Israelƒuɔ Bɔlɛ 20:5 - Katɔti Ɔku Kedee

⁵ Na tebo kalɔ takya baƒiɔ badi lili kalɔ iye akpa ɔdi. Ɔsika ndi bina Unwoti Katɔti ɔni muukpó kɔgyulo, na mɔɔní bekyuli bani muukisi-mii kɔtu ɔ́si bati ku bebi lɛlɔ útédu kaba katɛdi ku kenedi lɛlɔ.

Israelƒuɔ Bɔlɛ 20:5 Referans Kwoze

Bumomo Bɔka 14:18

‘Ami Unwoti ndi Katɔti ɔni mɔɔnu kɔnyana, na mɔɔbla lɛƒɔndia uwi ƒui, na neeeti kɔnyi pla pla. Mmomu mɔɔyɔ́ mina bekyuli na muuti bani nénwini kama bákya bana ulikplu ala ku bani mɔɔta teenye-mi lɛlɔ ku ekpidi ƒui taakyiɛ. Nsu mɔɔní bekyuli bani mɔɔƒiɔ́-mi ƒui kɔtu. Naaayiƒala kudii ka lɛni bana bebi ku bawɔ kɔtu utédu kaba katɛdi ku kenedi lɛlɔ ɔ́si ekpidi ani na bana bawɔne bábla ɔsu.’

Lɛkpa Ulu 5:9

Na tebo kalɔ takya baƒiɔ badi lili kalɔ iye akpa ɔdi. Ɔsika ndi bina Unwoti Katɔti ɔni muukpó kɔgyulo. Na mɔɔní bekyuli bani muukisi-mii kɔtu ɔ́si bati ku bebi lɛlɔ útédu kaba katɛdi ku kenedi lɛlɔ.

Lɛkpa Ulu 4:24

Ɔsika si bɛ́bla lɛni ni, bina Unwoti Katɔti ɔdubuti kɔnyi. Ɔsika uukpó kogyulo na use aani Ogya na ɔkana na ɔkyula-mii.

Israelƒuɔ Bɔlɛ 34:14

Na takpa ɔti ɔdi tebunku ami Unwoti lɛti pɛ. Ɔsika ami Unwoti muukpó kogyulo.

Yosua 24:19

Amu na Yosua ɔ́su Israelƒuɔ ɔnini, “Ngyi ka bilakana Unwoti bɔɔsiaku, ɔsika ɔdi Katɔti ɔni nse kedee na uukpó kogyulo na si bɛ́ta binye-nwu lɛlɔ ni, uleti bina ekpidi ulakyiɛ-mii.

Kɔgya 109:14

Unwoti unyimo nwuna bati kuuku ekpidi na uteti uni ekpidi utakyiɛ-nwu.

Yosua 23:7

Biteti lɛlɔ bitasala ku kadi bamba bekyuli bani nkya mmɔ akɔ, na bitakpali bana baƒiɔ bani na baakpa anyi, na bitese kenye kadi na bana baƒiɔ bammɔ badi kudɔ na bitakpa-ma iye bitalɛ-ma akɔnkɔ kalɔ.

Lɛkpa Ulu 6:15

Na si bɛ́yu atuɔkplu na bɛkya bɛɛkpá baƒiɔ bammɔ badi ni, Katɔti kɔnyi kɔdubo-mii lɛlɔ aani ogya na ɔdubɔkyula-mii na ɔyila bina udu ƒui ɔlɛku kalɔ kammɔ lɛlɔ. Ɔsika Bina Katɔti ɔdi Katɔti ɔni muukpó kogyulo.

Nahum 1:2

Unwoti ɔdi Katɔti ɔni naaawia ka ukyuli ɔdi ukpoku-nwu kogyulo, mmomu ɔɔwia ka badi nwuna litemi lɛlɔ siin. Na ɔɔƒɔ nwuna bekisine kayu teedie-ma kasi na kɔnyi kemmo.

Yeremia 32:18

Aanu kaba bekyuli mpim mpim kɔnyana. Na lɛni kani na aaní bekyuli kɔtu na bana bawɔne ekpidi ani na bábla ɔsu. Awɔ ndi Unwoti Ɔyikune Ƒui.

