รโฮงะ 15:3 - ้พระคัมภีร์ละว้า

³ โม เซ เชีย นึง รซอม เชีย ยุฮ ไอ โมเซ ป มัฮ กวนไจ ยุฮ พะจาว เซ, ไม่ รซอม เชีย ยุฮ กวน แกะ เซ. อัฮ เฮี, “โอ พะโองจาว, ป มัฮ พะจาว ป ตึก นึง ระ อัมนัต แตะ, กัน ยุฮ เปอะ มัฮ ป ระ เนอึม ไล ปอ เงอึต ปุย นึง. โอ พะโองจาว, ปะ มัฮ เปอะ กซัต ตัตเตียง ปุย โครยญ เมือง โครยญ ปะเทต. ป ยุฮ ป อัฮ เปอะ โครยญ เจือ มัฮ ป ซื ป ไซ ไม่ ป เนอึม ป แนม.

รโฮงะ 15:3 Referans Kwoze

ลืลาว 111:2

กัน ยุฮ พะจาว มัฮ เนอึม ป ตึก นึง ระ ไล แตะ. เมาะ ป ฮงา เนอึม นึง กัน เซ ซ ซาวป แนฮ ตอก ซ ยุง แตะ ไลลวง อื โฮวน ปุ ปุ.

ลืลาว 139:14

อาึ ซ ลืลาว ปะ นึง มัฮ เปอะ พะจาว ป ไมจ ปุย ฮลัต นึง. ป ยุฮ เปอะ มัฮ ป ระ ไล ปอ เงอึต ปุย นึง. อาึ ยุง ที เยอะ โอเอีฮ ไล เซ.

ลืลาว 145:17

กัน ยุฮ พะจาว มัฮ เนอึม ป ปุก ป ลอก โครยญ เจือ. เปลีฮ ลอป รพาวม ฮรัก แตะ นึง กัน ยุฮ แตะ.

ฮีบรู 3:5

ไอ โมเซ มัฮ ปุย เนอึม รพาวม ละ ยุฮ แตะ กัน ลลาึง โม อิซราเอน, ป มัฮ ปุย ไน เญือะ ยุฮ พะจาว. ไอ โมเซ มัฮ กวนไจ ยุฮ พะจาว. รโฮงะ อาึง โอเอีฮ ป ซ เปลีฮ พะจาว เฆียง เฮี.

อิซยา 33:22

โม่ะ เคิง พากัง โล่ง ยุฮ โม ป รุป ไม่ เยอะ เซ แปน โตว ป โกว. พากัง โล่ง ยุฮ อื เซ ปุ โรฮ เญาะ เกียฮ กัง อื. ป มัฮ คาวคอง เละ มาื ยุฮ โม ป เกละยุ อุ เซ เมาะ ไก อื ซ โฮลฮ เอะ ตุย ฮา อื แกล เอิน. ซ รฆุ ดิ ปุย ไม่ ปุ แตะ เตือง โอยจ อื. ปัง มัฮ โม ป คาโด่ ซ โฮลฮ ตื โรฮ รโตง แตะ นึง อื. เอีจ มัฮ พะจาว ป รเตีฮ รตุม โอเอีฮ ละ เอะ เอ, เอีจ มัฮ พะจาว ป ตัตเตียง โอเอีฮ ละ เอะ เอ, มัฮ โรฮ กซัต ยุฮ ฮุ. พะจาว เซ เอีจ แจง ซ เกือฮ อื เอะ โปน ฮา ป โอ ไมจ เจอ.

โฮเชยา 14:9

โม ป ไก กัมกึต วิไซ เยอ, เกือฮ คาวไจ ไลลวง ป เอีจ ไซฮ อาึ อาึง เฮี, ไม่ ไตม อื อาึง โตะ รพาวม แตะ. คระ ยุฮ พะจาว เซ มัฮ เนอึม คระ ปุก คระ ลอก. ปุย ซื ปุย ไซ ไม่ ยุฮ อื ตัม ป อัฮ อื เซ ซ โฮลฮ เนอึม จีวิต แตะ เบือ อื. ปุย ฆอก ปุย เบร ปังเมอ ซ โคะ ซดุฮ ปอ ฆลาื แตะ, นึง คระ โฮว แตะ, อัฮ เซ.

