na lɛlɔ litaayɔ-mii.

Malakai 3:1

“Ami, Unwoti Ɔyikune Ƒui, ndubɔtala ɔtu ɔdi na ɔklibi ulu use ute-mi. Na kɔnakunwi Unwoti ɔni ulu na binye bɛɛnu ni, ɔdubɔda ɔlɛ na nwuna kakpakɔ kemmo. Ɔtu ɔni na bɛɛwia mmɔ ɔ́si ɔdubo ku mina linyese. Na ɔkɛ ulu ɔdubo ɔƒaani.”

Sakaria 14:5

Na bɛdubukeli bɛsia kɔwɛ kɔmmɔ kemmo útédu Asal. Na bɛdubɔwia kasiakɔ kesii biala aani kalɛ na ɔ́bla uwi ɔni na kalɔ kákunku na Yudaƒuɔ Ɔga Usia uwi. Na ɔmmɔ kama ni, Unwoti Katɔti ɔdubɔda ɔlɛ ku nwuna batu.

Yeremia 31:12

Mina bekyuli badubo-mi kudɔ na Sion Kɔbi lɛlɔ na babadi limeyi na bana anumi ekeye, ɔsika ndubute-ma kusɛ kusɛ. Na ndubute-ma antabi ku egyiibi ku nnɔ. Na lite-ma baƒonu ku ɔmantɛ bakɔ. Ala adubo-ma bɔdianku na balɛ lili aani kemo kani edula nákɛ ntu kaduɛ.

Yesaia 61:10

Lɛlɔ lɛɛyɔ́-mi na Unwoti lɛlɔ na ebiti aada mina kɔyu na lɛla lɛni na mina Katɔti ɔ́bla úte-mi ɔsu. Kalɛ na ɔ́ƒɔ-mi ngba use aani kalɛ na baaklibi uleku teesienku kawɛɛkɔ. Na lɛduni lɛni mɔɔtina ka ɔ́bla-mi siin lɛma-mi lili aani ɔkpane lɛduni lɛni na uubi lili.

Yesaia 54:1

“Die lɛnu ku kɔvanu momoomo, awɔ udinkɔ, ina ka átawɔ kudii, ɔsika uleku ɔni na ɔgyani údie-nwu atu ni, anwu ndubo bɔwɔ butulo.

Yesaia 42:10

“Bɛsu kayawi ƒui na bedie ɔnu ɔwɔdi bete ami Unwoti. Na bɛsu bani ƒui nkɛ ɛpu anumi baaví ku bani nli kalɔ ɔgyu kakaaka ƒui bɛnii basalaku-mii na beti bumwi bete-mi.

Kɔgya 68:18

Uwi ɔni na ákɔ ésie katɔ ƒui ni, éti bekyuli bani na ékpo áƒɔ ƒui átɔlɔku. Na éte-ma etela. Na ƒula bekisine bani naaayɔ ka elie mmɔ muedi lɛnɔ béte-ɔ ala.

Kɔgya 40:7

Mmɔ na lɛ́su nnini, “Ati, aanu-mi. Líbo nnii mbabla ƒula lɛƒɔyɔ aani kalɛ na bénweni básiku-mi lɛlɔ na Bunweni Kedee Ɔku kemmo.

Yesaia 35:10

Na bani na Unwoti ɔ́ƒɔ mmɔ kani ndubɔsia mmɔ na beteedie lɛnu na betéduo Yerusalem. Na lɛlɔyɔ ebiti ndubɔbla bana kagabwa kani na badububi lili. Na badubɔdi limeyi na bakɛ lɛlɔyɔ, ɔsika ala ani muukpóku-ma ku ɔlɛ bunu biala kenye kadubukulo.

Israelƒuɔ Bɔlɛ 29:45

Na ami Unwoti ndubɔkya-mii akɔ aani bina Katɔti kalɛ.

Yesaia 37:22

ami Unwoti lɛ́ya na Yerusalem ɔni ndi ugblebi adagyaa ɔ́pii Sanaherib, na ɔɔmá-nwu, na bukeli bɔni na ɔdubo bukeli ɔsu.

Sakaria 1:16

Anwuɔsu ndubɔnu Yerusalem kɔnyana. Na ndubɔya na basɔku ɔma unengudi ɔmmɔ batu ƒui na basɔku mina kakpakɔ batu benyene kana kenyekɔ.

Sakaria 2:5

Unwoti úse kenye ka anwu ɔlati ndubo kowodu kɔni maka mamana Yerusalem bunwini na utaagyumana-nwu, na anwu kani ndubulie ɔma ɔmmɔ ntɛntɛ na uteekeye na ɔma unengudi ɔmmɔ kemmo.”

Sakaria 2:11

Na si uwi ɔni na úbo-nwu kemmo lɛni ni, kadi bekyuli pii badubunwini bebo Unwoti kudɔ na benwini nwuna bekyuli na uwi ɔmmɔ lɛlɔ, na badubɔnu bati ka Unwoti kenye udiene na ɔdi sɔsɔ.

Lɛkpa Ulu 28:64

Bina Unwoti ɔdubɔya na bigyingya bɛkya kalɔ lɛlɔ ƒui. Mmɔ na bɛdubo baƒiɔ bani na béti egyii ku atabi bánwi bɔkpa, baƒiɔ bani na bina bati kuuku bátakpa kudii.

Yesaia 48:20

Anwuɔsu ɔƒaani ni, bɛtɔlɔ Babel! Na si bɛ́yu ulu bísela ni, na biteedie lɛnu taatɔ ku ebiti. Na lɛlɔ lɛyɔ-mii na biteebo kudu na ukyuli biala unu-mii kɔku bɛnini, “Unwoti údie nwuna kabla ɔblane Yakob.”

Yesaia 52:11

Bɛda Babel ɔma unengudi ɔmmɔ biwi na bɛlɛ-nwu kemmo! Na bitetuku lɛla lɛni muusé lɛlɔ lɛdi. Na bɛƒɔ bina adala ƒui amii bani nti Unwoti lɛlɔ ala ani nse kedee.