Agba 2:6 - Katɔti Ɔku Kedee

⁶ Ɔsika Unwoti muute lɛnunda! Na nwuna etemila aayá na ukyuli ɔɔtí lɛla na ɔɔdá anu.

Agba 2:6 Referans Kwoze

Yakobo 1:5

Si bina akɔ ɔdi ɔɔyaki lɛnunda ni, ɔlɛka uvele Katɔti na ɔdubuti-ni ute-nwu, ɔsika Katɔti uuti-ni teete ukyuli biala ku kaƒɔ ƒaa.

Kɔgya 119:98

Ƒula ɔda bubo nkɛnku-mi uwi biala na bɔɔyá na mɔɔdá anu teetulo mina bekisine.

Hiob 32:8

Nsu ɔƒaani ni, lɛ́nu lɛ́ti ka lɛnunda ni, Katɔti muuti-ni teete ukyuli.

Luka 21:15

Ɔsika ndubuti kenye ogya etemila ku lɛnunda lite-mii kalɛ na bina bekisine badi balakana bunye bɔsiaku-mii iye batɛmi bedie-mii kudii.

Yesaia 54:13

Ndubɔtina bina bebi ala na bakɔ katɔ ku keyi buɛɛ.

Yohane 6:45

Katɔti kenye udiene ɔdi únweni ɔnii, ‘Katɔti ndubɔtina bana ƒui ala.’ Anwuɔsu ukyuli biala ɔni nénu na ɔ́tɛya ala ɔ́siku Ati kudɔ ni, anwu muubo-mi kudɔ.

Baga 1 3:12

ndubɔbla lɛla lɛni na éye-mi lite-ɔ. Na ndubute-ɔ lɛnunda ku kayi kani na eti awia ala kemmo ati. Na ukyuli ɔdi útelie dii, na ukyuli ɔdi lɛnɔ ɔsɔ ulebo lɛnɔ na wedu ƒula kalɛ.

Yakobo 1:17

Ala abuni ani ƒui na bubo na bɔɔnu ka adia geen sɔsɔ ni, Katɔti kudɔ na aasí. Na ulávumana iye udie-bu atu aani ɔƒɛ ku kɔbuli kɔni nédie kuse na buduo lɛdisa kemmo.

Kɔgya 119:104

Ɔkɛnku ƒula ɔda bubo lɛlɔ ɔsu na mina kasusu kese nwaa. Na ɔmmɔ ɔsu na nkisi likpidi ulu biala.

Daniel 2:23

Awɔ ndi Katɔti ɔni na mina bati kukuuku bákpa. Ɔƒɛni ni, mɔɔgyá-a enu, na muumwi-ɔ. Ɔsika ábla-mi ɔnundane geen na ásu-mi kɔna kɔni na ɔga úgye ku kuna kalɔ budie.”

Daniel 1:17

Katɔti ɔ́ya na bakloƒu ine bamɛni báda anu na bebo ababla sɔsɔ. Báka lɛku pii na bénwini bakutine geen. Na Daniel anwu ɔɔkana na uudie ana kalɔ muedi ku kɔyu kemmo ala bɔnu taati ku ana kalɔ budie.

Yesaia 8:20

Bɛnu bɛti ka si bana ala aaakɛnku mina litemi lɛni ndanku ɔda bubo ku bunyimi bɔmɛni ni, na bukeye bɔdi buuubo-ma kemmo.

Baga 1 4:29

Katɔti úte Salomo lɛnunda ku ala kemmo bɔnu taati ku lɛlati lɛni neeebo bɔkɔku aani kalɛ na ɛpu kɔnwinimi kuse kalɛ.

Daniel 2:21

Awɔ mɔɔdi bayawine ablala ƒui lɛlɔ na eete lɛlɔ badine ɔyikun na aasɔ taaƒɔ-nwu bana kudɔ. Na awɔ ndi lɛnunda ku lɛlati biala kasikɔ.

Agba 6:23

Ɔsika ɔda bubo bɔmɛni bɔdi asogya, na ala bɔtina bɔmɛni bɔdi-ɔ bukeye. Na kalɛ na etemila amɛni aaklibi-ɔ na ati lɛlɔ bɔda ni, adi ulu ɔni lɛlɔ na adubɔsia na akɛ ngba.

Kɔgya 19:7

Unwoti ɔda bubo bɔdia ƒui bɔ́wɔlɔ na ɔɔyá na bɔɔkɛ́ ɔlɔkplu ɔwɔdi. Na ala ani na úbo ɔda ka bɔbla adi ani buti anu bɔsia geen. Na nwuna ɔda bubo bɔdi etemila aani baaƒɔ́ taadi sɔsɔ. Na ɔɔyá na ukyuli ɔni mɔɔyáki lɛnunda ɔɔkɛ́-ni.

