YESAYA 24:5 - WUKE SUSI WATTI'U AL᷊AL᷊USASSA

⁵ Runia mabbal᷊i lal᷊eo ana waugu tumanangnge lullawangnga manga parentan Duata, mammal᷊u manga atoranna wuṛṛu massinaaddu riandi apan niolangnge ringanni mangitou saran mal᷊annu-l᷊annu.

YESAYA 24:5 Referans Kwoze

IBRANI 13:20

Ruata suete napaawiakku Mawung kite Yesus Kristus wuassu papate. Ana waugu papate-Ne udde i Tou orassa indi naola'a Mallal᷊u'adda Mawantuga si ite, eteudde manga dombane. Papate-Ne udde lai mannohassa pa'aire apan tawe pangudusanne apan niola'u Ruata ringanni ite.

IBRANI 9:1

Pa'aire apan paarorone pia manga atorannu patataṛṛamawu, wuṛṛu pia lai tampa patataṛṛamawuanna niola'u taumata.

DANIEL 7:25

I tou sarun mabbisara lumawangnga Ruata Apan Atanggaṛṛanne wuṛṛu mangallangnga umattu Ruata, wuṛṛu i mangitou sarunaggasanne al᷊annune tatallu setenga su tonnane.

LUKAS 1:6

Rua sangkawinganna udde, mabbiakka ma'al᷊uassa naungngu Ruata. Itarua matuṛṛutta anambon parenta wuṛṛu tita Mawu ringannu ahewallu naungnge.

MIKHA 2:10

Darisikke wuṛṛu roote; isindi tate lai matammudda. Manga rosanu buatte napaarantan asasilaka apan maata'utta su tampa indi.

DANIEL 9:10

I yami tawe maddaringikka tingik-Ku, oh Mawu Ruatan kami, sutempo I'o nandolokki yami mabbiakka tuttuṛṛutta manga tita apan buatte nionggollu Mawu si yami wuassu manga nabi, manga allang-Ngu udde.

YEHEZKIEL 20:24

ana waugu i mangitou buatte nangapissa manga parenta-U, lullawangnga manga tita-U, wuṛṛu nanggal᷊usa'a allon Sabat, wuṛṛu massubba manga monganna apan raddaloannu iupungngi mangitou.

YEHEZKIEL 20:13

Arawe su wadda'u anne udde, i mangitou nilumawangnga manga parenta-U, wuṛṛu nanol᷊a'u manga tita-U apan maola'a wataṛṛu manungku taumata apan matuṛṛuta sidutu wiakka. I mangitou tumanite nanggal᷊usa'a allon Sabat. Ana waugu udde, su wadda'u anne udde i Ya'u nasaddiate mamallossu asasa'u-U su saruanni mangitou wuṛṛu mamate si mangitou.

YEREMIA 50:5

I mangitou sarun maiwal᷊on lal᷊anna watukku Sion, ana see niumamatte su lal᷊anna udde. I mangitou sarun ma'ola'a pa'aire sarangkal᷊o'enge si Ya'u, wuṛṛu sidutu uaagassa pa'aire udde.

YESAYA 50:1

Mawu nabbisara su Israel, “Ei uma-U, sunnanu i Ya'u mallimbuakka si'o naal᷊ihidda sangkatou esakka mallimbuakka awingnge? Amungkangngu aroddi, suapa surattu sindo? Sunnanu i Ya'u mabbalungngu, ere sangkatou iamangnga nabbal᷊u'u anangnge ipamaekka awallassa? Wal᷊ine! I'o niatawanna wuṛṛu niwuangnga, ana waugu rosa wuṛṛu al᷊al᷊eonu sassane!

YESAYA 10:6

I Ya'u nandolokku Asyur niapapangalo pabbawala-U apan massinaadda wuṛṛu ma'ola'a si Ya'u nasa'u. I Ya'u nanddolokku Asyur iapaaṛṛo wuṛṛu iapata'o se'e iapaṛṛinda pabbawala-Ku ere awu su lal᷊anna.”

DARALO 105:10

ana see nitohassa si Yakub, maola'a paaire sarangkal᷊o'engnge su umattu Israel.

DARALO 55:5

Naungku tumaniten sussinggawanga, atata'uttu papate uarundinganna watangangku.

2 TAWARIKH 33:9

Manasye naaola'a tumana'u Yerusalem na'ola'a manga rosa maddal᷊eoanna wuassu rosa apan buatte niola'u manga walahanna apan nilimbuaṛṛannu Mawu wuassu Kanaan sutempo al᷊aṛṛana'u Mawu sinumutta su wanua udde.

2 SAMUEL 23:5

Aroddi lai papapulungku nial᷊amatannu Ruata, pa'aire-Ne si ya'u, tawe mawal᷊u, pa'aire-Ne udde mal᷊annu-l᷊annu wuṛṛu nasuungnga, mangke sidutu uaatokka su sarangkanambone. Ruata uariaga auntungangku wuṛṛu nangutungngu al᷊awo'u apulun naungku.

