Korintoƒuɔ 1 4:5 - Katɔti Ɔku Kedee

⁵ Anwuɔsu ni, ɔdi utatɛku ɔkpanadi litemi wetédu ka uwi ɔbuni ɔmmɔ webo. Si uwi ɔni na Blɔti úbo ni, anwu ndubɔtɛku ukyuli biala litemi na limeyi likplodi lɛmmɔ lɛlɔ. Na anwu ndubudie kasuudikɔ ala abɛdi keyi na ɔdubudie ala ani na bekyuli kakali kadanku ɔtina. Mmɔ na Katɔti ɔdubumwi ukyuli biala kalɛ na ɔ́bla nwuna kabla ɔ́vinku.

Korintoƒuɔ 1 4:5 Referans Kwoze

Yakobo 5:7

Banwa, kalɛ na umonsene ɔɔkɛ́ kayi teete kaƒendi ɔnantu ku ketudi ɔnantu ute nwuna edula ani na ɔ́va bɔdia ɔsu ni, lɛni kani na ɔlɛka bɛkɛ kayi utédu uwi ɔni na Blɔti wasɔ webo.

Korintoƒuɔ 2 5:10

Ɔsika bula ƒui bɔdubɔda bɔlɛ Kristo anumi na ɔtɛku-bu litemi. Na ɔdi biala ɔdubɔƒɔ nwuna lɛyuƒɔla lɛni námanku nwuna kabla. Lɛbuni lɛdi o-o iye likpidi o-o, ɔdubɔƒɔ nwuna lɛyuƒɔla ɔkɛnku ngba bɔni na búlie na kayawi kamɛni kemmo.

Korintoƒuɔ 1 3:13

Nsu si ɔtɔ ɔni na ɔdi biala ɔ́tu ɔdia iye ɔɔɔdia ni, Kristo limeyi bonwu lɛmmɔ ndubudie bana kabla bɔtina. Ɔsika limeyi lɛmmɔ lɛlɔ ni, ogya ndubo ɔdi biala kabla keyi budie. Ogya ɔmɛni ndubo kabla biala bɔkɔku bɔnu na ɔnu si kabla kammɔ kadia.

Hebriƒuɔ 4:13

Ala ani ƒui na Katɔti údie lítabɛ-nwu. Na ɔɔnu lɛla biala kalɛ na lise. Na nwuna anumi na bɔdubo bula akunta ƒui bɔbu.

Korintoƒuɔ 2 10:18

Ɔsika ukyuli ɔni na Katɔti uumwi ni, anwu ndi lɛla lɛdi, na ɔɔɔdi ukyuli ɔni muumwi lɛlɔ.

Romaƒuɔ 2:16

Na litemi buni lɛni lɛsa na mɔɔkɔ́ ni, lɛɛtina ka Katɔti ɔdubɔya na Yesu Kristo ɔtɛku bekyuli litemi ɔ́siku ala ani nábɛ akya-ma kasusu kemmo ƒui lɛlɔ.

Romaƒuɔ 2:1

Anwuɔsu ni, si awɔ ɔdi aatɛku ukyuli litemi na aadú-ma kɔtɔ ni, eeebo kenye kadi na eedie. Na ulu biala lɛlɔ na ádu ƒula bakpana kɔtɔ ni, ƒula lɛlɔ na aadú kɔtɔ. Ɔsika ala ani na bábla ni, ana udu kani na awɔ lɛnɔ aabla.

Budie Taatina 20:12

Na lɛ́nu ka bekpine ƒui benye lɛgaboku lɛmɛni anumi, banamu ku benengu, na bébimi lɛku lɛdi béwi. Na básɔ bébimi ɔku ɔbambadi ɔni ndi ngba ɔku lɛnɔ béwi. Na lɛku lɛmɛni kemmo na baanu taatɛku bekpine ƒui litemi ɔkɛnku ala ani na bábla na bénweni bákya lɛku lɛmmɔ kemmo lɛlɔ.

Etemila 12:14

Katɔti ɔdubɔtɛku-bu litemi na lɛla biala na ukyuli ɔ́bla lɛlɔ ina bɔbɛ na ábɛ ábla-nya na adi likpidi iye lɛbuni.

