YEREMIA 7:24 - WUKE SUSI WATTI'U AL᷊AL᷊USASSA

²⁴ Arawe i mangitou maddiri maddaringikka wuṛṛu maddiri massunna. Ewe'e lai i mangitou tuttuṛṛutta apulu naungngi mangitou sassane apan maattikka wuṛṛu lal᷊eo udde. I mangitou wal᷊inewe nabbal᷊i mapia ewe'e nabbal᷊i lembon maddal᷊eoanna.

YEREMIA 7:24 Referans Kwoze

YEREMIA 8:5

Arawe anio i yamiu, uma-U, sidutu sussempalla wuṛṛu mannantang-Ku? I yamiu uaagassa matohassa su manga paal᷊uannu, wuṛṛu maddiri mabbelengnga ringang-Ku!

YEREMIA 7:26

Arawe taweddu maddaringikka ara'e massunna. I yamiu ewe'e lai nabbal᷊i lembon aattikke wuṛṛu lal᷊eo wuassu iupungngu al᷊amonanu.”

TAHIUL᷊E 29:19

Suwallatti yamiu apan naaringikka atoranna apan masahadda udde, imbaṛṛangnga piaddu maṛṛingidda manungku ola'u pabbiaṛṛanne sidutu mapia, salaiwe i tou ringannu apulun naungnge niumamatta su lal᷊anne sassane. Olangnge udde sarun maawinasa si yamiu sarangkanambone, manga taumata lal᷊eo ara'e lai taumata mapia.

YEHEZKIEL 20:13

Arawe su wadda'u anne udde, i mangitou nilumawangnga manga parenta-U, wuṛṛu nanol᷊a'u manga tita-U apan maola'a wataṛṛu manungku taumata apan matuṛṛuta sidutu wiakka. I mangitou tumanite nanggal᷊usa'a allon Sabat. Ana waugu udde, su wadda'u anne udde i Ya'u nasaddiate mamallossu asasa'u-U su saruanni mangitou wuṛṛu mamate si mangitou.

YEREMIA 32:33

I mangitou buatte nanantang-Ku salaiwe I Ya'u sidutu mangngenggenna si mangitou, i mangitou maddiri maddaringikka wuṛṛu mangimanna.

HOSEA 4:16

I yamiu, ei taumatan Israel, tumaniten tawe maddaringikka! Ereapa wotongnge i Ya'u mallu'adda si yamiu ere domba su wadda'u nannal᷊o?”

YEHEZKIEL 20:21

Arawe ingana'a saṛṛen tumuwo udde mal᷊awangnga si Ya'u. I mangitou lullawangnga manga tita-U wuṛṛu tawe maddaringikka manga parenta-U, apan maola'a wataṛṛu manungku taumata apan tuttuṛṛuta udde sidutu wiakka. I mangitou manggal᷊usa'a allon Sabat. Ana waugu udde i Ya'u nasaddiate mamallossu asasa'u-U su saruanni mangitou su wadda'u anne udde wuṛṛu mamate si mangitou sarangkanambone.

YEHEZKIEL 20:8

Arawe i mangitou lullawangnga si Ya'u wuṛṛu maddiri maddaringikka si Ya'u. I mangitou maddiri manddamme manga paal᷊uanna apan maarantinna udde wuṛṛu lai maddiri mangillol᷊o massubba manga paal᷊uanna wuassu Mesir. Sutempo i mangitou ta'e poiaroddi, i Ya'u nasaddiate mapasabbangngu asasa'u-U si mangitou.

YEREMIA 15:6

I yamiu buatte nanol᷊a'a wuṛṛu nanantang-Ku, ana waugu udde i Ya'u namatten lima-U ipakkimunsa'a si yamiu, ana waugu i Ya'u nawusate maṛṛaddannu asasa'u-U.

