Nsu Timoteo anwu ni, amii alati bɛgyi kalɛ na nwuna udu buni ɔmmɔ use. Ɔsika aani kalɛ na ubi ku ɔti baabla kabla taasala ni, lɛni geen na úbunku-mi na litemi buni lɛmmɔ bɔsu kemmo.
Anwuɔsu ni, mina bakpana bayɔne, aani kalɛ na bɛɛdi mina litemi lɛlɔ si nkya-mii kudɔ ni, lɛni kani na ɔdi ka bɛdi-nya lɛlɔ bitulo si uwi ɔni na liiibo-mii kudɔ lɛnɔ. Bise anumi na bitaabla ala ani mɔɔtina ka Yesu ɔ́ƒɔ-mii ngba, na biti ɔbu geen bite Katɔti.
Na úte-mii adila ani ndi manna na kalɔ kakwiidi kammɔ kemmo. Na adila ɔmmɔ udu ni, bina bati kuuku muedi bátati-nya kudii. Na Unwoti Katɔti ɔ́bla ɔmɛni ɔnii ɔɔnu si bɛdubɔti ka anwu nda-mii, na ɔkɔku bina bɔƒɔtaadi ɔnu kalɛ na weti ala abuni wete-mii na kawɔlɔkɔ ku kaƒɔ ƒaa.
Na bitayiƒala kalɛ na bina Unwoti Katɔti ɔ́tɔnku-mii na kalɔ kakwiidi kamɛni kemmo akwa aavlene. Ɔ́bla ɔmɛni ɔnii ɔɔnu si bɛdubɔti ka anwu nda-mii. Na ɔkɔku-mii ɔnu si bina kasusu kadubɔsia-nwu lɛlɔ na bɛdi nwuna ɔda bubo lɛlɔ.
Amu na Unwoti ɔ́su Mose ɔnini, “Ndubɔya na adila ataana taasi katɔ teete-mii aani ɔnantu. Na limeyi ndi limeyi ni, ya na bekyuli bammɔ balɛ na batála kalɛ kani medu-ma bɔdi limeyi kenye. Na ɔmɛni ndubuti bɔkɔku-ma bɔnu si badubo mina ɔda bubo lɛlɔ bɔdi.
Na línweni ɔku kpakplaa ɔmmɔ límene-mii ɔsika si bubo na líbo-mii kudɔ uwi ɔmmɔ kemmo ni, nka bɛdubɔya na enu aƒɛ-mi. Nsu amii ndi bekyuli bani nálɛka bɛya na lɛlɔ lɛyɔ-mi. Na lɛ́ƒɔ lɛ́di ka si lɛlɔ lɛɛyɔ́-mi ni, amii lɛnɔ lɛlɔ lɛdubɔyɔ-mii.
Sɔsɔ ni, ɔku ɔni na línweni-mii mmɔ ni, línweni-nwu na kayi ɔlɛ bunu ku enuƒɛ ku keku buwulo kemmo. Na ɔɔɔdi ka mɔɔwia nnii amii lɛnɔ binu ɔlɛ ɔdi, mmomu kalɛ na bɛnu bɛti ka mɔɔyɔ́-mii geen ɔsu.
Béduo bukpoku taanu kpakplaa kemmo na lɛbibo lɛni nébo-ma lɛlɔ ɔsu. Nsu ɔmɛni kemmo ƒui ni, ebiti áda-ma geen na lɛni kani na béte bekyuli ala pii ku kaƒɔ ƒaa ina ka badi bawabane geen.