Petro 1 1:7

Ala ani ndubɔsiaku-mii ndubɔtina kalɛ na bɛ́ƒɔ bɛ́di geen. Sika ugyiedi ɔni muubie muedi ni, ogya kemmo na beeti-nwu taakya taanu-nwu taati kalɛ na ɔdia. Anwuɔsu bina bɔƒɔtaadi bɔni náƒɔ kuye butulo sika ugyiedi ɔmɛni ni, ɔlɛka bakɔku-mu banu asa na bɔkana bunye kpakplaa. Na si bina bɔƒɔtaadi bɔmmɔ bɔ́kana na búnye ni, Katɔti ɔdubumwi-mii na ɔtalaku-mii katɔ, na ɔbu-mii na Yesu bɔsɔ bubo limeyi lɛmmɔ lɛlɔ.

Romaƒuɔ 2:29

Mmomu ukyuli ɔni ndi Yudani geen ndi ukyuli ɔni mɔɔtina na nwuna ablala kemmo ka úti nwuna kayi úte Katɔti. Na ɔɔɔkɛnku ɔlɔna ɔni na békulo na ɔda bubo ɔdi kenye lɛlɔ. Mmomu ɔkɛnku Katɔti Kɔyu lɛlɔ. Na ɔɔɔdi ukyuli ɔyawine mɔɔkɔliku ukyuli ɔmmɔ lɛnyi katɔ, mmomu Katɔti.

Korintoƒuɔ 2 4:2

Búdie abɛla ku kɔƒa ala bɔbla atu. Na bulányi ɔkɔ taabla kabla kadi na bulátu Katɔti litemi lɛmmɔ teenwini. Bɔɔsu litemi buni lɛmmɔ nwaa na Katɔti anumi kalɛ na ukyuli biala ɔdubɔnu bula ɔbladu buni ɔti.

Romaƒuɔ 14:4

Kenyekɔ kamani na ebo na aatɛku ukyuli ɔdi kabla ɔblane litemi? Nwuna unwoti ɔlati ndubɔnu bɔti si unye ute-nwu kpakplaa iye uuunye. Na kabla ɔblane ɔmmɔ lɛnɔ ɔdubunye kpakplaa, ɔsika Blɔti ɔdubɔkana na ɔya na unye ute-nwu kpakplaa.

Yohane 5:44

Dɛ na ɔdubɔbla asa na bɛƒɔ-mi bɛdi ka bilie bɛɛwia bumwi taasiku bina lɛlɔ kudɔ, na biláwia ka Anwu ɔni lɛti pɛ ndi Katɔti umwi-mii?

Yakobo 4:11

Banwa, bitalɔ lɛlɔ anyikpi. Si ɔdi ɔ́bla lɛni iye ɔ́tɛku ɔnwani ɔdi litemi ni, na ulábu ɔda bubo bɔmmɔ na ɔ́ta únye-mu lɛlɔ lɛnɔ. Si bɛ́ta bínye ɔda bubo bɔmmɔ lɛlɔ ni, na ɔɔtina ka bɛ́da ɔda bubo bɔmmɔ lɛlɔ bɔdi bɛ́ya. Na bínwini bɛɛtɛku ɔda bubo bɔmmɔ litemi.

Luka 6:37

“Bitababla bitatɛku bekyuli litemi, na Katɔti lɛnɔ ulatɛku-mii litemi. Bitadu bekyuli kɔtɔ, na Katɔti lɛnɔ uládu-mii kɔtɔ. Biti bɛkyiɛ bekyuli, na Katɔti lɛnɔ weti wakyiɛ-mii.

Mateo 24:46

Kubiti geen ndubo kabla ɔblane ɔmmɔ bɔda si nwuna unwoti ɔ́si úbo úbanu ka ɔɔbla lɛla lɛni na ɔ́su.

Budie Taatina 1:7

Bɛnu! Aanu-nwu ka ɔ́si kayaa ɔdubo na kemmo! Ukyuli biala ɔdubo-nwu bɔnu ku bani ƒui nábla-nwu kalala. Kayawi bekyuli ƒui badubuwulo kɔnyana ku keku. Ɔsia lɛni.

Petro 1 5:4

Na uwi ɔni na Kristo ɔni ndi Baƒonu Ɔdane Unengudi ƒui wada walɛ ni, na wete-mii kagabwa kani muukeye na kana udu ulávumana.

