YEREMIA 34:16 - WUKE SUSI WATTI'U AL᷊AL᷊USASSA

^16-19 Manga tembonannu pamarentan Yehuda wuṛṛu Yerusalem su sambau ringannu mamanaran bal᷊en araratuanna, manga imam wuṛṛu anambon mandariagga letangngu buatte namattan pa'aire udde ringannu nakkata sapi, niwa'a nitahia darua, wuṛṛu niumamatta suwallattu darua wa'an sapi udde. Arawe, wua'udde ṛingiranni yamiu nawal᷊u wuṛṛu nallobbossa si Ya'u. Manga allangnga apan buatte nipallossi yamiu ere su apulu mangitou, niul᷊eanni yamiu apia wuṛṛu niwata'a maola'a allangnga apia. Ana waugu udde, i Ya'u, Mawu, nabbisara manung-Ku i yamiu buatte nilumawangnga parenta-U, wuṛṛu tumuṛṛutta manga atorannae, ana waugu i yamiu tawe namallossu sansul᷊ungngu walahannu Israel. Ore, orassa indi mappianne i Ya'u mangonggollu apapallossa si yamiu; apapallossa tadea'u mate sulal᷊ummu pangalo ara'e al᷊aṛṛusa'itta ara'e ṛutumma. I Ya'u sarun ma'ola'a si yamiu ere lai i yamiu na'ola'a sapi apan niṛṛatang kamiu udde.I Ya'u sarun ma'ola'a al᷊awo'u walahanna su runia pia atata'utta maasilo inolaang-Ku si yamiu.

YEREMIA 34:16 Referans Kwoze

IMAMATTA 19:12

Imbaṛṛangnga ma'ire ringannu arang-Ku amungkangngu i yamiu tawe maatipussa pa'aire udde, ana waugu ringannu udde mallobbossa arang-Ku. Ete i Ya'u Ruatanu.

YEHEZKIEL 18:24

Arawe amungkangngu sangkatou apan mapia tate ma'ola'a apapia lai, ewe'e mannatakke ma'ola'a al᷊al᷊eo wuṛṛu al᷊awo'u inolaanna ma'arantinna apan inanaramanne a'olaannu taumata lal᷊eo, apa i tou sidutu wiakka? Tawe! Wuassu manga inolaanne apan mapia udde, tawe saran sambau apan naunganna apia. I tou sarun mate ana waugu na'ola'a rosa wuṛṛu tawe satia si Ya'u.

YEHEZKIEL 3:20

Amungkangngu sangkatou apan mapia manatakke ma'ola'a rosa, wuṛṛu i tou Ta'u iapasaruanna asasilaka, ne i tou sarun mate napawe i'o tawe mapanaungngi tou. I tou sarun nate ana waugu manga rosane, wuṛṛu manga inolaanne apan mapia tate Ta'u naunganna. Arawe su ola'u papatene udde sarun Ta'u ipa'iwal᷊o si'o.

YEREMIA 34:11

Arawe wua'udde ṛingiranni mangitou nawal᷊u, ana see nanganu apia manga allangnga udde, wuṛṛu niwata'a maola'a allangnga apia.

SASABANGNGA 20:7

Imbaṛṛangnga managon arang-Ku walate asagone, ana waugu i Ya'u, Ruatanu, makkuumanni sai-sai apan walate assagoneng arang-Ku.

1 SAMUEL 15:11

“I ya'u sinumassilla nanenegi Saul naola'a ratu, ana waugu i tou buatte tinumal᷊iudda si Ya'u, wuṛṛu tawe tumuṛṛutta parenta-U.” I Samuel mangke nasusa, wuṛṛu su al᷊o'engngu ṛabbi i tou sussal᷊ande Mawu.

MALEAKHI 1:12

Arawe i yamiu mallobbossa si Ya'u ana waugu massunna mezbah-U tawe ereggane, wuṛṛu mangngongngollu sasamba isudde anna apan nitol᷊a'i yamiu!

MALEAKHI 1:7

Ringannu mangonggollu anna sasamba apan tawe suṛṛinone maola'a sasamba su wowon mezba-Ku. Wua'udde i yamiu maiwal᷊o, ‘Ringannu olangnge ereapa i yami mangngaddio'a Si'o?’ Ringannu nandal᷊eo mezbah-U.

YEHEZKIEL 39:7

Arawe supattangngannu taumatan Israel, sarun Ta'u iapasingkatta arang-Ku apan na'ukkassa, wuṛṛu arang-Ku udde tate lai lal᷊eoanna. Ne manga walahanna masingkatte manungku ete i Ya'u Mawu, Ruata apan na'ukkassa wuassu Israel.”

YEHEZKIEL 20:39

Mawu Apan Atanggaṛṛanne nabbisara, “Ei manga taumatan Israel, orassa indi walate i'o. Asal᷊a'e ma'ola'a rosa ringannu massubba manga paal᷊uannu! Arawe paanaungete manungku wua'udde i yamiu ṛinone tumuṛṛutta si Ya'u wuṛṛu tate lai mallobbossa arang-Ku apan na'ukkassa ringannu mangngapiddu sasamba su manga paal᷊uannu udde.

YEHEZKIEL 13:22

Manga taumata mapia apan maddiri Ta'u olaanna lal᷊eo, niadio'i yamiu naungnge ringannu wawahianu. Manga taumata lal᷊eo niola'i yamiu wahewalla naungnge tadea'u sidutu marosa wuṛṛu tawe iapaasal᷊amatta.