Galatiƒuɔ 3:14 - Katɔti Ɔku Kedee

¹⁴ Na Kristo ɔ́bla ɔmɛni kalɛ na kusɛ kusɛ ɔni na Katɔti ɔ́su úse ka wasiaku Abraham mmɔ ɔsiaku bani naaadi Yudaƒuɔ lɛnɔ kama ɔkɛnku Kristo Yesu lɛlɔ. Na ɔkɛnku bɔƒɔtaadi bɔmmɔ lɛlɔ ni, na abu lɛnɔ bɔkɛ Katɔti linyese lɛni ndi nwuna Kɔyu.

Galatiƒuɔ 3:14 Referans Kwoze

Korintoƒuɔ 1 12:13

Lɛni kani na use na abu bani ndi Yudaƒuɔ ku kadi bamba bekyuli akɔ ku bani mɔɔbla bekyuli bamba kabla ku bani mɔɔbla ama alati kabla lɛnɔ akɔ. Kɔyu kunwi kɔmmɔ kani na béti bábla-bu ntu bɔkpila ɔdi ɔmmɔ na bɔdi ɔlɔna unwi. Na Kɔyu kunwi kɔmmɔ na béte bula ƒui na bɔ́ni.

Eƒesoƒuɔ 2:18

Ɔkɛnku Kristo lɛlɔ na bula akpa anyɔ ƒui, Yudaƒuɔ ku bani naaadi Yudaƒuɔ, bɔkɛ Katɔti Kɔyu kunwi lɛlɔ búbo Katɔti anumi.

Galatiƒuɔ 3:2

Bɛya na liye-mii ɔmɛni linu. Katɔti Kɔyu kɔni na úte-mii mmɔ ni, ɔkɛnku ɔda bubo bɔni lɛlɔ na bɛɛdi ɔsu munuu ɔkɛnku litemi lɛni na bínu na bɛ́ƒɔ bɛ́di ɔsu?

Batalane Kabla 2:33

Na ɔƒaani ni, Katɔti úte-nwu kenyekɔ kenengudi na nwuna kɔdianu, na úti nwuna Kɔyu úte-nwu aani kalɛ na ɔ́su úse. Lɛni na anwu lɛnɔ ɔ́tala-ku ɔ́kya-bu. Anwuɔsu na bɛɛnu na biinú lɛla lɛni mɔɔlɛ́ mɛni.

Esekiel 11:19

Na ndubɔda bina atuɔkplu bɔbla ƒui lidie-mii lɛlɔ na lɛya na anumi eteegyie-mii kalɛ na bɛsiaku-mii kama siin na biteenu-mi litemi

Petro 1 1:22

Ka bɛɛdi litemi geen lɛmmɔ lɛlɔ na bɛ́bla lɛlɔ sɛɛn ka Katɔti úti bina ekpidi ɔ́kyiɛ-mii na bɛɛyɔ́ lɛlɔ ɔƒɛni ɔsu ni, bɛya na bina baƒɔtaadine bakpana bɔyɔ bɔkɔ katɔ bubu ku kayi ƒui.

Yohane 7:39

Mɛni ni, Kɔyu kɔni ndubɔƒɔ bekyuli bani náƒɔ-nwu bádi lɛlɔ kemmo litemi na ɔɔsu. Ɔsika úti úbedu ɔƒɛni ni, Katɔti útatala tɔ Kɔyu kɔmmɔ ɔnii kutáƒɔ-ma lɛlɔ kemmo. Ɔsika Yesu úteduo tɔ nwuna lɛga bɔdi bukeye kemmo.

Yesaia 32:15

Uwi ɔni na Unwoti ɔdubɔsɔku nwuna kɔyu ute-bu ɔsiku katɔ ni, kɔlɔ kɔkwiidi ƒui kɔdubunwini adingyii mmo bɔni adingyii ndubɔlɛ lili abla aani aku, na kalɔ kammɔ kadia geen.

Eƒesoƒuɔ 4:30

Na bitaya na Katɔti Kɔyu kúduo kɔnyana kemmo. Ɔsika Kɔyu kɔmmɔ nése-mii likpo kúse ka bɛdi Katɔti bekyuli bani ngba na ɔdubɔƒɔ na limeyi likplodi lɛmmɔ lɛlɔ.

Eƒesoƒuɔ 3:16

Muuvele Katɔti na nwuna lɛƒɔndia bukeye pii kemmo nnii ɔkya-mii ɔkplu na nwuna Kɔyu kute-mii ɔyikun na bina kayi kemmo.

Eƒesoƒuɔ 2:22

Na Kristo ɔmmɔ kemmo na baatú abu lɛnɔ aani ɔtɔ kalɛ na bunwini keliekɔ bute Katɔti na kɔyu kemmo.

Galatiƒuɔ 4:6

Ka bɔdi Katɔti bebi ɔsu ni, ɔ́tala Ubi ɔmmɔ Kɔyu ɔ́kya bula kayi kemmo. Na Kɔyu kɔmmɔ mɔɔkpali katɔ taalɔ ɔnini, “Abba” ɔni kalɔ ndi mina Ati.

