Israelƒuɔ Bɔlɛ 15:16 - Katɔti Ɔku Kedee

¹⁶ Liƒu ku bɔyia geen ndubo bekyuli bamɛni bɔda. O, Unwoti, ɔkɛnku ƒula ɔyikun ɔsu ni, badubo bɔsinsi bunye aani lɛtakpɛ, úti útédu ka awɔ Unwoti ásia ávi, na ƒula bekyuli bani na édie adanku bávi bátɔlɔ.

Israelƒuɔ Bɔlɛ 15:16 Referans Kwoze

Kɔgya 74:2

Tayiƒala ƒula kadi bekyuli bani na awɔ ɔlati áƒuna na édie-ma ése aani kaba bekyuli bani ndubɔdi ƒula ala. Kali nu Sion Kɔbi kesii kani na ábla na ɔdi ƒula keliekɔ dii.

Lɛkpa Ulu 2:25

Na mɔɔsu-mii nnii ɔ́si ɔmwi ni, ndubuse kalɔ liti liƒu ntaakya kadi biala nkya ɔƒɛ kalɔ lɛlɔ kemmo na amii ɔsu. Badubuteenu bina lɛlɔ litemi na liƒu libendi lɛdubo-ma bɔda na amii ɔsu.”

Samuel 1 25:37

Amu ka kadi kégye ni, Abigail ɔ́sɔku ala ani ƒui nálɛ ɔ́su Nabal. Na ka únu-nya lɛnɔ ni, kayi kékulo-nwu na ɔ́gyini unye aani lɛtabi.

Yosua 2:9

“Ngyi ka Unwoti úuti kalɔ kamɛni úte-mii. Ɔsika ukyuli biala ɔni nkya kalɔ kamɛni kemmo ɔtɔtɔ ɔɔgyú-nwu geen ɔ́si amii ɔsu.

Petro 2 2:1

Kalɛ na ɔkɔ kenye bediene bákya uwi ɔni návi ni, lɛni kani na ɔkɔ ala batinane bammɔ udu badubɔkya-mii akɔ. Badubo ɔkɔ bɔnyi bɔtina ala na ulu ɔni lɛlɔ na ɔdi ka bekyuli basia bada bana ngba lɛlɔ. Nsu ɔmmɔ ɔdubɔya na bekyuli bayii. Na badubuni ala ƒui lɛlɔ ɔdine Blɔti ɔni nédie-ma ɔ́lɛku bana ekpidi kemmo. Na ɔmmɔ ndubɔyila-ma udu.

Petro 1 2:9

Nsu amii ni, bɛdi bekyuli bani na Katɔti ɔ́ƒuna. Na bɛdi bakpane bani muumwi Katɔti ɔni ndi Ɔga. Bɛdi Katɔti bekyuli kedee bani na ɔ́lɔ ɔnii binwini anwu badi. Na amii ndubo nwuna ablala ebendi kudu bubo. Ɔsika anwu geen nálɔ-mii ɔ́lɛku likpidi lɛdisa kemmo úsienku ngba bɔƒɔ bukeye kemmo.

Tito 2:14

Úti lɛlɔ úte na bula lili kalɛ na udie-bu na likpidi biala kemmo na bɔbla bekyuli kedee bani ndi nwuna badi kani, na baawia ka bataabla lɛbuni.

Yeremia 31:11

Ndubo-ma budie bɔsiku bana bekisine bani ndubɔkana na badi-ma lɛlɔ enu kemmo.

Lɛkpa Ulu 11:25

Na kesi kesii bísela ni, bina Unwoti Katɔti ɔdubɔya na bekyuli bani nlie kɔlɔ kɔmmɔ lɛlɔ bayia-mii geen aani kalɛ na ɔ́su úse. Na uláya na ukyuli ɔdi unye utile-mii ulu.

Israelƒuɔ Bɔlɛ 11:7

Nsu Israelƒuɔ keliekɔ aka ni, akpewe ina unwi muedi ulébo kudu na ukyuli iye ebuo ɔdi ɔsu.’ Na mmɔ na adubo bɔnu bɔti ka ami ɔni ndi Unwoti mɔɔkya kavumana Egyipteƒuɔ ku Israelƒuɔ ntɛ.