YOSUA 24:25

Ne su allo udde su Sikhem i Yosua na'ola'a paddariandi ringannu taumatan Israel; wuṛṛu isudde i tou nangonggolu manga tita si mangitou wuṛṛu manga atoranna apan ṛinone olaanni mangitou.

TAHIUL᷊E 32:20

Wisara-Ne, ‘I Ya'u maddirite mantul᷊ungngi mangitou apia; walate Ta'u ellehanna tanne ereapa panginsueanni mangitou. Ana waugu walahanna udde maatikka puane wuṛṛu mangke tawe tumuṛṛutta.

TAHIUL᷊E 32:15

Mawu nabbal᷊i ala, arawe apulune lullawangnga, i mangitou mangkatawa, nal᷊aiddu anna. Ana see i mangitou nanantangngu Ruata, Mandariadine, wuṛṛu nanol᷊a'u Mananal᷊amatti mangitou apan matohassa.

IMAMATTA 20:22

Mawu nabbisara, “Paatuṛute su anambon tita wuṛṛu parenta-U, tadea'u i yamiu tawe limbuaṛṛana wuassu wanua Kanaan, suapa i Ya'u sarun mangapiddi yamiu.

DANIEL 9:5

I yami narosate, i yami buatte na'ola'a alaleo, wuṛṛu na'ola'a pasasal᷊a. I yami buatte namangalo wuṛṛu nilumawangnga parenta-Nu see sinumewadda wuassu manga atoran-Nu.

YEHEZKIEL 37:26

I Ya'u sarun makkiinnu sambau pa'aire ringanni mangitou apan manohassa atatammudi mangitou saran mal᷊annu-l᷊annu. I Ya'u sarun mangal᷊amatta wuṛṛu manamba reenganni mangitou. Su leta'i mangitou sarun Ta'u iapararisikka Wal᷊e-U apan sidutu poiaroddi saran mal᷊annu-l᷊annu.

YESAYA 9:17

Al᷊al᷊eon walahanna udde mannoṛṛobba naal᷊ihidda putungnga nangepoddu anggaṛṛumunanna ṛoaanna. Ṛenggamme naal᷊ihidda mahurangnge nasoṛṛobba ringannu timbulla sussal᷊oi.

YESAYA 30:9

Ana waugu, i mangitou udde walahanna apan apulunne lullawangnga su saruannu Ruata, apulune mammahia wuṛṛu mangke maddiri maddaringikka al᷊aṛṛa'u Mawu.

YESAYA 33:8

Manga lal᷊anna wahewalla apan maasilaka nabbal᷊i mal᷊annabba; tawe taumata apan umamatta isudde. Paaire niwahanna wuṛṛu riandi nitol᷊a'a. Tateddu lai pandumanna.

YEHEZKIEL 16:59

Mawu Apan Atanggaṛṛanne nabbisara, “I'o sarun Ta'u iṛṛuumanna uasul᷊ungngu inolaannu, ana waugu i'o buatte nassinaadu sasalunu see nilumawangnga pa'aire-U si'o.

YOSUA 23:16

Napawe i yamiu lumawanna pa'aire apan buatte nirolokku Mawu Ruatanu tadea'u sidutu tattuṛutanna, wuṛṛu i yamiu inai mattaṛṛamawu su manga Mawu waine see lai massubba manga Mawu udde, ne Mawu sarun masa'u, wuṛṛu maṛṛuumanni yamiu. Su lal᷊ummu tempo apan mal᷊ihakka i yamiu sarangkanambone sarun mawul᷊i wuassu wanua apan mapia indi, apan nionggolu Mawu si yamiu.”

2 MARARATU 21:12

Ana waugu udde, i Ya'u, Ruata apan sassubbannu walahannu Israel, sarun mandantan silaka apan bahewalla su Yerusalem wuṛṛu su Yehuda na'oman sara suapan taumata apan naaringikka ola'u hatto udde sarun ṛumoro.

2 MARARATU 21:15

Sarangkanambone sarun Ta'u olaanna su saruannu walahangKu ana waugu i mangitou buatte na'ola'a rosa su saruang-Ku wuṛṛu nandal᷊eo naungku ro'en al᷊amonan mangitou sinumabbanga wuassu Mesir naddatingngu allo indi.”

YEREMIA 11:10

I mangitou buatte na'ola'a rosa apan niola'u al᷊amona mangitou apan maddiri tumuṛṛutta si Ya'u, i mangitou massubba mawu waine wuṛṛu maddiri tumuṛṛutta parenta-U. Mawae Israel aroddi lai Yehuda lullawangnga paaire apan buatte Ta'u niola'a ringannu al᷊amonan mangitou.

HOSEA 6:7

Arawe ere su Adam i yamiu tawe nanuungngu paairenu si Ya'u.