Tesalonikaƒuɔ 1 5:2

Ɔsika amii alati bɛgyi geen ka Blɔti limeyi lɛmmɔ lɛdububo aani kalɛ na uyune uuyú ukyuli taatu usien.

Yohane 21:22

Amu na Yesu údie kenye na úye-nwu ɔnini, “Si mɔɔyɔ́ nnii anwu ɔsɔ ɔkya ngba wetédu uwi ɔni na masɔ mebo ni, bi nkɛ-ɔ? Awɔ ni, taasiaku-mi.”

Petro 2 3:4

Na badubuye-mii banii, “Wɛ na ukyuli ɔni ndubo mmɔ ɔkya? Ɔsika ɔ́si uwi ɔni na bula bati békpi ni, lɛla lɛdi biala lɛmu lise aani uwi ɔni na bédie kayawi kalɛ!”

Mateo 25:23

“Nwuna unwoti ɔmmɔ ɔ́su-nwu ɔnii, ‘Kabla ɔblane ɔbuni, ábla lɛla biala ulu lɛlɔ geen! Ka ásia ala blii suɛ amɛni anu kaduɛ ɔsu ni, ndubuti-ɔ linyene ala enengudi kenye. Bo butaadi na butaani na butaakɛ ebiti!’

Malakai 3:18

Na bekyuli badubɔnu kavumana kani nkya bekyuli bani muunú-mi litemi na baabla ala ulu siin lɛlɔ ku bani néni-mi na baabla ekpidi ntɛ.”

Yuda 1:14

Bekyuli bamɛni lɛlɔ litemi geen na Henok ɔni ndi kaba maatɛdi ubi ɔ́si Adam lɛlɔ ɔ́su úse ɔnini, “Katɔti ku nwuna batu ƒui bumomo báyu bébo kalɔ lɛlɔ.

Petro 2 3:12

Na kalɛ na bíti bilie siin bɛgya Blɔti limeyi lɛmmɔ ni, anwu ndubɔya na limeyi lɛmmɔ libo pla. Limeyi lɛmmɔ na kayaa kadubo bɔkywi, na ogya liwulu lɛdubɔya na ala ani nkya kayawi ƒui ayɛɛlɛ.

Korintoƒuɔ 1 15:23

Nsu Katɔti ɔdubɔgyila ɔdi biala na ulu ɔni na Katɔti ɔlati úse úse lɛlɔ. Na Kristo ndi udeedi. Na uwi ɔni lɛlɔ na wasɔ webo ni, bani na béti lɛlɔ béte Kristo ɔmmɔ na ɔdubɔsɔ ɔgyila.

Korintoƒuɔ 1 11:26

Ɔmɛni ɔɔtina ka uwi biala na bɛɛdi iye bɛɛní na ɔɔƒɛɛ ɔmɛni kemmo ni, biibó Blɔti kukpi kudu wetédu uwi ɔni na wasɔ webo.

Korintoƒuɔ 1 1:7

Ɔmɛni ɔsu ni, bilayaki litela lɛdi ɔni na binye bɛgya ka Katɔti ɔya na Blɔti Yesu Kristo ɔ́da ɔ́lɛ.

Romaƒuɔ 2:7

Bekyuli bani mɔɔkya lɛbuni bɔbla ɔkplu na basiaku bukeye ku bumwi ku ngba bɔnii nsɔ naaadubo bɔsa kudii kama ni, Katɔti ɔdubɔya na bakɛ ngba ƒui bɔmmɔ.

Mateo 24:30

“Ala adi adubɔlɛ na kayaa ani mɔɔtina ka Ukyuli Ɔyawine Ubi ɔdubo. Na kayawi bekyuli ƒui badubuwulo na bana ekpidi ɔsu uwi ɔni na badubɔnu ka Ukyuli Ɔyawine Ubi ɔkɛ ulɔyɔ kemmo ɔ́yu ɔ́si kayaa ɔdubo na bukeye bonwu ku ɔyikun kemmo.