Bumomo Bɔka 14:33

Na bina bebi badubo abi bubo na bataaka taamana kalɔ kakwiidi kamɛni kemmo akwa aavlene sɔɔn útédu ka bina ƒui bíkpi bɛ́sa.

Kɔgya 79:8

Teti bula bati kuuku ekpidi tani-bu kɔtu. Mmomu bo pla na abanu-bu kɔnyana, ɔsika bɔsɔ buuubo lɛnunsia lɛdi na bɔɔɔgyi lɛla lɛni na bɔbla.

Israelƒuɔ Bɔlɛ 23:24

Na bitakya lili kalɔ bitete bana baƒiɔ na bitaabla-ma kabla, na bitasiaku bana ɔbladu kama lɛnɔ. Ɔlɛka bɛbwɛ bana baƒiɔ ku bana atabi kedee ammɔ ƒui kpɛtɛ kpɛtɛ.

Yakobo 4:4

Bɛdi bekyuli bani na biládi Katɔti ɔda bubo lɛlɔ. Bɛɛɛgyi ka si bɛ́bi bɛsiaku kayawi ala ni, bíti lɛlɔ bínwini Katɔti bekisine? Na ukyuli biala ɔni meti kayawi ala aani nwuna ɔkpana ni, ɔdi ukisine ute Katɔti.

Romaƒuɔ 8:7

Na ukyuli ɔni kasusu nsia ɔlɔna ala kani lɛlɔ ni, ɔdi ukisine ute Katɔti, ɔsika uládi Katɔti ɔda bubo lɛlɔ. Na sɔsɔ geen ni, ulakana-mu lɛlɔ bɔdi lɛnɔ kudii.

Romaƒuɔ 1:30

Na beetemi enyekpi na bana bakpana lɛlɔ. Badi bekyuli bani muukisi Katɔti. Beedumi lɛlɔ, na baatina lɛlɔ, na baakun lɛmɛnɛ. Na baawia likpidi lilu lɛbambadi pii. Na balábu bana bawɔne.

Yeremia 2:9

“Anwuɔsu nsɔ ndubo-mii kɔtɔ bɔdu. Lɛni na ami Unwoti mɔɔsu. Na ndubɔdu bina bawɔ bawɔ lɛnɔ kɔtɔ.

Yesaia 44:19

Beeebo kasusu kani na bati beye lɛlɔ banini, “Ligyiiku lɛmɛni kakɛ kani na líti lɛ́kya ogya líƒulo adila ku lɛna na kakɛ kakladi na líti lɛ́nwi lɛla lɛni neeebo kalɔ na lɛɛɛdi lɛla lɛdi mɛni. Bi ɔsu na ɔlɛka ntaabu ligyiiku?”

Yesaia 44:15

Egyii ammɔ kakɛ kadi na beeti taakya ogya na eete liwulu iye baanwá adila. Na likuku lɛkladi na ɔnwine uuti taanwi baƒiɔ bani na ɔɔkya lili kalɔ teete ɔnii ɔɔbu.

Kɔgya 81:15

Na bani muukisi-mi ƒui badubɔkya lili kalɔ bete-mi na bataayia-mi na bana kɔtu bɔni lɛnɔ buse bute-ma uwi ƒui.

Hiob 5:4

Na nwuna bebi basɔ balákɛ ukyuli ɔni medie-ma kenye na litemi katɛkɔ.

Baga 2 23:26

Nsu Unwoti kɔnyi kúbakɔ na Yudaƒuɔ lɛlɔ ɔ́si lɛla lɛni na Manase ɔ́bla ɔ́su, na kɔnyi kútebo kalɔ.

Baga 2 17:35

Uwi ɔni na Unwoti únyimiku Israelƒuɔ bunyimi bɔni nkya-ma ntɛ ni, úbo-ma ɔda ɔnii, “Bitakpa baƒiɔ bamba badi na bitakya lili kalɔ bitete-ma na bitabla-ma kabla kadi na bitabla akpala adi bitete-ma.

