Israelƒuɔ Bɔlɛ 34:6 - Katɔti Ɔku Kedee

⁶ Amu na Unwoti úsie ɔ́vi Mose anumi na ɔ́su-nwu ɔnini, “Ami Unwoti ndi Katɔti ɔni mɔɔnu kɔnyana, na mɔɔbla lɛƒɔndia uwi ƒui, na neeeti kɔnyi pla pla. Mmomu mɔɔyɔ́ mina bekyuli na mɔɔbla ala ulu lɛlɔ teete-ma.

Israelƒuɔ Bɔlɛ 34:6 Referans Kwoze

Kɔgya 86:15

Nsu awɔ ni, Katɔti ɔni mɔɔnu kɔnyana na aayɔ́-bu geen na adi. Eléti kɔnyi buti buti mmomu aayɔ́-bu uwi ndi uwi na alalɛ ƒula litemi kama lɛnɔ.

Yoel 2:13

Ɔɔɔdi bina lɛwu na bɛɛní bɛbwɛ biti bɛtina ka biiwulo kɔnyana. Mmomu binwini bibo-mi kudɔ ku kayi kani muunú ɔlɛ na bina ekpidi ani na bɛ́bla lili. Mɔɔnu kɔnyana na mbo lɛƒɔndia na ndaku ukyuli lɛda. Neeeti kɔnyi buti buti. Na naaayɔ ka ntaani kɔtu lɛnɔ.

Kɔgya 145:8

Unwoti ubo lɛƒɔndia na ɔɔnu kɔnyana na uléti kɔnyi pla pla, na ɔɔyɔ́ bekyuli uwi ndi uwi.

Nehemia 9:17

Na béni ka benyimo ƒula akɔla lidu lidu ani na édie átina na bana akɔ. Na bana atuɔkplu ku bɔta bunye kemmo ni, bédie ɔtɔnkune ɔni nsɔ makpanku-ma matákya bana lɛbibo kabla kemmo. Nsu awɔ Katɔti aanu kɔnyana, na éyi ku bɔyɔ ku lɛƒɔndia, na éti bana ekpidi akyiɛ-ma. Ɔmmɔ ɔsu étenwini kama átakya-ma.

Yona 4:2

Ɔmɛni ɔsu ɔ́kpali Katɔti ɔnini, “Unwoti ɔɔɔdi ɔmɛni na lɛ́su nnii aaadubo ɔma ɔmɛni bɔkyula iye ɔ́si ɔni nkya ɔma. Ɔmɛni ɔsu na lɛ́kya ɔkplu ka likeli lisie Tarsis! Ngyi ka awɔ adi kɔnyana ɔnune Katɔti na ebo kayi buɛɛ uwi ndi uwi, na aakana tavumana ƒula kasusu uwi biala kemmo kalɛ na aláni ukyuli kɔtu lɛnɔ.

Kɔgya 86:5

Aabla-bu lɛƒɔndia, na eeti ekpidi taakyiɛ na bani ƒui mɔɔkpali-ɔ ni, aayɔ́-ma uwi ndi uwi geen.

Ala Alɛdi 2 30:9

“Na bekisine bani néƒie bina lɛlɔ bekyuli badi bátɔlɔku ni, badubɔya na basɔ benwini bebo ɔma. Unwoti Katɔti ubo lɛƒɔndia na ɔɔnu kɔnyana. Na si bínwini bíbo-nwu kudɔ ni, ɔsɔ ɔɔɔdubo nwuna kama bunwini bɔkya-mii kudii.”

Mika 7:18

Unwoti Katɔti, beleti baƒiɔ badi balákɔku-ɔ, ɔsika eeti likpidi taakyiɛ abu ƒula bekyuli baƒunadi ɛlɛɛ bani nébu, na eléti kɔnyi taakya-bu uwi ƒui, mmomu aayɔ́-bu uwi ndi uwi.

Lɛkpa Ulu 5:10

Nsu mɔɔbla lɛƒɔndia teete nkyuli ɛlɛ ɛlɛ bani mɔɔyɔ́-mi na baadi mina ɔda bubo lɛlɔ.

Kɔgya 138:2

Ndububoku lɛlɔ kalɔ na liti mina anumi lɛtina ƒula kakpakɔ kedee na limwi-ɔ lɛnyi, ɔsika aayɔ́-bu uwi ndi uwi na asia ƒula litemi kama. Na édie átina ka ƒula lɛnyi ku ƒula ɔda bubo bɔ́kɔ katɔ ƒui butulo lɛla ndi lɛla.

Kɔgya 116:5

Unwoti ɔɔnu kɔnyana na use siin. Bula Katɔti ɔɔnu kɔnyana.

Kɔgya 108:4

Unwoti, kalɛ na aayɔ́ bekyuli uwi biala ku kalɛ na aadi ƒula litemi lɛlɔ úbomo geen aani kalɛ na bɔɔnu kalɛ na kayaa kébomo.

