Marko 4:39 - Katɔti Ɔku Kedee

³⁹ Yesu ɔ́ta únye na údie lɛdi na ɔ́su ɔnini, “Ɔƒɛƒɛɛ, da bukpo ya!” Na ɔ́sɔ ɔ́su ntu lɛnɔ ɔnini, “Ntu, bla buɛɛ.” Amu na ɔƒɛƒɛɛ ɔ́da bukpo ɔ́ya, na ntu anumi ƒui bɔ́bla kpoo.

Marko 4:39 Referans Kwoze

Kɔgya 107:29

Na ɔ́ya na ɔƒɛƒɛɛ kpakplaa ɔmmɔ ɔ́da búkpo ɔ́ya na avlɔvɔ ku lɛla biala lɛ́bla buɛɛ.

Kɔgya 89:9

Awɔ muuboku ɛpu bonwu ku nwuna lɛlɔ bɔnwanɛ ƒui kalɔ. Na aayala nwuna avlɔvɔ ammɔ buɛɛ.

Kɔgya 65:7

Kalɛ na eeboku ɛpu ɔni mɔɔnwanɛ lɛlɔ na uubó ku kudu kalɔ buɛɛ ni, lɛni kani na eeboku kadi bekyuli lɛsɛ lɛni na baakya kalɔ.

Kɔgya 29:10

Unwoti uli kalɔ kpli ɔɔdi ɛpu ɔmmɔ lɛlɔ. Na ɔɔdi ala ƒui muedi lɛlɔ úsela uwi ƒui.

Yeremia 5:22

Bi ɔsu na útalɛka lɛlɔ litaatɔ-mii na bitaayia-mi ku ɔbu? Ami násia ubili líte ɛpu na ɔ́bala ntu bɔmmɔ. Ntu bɔmmɔ buubó taababwɛ teewi ubili kowodu kɔmmɔ, nsu bulávia teebo kama teetulo kesii kani na lɛ́sia-mu ɔmii.

Agba 8:29

Na mɔɔnu asa na ɔ́sia kalɔ ubili aani ɔmii úte ɛpu ɔmmɔ ƒui kalɛ na uleyi ulavia mmɔ. Na kalɛ na úse kalɔ kammɔ ɔka kalɔ ni, nnye mɔɔnu.

Kɔgya 148:8

Ogya ku etubankɛ ku ulɔyɔ ku ɔƒɛƒɛɛ kpakplaa ɔni muukpó na biinú-nwu lɛdi ƒui bimwi-nwu.

Hiob 38:11

Ɔma nátina-nwu kesii kani na uyi ɔwɔ, na ɔ́su-nwu ɔnii nwuna ɔvɔlɔvɔ ani mɔɔta teebo atavia mmɔ?

Israelƒuɔ Bɔlɛ 14:22

na Israelƒuɔ bésie bávia ɛpu ɔmmɔ kemmo kalɔ kakwiidi lɛlɔ. Na ntu bɔmmɔ bɔ́bla awodu bonwu bɔ́kya-ma kɔmii ku kɔdianu.

Marko 9:25

Amu na uwi ɔni na Yesu ɔ́nu ka bekyuli pii bammɔ baaní teede-ma ni, útemi úte kɔyu kɔmɛni ɔnini, “Kɔyu kukpidi kɔni neeenu na kulétemi, mɔɔsu-ɔ ka vi lɛ ɔnamu ɔmɛni lɛlɔ kemmo, na sɔ teduo-nwu lɛlɔ kemmo kudi kudii lɛnɔ!”

Israelƒuɔ Bɔlɛ 14:16

Talaku ƒula ugyii ɔdadi ɔmmɔ katɔ na enene kɔnu atina Ɛpugyie ɔmmɔ na ntu bɔmmɔ bɔbwɛ kemmo inyɔ na Israelƒuɔ basia ɛpu ɔmmɔ kemmo balɛ kalɔ kakwiidi lɛlɔ.

Luka 4:39

Amu na úsie uténye-nwu kudɔ na kesii kani na ɔtɛ, na ɔ́bɔku ɔlɛ ɔmmɔ. Na kɔnakunwi ni, ɔlɛ ɔmmɔ ɔ́ba-nwu na ɔ́ta únye na úsie kalɔ ɔɔnwá teete-ma.

Nahum 1:4

Si Unwoti údie lɛdi ni, ɛpu ku ntukpa ƒui bɔɔkwii, na aku ani nkya Basan ku Karmel ku Lebanon abi lɛlɔ ƒui egyii ku anwula aayɛyɛ.

Kɔnyana Buwulo 3:31

Unwoti ɔɔɔdubo-bu buni uwi ƒui!

Mateo 8:26

Mmɔ na Yesu úye-ma ɔnini, “Bi ɔsu na bibo liƒu lɛni? Bina bɔƒɔtaadi bɔsɔ.” Amu na ɔ́ta na ɔ́bɔku ɔƒɛƒɛɛ ku ntu bɔni mɔɔnwanɛ lɛlɔ mmɔ ɔnii bɔda bɔya. Na mmɔ ƒui kábla kpoo.

Marko 4:38

Uwi ɔmmɔ na Yesu ulie ɔkɔlɔ kama na úti lili ɔ́sia ɔsiadi lɛlɔ ɔɔlɛɛ. Amu na nwuna bakpana bágyila-nwu na básu-nwu banini, “Ala ɔtinane, ulekpoku-ɔ ka bɔdaku bukpi?”

Luka 4:35

Amu na Yesu ɔ́bɔku kɔyu kɔmmɔ ɔnini, “Ba lɛsɛ! Na avi alɛ ukyuli ɔmmɔ lɛlɔ kemmo!” Amu na kɔyu kukpidi kɔmmɔ kúƒwimi ukyuli ɔmmɔ ɔ́ƒiɛmi kalɔ na bana anumi, na kɔ́vi kɔ́lɛ-nwu lɛlɔ kemmo kɔ́tɔlɔ. Nsu ukyuli ɔmmɔ útaƒɔ ɔlɛ ɔdi.

Luka 8:24

Batɛyane bammɔ bésie na bátágyila Yesu na básu-nwu banini, “Ati! Bɔdaku bukpi!” Amu na Yesu ɔ́ta únye na údie lɛdi ɔ́bɔku ɔƒɛƒɛɛ ku ntu bɔni mɔɔnwanɛ lɛlɔ mmɔ, na ana ƒui kenye káyɔ na ɔ́bla buɛɛ.