Baga 1 21:29

“Ánu áti kalɛ na Ahab úboku lɛlɔ kalɔ na mina anumi? Ɔ́si lɛla lɛni na ɔ́bla mɛni ɔsu ni, lɛɛɛdubo ɔgbankpi ɔdi buti buboku-nwu lɛlɔ na nwuna ngba uwi. Mmomu ndubɔya na ɔgbankpi ɔmmɔ ɔlɛ nwuna kaduli na ubidi uwi.”

Samuel 2 21:6

buuvele ka ete-bu nwuna bananabi maatɛ na bɔdu-ma na buti-ma bɔƒala Katɔti anumi na Gibea Saul ɔma unengudi kemmo.” Ɔmmɔ ɔsu Ɔga Dawid lɛnɔ ɔ́su ɔnini, “Ndubute-mii bekyuli bammɔ.”

Samuel 2 21:1

Uwi ɔni na Dawid ɔɔdi lɛga ni, kɔka kɔdi kúbo kalɔ kammɔ ƒui lɛlɔ kɔ́siaku lɛlɔ akwa atɛ sɔɔn, ɔmmɔ ɔsu Dawid úye Unwoti kasusu únu. Amu na Unwoti ɔ́su-nwu ɔnini, “Ɔɔɔdi keeke na ɔɔlɛ́ lɛni, mmomu ɔkɛnku Saul ku nwuna kaduli bekyuli ubugya ɔni na béwi kalɔ na bádu Gibeonƒuɔ pii lɛnɔ ɔsu.”

Lɛkpa Ulu 32:21

Baƒiɔ bani na bábla ɔ́ya na líti kɔnyi lɛ́kya-ma. Na muukpó kogyulo ku bana baƒiɔ bani naaadi ku lɛla mmɔ sɔsɔ. Anwuɔsu ndubuti kadi bekyuli bani naaadi lɛla lɛdi lɛkya-ma kɔnyi. Na ndubɔya na bana bekisine babla bekyuli geen.

Lɛkpa Ulu 7:10

Nsu bani muukisi-nwu ni, ulenye taanu-ma gyɔlɔɔ mmomu uudie taalɛ-ma anumi ku anumi na ɔyila-ma udu kɔnakunwi.

Lewiƒuɔ Ɔda Bubo 26:29

Na bɛdubɔdu bina bebi bananabi ku belekubi muedi bɛkun.

Lewiƒuɔ Ɔda Bubo 26:1

“ ‘Ɔdi utavɔ baƒiɔ badi iye use lɛtabi lɛdi iye ɔnwi lɛtabi lɛdi ɔbla-ni kedee use lɛlɔ utaakpa na kalɔ kani lɛlɔ bísela bitélie mmɔ lɛlɔ. Ami ndi bina Unwoti Katɔti.

Lewiƒuɔ Ɔda Bubo 20:5

na ami Unwoti ɔlati ndubuti mina lɛnumi lɛlɛ ukyuli ɔmmɔ ku nwuna kaduli bekyuli lɛlɔ na likulo-ma lidie bina akɔ. Ndubukulo ukyuli ɔmmɔ lidie-mii akɔ ku bani ƒui nsiaku-nwu na béti lɛlɔ bénwini aani bayalɛ na básiaku Molek baƒiɔ bammɔ.

Korintoƒuɔ 1 10:22

Munuu bɛɛyɔ́ ka Blɔti uti nwuna kɔnyi ɔkya-bu? Bitaya bɔkali bɔnii bubo ɔyikun butulo-nwu.

Yohane 15:18

“Si kayawi bekyuli beekisi-mii ni, bɛti kɔnakunwi ka ami na báka bukisi lɛni.

Yohane 7:7

Kayawi kalakana amii bukisi. Nsu keekisi ami, ɔsika muudie taasu kede kede ka bayawine ablala adi likpidi.

Mateo 4:9

Na ɔ́su Yesu ɔnini, “Si álɛ akɔnkɔ na émwi-mi ni, ndubuti ala amɛni ƒui lite-ɔ.”

Daniel 1:2

Unwoti ɔ́ya na ɔ́di lɛlɔ na úƒie Yehoiakim ɔ́tɔlɔku, na úti ala adi bene ani beeti taabla kabla na Katɔti kakpakɔ lɛnɔ ɔ́tɔlɔku. Na uwi ɔni na Babilon ɔga ɔmmɔ ɔ́sɔ únwini úsie Babilon ni, úti ala ammɔ útése ɔtɔ na nwuna baƒiɔ kakpakɔ.

