10 จีวิต เตอะ เอีจ ซ ไฆร, เคิ เนอึม ยุฮ ฮุ เอีจ ซ ล่อยญ นึง อาวต ลอป เปอะ ไม่ รพาวม ตุก แตะ. เรียง แด่น เนอะ โอยจ ปุๆ ฆาื มั่ป พิต ยุฮ ฮุ. ซอัง เงอะ ตอก เอิน ป เอีจ ฮรัม โฮ.
อาึ มัฮ ปุย เอีจ กอ อาวม เม่ะมั่ก เน่อึม เญือม นุม ลั่ง แตะ. ติ ติ เลีฮ อื เอีจ ซเปี เนอึม ยุม เมอะ. โฮลฮ โอต ลอป ป โอ มวน ไม่ โอ เยอะ เญาะ ไก ควน ซโอว รพาวม.
ปะ ฮาวก รพาวม เปอะ ละ อาึ, เกือฮ เปอะ อาึ อาวม ป โซะ นึง เนะซอัง แตะ ฆาื มั่ป พิต ยุฮ ฮุ.
รพาวม อาึ ตุก เนอึม, อาวม แนฮ โซะ รพาวม แตะ รโตง จัตเจือ แตะ ป มัฮ โกะ เนะ คระ เฌือต แตะ. มัฮ ซ ไก ป มัฮ อื ละ อื, อาึ ปอ เอิน ปุน ปัว ติ แตะ ลอก ป โอยจ นึง โซะ แตะ เน่อึม นึง พะจาว, ไม่ เกือฮ ติ แตะ รกัฮ ฮา พะคริต ละ ซ เรอึม แตะ โม เอียกปุ แตะ ป มัฮ โม ยิว เซ.
มัฮ เซ ป เกือฮ พะจาว อื เงี่ยง ซเงะ ฆาื อื ตอก เอิน รพาวม ปุย ติ รพาวม โน่ง โฮ, เกือฮ เคิ เนอึม ยุฮ อื ล่อยญ พราวป เอิน ปอ ฮลัต ปุย นึง.
เญือม เพอึก เฟียต เปอะ ปุย ฆาื มั่ป ยุฮ อื, ปะ เอีจ ยุฮ เปอะ ไลจ ไม่ โอเอีฮ ป ฮรัก อื ตอก เอิน โปว เมะ ตาวก เลียก โตะ งอ โฮ. ป เนอึม นึง อื ปุย ปลัฮเตะ เอ มัฮ ตื ตอก พาวง โดง โฮ.
อาึ ซ โฮลฮ ลั่ง โอต เม่ะมั่ก รพาวม ตุก แตะ เฮี เลี่ญ เมาะ เมอ แล? อาึ อาวต ลอป ไม่ รพาวม ตุก แตะ โครยญ ไกลป ซเงะ. โม ป เกละยุ อาึ เซ ซ โฮลฮ ลั่ง โคมเฮง อาึ เลี่ญ เมาะ เมอ แล?
อาึ แงงัฮ ลอป เปอะ ตัง โซม แตะ อาวป, อาึ โฮลฮ ฆิ ซอัง ฮนัง รบวต แตะ.
ปเลี่ย เฮี เคียง เอีจ กวต เตอะ, ปัว เปอะ โอ ละ โปวฮ อาึ. เญือม โอ อาึ เญือะ ไก เรียง แด่น เนอ ปัว เปอะ โอ เกือฮ ติ เปอะ ซไง ฮา เยอะ.
โม เปะ ป ยุฮ กัน ฆอก กัน เบร เยอ, ตอ แปฮ ฮา อาึ อื, นึง เอีจ ฮมอง พะจาว เซียง เยือม อาึ เฮี.
โอ พะจาว, เญือม ไววอน อาึ ปัว นึง เปอะ, ปัว ปะ ง่อต ละ แตะ. ปัว เปอะ เลียก พาวม นึง เงอะ, ไม่ โลยฮ เปอะ เนิ.