เซคาริยา 9:9

โม เปะ ป มัฮ ปุย อาวต เมือง ซีโยน, ไมจ เปอะ เกือฮ ติ แตะ ญันดี่ ปีติ. โม เปะ ปุย เวียง เยรูซาเลม, ไมจ เปอะ รโอง รออฮ ไม่ ไมจ มวน รพาวม แตะ. แก แลน, กซัต ยุฮ เปอะ เอีจ ซ ฮอยจ เคะ เปอะ. มัฮ ป อาวต ไม่ รพาวม ซืไซ แตะ. มัฮ โรฮ ป ปุน เกือฮ ปุย โปน ป โอ ไมจ. มัฮ ปุย ปึกๆ ออนๆ. บุก โรวก บรัง. มัฮ เนอึม กวน บรัง ป บุก อื เซ.

โยฮัน 1:17

พะจาว เกือฮ โกตไม ยุฮ แตะ ฮอยจ เบือ ไอ โมเซ. กุนมุ่น ไม่ ลปุง เนอึม ปังเมอ ฮอยจ เบือ พะเยซูคริต.

ลืลาว 100:5

พะจาว มัฮ ป ตึก นึง ไมจ แตะ. รพาวม ฮรัก ตอน ฮมัน ยุฮ อื ไก โตว ลอยจ นึง. มัฮ ป เนอึม ลอป รพาวม โครยญ เจน ปุย โอ เญาะ ไก ลอยจ.

1 โมเซ 17:1

เญือม ไก อาญุ อัปรัม รไตม โรฮ ซไตม เนอึม เมอ, พะจาว เปลีฮ ติ แตะ ละ อื. อัฮ เฮี, “อาึ มัฮ พะจาว อาวต ไม่ อัมนัต ตึก นึง ระ แตะ. ปะ ไมจ เปอะ รโจะ ลอป รพาวม แตะ ไม่ อาึ, ไม่ เนอึง เปอะ ป อัฮ ฮะ โครยญ เจือ.

รโฮงะ 19:2

กัน รเตีฮ ยุฮ อื มัฮ ป ซื ป ไซ ไม่ ป ปุก ป ลอก โครยญ เจือ. มอจังคึต ระ เซ ป เกือฮ ปุย ปลัฮเตะ ยุฮ ป คึต ป ตวยฮ ฆาื กัน บาึฮ ม่อยญ ฮอยญ เรี ยุฮ อื เซ เอีจ ตัตซิน อื เกือฮ ลอก ตุต แตะ. พะจาว เอีจ โรก เวน ละ ปรโปวน เซ รโตง ฮนัม กวนไจ ยุฮ แตะ,” อัฮ เซ เซียง ฮมอง เงอะ เซ.

รโฮงะ 14:3

โม ป ไปญ พิน เซ เชีย นึง รซอม เชีย โคระ ซองนา ก งาวม คึ ไม่ ซองนา ปุย ตัง เจือ ปาวน ปุย เซ ไม่ ซองนา โม ป ระ ป คาว. ไก โตว ป เกียฮ เชีย นึง รซอม เชีย โคระ เซ โนก ฮา ปุย ติ แซน ไปล ปาวน ฮมาึน ไปล ปาวน เปือน ปุย เซ. โม เซ มัฮ ปุย เอีจ โตฮ พะจาว โอก ฮา ปุย ปลัฮเตะ.

5 โมเซ 31:30

ฟวยจ เซ ไอ โมเซ ลาว รซอม เชีย ยุฮ แตะ เซ เตือง โอยจ อื, เกือฮ โม อิซราเอน ฮมอง อื โครยญ โฆะ อื.

รโฮงะ 17:14

กซัต โม เซ ซ รุป ปุ แตะ ไม่ กวน แกะ ยุฮ พะจาว. กวน แกะ เซ ไม่ โม ป อาวต ไม่ อื ซ เป โม เซ, นึง มัฮ กวน แกะ เซ จาวไน ปุน เตียง โม จาวไน เตือง โอยจ อื, ไม่ มัฮ อื กซัต ปุน เตียง กซัต เตือง โอยจ อื. โม ป อาวต ไม่ อื เซ มัฮ โม ป เนอึม รพาวม. กวน แกะ เซ เอีจ เลือก อาึง อื ไม่ กอก อื เอีญ เคะ แตะ,” อัฮ เซ เตปด่า เซ.

