YESAYA 14:1 - WUKE SUSI WATTI'U AL᷊AL᷊USASSA

¹ Mawu sarun umakkannu Israel uman-Ne, wuṛṛu mamile si mangitou apia maola'a pussa'a-Ne. I Tou sarun mapaatana'i mangitou apia su wanua mangitou sassane. Taumata raho sarun dumanta wuṛṛu ma'ammulli mangitou.

YESAYA 14:1 Referans Kwoze

DARALO 102:13

Arawe I'o, oh Mawu, Ratu saran mal᷊annu-l᷊annu, sidutu nannaunganna sara maṛṛawa mappulunnu.

ZAKARIA 1:17

Mala'ekatta udde nandolo'u mamasingkattu tanata indi lai, “Mawu Apan Lembontaṛṛino naddiandi manungku manga soa-Ne sarun mabbal᷊i su lal᷊umanna'a apia wuṛṛu manungku paasa lai i Tou sarun mantul᷊ungngu Yerusalem wuṛṛu manga'u maola'a pussa'a-Ne sassane.”

MALEAKHI 1:11

I Ya'u aaddatannu manga walahanna su ahewallu runia. Suapan tampa itattambunna amania iapangaddatta arang-Ku wuṛṛu nionggolla manga sasamba apan suṛṛinone, ana waugu anambon balahanna mangngaddatta si Ya'u!

YEREMIA 50:33

Mawu Apan Lembontaṛṛino nabbisara, “Taumatan Israel wuṛṛu taumatan Yehuda ua'ol᷊obba. Sarangkanambone apan nanawanna si mangitou uariagga si mangitou matoha-tohassa wuṛṛu mangke tawe mamallossi mangitou.

YESAYA 49:13

Pangantarite ei langitta, paggiote ei runia, ei manga wowone, paggioten al᷊al᷊uassa! Ana waugu Mawu nirumanta mallimbatta uman-Ne, I Tou mandangngu uman-Ne apan niallangnga.

YEREMIA 29:14

Atonna, i yamiu sarun maasomba si Ya'u. I yamiu sarun Ta'u ihemonna wuassu pattangngannu al᷊awo'u walahanna wuṛṛu wuassu tiappu wanua su tampang kamiu nisal᷊iawukka wuṛṛu niwuanga. I yamiu sarun Ta'u iapidda watukku wanua inariaddiannu indi see mamelengngu ola'u pabbiaṛṛanni yamiu. I Ya'u, Mawu, buatte nabbisara.’

YESAYA 66:20

Wuassu manga wanua udde i mangitou sarun mangapidda apia manga tuṛṛangngi yamiu sambalahanna maola'a aonggolla si Ya'u. I mangitou sarun mangapiddu manga taumata udde su wui-U apan susi su Yerusalem ringannu uasa'e awal᷊o, keledai wuṛṛu unta, wuṛṛu ringannu kereta see roda, ere inanaramannu taumatan Israel mangngapidda su Wal᷊en Mawu sasamba gandumma sulal᷊ummu tampane apan baresi.

YESAYA 49:7

Ruata na'ukkassa Mananal᷊amattu Israel nabbisara su taumata apan tumaniten aal᷊uandahanna, wuṛṛu ipaddantinnu manga walahanna see lai naola'a allangngu manga tembonanne, “Manga ratu sarun maasilo inolaang-Ku; i mangitou sarun dumarisikka mangaddatta si Ya'u. Manga tembonanne sarun maasilo lai, ana see umal᷊intudda massubba.” Udde matipussa ana waugu Mawu buatte namile allang-Nge; Ruata na'ukassu Israel satia su paaire-Ne.

YESAYA 44:1

Mawu nabbisara, “Paddaringikka, ei Yakub allang-Ku, ei Israel, umatta nipile-U!

YESAYA 41:8

Arawe i'o, Israel, allang-Ku, umatta nipile-U, i'o pallaṛṛiten Abraham, hawe-U.

YESAYA 27:6

Sutempo apan addantane, walahannu Israel naal᷊ihidda punnu alu apan nakkamutta wuṛṛu nabbalaga, see namene runia ringannu manga wuane.

