YESAYA 65:13 - WUKE SUSI WATTI'U AL᷊AL᷊USASSA

¹³ Mangke atonna, taumata apan massubba si Ya'u sarun umanna, wuṛṛu i yamiu amal᷊unusanna. I mangitou sarun ma'inumma, arawe i yamiu amarouanna. I mangitou sarun lumuassa, arawe i yamiu pansilianna.

YESAYA 65:13 Referans Kwoze

MALEAKHI 3:18

Uma-U sarun maasilo apia ereapa paṛṛalane pal᷊addu taumata mapia wuṛṛu taumata lal᷊eo, suwallattu taumata apan mattaṛṛamawu si Ya'u wuṛṛu tawe.”

YESAYA 66:14

Naasilo udde, i yamiu sarun lumuassa, wuṛṛu mabbal᷊i matohassa wuṛṛu sehatta ere nannal᷊o wakku. Ne manga allang-Ku sarun ma'apendamma taṛṛino-U wuṛṛu manga see-U sarun ma'apendamma asasa'u-U.”

YESAYA 66:5

Paddaringikke apa apan iwabbisara Mawu, ei i yamiu apan matta'utta wuṛṛu matuṛṛutta si Tou, “Ana waugu i yamiu satia si Ya'u, pia suwallattu walahannu apan maddantinni yamiu, wuṛṛu maddiri massagal᷊omang kamiu. I mangitou mangngal᷊uandaga si yamiu ringannu mabbisara, ‘Wala'e Mawu mapal᷊iatta'u awawantu-Ge, tadea'u i yami maasilo al᷊al᷊uassi yamiu.’ Arawe ete i mangitou sassane apan maasomba asasili.

YESAYA 61:7

Ana waugu i yamiu naasombate asasili paarua lappuanna, wuṛṛu luhudda wuṛṛu aal᷊uandaga naola'e wageangnge, ne i yamiu sarun maasomba pussa'a paarua lappuanna lai su wanuanu wuṛṛu uatahuanna al᷊al᷊uassa tutune.

YESAYA 44:9

Manga taumata apan nallanginnu paal᷊uanna sassubbanna udde tawe gunane, wuṛṛu manga monganna apan raddaloanni mangitou tawe mangal᷊ene. Manga taumata apan massubba paal᷊uanna udde wuta wuṛṛu waggan napa, ana waugu udde i mangitou sarun masili.

DANIEL 12:2

Manambo suwallatti mangitou apan natete sarun tate mabbiakka apia; sambageanganna lai sarun aṛṛiaannu asasusa wuṛṛu atata'utta saran mal᷊annu-l᷊annu lai.

YESAYA 1:19

Amungkangngu i yamiu maapulu tumuṛṛutta si Ya'u, i yamiu sarun mamendamma al᷊awo'a apan mapia sussabbangnga wuassu wanuanu.

DARALO 34:10

Pangaddate Mawu, ei i yamiu al᷊aṛṛanang-Nge, ana waugu taumata apan mangngimanna sarun tawe atalanne.

YESAYA 41:17

Napawe pabbawala-U apan susa udde maddea'a ua'e, wuṛṛu tonggol᷊anni mangitou namara ana waugu marou, ne i Ya'u, Mawu, sarun sumimbakka aal᷊iomanni mangitou; Ruatan Israel sarun tawe manantangngu uman-Ne.

YESAYA 5:13

Ana waugu udde uma-U apan waggan napa sarun ehetanna inai maola'a taumata niatawanna. Manga mamamiaṛṛa'a wuṛṛu tumana'u soa sarun mate amal᷊unusanna wuṛṛu amarouanna.

YESAYA 8:21

Manga taumata apan naṛṛiaannu susa wuṛṛu mal᷊unussa sarun mamal᷊intaddu wanua udde. Ana waugu mal᷊unussa, i mangitou mangke mandona na'oman sara mangnganen datu wuṛṛu Ruata mangitou. Suapan tampa i mangitou ma'ellega, tumatingngara,

YESAYA 41:18

I Ya'u na'ola'a manga sal᷊ukka mangngelekka su manga wuidda apan lunggukka; matan kua'e sarun umal᷊iwombonga su pattangngannu ammaranne. Wadda'a mal᷊alangnga sarun Ta'u olaanna rano; ua'e sarun ṛumawiassa wuassu leta'a apan mamara.

YESAYA 42:17

Taumata apan mangngimanna su paal᷊uanna sassubbanna wuṛṛu mangnga'u udde maola'a mawu mangitou, sarun lobbosanna wuṛṛu pansilianna.”

YESAYA 44:11

Atonna, anambon taumata apan massubba paal᷊uanna sarun masili. Taumata apan nallanginnu paal᷊uanna udde taumata ere i ite. Doloṛṛa'e i mangitou dumarisikka suadio'a; i mangitou sarun matta'utta wuṛṛu masili.

YESAYA 49:10

I mangitou tawe marou ara'e amal᷊unusanna, wuṛṛu tawe aṛṛinoannu sal᷊ihangngu paddissa su wadda'u anne. Ana waugu i Ya'u, u'akkanni mangitou, sarun mangehetta si mangitou wuṛṛu mangapiddi mangitou watukku al᷊imatan kua'e.

YESAYA 50:11

Ei i yamiu apan mappandumma manilaka taumata waine, i yamiu sarun pateannu ṛiinni yamiu sassane. Ete Mawu apan ma'ola'a udde matipussa, i yamiu sarun sansaranna ringannu mawakkatta.

YESAYA 62:9

Arawe i yamiu apan mangngammullu pangitinganna, sarun umanna wuane wuṛṛu maddalo Mawu; wuṛṛu i yamiu apan manni'o wuan anggore, sarun ma'inumma ua'ene su rallakku Wal᷊e-U.”

YEREMIA 22:22

Ana waugu udde, manga piaṛṛangngu sarun mawul᷊i tiupannu anginna. Manga hawenu sarun ṛootanna maola'a tawananna, wuṛṛu soanu heloanna wuṛṛu pansilianna ana waugu anambon al᷊al᷊eonu.

HOSEA 4:10

I yamiu sarun umanna wuassu manga sasamba apan nionggolla, arawe i yamiu sidutu mal᷊unussa. I yamiu sarun massubba manga mongannu asasuwukka, arawe tumanangnge mangke tawe aatambanna, ana waugu i yamiu buatte nanantang-Ku wuṛṛu massubate manga mawu waine.”

AMSAL 13:25

Taumata apan mapia sidutu su asasuungnga, arawe taumata lal᷊eo sidutu su awussa.