รโฮงะ 11:17

อัฮ เฮี, “โอ พะโองจาว ป มัฮ พะจาว ป ตึก นึง ระ อัมนัต แตะ, ปะ มัฮ เปอะ ป ตึน ไก เน่อึม โฆะ ฮอยจ ละ ปเลี่ย เฮี. เอะ ญันดี่ ไม่ ปะ นึง เอีจ เติง เวลา โฮลฮ เปอะ ตัตเตียง ปลัฮเตะ นึง อัมนัต ระ ยุฮ แตะ เน่อึม ปเลี่ย เฮี.

รโฮงะ 4:8

ปุย ตัง เจือ เซ ติๆ ไก โพรยจ แลฮๆ. ไก ไง่ เลี่ป โกะ อื เตือง ลวง ราว ลวง ฆรึม โพรยจ อื เซ. โม เซ เชีย แนฮ เตือง ซเง่ะ รซาวม, อัฮ อื ตอก เฮี, “พะโองจาว ป มัฮ พะจาว ตึก นึง ระ อัมนัต แตะ. มัฮ ป ตึน ไก เน่อึม โฆะ ลั่ง. มัฮ โรฮ ป ไก ปเลี่ย. มัฮ โรฮ ป ซ ฮอยจ เฆียง เฮี. มัฮ ป ซง่ะ ซงอม, มัฮ ป ซง่ะ ซงอม, มัฮ ป ซง่ะ ซงอม,” อัฮ เลาะ อัฮ ลาึน อื ตอก เซ.

ด่านีเอน 6:20

เญือม ฮอยจ อื โบ ทัม เซ กอก ด่านีเอน ไม่ รพาวม ตุก แตะ ตอก เฮี, “ด่านีเอน, ปะ ป รซอฮ ละ พะจาว ป ไอม ลอป, พะจาว ยุฮ เปอะ ป ทื ลอป เปอะ ไม่ รพาวม เนอึม แตะ เซ อัม ปุน เกือฮ เนอึม ปะ โปน ฮา รเวีย ซิงโต เซ?” อัฮ เซ ละ อื.

อิซยา 45:21

เกือฮ แลน โม เปะ ฟู มวยญ เดือ โครวน ไม่ อาึ เฮี. ซิงซา ดิ ไม่ ปุ เปอะ ละ ซ กัฮ เปอะ ปุ แตะ. ฟวยจ เซ เกือฮ รโฮงะ แลน ลักทัน ยุฮ แตะ ละ อาึ. มัฮ ปุย ป ซ เกียฮ รโฮงะ อาึง โอเอีฮ เน่อึม กา เกิต อื, โม่ มัฮ อาึ ป มัฮ พะจาว เฮี? โนก ฮา อาึ อื ไก โตว พะจาว ไฮญ เญอ. อาึ มัฮ พะจาว ป ซื ป ไซ ป เกียฮ เรอึม ปุย ไน แตะ.

ลืลาว 145:6

ปุย ซ รโฮงะ ไลลวง กัน ระ ไล ยุฮ เปอะ ปอ เงอึต ปุย นึง. อาึ ซ ครอฮ โรฮ ไลลวง กัน ระ ไล ยุฮ เปอะ เซ ละ ปุย.

ลืลาว 99:4

โอ กซัต ป ตึก นึง ระ อัมนัต แตะ, ปะ ฮรัก เปอะ กัน ปุก กัน ลอก. ปะ เกือฮ เปอะ กัน ซื กัน ไซ ยุฮ แตะ ตอน ฮมัน. ปะ เอีจ ยุฮ เปอะ ป ปุก ป ลอก ป ซื ป ไซ นึง เมือง อิซราเอน.

รโฮงะ 19:16

ไก โรฮ มอยฮ นึง ลปิ อื ไม่ นึง รเวือง อื ติ. มอยฮ อื เซ มัฮ “กซัต ตัตเตียง โม กซัต เตือง โอยจ อื, ไม่ จาวไน ตัตเตียง โม จาวไน เตือง โอยจ อื,” อัฮ เซ.

เซฟันยา 3:5

พะจาว ป อาวต นึง เมือง เซ มัฮ ป ซื ป ไซ, ยุฮ โตว ป พิต ป โฌวะ ติ ชวง. พะจาว รเตีฮ แนฮ โอเอีฮ ละ ปุย ตัม ปุก ตัม ลอก อื โครยญ ซะ. โม ปุย บ่วก ปุย โจวง เซ ปังเมอ ยุฮ แนฮ ลั่ง ป พิต, ยุง โตว โซะกิจ นึง ป ยุฮ แตะ เซ เฟือฮ.