DARALO 143:12

Ana waugu darangngu-Nu, patete anambon see'u, ṛadda'e anambon matataṛṛualanga si ya'u, ana waugu i ya'u allang-Ngu.

DARALO 98:3

I Tou uanaungnga darangngu wuṛṛu apapia-Ne su Israel, al᷊aṛṛanang-Nge. Anambon walahanna su ahewallu runia naasilote Ruatan kite naauntunga.

ESTER 8:17

Wuṛṛu lai suapan soa see propinsi, su al᷊awo'u tampa suratta parentan datu niwasa, manga taumatan Yahudi lullala'a, mallal᷊umanna'a wuṛṛu naandeangnga. Ewe'e lai manambo wuassu tumana'a apan naola'a walahannu Yahudi, ana waugu i mangitou matta'uttu walahanna udde.

LUKAS 2:32

naal᷊ihida semakka apan mannemakka lal᷊annu manga walahanna waine, ana see rumanta ringan-Nu; eteudde asasemakka apan mandantan awawantuga su al᷊aṛṛanang-Ngu Israel.”

LUKAS 1:54

I Tou nantul᷊ungngu Israel allang-Nge, tumuṛṛuttu pa'aire apan suete niolang-Nge ringannu iupungngu al᷊amonang kite.

YESAYA 41:9

I'o buatte Ta'u nial᷊appa wuassu manga pentakku runia, Ta'u niwaggoanna wuassu manga tampa apan arauanne. Wisara-Nu, ‘I'o allang-Ku; i Ya'u tawe manol᷊a'u taumata nipile-U.’

YESAYA 45:14

Mawu nabbisara su Israel, “Tahuanete hessin leta'u Mesir wuṛṛu auntungannu Sudan. Manga taumatan Syeba apan waṛṛani mabbal᷊i pussa'anu; i mangitou u'amatta su liuddi yamiu ringannu laṛṛapusanna. I mangitou sarun massubba wuṛṛu manga'u, ‘Ruata atonna-tonna su pattangngannu; tawe mawu wal᷊ine tumba'u i Tou!

YESAYA 49:10

I mangitou tawe marou ara'e amal᷊unusanna, wuṛṛu tawe aṛṛinoannu sal᷊ihangngu paddissa su wadda'u anne. Ana waugu i Ya'u, u'akkanni mangitou, sarun mangehetta si mangitou wuṛṛu mangapiddi mangitou watukku al᷊imatan kua'e.

YESAYA 49:15

Mawu sinumimbakka, wisara-Ne, “Wotongngewe sangkatou inangnga maabul᷊in anangnge, wuṛṛu tawe mandangngu anangnge sidutu? Salaiwe i tou maabul᷊ine i Ya'u tawe maabul᷊inu!

YESAYA 49:25

Mawu sinumimbakka, “Eteudde apan sarun mariaddi. Atawannu manga taumata waṛṛani sarun anuanna apia. Saranapan taumata maṛṛagissa sarun aṛṛoanna apia. Ana waugu ete i Ya'u sassane mando'appa seennu; i Ya'u sarun manal᷊amatta manga anangngu.

YESAYA 54:3

I'o sarun aatambanna ahewalle watukku aikkatanna ara'e lai aiṛṛi, tumanangngu sarun mangintaṛṛe su leta'u manga walahanna wuṛṛu matana'a su manga soa apan orassa indi mal᷊annabba.

YESAYA 55:7

Ṛinone taumata lal᷊eo mangapia pabbiaṛṛanne, wuṛṛu mamal᷊u lal᷊annu ṛingidde. Wala'e i tou mabbelengnga ringannu Mawu, wuṛṛu maasomba darangngu-Ne. Ṛinone i tou mabbal᷊i'a ringannu Ruatan kite, ana waugu Mawu mangampungnga ringannu naungnga awasa.

