YESAYA 41:17 - WUKE SUSI WATTI'U AL᷊AL᷊USASSA

¹⁷ Napawe pabbawala-U apan susa udde maddea'a ua'e, wuṛṛu tonggol᷊anni mangitou namara ana waugu marou, ne i Ya'u, Mawu, sarun sumimbakka aal᷊iomanni mangitou; Ruatan Israel sarun tawe manantangngu uman-Ne.

YESAYA 41:17 Referans Kwoze

YESAYA 55:1

Mawu nabbisara, “Wette i yamiu sarangkanambone apan marou, pa'inumpe, ua'e nasaddiate. Rantate i yamiu apan tawe uatahuanna roitta, panengkampe gandumma apan tawe bawaekke, wuṛṛu ante! Anggore wuṛṛu susu nasaddiate, sengkampe ringannu tawe bawaekke.

YESAYA 30:19

Ei i yamiu apan uatana'a su Yerusalem, i yamiu tawe sidutu mangke lulluai. Mawu pia aakkanna, wuṛṛu ringannu mal᷊ihakka sumimbakka si yamiu amungkangngu sumal᷊ande maddorongnga tul᷊unganna si Tou.

MATIUS 5:6

Lal᷊umanna'a su taumata apan sidutu ma'ola'a apulun Ruata; Ruata sarun manuungngu apulu mangitou!

YESAYA 44:3

Ana waugu i Ya'u sarun mandal᷊innu ua'e su leta'a apan mamara, wuṛṛu mapa'elekku manga sal᷊ukka su leta'a apan naṛṛangngitta. I Ya'u sarun mangonggollu taṛṛino-U su papapulunnu, wuṛṛu mangal᷊amatta pallaṛṛitenu.

YESAYA 42:16

Pabbawala-U apan buta sarun Ta'u ehetanna umamattu lal᷊anna apan awagananni mangitou; I mangitou sarun Ta'u ipiaṛṛa'a su manga lal᷊anna apan awagananni mangitou. Ararandumma Ta'u olaanna semakka si mangitou, wuṛṛu lal᷊anna natatal᷊attada Ta'u iratakka. Eteudde apan Ta'u olaanna si mangitou, wuṛṛu sarun Ta'u manaranna.

YESAYA 61:1

Taṛṛino Mawu Apan Atanggaṛṛanne indi si ya'u; i Tou namile wuṛṛu nandolo'u iappa'apiddu watti'u al᷊al᷊uassa su taumata asiangnga wuṛṛu iappa'apia taumata apan naungnge natumma'a; iappapasingkatta su taumatan ṛuumanna manungku i mangitou mal᷊ihakke ipallossa, wuṛṛu su manga taumata sulal᷊ummu tuttupanna manungku i mangitou sarun iapasabbangnga.

PANDARIADDI 28:15

Paanaunge, i Ya'u sarun mantul᷊ungnga wuṛṛu mallu'adda si'o, su al᷊awo'u tampa amatannu, wuṛṛu i'o sarun Ta'u iapidda mabelengnga watukku wanua indi. I Ya'u tawe manantangngu maddatingngu sarangkanambone Ta'u niola'a su alawo'u apa apan pina'ire-U si'o.”

SONDAPPA 22:17

Ghaṛṛahon Ruata wuṛṛu Ma'a'awingnga Wawine nabbisara, “Wette!” Suapan taumata apan naaringikka indi ṛinone lai mabbisara, “Wette!” Isai apan marou, ṛinone i tou rumanta! Wuṛṛu isai apan maapulu, ṛinone i tou manganu ua'e apan mangonggolu wiakka udde ringannu tawe bawaekke.

SONDAPPA 21:6

See i Tou nabbisara, “Nasuete! Ete i Ya'u paarorone wuṛṛu pangudusanne; ete i Ya'u Mawu apan wuassu Panattaṛṛanne ma'omam Panginsueanne. Suapan taumata marou, Ta'u iapa'inumma ringannu tawe bawaekke, wuassu al᷊imatan ua'e apan mangngonggolu wiakka.

2 KORINTUS 12:9

Arawe Mawu sinumimbakka, “I Ya'u mandangngu si'o wuṛṛu ete indi wuannu; ana waugu taṛṛino-U ahewal᷊anne amungkangngu i'o sulal᷊ummu al᷊allome.” Ana waugu udde naungku mal᷊uassa mamarabungan al᷊allome'u, ana waugu amungkangngu i ya'u lome, ne su tempo udde i ya'u maapendama manungku Kristus uariagga si ya'u ringannu atatohan-Ne.

LUKAS 16:24

‘Iamangnga Abraham!’ sasal᷊anden taumata ala udde. ‘Akkanaawe i ya'u. Doloṛṛa'a i Lazarus mangammon tal᷊imadone su ua'e, see rumanta maṛṛolo lila'u. I ya'u mangke nasansarate sulal᷊ummu putungnga indi!’

MATIUS 5:3

“Lal᷊umanna'a su taumata apan uapendamma tawe atatohassa wuṛṛu tumba'u uaantimma Mawu sassane; ete i mangitou udde lal᷊oṛṛon araratuannu Ruata!

LAL᷊ALLU 4:4

Manga ana'a maraddio'a tawe iapasusu, na'oman sara nate namarouanna. Al᷊aṛṛana'a maddorongnga anna, arawe taweddu mangonggolla.

