YESAYA 24:14 - WUKE SUSI WATTI'U AL᷊AL᷊USASSA

¹⁴ Manga taumata apan nasal᷊amatta sarun mangngantarin lal᷊uassa. Taumata su samba'an waṛṛatta sarun mabbatti'u awawantugu Mawu,

YESAYA 24:14 Referans Kwoze

ZAKARIA 2:10

Mawu nabbisara, “Pangantarite ringannu lullala'a ei tumana'u Yerusalem! I ya'u sarun matana'a su pattangngannu!”

YEREMIA 33:11

Arawe su manga tampa udde sarun aringiṛṛanna apia tingikku al᷊al᷊uassa wuṛṛu lal᷊ala'a see aantari manga taumata apan uaapiddu sasamba aadiangkamanna watukku wal᷊e-U. I mangitou sarun mabbisara, ‘Pa'adiangkamante su Mawu Apan Lembontaṛṛino, ana waugu i Tou mapia wuṛṛu darangngu-Ne tawe patta'al᷊anne.’ Wanua indi sarun Ta'u olaanna manambo wiakke ere dorone. I Ya'u, Mawu, buatte nabbisara.”

YEREMIA 31:12

Watukku Wuiddu Sion i mangitou sarun dumanta ringannu hati apan matilangnga, lapiddu mangngantari ringannu lullala'a ana waugu anambon aonggo-U si mangitou, eteudde gandumma, lana, anggore, sapi wuṛṛu domba. I mangitou naal᷊ihidda wailla apan ua'ene natimu, tawe atalannu apa-apa.

YEREMIA 30:19

Tumanangnge sarun maddalo si Ya'u ringannu aantari, wuṛṛu u'ui ringannu al᷊al᷊uassa. I Ya'u na'ola'a si mangitou a'addatanna wuṛṛu tate al᷊uandahanna, wuṛṛu reenganni mangitou sidutu aatambanna.

YESAYA 54:1

Yerusalem, dorone i'o naal᷊ihidda wawine tinna apan tawe wotongnge manungkangnga. Arawe orassa indi paggiote, wuṛṛu pangantarite ringannu lulluassa! Ana waugu manga anangngu marasai nilumebbe wuassu ana'a wawine apan tawe nitantangngu awingnge.

YESAYA 51:11

Ne manga taumata apan nipallossu Mawu sarun mapul᷊e i mangitou sumuttate su Yerusalem ringannu paggahahio hati mangitou matilangnga ana waugu al᷊al᷊uassa tutune. I mangitou lulluassa wuṛṛu lullala'a, asasusa wuṛṛu sasal᷊iomanna mangke nawul᷊ite.

YESAYA 44:23

Paggiote ringannu al᷊al᷊uassa, ei langitta, paggiote, ei wantan dunia! Paggioten lal᷊uassa, ei manga wowone! see lai mahurangnge wuṛṛu suapan punnu alu sulal᷊umme! Ana waugu Mawu buatte napal᷊iatta'u awawantu-Ge ringannu nanubbussa Israel uman-Ne.

YESAYA 40:9

Saate su wowone apan matanggakka, wuṛṛu al᷊iata'e watti'u al᷊al᷊uassa su Yerusalem! Pangintul᷊ite ringannu tingikka matelengnga, wuṛṛu al᷊iata'e watti'u al᷊al᷊uassa su Sion! Wal᷊oa'e su manga soan Yehuda manungku Ruata mangitou sarun dumanta!

YESAYA 35:10

Manga taumata apan nipallossu Mawu sarun mapul᷊e; i mangitou sumuttate soan Yerusalem ringannu u'ui, hati mangitou matilangnga ana waugu lal᷊umanna'a awasa. I mangitou sarun lumuassa wuṛṛu lumala'a; asasusa wuṛṛu sasal᷊iomanna mangke nawul᷊ite.

YESAYA 35:2

Wadda'u anne tattuwoanne ringannu mal᷊ihakka, wuṛṛu mangngantari ringannu aantarine. Araṛṛamage ere wowon Libanon, saṛṛene ere wawal᷊annu Karmel wuṛṛu Saron. Ne suapan taumata sarun maasilo taṛṛino Mawu, wuṛṛu awawantugu Ruatan kite.

YESAYA 27:2

Sutempo udde Mawu sarun mabbisara, “Pangantarite su ola'u wawail᷊annu anggore-U apan maṛṛansangnga.

YESAYA 26:1

Sutempo udde taumata sarun mangngantari antari indi su leta'u Yehuda: “Atohassawe etapa soan kite; Ruata sassane namangunna tanda batu-Ne, isindi i ite masal᷊amatta.

YESAYA 25:1

Mawu, ete I'o Ruata'u i Ya'u mamantuga Si'o wuṛṛu maddalo aran-Nu. Ana waugu manga manara-Nu lembon ma'atiangnga; I'o buatte nakkiinna ro'en dorone, wuṛṛu nammanara ringannu satia.

YESAYA 48:20

Roote wuṛṛu tal᷊angke su Babel, al᷊iata'e watti'a indi su al᷊awo'u tampa. Pasingkata'e ringannu aintul᷊in al᷊al᷊uassa: “Mawu buatte nanal᷊amatta Israel, allang-Nge!

YESAYA 60:5

Naasilo udde i'o tinumiangnga wuṛṛu hatinu nasemakka; i'o naherangnga wuṛṛu nahewalla naungnga. Darotongngu manga walahanna niapidda ringannu, pa'aala wuassu samba'an tahal᷊oangnga niombo si'o.

YEREMIA 51:10

Umattu Mawu nabbisara, “Mawu buatte napal᷊iatta'a manungku i ite su samba'a apan naṛṛino. Wette inaite watukku Yerusalem wuṛṛu mabbatti'a poiaroddi apa apan buatte niola'u Mawu Ruatang kite.”