YESAYA 22:23 - WUKE SUSI WATTI'U AL᷊AL᷊USASSA

²³ I tou sarun Ta'u onggol᷊annu aiananna apan tawe humolle ere pasa'a apan uapansakka ma'uatta su darandungnga. Anambon alahanne sarun addatanna ana waugu i tou.

YESAYA 22:23 Referans Kwoze

AYUB 36:7

Taumata apan matul᷊idda aellehan-Ne, i mangitou niolang-Nge uataṛṛino ere manga ratu, na'oman sara i mangitou aaddatanna saran mal᷊annu-l᷊annu.

EZRA 9:8

Arawe orassa indi, oh Mawu Ruatan kami, I'o wakkute niumakkanni yami. I'o namallossu manga pira taumata suwallatti yami wuassu patataṛṛuallanga tadea'u mabbiakka ringannu mal᷊angnganna su tampa apan niṛṛae indi. I'o nangonggolla si yami pabbiaṛṛanna wakku.

ZAKARIA 10:4

Wuassu wallatti mangitou sarun Ta'u pileanna tembonanne, piaṛṛa'a, wuṛṛu panglima tantara apan sarun mamarenta uma-U.”

1 SAMUEL 2:8

Wuassu asasusa Mawu namatunna taumata tawe darotongnge, wuassu asasahadda Mawu namallossu taumata lal᷊ebbone. I mangitou niola'a hawe manga ma'ala, wuṛṛu nionggol᷊annu manara apan a'addatanna. Rapappakku runia tatahuanannu Mawu, su wowone Mawu napararisikku runia.

SONDAPPA 3:21

I mangitou apan naauntunga, sarun Ta'u iwala uma'ianna su adderan araratuang-Ku su sambau ringang-Ku, ere i Ya'u sassane lai suete na'auntunga wuṛṛu orassa indi ua'ianna suadio'a ringannu Iamang-Ku su adderan araratuan-Ne.

MANNANASE 12:11

Wisaran taumata pande udde naal᷊ihidda ta'innu sangkatou mallal᷊u'adda apan maṛṛoro, ta'inna apan nipaanne ipanahekku manga dombane. Ammul᷊annu sasanato'a wuṛṛu tatantiro, naal᷊ihidda pa'u apan uapansakka matohassa. Sarangkanambone udde aonggollu Ruata lai, mallal᷊u'addi ite apan sambau.

ESTER 10:3

Mordekhai, taumatan Yahudi udde sidutu uaagassa manara atanggaṛṛanne su al᷊ungngi Ratu Ahasyweros sassane. Mordekhai aaddatanna wuṛṛu ipaapulun manga taumata sambalahanne. I tou mattinsahadda hunan asasal᷊amatta wuṛṛu lal᷊umanna'u walahanne see anambon papapulunni mangitou.

ESTER 4:14

Taumatan Yahudi sarun maasomba aontolla ringannu manambo lal᷊anne na'oman sara i mangitou masal᷊amatta. Arawe amungkangngu i'o sidutu mal᷊annabba sulal᷊ummu olangnge ereindi, i'o sassane sarun mate wuṛṛu amonannu iamangngu sarun masue wattinge. Isai masingkatta, asinungka sutempo ereindi i'o buatte nipile maola'a wo'i!”

YESAYA 22:24

Arawe manga hawene wuṛṛu tanggumanne sarun mabbal᷊i winabbawane. I mangitou sarun tumungkelem biakke si tou, naal᷊ihidda urinna pasi ele su pasa'a.

YESAYA 22:25

Amungkangngu udde mariaddi, ne passa'a apan nipa'u ringannu ma'uatta udde sarun mapallossa wuṛṛu manawo. Wuṛṛu eteudde panguddusannu ṛuanganna wuṛṛu anambon taumata apan uaantimma si tou. I Ya'u, Mawu, buatte nabbisara.”