มีคา 7:20

ปะ ซ เปลีฮ เปอะ กัน ซื กัน ไซ ยุฮ แตะ ละ จัตเจือ ยาโคป, ซ เปลีฮ โรฮ เปอะ รพาวม ฮรัก ตอน ฮมัน ยุฮ แตะ ละ จัตเจือ อัปราฮัม ตัม ป เอีจ ซันญา ซโตฮ เปอะ อาึง ละ โม จัตเจือ ไพรม เอะ เน่อึม เจน โฆะ ลั่ง.

ลืลาว 105:5

โม เปะ ป มัฮ จัตเจือ อิซราเอน ป มัฮ กวนไจ ยุฮ พะจาว, โม เปะ ป มัฮ จัตเจือ ยาโคป ป มัฮ ปุย เอีจ เลือก พะจาว อาึง เซ, ไมจ เปอะ ไตม กัน ซัมคัน ยุฮ พะจาว โครยญ เจือ. ไมจ โรฮ เปอะ ไตม ตอก รเตีฮ รตุม อื โอเอีฮ ละ ปุย โรฮ.

ลืลาว 78:12

พะจาว เอีจ ยุฮ ป ซัมคัน ซองนา ปันตา โม จัตเจือ ไพรม อื. มัฮ ยุฮ อื นึง เตะ ลโลวง ป อัฮ ปุย โซอัน ไม่, ป ไก นึง เมือง อียิป เซ.

โยป 5:9

นึง มัฮ อื ป เกียฮ ยุฮ กัน ระ เนอึม โฮฮ ฮา เกียฮ คาวไจ เอะ อื, ไม่ เกียฮ ยุฮ อื ป ซัมคัน ปอ โอ เยอะ เญาะ โอยจ เมีญ.

4 กซัต 24:6

ฟวยจ เซ กซัต โยอัต เซ กอก แม เยโฮยาด่า ซตุ ระ เซ ฆาื อื. อัฮ เฮี ละ อื, “ปะ เมอยุ โอ เปอะ เกือฮ โม เลวี โฮว ซาวป เกป พาซี เน่อึม นึง โม ยูด่า ไม่ ปุย อาวต นึง เวียง เยรูซาเลม เมอ? ไลลวง เซ เยอ เอีจ มัฮ โรฮ ป เอีจ อัฮ ไอ โมเซ กวนไจ ยุฮ พะจาว อาึง นึง ซ เกือฮ อื โม อิซราเอน กัฮ พาซี ละ ซ เพรียง แตะ พากัง นา ก อาวต พะจาว เซ นึง,” อัฮ เซ.

3 กซัต 6:49

ป มัฮ อาโรน ไม่ โม จัตเจือ อื ปังเมอ แปน ป มอง ไจ ไซ ตอง ซัตซิง ทไว ปุย นึง คัน ยุฮ พะจาว, ไม่ ตอง โรฮ อื ป ซออย ฮงาื ละ อื. มัฮ โรฮ ป ลัง ยุฮ กัน กไน ฮอง ตึก นึง ซัมคัน แตะ เซ ละ ซ รไซจ อื พิต โฌวะ ยุฮ โม อิซราเอน, ตัม ป ซตอก ไอ โมเซ ป มัฮ กวนไจ ยุฮ พะจาว อาึง เซ โครยญ เจือ.

รโฮงะ 14:8

ฟวยจ เซ ไก แม เตปด่า ติ, อัฮ เฮี, “บ่าบี่โลน ป มัฮ เวียง ระ ป คนัป ปุย โครยญ เจือ ปุย ญุ ไปล อะงุน ป มัฮ กัน บาึฮ ม่อยญ ฮอยญ เรี ยุฮ แตะ เซ, เอีจ ไลจ เนอึม ไลจ แนม,” อัฮ เซ.