Baga 1 3:9

Anwuɔsu te ami ƒula kabla ɔblane kayi kani na liti lɛda ƒula bekyuli bamɛni na lɛnu lɛbuni ku likpidi lɛti. Ɔsika si átabla ɔmɛni ni, ɔma ndubɔkana ƒula bekyuli pii bamɛni udu bɔda?”

Israelƒuɔ Bɔlɛ 31:3

Na lɛ́ya na mina kɔyu kɔ́ƒɔ-nwu lɛlɔ kemmo ƒui na líte-nwu lɛnunda ku lɛlati bonwu lɛni na ɔkana uti sika ugyiedi ku ɔƒualadi ku abuala egyiedi ɔvɔ ala lidu lidu. Na uti kugyii lɛnɔ ɔnwi ala lidu lidu.

Ala Alɛdi 1 22:12

Ute-ɔ lɛnunda ku lɛlati kalɛ na adi Israelƒuɔ lɛlɔ asiaku nwuna ɔda bubo lɛlɔ.

Nehemia 7:5

Anwuɔsu mina Katɔti úti ɔ́sia-mi kayi lɛlɔ ka lɛlɔ bakutine ku benengu ku bekyuli keeke kalɛ na bebo bebenweni bekyuli bani ƒui nénwini bébo mmɔ anyi.

Hiob 22:22

Nu-nwu ala bɔtina na eti-nya akya kayi.

Kɔgya 51:6

Nsu geen ni, aawia ka lɛsiaku litemi geen lɛmmɔ kama uwi biala. Anwuɔsu ti ƒula lɛnunda lɛni kemmo nágyu mmɔ te-mi.

Etemila 2:26

Ukyuli ɔni mɔɔbla Katɔti lɛƒɔyɔ ni, anwu na Katɔti ɔɔyá na ɔɔdá anu na uunú ala kalɔ na ɔɔyá na lɛlɔ lɛɛyɔ́ ukyuli ɔmmɔ. Nsu si bɔɔbla likpidi ni, bɔdubo lɛlɔ bususu geen bute bula lɛdila, nsu Katɔti ɔdubɔƒɔ bula akɛla ute ukyuli ɔni mɔɔbla-nwu lɛƒɔyɔ. Na nwuna kalɔ budie bɔbambadi bɔdi buuubo buuutulo ka ɔƒɛƒɛɛ kama bɔbi taasiaku kani na ɔdi.

Baga 1 10:24

Na kayawi bekyuli ƒui bátaawia kuƒi ka bebenu lɛla lɛdi basiku Ɔga Salomo kudɔ ɔ́si lɛnunda lɛni na Katɔti úti ɔ́kya-nwu kayi kemmo ɔsu.

Esra 7:25

Na awɔ, Esra, ti lɛnunda lɛni na ƒula Katɔti úte-ɔ na awia litemi batɛne bani ngyi ƒula Katɔti ɔda bubo bɔmmɔ lɛlɔ ala na bataatɛ ketu ɔvi badi bammɔ litemi. Na bani na baaagyi ɔda bubo bɔmmɔ lɛnɔ ni, na atina-ma ala.

Hiob 12:13

“Nsu ɔna ƒui kawɔlɔkɔ ni, Katɔti ndi lɛnunda ku ɔyikun ƒui kasikɔ. Na anwu mɔɔtina-bu kasiakɔ ku ala kalɔ bunu.

Hiob 12:16

Katɔti ubo ɔyikun na ɔɔdi bekyuli ƒui lɛlɔ. Ɔɔdi ɔkɔ banyine bani mɔɔtɔ́lɔ bekyuli ku bani na baatɔ́lɔ ƒui lɛlɔ.

Kɔgya 19:8

Ɔda bubo bɔmmɔ buse kede kede na ɔɔbla ukyuli lili kemmo nwaa na ɔɔtí Unwoti lɛƒɔyɔ.

Kɔgya 94:10

Katɔti dɔnku kadi bekyuli ƒui Lɛni kani na ɔdubɔni-ba kɔtu. Na ubo lɛnunda na ɔɔtina bekyuli ala.

Kɔgya 119:34

Die-mu kalɔ te-mi na lɛsiaku-mu kama. Na madi-mu lɛlɔ lɛnɔ ku mina kayi ƒui.