Batalane Kabla 20:28

Ɔmɛni ɔsu ni, binye lɛlɔ kagyumana. Katɔti Kɔyu nábla-mii batɔnkune ɔnii bɛda nwuna bebi bani na Katɔti úti úte-mii bɔda kɔkɔɔkɔ. Bɛda-ma kaduɛ, ɔsika Katɔti úwi Ubidi ubugya kalɔ úti udie-ma lili.

Yesaia 51:10

Na awɔ kani náya na ɛpu ntu bɔ́kwii na kalɔ kekpludi kálɛ na ƒula kadi bekyuli bani na édie bákɛ ulu básia mmɔ bálɛ.

Samuel 2 7:23

Na bekyuli badi lɛnɔ beeese aani ƒula kadi bekyuli Israelƒuɔ kalɛ na kalɔ kamɛni lɛlɔ. Ama kani na awɔ Katɔti étédie álɛku Egyipteƒuɔ lɛlɔ bɔdi kalɔ éte lɛlɔ na bénwini ƒula kadi bekyuli. Na ƒula lɛnyi lɛ́ƒɔ kuye na ábla ala enengudi éte-bu ku akɔla ala budie taatina ani mɔɔda bekyuli liƒu. Na ábɔku kadi bamba bekyuli ku bana baƒiɔ álɛku bana kuliekɔ na bana kalɔ kénwini abu Israelƒuɔ bati kadi.

Samuel 1 2:9

Ɔdubɔgyumana nwuna bekyuli kedee ƒui na bana kɔvinkɔ. Nsu balalane ni, badubo bɔyi bɔkya lɛdisa kemmo na bayii ku udu. Ukyuli ulélie ngba ɔkɛnku anwu ɔlati ɔyikun lɛlɔ.

Lɛkpa Ulu 32:9

Ɔsika Unwoti ɔlati néti Israelƒuɔ bani ndi Yakob bebi ɔ́bla nwuna badi.

Lɛkpa Ulu 32:6

Ulu ɔni lɛlɔ na bɛdubɔsia bise bina Unwoti kɔdɛ na ɔdi mmɔ? Amii bekyuli badɔlɔdi biiibo kasusu kadi. Unwoti ndi bina Ɔti ku bina Udiene. Na anwu nábla-mii na ɔ́vɔ-mii.

Israelƒuɔ Bɔlɛ 23:27

“Ndubo mina liƒu ala butaabla na bina anumi na lɛya na kadi bekyuli bani nkya kɔlɔ kɔmmɔ kemmo ƒui beƒu babla susuusu, na lɛya na ama bani ndi bina bekisine mmɔ benwini kama bakya-mii na bekeli batɔlɔ.

Ala Kalɔ Buse 35:5

Nwuna kama ni, báyu ulu na bátɔlɔ. Na Unwoti Katɔti ɔyikun ɔni na kadi kammɔ bekyuli bánu ɔsu ni, liƒu lɛ́da-ma na Yakob ku anwu badi lɛlɔ ɔsu ni, bátakana na basia-ma kama.

Israelƒuɔ Bɔlɛ 15:5

Na ɛpu ligyu lɛmmɔ líbi-ma ala kpoo, na báyu bátátɛ-nwu kalɔ aani lɛtabi.

Israelƒuɔ Bɔlɛ 15:6

“Unwoti, ƒula kɔdianu kɔnu kɔɔtina lɛgadi ɔyikun. Unwoti, ƒula kɔdianu kɔnu nákɔ ukisine ɔmmɔ ɔ́bwɛ kpɛtɛ kpɛtɛ.

Israelƒuɔ Bɔlɛ 15:13

“Adubɔtɔnku ƒula bekyuli ka aayɔ́-ma uwi ndi uwi ɔsu. Ƒula bekyuli bani na ékpo áƒɔ. Na ɔkɛnku ƒula ɔyikun lɛlɔ ɔsu adubɔtɔnku-ma etéduoku ƒula kalɔ kedee kemmo.