YEREMIA 3:17

Sutempo udde soan Yerusalem sarun isaggo, ‘Aianannu Mawu’, wuṛṛu anambon walahanna sarun ma'ammulla su soa udde massubba Mawu. I mangitou tate lai tumuṛṛutta apulu naungngi mangitou apan maattikka wuṛṛu lal᷊eo udde.

YEREMIA 2:27

I yamiu sarun pansilianna, ana waugu alu sampaddi waggoanni i yamiu iamangnga wuṛṛu watu sambau waggoanni yamiu inangnga. I yamiu wal᷊inewe rumanta ringang-Ku, ewe'e nanantang-Ku. Arawe napawe nirumanta asasusa, ete i Ya'u apan waggoanni yamiu tadea'u rumanta manal᷊amatta si yamiu.

NEHEMIA 9:29

I'o nanaggu si mangitou tadea'u al᷊aṛṛang-Ngu daringiṛṛanna, arawe i mangitou nanol᷊a'u tita-Nu wuṛṛu naungnge mawunga. Sumbal᷊i, amungkangngu tita-Nu daringiṛṛanna, atonna sarun maola'a pabbiaṛṛanna. I mangitou puane maattikka wuṛṛu matanggakka, tawe maddaringikka, wuṛṛu maddiri tumuṛṛutta.

YEHEZKIEL 20:16

Wawansaga udde Ta'u niwisara ana waugu i mangitou tawe maddaringikka manga parenta-U, nilumawangnga manga tita-U wuṛṛu nanggal᷊usa'a allon Sabat. I mangitou mappianne massubba manga paal᷊uanni mangitou.

YEREMIA 23:17

Su manga taumata apan maddiri maddaringikka manga wisara-U, i mangitou sidutu mabbisara, ‘I yamiu sarun masal᷊amatta.’ Wuṛṛu suapan taumata apan maatikka puane i mangitou mabbisara, ‘I'o sarun tawe maasomba silaka.’ ”

YEREMIA 9:14

I mangitou puane maattikka wuṛṛu massubba manga paal᷊uanni Baal ere buatte niaṛṛa'u al᷊amona mangitou.

YEREMIA 13:11

Ere nasa maautta uawa'issa masaggadda su lawassu tatahuanne, aroddi lai pandumang-Ku tadea'u umattu Israel wuṛṛu Yehuda wawa'isanna masagadda ringang-Ku. Ringannu aroddi i mangitou mabbal᷊i uma-U apan ma'ola'a arang-Ku raddaloanna wuṛṛu a'addatanna. Arawe, i mangitou maddiri tumuṛṛutta si Ya'u.”

YEREMIA 16:12

Arawe i yamiu ma'ola'a lembon al᷊al᷊eone lai. Puang kamiu maattikka wuṛṛu tumba'u tuttuṛṛutta apulunu sassane apan dal᷊eo. I yamiu tawe tumuṛṛutta si Ya'u.

YEREMIA 17:23

Arawe al᷊amonanu maddiri maddaringikka ara'e mappandumma manga wisara-U. Naungngi mangitou maattikka, wuṛṛu maddiri tumuṛṛutta wuṛṛu tagguanna.

YEREMIA 18:10

arawe wua'udde walahanna udde tawe tumuṛṛutta si Ya'u wua'udde ma'ola'a al᷊al᷊eo, ne pandumang-Ku sarun tawe ipariaddi.”

YEREMIA 18:12

Arawe i mangitou sarun sumimbakka, ‘Apa hunane? I yami sidutu mannan tuṛṛutta apulung kami sassane! I yami sambau-sambau sarun ma'ola'a apulun naungngi yami apan dal᷊eo!’ ”

YEREMIA 35:15

I Ya'u sidutu mandolokka ringanni yamiu anambon allang-Ku manga nabi, wuṛṛu i mangitou buatte nanantiro si yamiu tadea'u mamal᷊u pallal᷊agunu wuṛṛu tate ma'ola'a al᷊al᷊eo. I mangitou mapanaungnga si yamiu tadea'u ariete massubba manga mawu waine wuṛṛu tate mattaṛṛamawu si mangitou, tadea'u i yamiu wotongnge sidutu uatana'a su wanua indi apan buatte Ta'u nionggolla si yamiu wuṛṛu su al᷊amonanu. Arawe i yamiu maddiri mappandumma wuṛṛu maddiri maddaringikka si Ya'u.