YESAYA 66:2

Ul᷊ilin pati'uppa uddewe lanna'u lima-U, ne sarangkanambone udde niola'a. Arawe apulu-U eteudde taumata naungnge masaṛṛionto'a, apan mangnga'u manga rosane, apan matta'utta wuṛṛu matuṛṛutta si Ya'u.

YESAYA 43:20

Winatangnga matengnga sarun mamantuga si Ya'u; serigala wuṛṛu manu'a unta sarun maddalo si Ya'u ana waugu i Ya'u napa'elekku ua'e su wadda'u anne, wuṛṛu manga sal᷊ukka su wadda'a mal᷊alangnga tadea'u mapa'inummu umatta nipile-U.

DARALO 94:14

Ana waugu Mawu sarun tawe manantangngu al᷊aṛṛanang-Nge; i Tou tawe ma'ellega aroddi pussa'a-Ne.

DARALO 50:15

Salandete si Ya'u sutempon asasusa, i Ya'u sarun mamallossi yamiu, wuṛṛu i yamiu sarun maddalo si Ya'u.”

DARALO 42:2

Naal᷊ihidda rusa maapulun ua'en sal᷊ukka, aroddi lai niawa'u maapulu-Nu, oh Ruata.

DARALO 34:6

Taumata su asasusa mangngantimma si Tou wuṛṛu lulluassa, i mangitou taweddu pangiananne mabbal᷊i masili.

DARALO 22:15

Ikka'u nasuete naal᷊ihidda ua'e nabboso, anambon duṛṛi'u napallossa wuassu pabbuuanne, naungku nonossa ere lilinna.

SASABANGNGA 17:6

I Ya'u sarun rumarisikka su saruannu su wowon sambau watu wahewa su Wowon Sinai. Puulle watu udde, ne ua'e sarun sumabbangnga na'oman sara manga taumata udde wotongngete ma'inumma.” I Musa na'ola'a aroddi aellehannu manga piaṛṛa'u Israel.

SASABANGNGA 17:3

Arawe manga taumata udde mangke tumaniten marou wuṛṛu i mangitou sidutu sussawutulla si Musa. Unni mangitou, “Anio i'o nangapiddi yami sinumabbangnga wuassu Mesir? Tadea'u yami, manga ana'i yami wuṛṛu winatangngi yami mate marou?”

DARALO 37:25

Ro'en i ya'u ta'e dario'a naddatingu timmadete, taambe saran paassa i ya'u taambe naasilo taumata mapia tinantangu Mawu, ara'e ana'a pulunnu nabbal᷊i maddarorongnga.

DARALO 74:21

Arie mamalan taumata niallangnga pappansilianna, antimanna taumata su asasusa wuṛṛu asiangnga maddalo Si'o.

YESAYA 48:21

Sutempo i Tou namiaṛṛa'i mangitou su wadda'a mamara, i mangitou tawe naaṛṛaddannu rou. Mawu nama'a wowone watu wuṛṛu napa'elekku ua'e, wuassu watu udde sinumabbangnga ua'e huna mangitou.

YESAYA 49:10

I mangitou tawe marou ara'e amal᷊unusanna, wuṛṛu tawe aṛṛinoannu sal᷊ihangngu paddissa su wadda'u anne. Ana waugu i Ya'u, u'akkanni mangitou, sarun mangehetta si mangitou wuṛṛu mangapiddi mangitou watukku al᷊imatan kua'e.

YESAYA 58:11

I Ya'u sidutu sarun ua'ehetta si yamiu wuṛṛu mallaidda si yamiu su leta'a apan mamara; i Ya'u sarun mandiaga si yamiu tadea'u sidutu sehatta wuṛṛu matohassa. I yamiu sarun maola'a ere wawail᷊anna apan nasuungnga ua'ene, ere al᷊imatang kua'e apan tawe mamara.

YESAYA 62:12

I mangitou sarun isaggo: ‘Umatta susi’; ‘Umatta apan nisal᷊amattu Mawu’. Yerusalem sarun isaggo ‘Soa apan nisal᷊o'u Mawu’, ‘Soa apan tate lai itantangngu Mawu’.

YESAYA 65:13

Mangke atonna, taumata apan massubba si Ya'u sarun umanna, wuṛṛu i yamiu amal᷊unusanna. I mangitou sarun ma'inumma, arawe i yamiu amarouanna. I mangitou sarun lumuassa, arawe i yamiu pansilianna.

YESAYA 65:24

Tantal᷊anna i mangitou taambe naddorongnga, i Ya'u buatte sinumimbakka; tantal᷊anna i mangitou taambe nuddussa inumal᷊iomanna, i Ya'u buatte naddaringikka aal᷊iomanni mangitou.

YEHEZKIEL 47:8

I tou nabbisara si ya'u, “Sal᷊ukka indi mangngelekka wuassu ra'i sinumabbi wanua indi wuṛṛu sinumabbi Wawal᷊annu Sal᷊ukku Yordan mabbatukku Tahal᷊oangnga Nate. Napawe ua'ene na'omate su Tahal᷊oangnga Nate, ne ua'en tahal᷊oangnga mapakkada mabbal᷊i ua'e maammi.

1 MARARATU 17:8

Wua'udde Mawu nabbisara si Elia,

YEREMIA 31:25

I mangitou apan nallome sarun iapaatohassa, wuṛṛu mallappu ana waugu niamal᷊unusanna sarun Ta'u iapaal᷊aidda.