Ɔmmɔ kama béti egulabi adi béte lɛtɔ batune ku banwine badi. Na béti adila ku ntu ku nnɔ ka beti besienku Sidonƒuɔ ku Tiroƒuɔ kalɛ na beti sida kugyiikɛ basia ɛpu lɛlɔ basiku Lebanon beboku Yopa. Na Persiaƒuɔ Ɔga Kores úte kuƒi kɔmɛni.
Ndubo kadi bekyuli ƒui bɔkunku ku bana akɛla ani náƒɔ-ma kuye na beti-nya beboku mɛni. Mmɔ na kalɛ na mina bukeye bɔɔtu anumi bɔdubɔƒɔ kakpakɔ kammɔ kemmo ƒui.
Amu na Unwoti ɔ́su-nwu ɔnini, “Línu ala ani na énye mina anumi ákpali-mi ásu ƒui. Na lídie kakpakɔ kani na átu mɛni líse sɛsɛɛ lɛ́bla-ka kedee na líti mina lɛnyi lɛ́sia-ka lɛlɔ líte uwi ƒui. Na mina anumi ku kayi ƒui kadubɔsia-ka lɛlɔ uwi biala.
Ɔsika bɛdubo bɔdi bumo bɔsia kama na lɛlɔ lɛyɔ-mii aani kalɛ na bebiwɔ baanyimi anyii ntu teemo na bana bawɔne lɛgba lɛlɔ na baada-ma taamana kayi na lɛlɔ lɛɛyɔ́-ma.”
“Na Lebanon egyii kpakplaa enengudi lidu lɛni nkya-ma ƒui ni, badubɔlɛku-ni beboku. Na badubuti-ni banwi ala beti bakya mina kakpakɔ bɔdia kesii kani na mina lɛgba lɛɛnya.
Ka Israelƒuɔ bálɛ Egyipte kalɔ lɛlɔ lɛkwa eti yaalenwi ku avlaatɛdi (480) kemmo ni, Ɔga Salomo úse kalɔ ku Katɔti kakpakɔ bɔtu. Na uwi ɔmmɔ ɔdi lɛkwa linedi ka Salomo ɔɔdi lɛga na Israel kalɔ lɛlɔ. Na lɛkwa linedi lɛmmɔ kɔbuli kunyɔdi kɔni na baalɔ Siw kemmo ni, kabla kammɔ kése kalɔ.
Nu Unwoti ƒula Katɔti litemi na adi-ni lɛlɔ ku ƒula kayi ƒui ku kɔyu ƒui lɛnɔ. Na ese kabla kalɔ na kakpakɔ kammɔ lɛlɔ na eti abu nwuna lɛnyi kalɛ na Bunyimi Adaka ɔmmɔ ku ala ani lɛlɔ kabla na baabla na kakpakɔ mmɔ ƒui ni, akɛ-nya kesekɔ.”