HOSEA 10:6

Paal᷊uanna udde sarun iapidda watukku Asyur tadea'u ionggolla su ratu mawantuga. Israel tinumantalongnga hol᷊aga apan naaola'a si mangitou naasomba asasili wuṛṛu lallobbosanna.

MIKHA 6:16

Sarangkanambone udde mariaddi ana waugu i yamiu tuttantalongnga manga inolaanni Ratu Omri wuṛṛu anangnge apan dal᷊eo, eteudde Ratu Ahab. I yamiu mattanno manga pallal᷊aghun mangitou. Ana waugu udde i Ya'u sarun makkimunsa'a si yamiu, wuṛṛu i yamiu sarun al᷊uandahanna wuṛṛu lobbosannu al᷊awo'u walahanna.”

DARALO 81:13

Ana waugu udde i mangitou niwala'u tawe maddaringikka; wala'e i mangitou mappaamattu apulun naungnge sassane.

YEREMIA 3:13

Panga'ute manungku i'o nassala wuṛṛu buatte nilumawangnga su saruannu Mawu, Ruatanu. Panga'ute manungku su al᷊ungngu suapan punnu alu apan mappaṛṛampunga i'o buatte namatu'a apulunu su manga mawun balahanna waine, wuṛṛu tawe tumuṛṛutta manga parenta-U. I Ya'u, Mawu buatte nabbisara.”

YEREMIA 6:16

Mawu nabbisara uman-Ne, “Darisikke su pappengannu lal᷊anna, wuṛṛu panutudde paapia-pia! Pa'iwal᷊ote manga lal᷊annu al᷊amona, wuṛṛu suapa apan apianne suwallanne. Amatte su lal᷊anna udde, tadea'u i yamiu mabbiakka matammudda.” Arawe i mangitou nabbisara, “Tawe, i yami maddiri umamatta su lal᷊anna udde!”

YEREMIA 13:10

Walahanna apan dal᷊eo indi tumaniten maattikka wuṛṛu maddiri tumuṛṛutta si Ya'u. I mangitou mattaṛṛamawu wuṛṛu massubba manga mawu waine. Ana waugu udde i mangitou sarun maola'a ere nasa maautta apan tate gunane udde.

YEREMIA 17:9

Naungngu taumata tawe iaṛṛangngo, mappandeanna wuassu al᷊awo'a wuṛṛu tumaniten bahewalla raddangnge.

YEREMIA 22:21

I Ya'u buatte nabbisara si'o sutempo olangngu mapia, arawe i yami maddiri maddaringikka. Atonna etearoddi pallal᷊agunu ro'en dorone naddatingngu orassa indi; taambe saran paassa iemiu tumuṛṛutta si Ya'u.

YEREMIA 32:23

Arawe napawe i mangitou nirumanta watukku wanua indi wuṛṛu napaangaṛṛo, i mangitou tate tate lai tumuṛṛutta manga parenta-Nu, wuṛṛu tawe mabbiakka tumuṛṛuttu manga al᷊aṛṛang-Ngu. Sarangkanambone apan niparenta-Nu si mangitou tawe saran sambau apan niola'i mangitou. Ana waugu udde I'o nandantan al᷊awo'u asasilaka indi si mangitou.

DANIEL 9:6

I yami tawe maddaringikka manga nabi, manga allang-Ngu udde, apan buatte nabbisara ringanu aran-Nu su manga ratun kami, su manga piaṛṛa'a manga al᷊amona wuṛṛu su anambon walahanni yami.

ZAKARIA 7:11

Arawe uma-U puane maattikka wuṛṛu mangke maddiri maddaringikka; i mangitou mannapingnga tal᷊inga mangitou ana see tawe maaringikka.