Romaƒuɔ 2:4

Munuu bɛɛbu bɛnii keeke na Katɔti ɔɔbla-bu kaƒɔbuni na ɔɔkɛ́ kayi na uuwiku-bu lɛlɔ? Bɛti geen ka ni, Katɔti ɔɔbla-bu lɛƒɔndia lɛmɛni ɔsika ɔɔwia ka ubunku-bu na bunwini kayi.

Kɔgya 111:4

Na kalɛ na nwuna ablala ammɔ ébomo ɔsu ni, ɔ́ya na bulayiƒala-nya kudii. Unwoti ubo lɛƒɔndia na ɔɔnu kɔnyana lɛnɔ.

Kɔgya 112:4

Na bani ƒui mɔɔbla ala ulu lɛlɔ ni, badubɔnu bukeye na kesii kani na lɛdisa lɛkya. Ɔsika baabla lɛƒɔndia na baanu bekyuli kɔnyana na bese siin.

Kɔgya 57:10

Unwoti, kalɛ na aayɔ́ bekyuli uwi biala ku kalɛ na aadi ƒula litemi lɛlɔ úbomo geen aani kalɛ na bɔɔnu ka kayaa kébomo.

Israelƒuɔ Bɔlɛ 22:27

Ɔsika aku kani na ubo na uuti taabɛ kɔyɔ. Na si éteti étete-nwu ni, bi na uti ubi lɛlɔ usien? Na si áyu atuɔkplu na úwulo ɔ́kpali-mi ni, ndubunu-nwu bɔkpali. Ɔsika ndi Katɔti ɔni mbo kaƒɔ bɔkywi.

Mika 7:20

Adubo ƒula litemi kama bɔsia siin na alálɛ bula Nana Yakob ku Abraham kama kudii aani kalɛ na ése bula bati kuuku kenye ése uwi ɔni návi kukuuku kemmo.

Kɔnyana Buwulo 3:23

Unwoti ɔdi ukyuli ɔni lɛlɔ na basia anu ka ɔdubɔnu-bu kɔnyana ɔtanta biala.

Yohane 1:17

Ɔsika kudeedi ni, Katɔti ɔkɛ Mose lɛlɔ úte-bu nwuna ɔda bubo. Nsu ɔkɛ Yesu Kristo lɛlɔ úte-bu lɛƒɔndia lɛmɛni ku litemi geen.

Kɔgya 91:4

Ɔdububi-ɔ ala aani kalɛ na akɔkɔ uubi nwuna bebi avwi na akɛ kabɛkɔ. Na kalɛ na ɔɔsia nwuna litemi kama siin ɔsu ni, ɔdubo-ɔ bɔgyumana na ukpo ute-ɔ.

Kɔgya 31:19

Áklibi ala abuni geen ése bekyuli bani mɔɔbu-ɔ na békeli bábatamiku-ɔ. Na adubuti-nya ete-ma na bekyuli ƒui anumi.

Yesaia 12:4

Na Unwoti limeyi lɛmmɔ lɛlɔ ni, bɛdubɔsu bɛnii, “Bimwi Unwoti lɛnyi na bɛkpali-nwu lɛnyi bivele ala. Na bibo nwuna ala ebendi ani na ɔ́bla kudu bite kadi ƒui, na bati ka Unwoti lɛnyi lɛ́kɔ katɔ katɔ ƒui.

Kɔgya 111:8

Bɔdi litemi geen lɛni ndubunye siin bute uwi ƒui.

Baga 1 19:11

Amu na Unwoti údie kenye ɔnini, “Lɛ ténye kɔbi kɔmmɔ lɛlɔ na Unwoti anumi. Ɔsika Unwoti ɔdubo ubasia mmɔ ɔvi.” Amu na ɔƒɛƒɛɛ ubendi ɔdi úkpo, na úle kɔbi kɔmmɔ kemmo inyɔ, na úgyingya atakpɛ ammɔ na Unwoti anumi. Nsu Unwoti uuubo ɔƒɛƒɛɛ ɔmmɔ kemmo. Na ɔƒɛƒɛɛ ɔmmɔ kama ni, kalɔ kákunku, nsu Unwoti uuubo kalɔ bɔkunku bɔmmɔ kemmo.

Kɔgya 146:6

Anwu nédie kalɔ kammɔ ƒui ku ɛpu ku ala ani ƒui nkya-nya kemmo, na ɔɔdi nwuna litemi lɛlɔ uwi biala.

Yakobo 5:11

Bɔɔlɔ-ma bekyuli bani lɛlɔ lɛ́yɔ-ma ka bénye lɛbibo biala kenye ɔsu. Bínu kalɛ na Hiob ɔ́kɛ kayi ku kalɛ na Katɔti ɔ́ƒɔ-nwu kayu na kawɔlɔkɔ. Ɔsika Blɔti ubo kaƒɔ buni na ɔɔnu kɔnyana.

Israelƒuɔ Bɔlɛ 20:5

Na tebo kalɔ takya baƒiɔ badi lili kalɔ iye akpa ɔdi. Ɔsika ndi bina Unwoti Katɔti ɔni muukpó kɔgyulo, na mɔɔní bekyuli bani muukisi-mii kɔtu ɔ́si bati ku bebi lɛlɔ útédu kaba katɛdi ku kenedi lɛlɔ.