YESAYA 56:3

Taumata raho apan na'ammullu umattu Mawu tawe wotongnge mabbisara, “Mawu tawe namala'u massubba si Tou suaddio'a ringannu uman-Ne.” Taumata apan niwutu tawe wotongnge maṛṛingidda “I ya'u masahadda maola'a reengannu umat-Tu Mawu, ana waugu i ya'u tate maasomba papapulunna.”

YESAYA 60:10

Mawu nabbisara su Yerusalem, “Taumata raho sarun dumanta mamangunna apia darandungngu, wuṛṛu manga ratu sarun mangimbe si'o. Dorone i Ya'u nakkuumannu sulal᷊ummu asasa'u-U, arawe orassa indi Ya'u mappulute umakkannu.

YESAYA 60:14

Manga ana'u mangangallangngu rumanta umal᷊intudda, iapa apan buatte nangal᷊uandaga si'o sarun massuṛṛubbawa, i'o sarun isaggo ‘Soa Mawu’, ‘Sion, Soan Duata Susin Israel’.

YEHEZKIEL 47:22

wuṛṛu leta'a uddewe pussa'anu saran mal᷊annu-l᷊annu. Manga taumata raho apan matana'a suwallatti yamiu, wuṛṛu uatahuanna manga ana'a apan niasungkanga isudde, ṛinone lai maasomba tahia wuassu leta'a udde. I mangitou ṛinone ireengnga lai maola'a walahannu Israel, wuṛṛu i mangitou lai iundi tadea'u maasomba leta'a sutempo ma'ola'a patatahia leta'a suwallattu manga ṛuangannu Israel.

DARALO 102:14

I'o sarun dumarisikka wuṛṛu umakkannu Sion, tempone nia'omante umakkanni tou.

YESAYA 19:18

Sutempo udde sasinaukku Ibrani sarun ipaatta sulal᷊ummu lima soa su Mesir. Manga taumata poiaroddi massalu ringannu arannu Mawu Apan Lembontaṛṛino. Sambau suwallattu manga soa udde sarun isaggo “Soa Matannallo”.

YESAYA 21:1

Eteindi tanata su ola'u Babel: Naal᷊ihidda anginna al᷊isusu sussal᷊induṛṛunga sussabbi wadda'u anne, etearoddi darantane silaka wuassu wanua apan ma'ata'utta.

YESAYA 47:1

Mawu nabbisara, “Ei, Babel, lintukke wuassu adderan araratuannu, wuṛṛu a'iante su awu. I'o tate mamunga wuṛṛu maṛṛamaga ere dorone.

YEREMIA 16:15

ewe'e ringannu arang-Ku, Ruata apan biakka, apan nangapiddu umattu Israel sinumabbangnga wuassu sambau wanua su sawannakka wuṛṛu wuassu anambon banua waine suapa i mangitou buatte Ta'u nisal᷊iawukka. I mangitou sarun Ta'u iapidda apia watukku leta'i mangitou, wanua apan buatte Ta'u nionggolla su al᷊amona mangitou.”

YEREMIA 30:8

Mawu Apan Lembontaṛṛino nabbisara apia su uman-Ne, “Napawe nia'omante allo udde, pasanganna apan niandangnga su pal᷊u'anu sarun Ta'u paddianna, wuṛṛu aiinnu sarun Ta'u wu'anna. I yamiu sarun tawe maola'a allangngu taumata raho apia.

YEREMIA 31:4

Walahannu sarun ta'u olaanna tumelengnga ere dorone. Paassa lai i yamiu sarun manganu rebana, wuṛṛu massal᷊aingnga ringannu lulluassa.

YEREMIA 51:51

I yamiu mabbisara, ‘I yami haggeloanna wuṛṛu pappansilianna; i yamiu nasili ana waugu manga taumata raho ua'ianna su manga wabbo'a susi sulal᷊ummu Wal᷊en Mawu.’

YEHEZKIEL 16:60

Arawe i Ya'u sarun mannaungnga pa'aire apan buatte Ta'u niola'a ringannu sutempo i'o ta'e dario'a wuṛṛu ma'ola'a paaire ringannu apan ola'anna saran mal᷊annu-l᷊annu.