Israelƒuɔ Bɔlɛ 18:8

Na Mose ɔ́su nwuna aasi ala ani ƒui na Unwoti ɔ́bla Ƒarao ku Egyipteƒuɔ na Israelƒuɔ ɔsu. Na ɔ́sɔ ɔ́su-nwu abi ani bébo na ulu lɛlɔ ku kalɛ na Unwoti ɔ́da-ma údie.

Israelƒuɔ Bɔlɛ 20:2

“Ami ndi bina Unwoti Katɔti ɔni nédie-mii ɔ́lɛku Egyipte kalɔ lɛlɔ kesii kani nka bénye-mii lɛlɔ na bɛɛbla bana kabla.

Israelƒuɔ Bɔlɛ 23:20

“Bɛnu! Ndubo bɔtala mina ɔtu na ɔgyu ɔtɔ-mii, na anwu ndubo-mii bɔgyumana na ulu lɛlɔ, na uti-mii utéduoku kesii kani lɛ́klibi líse-mii.

Lɛkpa Ulu 2:4

Na ɔ́su-mi ka mbo-mii ɔda ɔmɛni ɔnini, “Kásɔ kébu blii na biduo bina banwani bani nási Esau kaba kemmo na beli Edom abi lɛlɔ kalɔ akɔ. Badubɔyia-mii, nsu mɔɔsú-mii nnii bɛ́nu kaduɛ na bana lɛlɔ.

Yosua 4:24

Ɔ́bla ɔmɛni úti ɔ́tina kayawi bekyuli ƒui na banu bati ka ubo ɔyikun geen. Na ɔmɛni ɔdubɔya na bayia Unwoti bana Katɔti uwi biala.”

Kɔgya 105:38

Ebiti áda Egyipteƒuɔ geen ka Israelƒuɔ bátɔlɔ-ma kalɔ lɛlɔ. Ɔsika bana lɛlɔ lɛ́da-ma liƒu.

Yesaia 63:12

Ɔma muudie kɔnu taabla ɔyikun ala ani muukeye si Mose ɔ́talaku kɔnu katɔ, na úle ɛpu kemmo inyɔ na bana anumi, na nwuna lɛnyi lise lísela uwi ƒui?

Israelƒuɔ Bɔlɛ 6:7

Na ndubuti-mii lɛbla aani ami ɔlati mina bekyuli geen na lɛbla bina Katɔti. Na ɔmɛni ɔdubɔya na bɛnu bɛti ka ami Unwoti bina Katɔti nédie-mii lɛ́lɛku lɛbibo kalɔ na Egyipte.

Israelƒuɔ Bɔlɛ 23:22

Nsu si bínu ɔtu ɔmmɔ litemi na bɛ́di mina ɔda ɔni líbo-mii lɛlɔ ni, ndubo bina bekisine bukpoku bute-mii.

Kɔgya 89:14

Ƒula bɔyɔ bɔni na aayɔ́-bu uwi ndi uwi ku kalɛ na asia ƒula litemi kama ntɔ-ɔ anumi na uudie-ɔ keyi ka ƒula lɛgadi lɛmmɔ ƒui linye kpakplaa lite ala bɔbla siin ku litemi bɔtɛ na ulu lɛlɔ.

Esekiel 16:8

“ ‘Na uwi ɔni na lɛsɔ lɛnu-ɔ na ɔmmɔ kama ni, na éedu kalɛ na ati ɔnana. Ɔmmɔ ɔsu líti mina awu gyɔlɔɔ ɔmmɔ kakɛ kadi líbi-ɔ lɛlɔ na lɛ́bɛla-a kasɔngya líti lɛ́tina-a ka ndubo-ɔ bɔgyumana. Na líse-ɔ kenye kpakplaa na búnyimi ka enwini Unwoti Katɔti ami ɔdi na ntaanu-ɔ lɛlɔ.