4 na liti litemi lɛmɛni lɛva-nwu anumi, na ami ku-nwu bɔtɛ-ni.
Lɛ́klibi lɛlɔ líte mina litemi kaduɛ, na ngyi ka mbo ubo.
Bibo bibasiaku-mi na litemi katɛkɔ na bidie lɛlɔ kenye ka amii ɔdi ɔ́tɛ na bítaƒiɔ.
Unwoti Katɔti, tɛ ami ku kadi kani bekyuli naaagyi-ɔ mɛni ntɛ litemi na ete-mi ubo. Na edie-mi alɛku ɔkɔ banyine ku balalane bamɛni akɔ.
Unwoti, ɔkɛnku ƒula lɛnyi ɔsu ni, ti mina bɔƒiɔ ƒui kyiɛ-mi ina ka bumomo na babu-ɔ.
“Tina-bu lɛla lɛni na bɔdubɔsu Katɔti, ɔsika bula kasusu kese-bu suu, na bɔɔɔgyi lɛla lɛni na bɔsu bɔsiku lɛla lɛmɛni lɛlɔ.
Nsu awɔ násu-mi anini, ‘Ndubɔnu ka enu ku akɔkɔ éyi-ɔ. Na ndubɔya na ƒula bebi ku bawɔ bemomo aani ɛpu kɔnwinimi. Na ukyuli ɔdi ulakana-ma bɔka.’ ”
Nsu mɔɔwia ka ami ku Katɔti Ɔyikune Ƒui ɔmmɔ bɔtɛmi, na ami ku-nwu bɔni litemi lɛmmɔ bɔnu.
Si bɔti na nka lɛti kesii kani na ɔkya na lɛkana-nwu kudɔ busie ni, nka ndubusie,
Mmɔ na ndubɔti lɛla lɛni geen na ɔ́yɔ ka ɔsu-mi.
“Ami ndi Unwoti Ɔyikune Ƒui, nsu ákyaku-mi unyeƒi anii lɛla lɛni na ábla ndi lɛbuni. Na ɔƒaani ni, bo na ebedie kenye na linu.”