Etemila 11:9

Lɛlɔ lɛyɔ-ɔ na ƒula lɛkloƒu uwi na enu ngba emini. Na teni lɛbuni biala na ánu iye ƒula kayi kaayɔ́ tete lɛlɔ. Nsu tayiƒala ka Katɔti ɔdubɔtɛku-ɔ litemi na lɛla biala lɛni na ábla lɛlɔ.

Korintoƒuɔ 1 3:8

Kavumana kadi keeebo ukyuli ɔni náva ku ɔni néwi-ka ntu kemmo. Katɔti kani ndubɔƒɔ bana ƒui kayu na bana kabla kenye.

Mateo 25:21

“Nwuna unwoti ɔmmɔ ɔ́su-nwu ɔnii, ‘Kabla ɔblane ɔbuni, ábla lɛla biala ulu lɛlɔ geen! Ka ásia ala blii suɛ amɛni anu kaduɛ ɔsu ni, ndubuti-ɔ linyene ala enengudi kenye. Bo butaadi na butaani na butaakɛ ebiti!’

Hiob 12:22

“Ɔɔyá na alaekpidi ani nábɛ akya kasuudikɔ ina kekpine muedi ni, aadá taalɛ keyi, na bukeye bɔƒɔ lɛla biala.

Yeremia 16:17

Mɔɔkana taanu lɛla biala lɛni na bɛɛbla ina dɛ na bɛnii bɛɛbɛla-mi bina ekpidi ani na bɛɛbla.

Yeremia 23:25

“Kenye bediene bani nálɛ-mii kama mɛni baasu taatina ka ami náya na bégye ana iye ami nédie lɛla lɛdi lɛ́tina-ma na kɔyu kemmo na benye-mi lɛnyi lɛlɔ baanyi ɔkɔ.

Hosea 8:13

Bɛɛdú bina bebuo babuni ƒui taabla akpala na bɛɛdi akpala ammɔ lɛnɔ, nsu ami Unwoti anwu muuní bina akpala ammɔ. Mina anumi adubɔsia bina ekpidi lɛlɔ na lɛni-mii kɔtu na bɛsɔ binwini bisie Egyipte.

Mateo 10:26

“Anwuɔsu bitayia bekyuli, ɔsika lɛla lɛni na béti ala bébi iye bábla bábɛ ni, Katɔti ɔdubudie-ni keyi.

Yohane 21:23

Ɔmmɔ ɔsu ni, litemi lɛmɛni lígyingya lɛ́vi Yesu basiakune ƒui akɔ ka ɔnii ɔtɛyane ɔmɛni anwu ulekpi. Nsu ɔɔɔdi bɔsu na Yesu ɔ́su ɔnii ulekpi. Mmomu bɔsu na ɔ́su ɔnini, “Si mɔɔyɔ́ nnii anwu ɔsɔ ɔkya ngba wetédu uwi ɔni na masɔ mebo ni, bi nkɛ-ɔ?”

Korintoƒuɔ 1 3:14

Si lɛla lɛni na ɔdi úti ɔ́tu ɔtɔ ɔ́sia ɔtɔ kalɔ lɛtabi lɛmɛni lɛlɔ lɛ́kana bunye si ogya ɔ́kywi ɔ́vi-ni lɛlɔ ni, ɔtune ɔmmɔ ɔdubɔƒɔ lɛyuƒɔla.

Korintoƒuɔ 1 11:16

Nsu si ukyuli ɔdi ɔɔkya unyeƒi na ɔmɛni lɛlɔ ni, lɛla lɛni kani na ami masu-nwu ndi ka abu ku Katɔti baƒɔtaadine akpa ƒui bɔsɔ buuubo ulu ɔbambadi ɔdi na bula bɔsala bɔmmɔ kemmo.

Yakobo 5:9

Banwa, bitadɔnku lɛlɔ, kalɛ na Katɔti lɛnɔ ulatɛku-mii litemi. Ɔsika Litemi Ɔtɛne ɔmmɔ úude na ɔ́ɔklibi lɛlɔ ka ɔda ɔlɛ.

Agba 12:8

Ukyuli ɔni na ubo kasusu kabuni lɛlɔ lɛɛda bekyuli ƒui ebiti, na beení bani nsiaku kalala ulu.

Korintoƒuɔ 2 10:9

Naaawia ka bɛkali bɛnii liƒu na mɔɔkya-mii na mina lɛku lɛni na muunweni-mii kemmo.