YEREMIA 48:37 - WUKE SUSI WATTI'U AL᷊AL᷊USASSA

³⁷ I mangitou sarangkanambone buatte nangiṛṛi uta'u pua wuṛṛu omengnga, nallessa ta'iakka, wuṛṛu nalluṛṛe nasa tatiala massusa.

YEREMIA 48:37 Referans Kwoze

YEREMIA 47:5

Taumatan Gaza niaṛṛiaannu asasusa wahewalla; tumna'u Askelon nimoune. Sara tingngera taumatan Filistin lambene udde sidutu lullal᷊o?

YEREMIA 41:5

nirumantate siri ual᷊un pul᷊o taumata wuassu Sikhem, Silo, wuṛṛu Samaria. I mangitou buatte nangiṛṛi omengnga, nanggesa'a laubba, wuṛṛu ringannu mannatta'a awa'i mangitou. I mangitou uaapiddu gandumma wuṛṛu kemenyan ionggolla su Wal᷊en Mawu.

PANDARIADDI 37:34

I Yakub nanggesa'a laungnge ana waugu massusa wuṛṛu nalluṛṛen laubbu lalal᷊o. Aroddi al᷊annune i tou lulluain anangnge udde.

YEREMIA 16:6

Taumata ala wuṛṛu taumata asiangnga su wanua indi sarun mate ringannu taweddu mallabbingngi mangitou. Taweddu saran sangkatou apan manansara watanganne ara'e mallunggukka puanne tatialan lullal᷊o mangitou.

YESAYA 20:2

Tatallu su tonnane wua'udde, Mawu nandolokki Yesaya ana'i Amos nalluatta sapatune wuṛṛu nasa karongnga apan nilluṛṛene. I tou tinumuṛṛutta wuṛṛu niumamatta tantol᷊e wuṛṛu tawe sapatune.

SONDAPPA 11:3

I Ya'u sarun mandolokku ruang katou tiala-U apan ual᷊uṛṛem peddeta ilallal᷊o, wuṛṛu i mangitou sarun mamasingkatu watti'u Ruata al᷊annune 1260 su allone.”

MARKUS 5:5

Allo ṛabbi i tou lullallele su lal᷊abinganna wuṛṛu su manga wuidda, ringannu aintul᷊ine wuṛṛu mallessa wadangnge ringannu watu.

MIKHA 1:16

Ei taumatan Yehuda, pol᷊ote utangngu maola'a tatiala lullal᷊o su manga anangngu apan arangnguani yamiu. Iṛṛite puanu ma'oman sara mal᷊unggukka ere manu'u winalanganna apan u'inassa winal᷊unanna, ana waugu manga anangngu sarun ṛuwoanna watukku pamamuanganna.

AMOS 8:10

Manga rameanu sarun Ta'u wal᷊uanna mabbal᷊i lullal᷊o, wuṛṛu manga aantarinu mabbal᷊i lal᷊uai. I Ya'u sarun ma'ola'a si yamiu mangiṛṛi utangngu wuṛṛu malluṛṛen laubba karongnga tattialan massusa. I yamiu sarun maola'a ere iamangnga inangnga apan lulluain papaten anangnge tinggassa. Allo udde sarun umuddussa ringannu lembon maasusa.”

YEHEZKIEL 27:31

Ana waugu i'o i mangitou nallunggukka pua, nalluṛṛen laubba karongnga napenen asasusa. I mangitou lulluai lullal᷊o wuṛṛu lullallun ola'u wiakku.

YEHEZKIEL 7:18

I mangitou sarun malluṛṛen nasa karongnga wuṛṛu ahewallu wadangnge sarun mangiladda. Pua mangitou sarun lungguṛṛanna wuṛṛu i mangitou sarun pansilianna.

YESAYA 37:1

Sutempo udde i Ratu Hizkia naaringikka aalae wuassu siri tallu taumata udde, i tou nanggesa'a laungnge wuṛṛu nalluṛṛen karongnga tatiala massusa, wua'udde i tou inaite su Wal᷊en Mawu.

YESAYA 3:24

Orassa indi i mangitou mappaatten lana mawangngi, sal᷊immurine hal᷊uru mangitou mawukku'a. Papeṛṛeti mangitou al᷊ussa sarun hantianni mangitou tal᷊i apan masalla. Puan mangitou apan pia utangnge maṛṛamaga sarun lungguṛṛanna. Laubbi mangitou apan maṛṛansangnga sarun hantiannu laubba nahahesa'a. Orassa indi i mangitou maṛṛamaga, tawe mal᷊anna'a addio'a hati mangitou mal᷊al᷊eo ana waugu cappanna.

2 MARARATU 6:30

Naaringikka udde, ratu nanggesa'a laungnge ana waugu nasusa. Manga taumata apan uarisikka maranin darandunga udde naasilo manungku laubbu lal᷊umme niola'a wuassu karongnga.

1 MARARATU 21:27

Napawe i Elia nuddusse nabbisara, i Ahab nanggesa'a laungnge wuṛṛu nalluṛṛen laubba karongnga naola'a tatiala sussassilla, ana see nappuassa. Sutempo mati'illa lai i tou nappaattu nasa karongnga, wuṛṛu amungkangngu umamatta, hatine sidutu massusa.

1 MARARATU 18:28

Manga nabi niumal᷊iomanna lembon ma'ikatta lai. Wuṛṛu ere su inanaramanne apan a'olaanni mangitou, i mangitou mammakkitta ara'e manggarissa waddangnga ringannu hal᷊ele wuṛṛu sambeangnga ma'oman ara daṛṛa tumuro.

IMAMATTA 19:28

Imbaṛṛangnga makkunta'a pisinu ipa'ola'a manga tatiala ara'e ipallessa watangannu ma'ola'a tatiala lullal᷊o su taumata nate. Ete i Ya'u Mawu.

PANDARIADDI 37:29

Napawe nabelengnga su paṛṛihi udde wuṛṛu tawe naasilo si Yusuf isudde, i tou nanggesa'a laungnge ana waugu massusa.

YEREMIA 49:3

Ei taumatan Hesybon, lalluaite ana waugu soan Ai naṛṛimunsa'e! Ei manga wawinen soa Raba, lallute! Palluṛṛete nasa karongnga tatiala massusa. Tal᷊angke pa'auwelenganna napenen awawingo. Milkom mongannu sarun iapidda su pamamuanganna suadio'a ringannu manga imam wuṛṛu manga tembonannu pamarentane!

YEHEZKIEL 29:18

“Ei taumata apan mattate, i Ratu Nebukadnezar wuassu Babel tantal᷊anna mammangalo Tirus. I tou nandolokku manga tantarane mamasanna manga winabbawa aroddi awakkanne, na'oman sara pua mangitou nabbal᷊i lunggukka wuṛṛu wambangngi mangitou nangkalisi, arawe mawae ratu aroddi lai tantarane tawe naasomba hessine wuassu inasaharanne udde.

1 TAWARIKH 19:4

I Ratu Hanun nanametta manga daroloṛanni Daud udde, nangiṛṛi omengngi mangitou, namonggo'a laubba aaunne sara tapanna'a, wuṛṛu nandolokki mangitou niapapul᷊e.