Bumomo Bɔka 25:1 - Katɔti Ɔku Kedee

¹ Uwi ɔni na Israelƒuɔ bákya Sitim ni, na ama ku Moab belekubi bése kalɔ baatɛ.

Bumomo Bɔka 25:1 Referans Kwoze

Korintoƒuɔ 1 10:8

Útalɛka butaabla kɔsɔnɔ bɔdi ala aani kalɛ na bana badi bábla, na nkyuli mpim aavlanyɔ-ɛtɛ békpi limeyi linwi.

Yosua 2:1

Ɔmmɔ kama ni, Nun ubidi Yosua ɔ́tala batu inyɔ badi ɔ́siku Sitim kesii kani bákya. Na ɔ́su-ma ɔnini, “Bɛbɛ bitánu Kanaan kalɔ kammɔ. Ɔni ntulo ƒui ndi ka biduo bana ɔma unengudi ɔni baalɔ banii Yeriko na bɛnu mmɔ kalɛ na use.” Amu ka bétéduo Yeriko ni, bésie bétéduo uleku ɔyalɛ ɔni baalɔ banii Rahab kaduli na bátɛ mmɔ.

Bumomo Bɔka 33:49

Na báda keliekɔ na Yordan Ketu ɔ́si Bet-Yesimot útédu Abel-Sitim na Moab kalɔ ƒiaa lɛlɔ.

Budie Taatina 2:14

“Nsu alakpa alɛɛ adi ábala-mii. Bibo bekyuli badi na bina akɔ mmɔ bani mɔɔsiaku Bileam ala bɔtina kama. Ukyuli ɔmɛni nátina Balak kalɛ na ɔtɔlɔ Israelƒuɔ. Na ɔ́kpanku-ma útákya likpidi kemmo. Baadi adila ani na béti bákpa béte baƒiɔ, na bábla lɛyalɛ ala.

Mika 6:5

“Bitayiƒala kasusu kekpidi kani na Moabƒuɔ Ɔga Balak ɔ́bla ɔ́siku-mii lɛlɔ iye lɛla lɛni na Beor ubidi Bileam ɔ́su-nwu ku kalɛ na údie kenye. Na binyimo akɔla ala budie taatina ala ani na ami Unwoti lɛ́bla ɔ́si bina keliekɔ na Sitim mmɔ úsie Gilgal.”

Yosua 3:1

Amu na kadi kégye ɔtanta tutuutu ni, Yosua ku Israelƒuɔ ƒui báta Sitim na bátɔlɔ bétélie Yordan Ketudɔ kesii kani na badubulie asa na bavia ketu kammɔ.

Etemila 7:26

Lɛ́nu lɛ́ti ka uleku ukpidi ubo ɔdu utulo kukpi. Na úbimi enu ku kayi ƒui úse aani kakpagyuɛ ka uƒie ukyuli. Na ɔnana ɔni mɔɔdi Katɔti litemi lɛlɔ ni, ɔkana na ukeli-nwu. Nsu ukyuli ɔni na uládi-ni lɛlɔ ni, ɔdubo-nwu buƒie aani kakpagyuɛ na ɔyii udu kede kede.

Israelƒuɔ Bɔlɛ 34:15

“Na awɔ ku kadi bamba bekyuli badi bitenyimi bunyimi bɔdi. Ɔsika si baakpá bana baƒiɔ na baabla akpala teete-nwu ni, badubo-ɔ bɔlɔ na ɔmɛni ɔdubunwini ala ani ndubo-ɔ bukpoku na adubɔdi bana adila.

Bumomo Bɔka 25:17

“Ti Midianƒuɔ bammɔ bla ƒula bekisine na adu-ma,

Bumomo Bɔka 31:2

“Ta na atáni Midianƒuɔ kɔtu na lɛla lɛni bábla Israelƒuɔ ɔsu. Na ɔmmɔ kama adubo bukpi.”

Lɛkpa Ulu 3:29

Anwuɔsu bɔ́sɔ búlie kɔwɛ kɔni nde Bet-Peor ɔma kakɛ.

