Mateo 9:27 - Katɔti Ɔku Kedee

²⁷ Amu ka Yesu ɔ́si mmɔ úsela ni, banumbwɛne inyɔ badi báta básiaku-nwu kama ku kɔvanu banii, “Ɔga Dawid uwɔ! Nu-bu kɔnyana.”

Mateo 9:27 Referans Kwoze

Mateo 15:22

Mmɔ ni, kalɛkɛ kammɔ uleku ɔdi úbo Yesu kudɔ. Na úvele-nwu ɔnini, “Blɔti, Ɔga Dawid Uwɔ, nu-mi kɔnyana! Kɔyu kukpidi kɔdi kuukpóku mina ubi ulekubi na uubó abi geen!”

Mateo 11:5

Banumbwɛne baanu, na bani náƒɛ bewi kalɔ beesié. Ama bani muuƒi ɔlɛgyie lɛlɔ lɛɛbla sɛɛn na batutine beenú. Bekpine baata na mɔɔkɔ́ litemi buni lɛmmɔ lɛsa teete bawabane.

Mateo 17:15

Na ɔ́su-nwu ɔnini, “Ati, nu mina ubi ɔnanabi ɔmɛni kɔnyana. Uuƒi kalɛ teebo na uubó abi geen. Uwi pii ni, uubuli teeduo ɔgya kemmo ku ntu kemmo lɛnɔ.

Yohane 7:42

Ɔɔɔdi bɔsu na Bunweni Kedee Ɔku ɔ́su ka Ukyuli Ɔƒunadi ɔmmɔ wasi Ɔga Dawid kaba kemmo na Betlehem ɔma kesii kani na Dawid ɔ́si yoo?”

Luka 7:21

Na uwi ɔmmɔ kani kemmo ni, Yesu ɔ́bwi bekyuli pii lɛlɛ na ɔ́gya ayu ekpidi, na ɔ́ya na banumbwɛne pii bánu.

Marko 11:10

Biti bumwi bite Ɔga Dawid lɛga kadikɔ kani ndubo! Hosiana ute Katɔti na katɔ ƒui!”

Marko 9:22

Uwi pii kɔyu kɔmɛni kɔɔkya ɔkplu ka nka kɔdu-nwu. Si úbo lɛni ni, kɔɔyá na uubuli teeduo ogya iye ntu kemmo. Buvele, nu-bu kɔnyana na ebunku-bu si ɔdi lɛla lɛni na akana bɔbla!”

Mateo 21:9

Amu na bekyuli bani ntɔ ku bani nkpɛ ƒui bése kalɔ baava taasu banii, “Yiidu! Ɔga Dawid Uwɔ ɔmmɔ ɔ́si ɔdubo o-o! Bimwi anwu ɔni ndubo na Blɔti lɛnyi kemmo! Hosiana!”

Mateo 1:1

Ɔmɛni ndi Yesu Kristo kaba kemmo bekyuli anyi. Na kási Dawid kaba kani nálɛ kási Abraham kemmo.

Mateo 21:15

Na ka bakpane benengu ku ɔda bubo ala batinane bánu akɔla ani na Yesu ɔdaku bɔbla ku banamu bani mɔɔva taasu banii, “Bimwi Ɔga Dawid Uwɔ” mmɔ ni, béti kɔnyi geen.

Romaƒuɔ 9:5

Ama mbo Israel ɔtɔ eƒi benengu bani na Katɔti ɔ́ƒuna. Na bana akɔ na Kristo ɔni nébo aani ukyuli ɔyawine ɔ́lɛ ɔ́si. Bɛya na bumwi Katɔti ɔni mɔɔdi ala ƒui lɛlɔ ɔ́si ɔƒɛni úsela ƒui. Ɔsia lɛni.

Luka 20:41

Yesu úye-ma ɔnini, “Dɛ na ɔ́bla asa na bekyuli básu banii Ukyuli Ɔƒunadi ɔmmɔ ɔdubɔsi Dawid kaba kemmo?

Luka 17:13

Na báva ku lɛdi momoomo banii, “Ati Yesu, nu-bu kɔnyana!”

Romaƒuɔ 1:3

Linyese lɛmɛni lɛkɛnku Katɔti Ubidi ɔni ndi Blɔti Yesu Kristo lɛlɔ. Báwɔ-nwu aani ɔyawine kalɛ na ɔdi Dawid kaba kemmo ubi.

Mateo 9:28

Amu uwi ɔni na Yesu útéduo kaduli kemmo ni, banumbwɛne inyɔ bammɔ bébo-nwu kudɔ. Na Yesu úye-ma ɔnini, “Bɛɛƒɔ́ taadi ka ndubɔkana-mii bɔbwi?” Mmɔ na bédie kenye banii, “Bɔ́ƒɔ bɔ́di!”

Mateo 20:29

Uwi ɔni na Yesu ku nwuna batɛyane bátɔlɔ Yeriko ni, bekyuli pii badi basiaku-ma.