Israelƒuɔ Bɔlɛ 33:19

Amu na Unwoti údie kenye ɔnini, “Ndubɔya na mina bukeye bɔvi ƒula anumi. Na si mɔɔví ni, ndubɔlɔ mina lɛnyi kedee nnii Unwoti. Na ukyuli ɔni litemi mɔɔyɔ́ ni, ndubɔnu-nwu kɔnyana. Na ukyuli ɔni mɔɔyɔ́ lɛnɔ ni, ndubɔbla-nwu lɛƒɔndia.

Lɛkpa Ulu 4:31

Ɔsika Katɔti ubo lɛƒɔndia na ulada-mii ulanyonu iye ɔyila-mii udu na ulayiƒala bunyimi bɔni na anwu ɔlati únyimi ku bina bati kuuku.

Lɛkpa Ulu 32:3

Ndubumwi Unwoti lɛnyi, na nwuna bekyuli badubɔsu nwuna ala ebendi ani na ɔɔbla.

Baga 1 8:30

Anwuɔsu nu ƒula kabla ɔblane ku Israelƒuɔ bɔkpali si bénye mɛni bákpali-ɔ. Na enu asiku katɔ, kesii kani ndi ƒula keliekɔ. Na si enu ni, na eti bana ekpidi akyiɛ-ma.

Etemila 8:11

Si bɔ́nu kalɛ na bekyuli bekpidi benye baabla likyulikpi ala taasia kama na balakɛ lɛtuni lɛdi ni, na ɔɔbla-bu aani abu lɛnɔ buse kalɔ buteelie ngba bɔmmɔ udu.

Yesaia 65:16

Ami kani ndi Katɔti ɔni lɛlɔ na ukyuli ɔdubɔkana na ɔsia lɛnu. Ala ani na ékpoku-mii dii ƒui ávi ni, ami nsɔ neeeti-nya lɛlɔ kasusu. Si biivele kusɛ kusɛ teete ukyuli ɔdi iye biisé kenye kadi ni, bɛbla lɛla biala na mina lɛnyi kemmo. Ami lɛti kani ndi Katɔti ɔni kani na ukyuli ɔsia lɛnu.

Yeremia 9:24

Na ukyuli ɔni mɔɔkun lɛmɛnɛ ni, ɔnu ka nwuna kasusu kese-nwu nwaa na ɔsiaku ami Unwoti. Na lɛla lɛni na mɔɔyɔ́ teetulo ƒui ndi lɛƒɔndia bɔbla ku etemila bɔtɛ siin ku bekyuli kɔnyana bɔnu na kalɔ kammɔ ƒui lɛlɔ.

Yeremia 32:18

Aanu kaba bekyuli mpim mpim kɔnyana. Na lɛni kani na aaní bekyuli kɔtu na bana bawɔne ekpidi ani na bábla ɔsu. Awɔ ndi Unwoti Ɔyikune Ƒui.

Nahum 1:3

Unwoti use buɛɛ na uleyile kɔnyi buti, nsu ubo ɔyikun. Anwuɔsu bani ƒui mɔɔƒiɔ́-nwu ni, ɔɔnu ka ɔ́ni-ma kɔtu, na ɔdi ulekeli lɛtuni lɛmmɔ. Nwuna ablala eedie lɛlɔ keyi na ɔƒɛƒɛɛ kpakplaa ɔni mɔɔkya ligede kemmo. Na nwuna lɛgba kalɔ ɔtumu ndi liƒlukutu lɛni bɔɔnu.

Ala Kalɔ Buse 24:27

Na ɔ́su ɔnini, “Bemwi Unwoti mina ɔtɔlati Abraham Katɔti. Ɔsika útayiƒala kalɛ na ɔɔnu mina ɔtɔlati kɔnyana ku kalɛ na ɔɔdi nwuna etemila ani na ɔ́su-nwu úse lɛlɔ teete-nwu. Na ami ni, Unwoti Katɔti ɔ́tɔnku-mi na lísie ulu ɔmɛni ńtédu mina ɔtɔlati lɛlɔ bekyuli kudɔ.”

Bumomo Bɔka 12:8

Mɔɔtɛmi ku anwu anumi ku anumi, na ɔɔɔdi agyolo kemmo, mmomu atɛ nwaa kemmo, na ɔɔnu kalɛ na Unwoti use ku nwuna anumi. Na bi ɔsu na bítayia ka bɛsu lɛla lɛdi na bɛ́ta bínye mina kabla ɔblane Mose lɛlɔ?”

Samuel 2 24:14

Amu na Dawid ɔ́su ɔnini, “Liƒu bonwu lɛla lɛdi mɛni, na kayi kaakpulu-mi. Nu, si Unwoti ɔlati ɔ́ni-bu kɔtu ni, ɔdia utulo, ɔsika ɔɔnu kɔnyana na ɔdia utulo ka liduo bekyuli lɛkɔkɔ.”

Agba 3:3

Tanyonu lɛƒɔndia bɔbla ku litemi kama bɔsiaku siin. Ti ala amɛni bo bala ƒula limɔ na aya na akɛ keliekɔ na ƒula kayi kemmo.