Lɛkpa Ulu 4:3

Amii alati bɛ́nu ku bina anumi lɛlɔ lɛla lɛni na Katɔti ɔ́bla na Peor Kɔbi lɛlɔ, kalɛ na ɔ́yila ukyuli biala ɔni muuti ala taatákpa baƒiɔ banii baalɔ Baal udu.

Lɛkpa Ulu 32:38

Na biti bebuo bani nélie lɛmwi bɛkpa bite-ma. Na bite-ma ntɛ na bani. Bɛsu-ma na bebo bebebunku-mii ɔƒaani. Bɛya na bekeli babaƒɔ-mii.

Yosua 22:17

Binyimo lɛla lɛni nálɛku-bu na Peor ɔkɛnku likpidi lɛni bɔ́bla ɔsu. Unwoti ɔ́ya na ɔlɛ ukpidi ɔdi úbeduo-bu akɔ. Na úti úbedu ɔmwi kadi bɔɔmu bɔkya buubo abi ɔ́si ɔlɛ ɔmmɔ ɔsu. Na buuye-mii si ukpidi ɔmmɔ útemo-mii tɔ?

Yeremia 40:11

Uwi ɔni na Babilonƒuɔ báka Yuda bukpo ni, Yudaƒuɔ pii békeli bésie Moab ku Amon ku Edom abi lɛlɔ ku kɔlɔ bamba pii lɛnɔ kemmo. Nsu Yudaƒuɔ bamɛni bénu ka Gedalia na Babilonƒuɔ ɔga ɔ́ƒuna úse ka utaadi Yuda kalɔ ƒui lɛlɔ, nsu nkyuli ɛlɛɛ kani nébu bakya kalɔ kammɔ lɛlɔ. Ɔmmɔ ɔsu bekyuli bamɛni bénwini bébo banii bebebunku na bede egyiibi ani nánwu kaduɛ mmɔ na lɛkwa lɛmmɔ kemmo utulo akwa bamba ƒui.

Esekiel 20:21

Nsu bana bebi lɛnɔ báta bénye-mi lɛlɔ. Na béni banii belenu mina ala bɔtina ku ɔda bubo lɛlɔ na badi-mu lɛlɔ. Na baabla mina Lɛnwunameyi kalɛ kalɛ aani limeyi keeke biala kalɛ. “Amu na ḿbeti kɔnyi geen na lɛ́su kpakplaa nnii ndubo-ma kɔtu bɔni na kalɔ kakwiidi kammɔ kemmo mmɔ.

Hosea 9:10

Unwoti ɔnini, “Bɔnu na lɛ́nu amii Israelƒuɔ lídie aani kɔdingyii ebi na kalɔ kakwiidi kadi kemmo, na lɛ́nu bina bati kuuku aani kɔnwingyie ebi edeedi ani náka bɔnwu. Nsu Baal-Peor baƒiɔ bani muusé lɛlɔ na bísie bɛɛkpá. Anwuɔsu na amii lɛnɔ biisé lɛlɔ aani baƒiɔ bani na bɛɛyɔ́ mmɔ kalɛ.

Israelƒuɔ Bɔlɛ 22:19

“Ukyuli biala na anwu ku ebuo ɔdi bátɛ ni, ɔlɛka badu ukyuli ɔmmɔ.

Bumomo Bɔka 7:15

na úte ɔmantɛ akɔ ɔkɔdi ku koƒonu kɔgyani ku koƒonu kɔkɔdi kɔni ndi kɔgyani na kɔ́ɔƒɔ lɛkwa linwi úte bɔkyula akpala,

Baga 2 23:7

Na ɔ́ya na bégyingya ɔtɔ ɔni bátu béte banana bayalɛ na kakpakɔ mmɔ. Na mmɔ na beleku bani muudi Asera baƒiɔ lɛwu bakya.

Kɔgya 106:28

Na Peor mmɔ ni, muna kadi bekyuli béti bana lɛlɔ bátámana baƒiɔ bani baalɔ banii Baal lɛlɔ. Na baadú bebuo taakpa lɛla lɛni neeebo ngba.