Mateo 10:41 - Katɔti Ɔku Kedee

⁴¹ Ukyuli biala ɔni maƒɔ Katɔti kenye udiene ka ɔdi kenye udiene ute Katɔti ɔsu ni, anwu ku kenye udiene ɔmmɔ badubɔkɛ lɛyuƒɔla linwi na Katɔti kudɔ. Na ukyuli ɔni maƒɔ ukyuli ɔni nse siin ka use siin ɔsu ni, anwu ku ukyuli ɔmmɔ badubɔkɛ lɛyuƒɔla linwi na Katɔti kudɔ.

Mateo 10:41 Referans Kwoze

Hebriƒuɔ 6:10

Katɔti ɔɔbla lɛla biala ulu lɛlɔ. Na uláyiƒala bina ala ani na bɛ́bla. Ɔgyi ka bɛɛyɔ́-nwu ɔkɛnku kalɛ na bíbunku nwuna bekyuli. Na bɛmu biibunku-ma úbedu ɔƒɛni.

Yohane 2 1:8

Anwuɔsu binye kagyumana kalɛ na bilatuma bilewiakun, mmomu na bina katuma kalɛ-mii kɔsia na kudu kɔwɔlɔ.

Ala Kalɔ Buse 20:7

Anwuɔsu ni, ya na uleku ɔmmɔ ɔsɔ unwini usie ɔgyani kudɔ, ɔsika Katɔti Kenye Udiene na ɔdi. Na ɔdubɔkpali katɔ na ƒula lili na elie ngba. Nsu si átaya na ulekudi ɔmmɔ ɔsɔ unwini ni, na ati ka awɔ ku ƒula badi ƒui bɛdubo bukpi.”

Korintoƒuɔ 1 9:17

Si banii ami ɔlati náƒuna kabla kamɛni na mina bɔyɔ kenye ni, nka ndubɔsia anu ka baƒɔ-mi kayu. Nsu ɔdi kabla kani na Blɔti nnye-mi lɛlɔ ɔnii mbla. Ɔsika Katɔti néti-mi únyene-ka kenye.

Mateo 16:27

Ɔsika ami ɔni ndi Ukyuli Ɔyawine Ubi ndububo ku Katɔti batu na Katɔti ɔyikun kemmo. Na ndubɔƒɔ ukyuli biala kayu na nwuna kabla kenye.

Mateo 6:18

Ɔmɛni ɔdubɔya na bekyuli baláti banii biilie kɔka. Mmomu ƒ'ɔti ɔni nkya kesii biala ndubɔti. Na anwu ɔni mɔɔnu ala ani na bekyuli balánu ni, anwu kani ndubɔƒɔ-mii kayu.

Romaƒuɔ 16:23

Gaio ɔni négyingya enu ɔ́ƒɔ ami ku baƒɔtaadine lɛkpa lɛni mɔɔsa mɛni ƒui uugyele-mii. Na Erasto ɔni ndi ɔma ɔmɛni egulabi lɛlɔ ɔnune ku bula ɔnwani Kwarto banii beegyele-mii.

Mateo 6:6

Na si aakpali katɔ ni, duo ƒula katɔma na akalɛ ɔtɔ, na akpali ƒ'ɔti ɔni na balanu. Na anwu ɔni mɔɔnu-ɔ uwi ɔni na bekyuli bamba balánu-ɔ ni, ɔdubɔƒɔ-ɔ kayu.

Batalane Kabla 16:15

Amu ka anwu ku nwuna kaduli bekyuli ƒui báƒɔ ntu bɔkpila ɔdi ni, úvele-bu ɔnini, “Si bɛ́tuna bɛnii ndi ɔƒɔtaadine geen nte Blɔti ni, na bibeduo-mi kudɔ.” Na ɔ́ni litemi lɛmɛni úneneku-bu útédu ka búsie bútéduo-nwu kudɔ.

Mateo 6:4

Na ƒula Katɔti ɔni mɔɔnu ala abuni ani na bekyuli bátanu uwi ɔni na aabla-nya ni, ɔdubɔƒɔ-ɔ kayu.

Mateo 6:1

“Bɛnu kaduɛ kalɛ na bilabla lɛbuni bɛnii bekyuli banu-mii. Ɔsika si bɛ́bla lɛni ni, Katɔti ulaƒɔ-mii kayu kadi na Katɔ Ɔga Ɔma.

Yesaia 3:10

Su bekyuli bani nse siin anii, ɔdubɔtɛ ute-ma ɔsika badubɔdi bana kabla ebi.

Mateo 7:8

Ɔsika ukyuli biala ɔni muuvele Katɔti ala ni, ɔdubute-nwu. Na ukyuli biala ɔni mɔɔwia ni, ɔɔkɛ́. Na ukyuli biala ɔni muubó Katɔti kegbuta kɔnu ni, ɔɔlɛmi teete-nwu.

Mateo 25:44

“Amu na ama lɛnɔ badubuye-nwu banini, ‘Ati, uwi ɔmani na bɔ́nu ka kɔka kɔɔda-a, iye utukwɛ ɔɔda-a, iye adi ɔƒɔ, iye ákɛ kasɔngya, iye eeƒi, iye bákya-a ɔtɔ na bútebo na bubebunku-ɔ?’

Mateo 25:45

“Mmɔ na Ɔga ɔmmɔ ɔdubɔsu-ma ɔnini, ‘Mɔɔsu-mii ka ni, uwi ɔni na bítabla lɛbuni bítete ukyuli ɔni na balábu ƒui na mina badi akɔ ni, ami na bítabla bítete!’ ”