Esekiel 8:3

Na lɛ́nu aani si kɔnu na údie na ɔ́da-mi linwini. Na mina kɔyu kemmo ala bɔnu bɔmmɔ kemmo ni, Unwoti Kɔyu kútiku-mi kúsienku kayaa na úti-mi úsienku Yerusalem. Kɔyu kɔmmɔ kúti-mi kúsienku kakpakɔ kaduli geen kemmo na ɔban kayakun kani nkya kɔtɔ kakɛ mmɔ. Na lɛ́nu ka bávɔ baƒiɔ badi bálɛ bani muusé Unwoti lɛlɔ na ɔ́ya na úti kɔnyi kpakplaa geen.

Agba 8:36

Nsu bekyuli bani na báyii ulu na bátanu-mi ni, bábla lɛlɔ kalala. Na bani muukisi-mi ni, bati ka kukpi na baayɔ́.”

Kɔgya 78:58

Ɔsika bákya-nwu kɔnyi geen na baƒiɔ akpabi ani na bátu bényene abi eli ɔsu. Na báya na uukpó kogyulo ka baakpá-ma.

Hiob 21:19

Na aasu-mi ɔƒɛni anini, ‘Katɔti ɔɔní alaekpidi bablane bammɔ bebi kɔtu na bana bawɔne kenye.’ Bɔsu na ami nda nnini, ‘Ɔlɛka ɔni alaekpidi bablane bammɔ kɔtu ama alati utédu kesii kani na wayu-ma ɔlɛ kaduɛ.’

Ala Alɛdi 2 25:14

Uwi ɔni na Amasia úsie útádi Edomƒuɔ lɛlɔ na kekpokɔ ɔ́wɔlɔ ni, úti bana báƒiɔ ala anwidi ku avɔdi ɔ́tɔlɔku úboku Yerusalem. Mmɔ na úbese-ma na ɔɔkpá-ma na ɔɔkya lili kalɔ teete-ma.

Baga 2 17:41

Na ina ka bekyuli baakpá Unwoti ni, bamu bakya baabla kabla teete bana baƒiɔ. Na úti úbedu ɔmwi kadi kamɛni lɛlɔ ni, bana bebi ku bawɔ lɛnɔ bámu bakya baabla ala ani na bana bati bábla.

Litemi Batɛne 2:19

Nsu si litemi ɔtɛne ɔmmɔ ɔ́nya úkpi ni, na bekyuli bammɔ ƒui beenwíni teesie bana ɔbladu ukpidi ɔni ntulo bana bati ɔdi ɔni bátaabla kemmo. Na baasiaku baƒiɔ kama na baakpá-ma na baabla-ma kabla. Na beení ka bedie bana ɔbladu buɛ ku atuɔkplu atu.

Yosua 23:16

Nsu si bɛ́ta bínye Unwoti Katɔti bunyimi bɔni unyimiku-mii lɛlɔ na bísie bɛɛkpá baƒiɔ badi ni, ɔdubuti kɔnyi ɔkya-mii na ɔyila bina ƒui udu kɔnakunwi na kalɔ kabunidi kani na úti úte-mii mɛni kemmo.”

Lɛkpa Ulu 32:41

ndubo mina kewii kani mɔɔda ku ogya bɔdɔ, na liti lɛƒɔ mina bekisine kayu na lɛni bani muukisi-mi kɔtu uti utédu ka lɛbla lɛla biala na ulu lɛlɔ.

Yohane 9:2

Mmɔ na nwuna basiakune béye-nwu banini, “Ala ɔtinane, ɔma ekpidi náya na ɔnana ɔmɛni anumi ábwɛ asa na báwɔ-nwu? Anwu ɔlati ekpidi ɔsu, munuu nwuna bawɔne ekpidi ɔsu?”

Lɛkpa Ulu 5:10

Nsu mɔɔbla lɛƒɔndia teete nkyuli ɛlɛ ɛlɛ bani mɔɔyɔ́-mi na baadi mina ɔda bubo lɛlɔ.

