YESAYA 31:4 - WUKE SUSI WATTI'U AL᷊AL᷊USASSA

⁴ Mawu nabbisara si ya'u, “Naal᷊ihidda singa sussaṛṛandanga mangngal᷊addu pabbawiakke wuṛṛu tawe apata'utannu aintul᷊i wuṛṛu a'uin ammul᷊annu mallal᷊u'adda winatangnga apan nasaddiate mando'appa si tou, aroddi lai i Ya'u sarun mamangalo wuṛṛu manahekku Wuiddu Sion.

YESAYA 31:4 Referans Kwoze

AMOS 3:8

Amungkangngu singa mammassingnga, isaite apan tawe mata'utta? Napawe Mawu Apan Atanggaṛṛanne mabbisara, isai apan wotongnge mal᷊annabba wuṛṛu tawe masingkattu tanata-Ne?

HOSEA 11:10

Mawu nabbisara, “Uma-U sarun tumantalongnga si Ya'u napawe i Ya'u mamiṛṛinganna ere singa wuṛṛu mammata'utta seetti mangitou. Uma-U sarun masasaṛṛawutta rumanta wuassu samba'a waṛṛatta tadea'u massubba si Ya'u.

ZAKARIA 2:5

Mawu buatte naddiandi manungku i Tou sassane sarun maola'a darandungnga putungnga apan uapal᷊iwutta soa udde tadea'u mallu'adda wuṛṛu i Tou sarun matana'a poiaroddi sulal᷊ummu al᷊awo'u taṛṛino wuṛṛu awawantu-Ne.”

YESAYA 42:13

Mawu inaite mapapangalo naal᷊ihidda sangkatou waṛṛanine, naal᷊ihidda sangkatou tantara apan apulune mapapangalo. I Tou nanggoressan aintul᷊in pangalo, wuṛṛu namasil᷊o awawaṛṛani-Ne su saruannu seetta.

ZAKARIA 12:8

Su allo udde i Ya'u sarun mallu'adda tumana'u Yerusalem; wuṛṛu iapa al᷊omeanne lai suwallatti mangitou sarun maola'a ere atohassi Daud. I mangitou sarun ehetannu papapulunni Daud ere lai mala'eka-U, ewe'e lai ere i Ya'u sassane.

SONDAPPA 5:5

See sangkatou wuassu manga piaṛṛange udde nabbisara si ya'u, “Arie palluai! Pa'ellege! Singa wuassu walahannu Yehuda, papapulunni Daud apan wahewalla, suete naauntunga! I tou wotongnge mamesangnga pitu segele udde wuṛṛu mamu'a wuke udde.”

ZAKARIA 14:3

Wua'udde Mawu sarun inai mapapangalo mando'appa manga walahanna udde, ere buatte niolang-Nge sutempon dorone.

ZAKARIA 9:15

Uman-Ne sarun onggolan-Ne passirunganna, ma'oman sara al᷊awo'u seetta wotongnge iawaddo. Naal᷊ihidda hahuressan taumata wu'anna, etearoddi hahuressan mangitou sulal᷊ummu pangalo. Naal᷊ihidda daṛṛan sasamba apan nilal᷊inna su wowon mezbah, aroddi lai daṛṛan seetti mangitou nabboso.

ZAKARIA 9:8

I Ya'u sarun mandiaga leta-U wuṛṛu mannal᷊are ammul᷊annu tantara raho apan sumabbi umamatta isudde. I Ya'u tate lai mamala mangangallangnga mandal᷊eo uma-U. Ana waugu asasusan mangitou buatte Ta'u niasiloanna.”

YEREMIA 50:44

Ere singa apan sinumabbangnga wuassu mahurangnge maappalla maranin Sal᷊ukku Yordan wuṛṛu nirumanta su wadda'a tampa manga domba mannioma, aroddi lai Ya'u, Mawu, sarun dumanta wuṛṛu ma'ola'a taumatan Babel tumal᷊angnga wuassu manga soa mangitou ringannu namaṛṛoro. Wua'udde i Ya'u sarun mamile sangkatou piaṛṛa'a iapaparenta walahanna udde. Isai apan botongnge isul᷊ung-Ku? Isai waṛṛani ma'ola'a parakara ringang-Ku? Apa pia piaṛṛa'a apan botongnge mando'appa si Ya'u?

YESAYA 12:6

Paggiote ei manga tumana'u Sion, pangantarite ringannu lulluassa. Ruata na'ukassu Israel mangke mawantuga, i Tou uatana'a su pattangnganni yamiu.”

YESAYA 10:16

Waugu taumatan Asyur buatte namungan batanganne, Mawu Apan Lembontaṛṛino sarun mandantan al᷊aṛṛusa'itta ipakkuumannu manga tembonannu tantara apan matohassa. I mangitou sarun mamendamma sal᷊ihangnga apan matanggakka ere putungnga apan sidutu mannutungnga.

2 TAWARIKH 20:15

ne i tou nabbisara, “Tuangnga Apan Mawantuga see lai manga tuṛṛangnga sarangkanambone. Mawu nabbisara manungku i yamiu tawe wotongnge mallome ara'e mata'utta sumaruanna tantara apan manambo udde. Ana waugu apan mapapangalo wal᷊inewe i yamiu, ewe'e Ruata.

SONDAPPA 10:3

See i tou inumui ringannu tingikka ma'ikkatta naal᷊ihidda tingikku manga singa. Napawe mala'ekatta udde suete niumui, pitu rallu'a sinumibakka ringannu tingikka mappose.

SASABANGNGA 14:14

Mawu sarun manahekki yamiu, wuṛṛu i yamiu manin tawe ma'ola'a apa-apa.”

SASABANGNGA 14:25

I Tou na'ola'a manga bolan kereta mangitou tawe tumiri, na'oman sara ringannu masahadda i mangitou umamatta. Unnu taumata Mesir, “Mawu mannahekku taumatan Israel mandoappa si ite. Weete i ite tumal᷊angke wua isindi!”

YESAYA 30:30

Mawu sarun mapararingikku tingik-Ke apan mawantuga, wuṛṛu suapan taumata sarun maapendamma taṛṛino-Ne apan bahewalla. Asasa'u-Ne sarun mandantan putungnga apan mannoṛṛobba, uranna masaddatta, uranna watu wuṛṛu tandi'a.

YESAYA 30:32

Tantal᷊anna i mangitou mammendamma manga papuulle, umattu Mawu lulluassa ringannu musikku tambore wuṛṛu kecapi. Ruata sassane sarun mamangalo mando'appa Asyur.