ด่านีเอน 9:11

โม อิซราเอน เตือง โอยจ อื เอีจ ยุฮ ตื ป แพก ฮา โกตไม ยุฮ เปอะ. เอีจ ลเตือฮ ติ แตะ ฮา อื. เนอึง โตว ป อัฮ ปะ. เคียง เมอ ยุฮ อื ตอก เซ, ปะ เอีจ เกือฮ เปอะ ลปุง ซะ ซม่อต ป เอีจ ไซฮ ปุย อาึง นึง โกตไม ยุฮ ไอ โมเซ ป มัฮ กวนไจ ยุฮ เปอะ โฮ ฮอยจ ละ เอะ ฆาื อื, นึง ยุฮ เอะ กัน พิต ละ เปอะ.

เนฮะมี 9:14

ปะ เอีจ เกือฮ เปอะ ปุย ทื ซเงะ ลโล่ะ ยุฮ แตะ, ปะ เอีจ เกือฮ โรฮ เปอะ ไอ โมเซ ป มัฮ กวนไจ ยุฮ แตะ ไซฮ โกตไม ยุฮ เปอะ ละ อื.

5 โมเซ 34:5

ไอ โมเซ ป มัฮ กวนไจ ยุฮ พะจาว เซ ยุม เนอึม นึง เมือง โมอัป เซ ตอก อัฮ พะจาว อาึง ละ อื เซ.

5 โมเซ 32:3

อาึ ซ รโฮงะ มอยฮ ระ ไล ยุฮ พะจาว. ไมจ ทไว โญตซัก ละ พะจาว ยุฮ เอะ.

โยชูวา 22:5

โม เปะ เอ, ปังเมอ ไมจ โรฮ เปอะ เครอึง นึง ซ ยุฮ เปอะ ตัม ลปุง ซตอก พะจาว ไม่ โกตไม ยุฮ อื, ตัม ป ซตอก ไอ โมเซ ป มัฮ กวนไจ ยุฮ พะจาว เซ ละ เปอะ. ไมจ เปอะ ฮรัก พะจาว ยุฮ เปอะ ไม่ โฮว เปอะ นึง คระ โครง ยุฮ อื โครยญ เจือ. ไมจ โรฮ เปอะ ยุฮ ตัม ลปุง ซตอก อื, ไม่ รโจะ ลอป เปอะ รพาวม แตะ ไม่ อื, ไม่ รซอฮ เปอะ ละ พะจาว เซ ไม่ เตม รพาวม เปอะ นึง,” อัฮ เซ ละ อื.

โยป 36:24

ปุย โครยญ เจน ปุย เอีจ ลืลาว พะจาว เบือ กัน ระ ไล ยุฮ อื. ปะ ไมจ โรฮ เปอะ ลืลาว พะจาว ตอก เซ โรฮ.

ลืลาว 18:30

เญือม ง่อต คระ โครง ยุฮ พะจาว มัฮ เนอึม ป ไมจ เนิ โครยญ เจือ. ลปุง พะจาว ไก โตว พิต โฌวะ นึง. พะจาว ปุน เฆีญ โม ป เปิง แตะ โครยญ โฆะ อื.

ลืลาว 92:5

โอ พะจาว, กัน ยุฮ ปะ เซ มัฮ เนอึม กัน ตึก นึง ระ ไล แตะ. ป คิต ป ง่อต เปอะ มัฮ เนอึม ป ตึก นึง โด่ะ แตะ.

ลืลาว 111:7

กัน ยุฮ พะจาว นึง อัมนัต แตะ มัฮ ป เนอึม ป แนม ไม่ ป ปุก ป ลอก. ลปุง ซตอก รเง่อึม อื ปุย มัฮ เนอึม ป ปุน อาึง ปุย รพาวม แตะ นึง.

1 ทิโมที 1:17

พะจาว มัฮ กซัต ตัตเตียง โอเอีฮ โอ เญาะ ไก ลอยจ. มัฮ ป ไอม ลอป, ป โอ ปุย เกียฮ ยุ นึง ไง่ แตะ. ไมจ ปุย ลืลาว พะจาว ติ โตน เซ เกือฮ ลอป ไก โญตซัก โอ เญาะ ไก ลอยจ. อาเมน.

รโฮงะ 1:8

พะโองจาว ป มัฮ พะจาว ตึก นึง ระ อัมนัต แตะ อัฮ เฮี, “อาึ มัฮ ตัว ‘ก’ ไม่ ตัว ‘ฌ’,” อัฮ เซ. พะโองจาว เซ มัฮ ป ไก ปเลี่ย เฮี, ตึน ไก โรฮ เน่อึม ไพรม อื. เฆียง เฮี ซ ฮอยจ แม.