Baga 1 19:10

Amu na Elia údie kenye ɔnini, “Lɛ́sia anu kpakplaa na lɛ́kpa Unwoti Ɔyikune Ƒui uwi biala. Na Israelƒuɔ béni ƒula bunyimi na bábwɛ ƒula akpabi. Na bádu ƒula kenye bediene ƒui ku lɛkɛɛ, na ami lɛti nébu. Na ɔƒaani benye baawia kuƒi ka badu ami lɛnɔ.”

Esekiel 18:19

“Ngyi ka lɛla lɛni ɔsu na balani ubi kɔtu na ɔti alaekpidi lili ɔdi lɛla lɛni ndubo-ɔ bɔbla kalɛ kadi. Na ani ndi ka ubi ɔmmɔ ɔɔbla lɛla lɛni ndi ulu na ɔɔdi mina ɔda bubo lɛlɔ.

Esekiel 20:7

Lɛ́su-ma nnii bebo baƒiɔ bani na bada baavínku na beesé lɛlɔ mmɔ bevaakun na bada Egyipteƒuɔ baƒiɔ bammɔ bene bɔkpa baya. Na línyimene-ma lɛnɔ ka ami ndi Unwoti Katɔti ɔni kani nátɔnku-ma mmɔ.

Esekiel 39:25

“Ɔƒaani ni, ndubo Israelƒuɔ kɔnyana bɔnu na lɛkpanku-ma lɛsiku baƒɔ lɛma lɛni kemmo na bákya mmɔ lɛsɔku liboku bana kalɔ lɛlɔ. Ɔsika Yakob bebi ku bawɔ na badi, anwuɔsu ndubute-ma kusɛ kusɛ na lɛtina-ma ka nse kedee.

Bumomo Bɔka 25:11

“Ɔsi lɛla lɛni na Pinehas ɔ́bla mɛni ɔsu mina kɔnyi kenye káyɔ na Israelƒuɔ bamɛni lɛlɔ. Ɔsika údie ɔ́tina ka utalɛka ukyuli ɔdi ɔkpa bamba utulo ami Unwoti. Na ɔmɛni ɔsu lɛ́sɔ ńteti kɔnyi na lɛyila-ma udu.

Baga 2 5:18

Nsu muuvele Unwoti ka uti likpidi lɛmɛni ɔkyiɛ ami nwuna kabla ɔblane, ɔsika si ndanku mina unengu na úduo Rimon koƒiodu na ukpo-mi lɛlɔ na úboku lili kalɔ na koƒiodu mmɔ ni, ɔlɛka ami lɛnɔ liboku lili kalɔ. Anwuɔsu Unwoti uti likpidi lɛmmɔ ani ɔkyiɛ-mi.”

Baga 2 5:27

Na ɔ́si lɛla lɛni ábla mɛni ɔsu ni, Naaman ɔlɛgyie ɔmɛni ɔdububo awɔ ku ƒula kaba bekyuli ƒui ɔ́si ɔƒɛni úsela uwi ƒui kemmo.” Na ka Gehasi ɔ́tɔlɔ mmɔ ni, ɔlɛ ɔmmɔ úbewi-nwu ɔlɔna lɛlɔ. Na nwuna ɔlɔna ɔ́bla ƒututuu aani etubankɛ.

Ala Alɛdi 2 7:19

“Nsu si awɔ iye Israel kadi bekyuli bammɔ akɔ ɔdi úse kalɔ ɔɔkpá baƒiɔ bani na kadi bamba bekyuli baakpá mmɔ ni,

Esekiel 18:2

“Esekiel, muunú Israelƒuɔ lɛsugba kukuuku lɛdi lɛni na ɔdi biala ɔɔsu ɔnini, ‘Ebi ekpidi ani na bawɔne bádi ni, nyana ɔdu mɔɔƒɔ́ lɛlɔ taakya bana bebi nnye kemmo.’

Daniel 3:18

Nsu si ina útabla lɛni muedi ni, abu bɔmu bunye kpakplaa ka bulakya lili kalɔ bulete ƒula baƒiɔ sika ugyiedi lɛtabi lɛni na átu ényene mmɔ.”