Galatiƒuɔ 3:16

Linyese lɛni na Katɔti ɔ́su úse mmɔ lise lite Abraham ku ubidi. Na Bunweni Kedee Ɔku ɔmmɔ kemmo ni, Katɔti útasu ɔnii, “Abraham ku nwuna bebi.” Si ɔ́su ɔnii, “ku nwuna bebi” ni, na ɔɔtina ka bebi bammɔ bemomo. Mmomu bɔsu na ɔ́su ɔnii ku ubidi. Na ɔmɛni ɔɔtina ka ukyuli unwi pɛ. Na ukyuli ɔmmɔ ndi Kristo.

Korintoƒuɔ 2 1:22

Anwu nése-bu likpo úti ɔ́tina ka anwu mbo-bu uwi ɔni na úti nwuna Kɔyu ɔ́kya-bu lɛlɔ kemmo. Na kuna lɛlɔ na búti bula kama búkpo na ala ani ƒui na ɔ́klibi úse úte-bu lɛlɔ.

Yesaia 49:6

Unwoti ɔ́su-mi ɔnini, “Ndubo-ɔ kabla kenengudi kɔnu bɔkya butulo ka akpanku Yakob adua ammɔ ƒui ku Israelƒuɔ bani nébu eboku-mi kani. Mmomu ndubɔbla-a na enwini bukeye ete kadi bamba bekyuli ƒui kalɛ na bayawine ƒui bakɛ ngba bɔƒɔ.”

Batalane Kabla 5:32

Na abu ku Katɔti Kɔyu kɔni na Katɔti uuti teete bekyuli bani mɔɔbu-nwu ni, abu ndi ala amɛni kenye bediene.”

Batalane Kabla 4:12

Anwu lɛti ndi bekyuli Ɔƒɔne, ɔsika anwu kani na Unwoti úte lɛnyi ku ɔyikun na bekyuli ƒui akɔ ɔni makana waƒɔ-bu ngba.”

Luka 24:49

Na ami ɔlati ndubuti lɛla lɛni na Katɔti ɔ́su-mii úse limene-mii. Nsu ɔlɛka binye bɛgya Katɔti ɔyikun ɔmɛni na Yerusalem wetédu uwi ɔni na ɔyikun ɔmmɔ ɔsi katɔ ubeduo-mii lɛlɔ kemmo.”

Luka 11:13

Ina ka bɛdi alaekpidi bablane ni, bɛgyi kalɛ na biti ala abuni bite bina bebi. Amu na Ati ɔni nkya katɔ nɔɔ? Bi ɔsu na uleti nwuna Kɔyu ulete bekyuli bani muuvele-nwu?”

Sakaria 12:10

“Ami Unwoti ndubɔya na Yerusalem bebi ku bawɔ ƒui beduo kɔnyana bonwu kɔdi kemmo na bakpali-mi bevele uwi ɔni na bánu ukyuli ɔni na bátu lɛtula lɛdi. Na badubo-nwu buwulo aani kalɛ na bawɔne badi beewulo bana ubi unwi pɛ ɔni na báwɔ na úkpi iye ubi udeedi ɔni na báyila.

Esekiel 39:29

Nsɔ lɛɛɛdubo kama bunwini bɔkya mina kadi bekyuli Israelƒuɔ kudii, na mina Kɔyu kɔdubo bulieku-ma. Ami Unwoti násu.”

Yeremia 31:33

“Bunyimi bɔni na ami Katɔti mɔɔsu ka ndubo bunyimiku-ma na uwi ɔni ndubo kemmo ndi ɔmɛni. Ndubuti mina ɔda bubo lɛkya-ma kayi kemmo. Na ndubunweni-mu lɛsia-ma kasusu lɛlɔ Ndubɔbla bana Katɔti na ama lɛnɔ babla mina bekyuli.

Yesaia 52:10

Unwoti údie nwuna ɔyikun bonwu keyi ɔ́tina kadi bekyuli ƒui. Na ɔƒaani ni, ukyuli biala ɔdubɔnu ɔti bula Unwoti Katɔti ɔni mɔɔƒɔ́ ukyuli ngba.

Yesaia 41:8

“Nsu awɔ Israel, Yakob kaba, adi mina kabla ɔblane. Lɛ́ƒuna-mii na bɛdi mina ɔkpana Abraham kaba kemmo bebi.

Ala Kalɔ Buse 22:18

Na ɔkɛ ƒula kaba kemmo ni, ndubute kayawi ƒui bekyuli kusɛ kusɛ. Ɔsika énu-mi litemi na ádi-ni lɛlɔ.”

Petro 1 3:9

Biteti likpidi bitaƒɔ bani mɔɔbla-mii ekpidi kayu, iye bidumi bani muudumi-mii. Na mmomu bivele Katɔti na ute-ma keyi buɛɛ. Ɔsika ɔmɛni na Katɔti ɔɔwia ka bɛbla. Na ɔ́su bula ƒui úse ka ɔmɛni ɔsu na ɔdubute-bu keyi buɛɛ.