YEREMIA 33:9 - WUKE SUSI WATTI'U AL᷊AL᷊USASSA

⁹ Yerusalem sarun maola'a al᷊al᷊uassa wuṛṛu ilallala-U. Al᷊awo'u walahanna su runia sarun mata'utta wuṛṛu matal᷊o see mangaddatta si Ya'u, napawe maaringikka ola'u apapia apan Ta'u niola'a su tumana'u Yerusalem, wuṛṛu su ola'u lal᷊umanna'a apan Ta'u nionggolla su soa udde.”

YEREMIA 33:9 Referans Kwoze

YESAYA 60:5

Naasilo udde i'o tinumiangnga wuṛṛu hatinu nasemakka; i'o naherangnga wuṛṛu nahewalla naungnga. Darotongngu manga walahanna niapidda ringannu, pa'aala wuassu samba'an tahal᷊oangnga niombo si'o.

YEREMIA 13:11

Ere nasa maautta uawa'issa masaggadda su lawassu tatahuanne, aroddi lai pandumang-Ku tadea'u umattu Israel wuṛṛu Yehuda wawa'isanna masagadda ringang-Ku. Ringannu aroddi i mangitou mabbal᷊i uma-U apan ma'ola'a arang-Ku raddaloanna wuṛṛu a'addatanna. Arawe, i mangitou maddiri tumuṛṛutta si Ya'u.”

YESAYA 62:7

I mangitou tawe wotongnge mamal᷊an Tou mal᷊annabba tantal᷊anna i Tou taambe namangunna apia Yerusalem, wuṛṛu olaanne tumelengnga su ahewallu runia.

NEHEMIA 6:16

Sutempo manga seetti yami suwallattu manga walahanna maranine isudde naaringikka olangnge udde, i mangitou matta'utta awul᷊iannu hati, ana waugu anambon taumata masingkatta manungku manara udde niola'a ringannu tul᷊ungannu Ruata.

HOSEA 3:5

Arawe sarun dumanta tempone walahannu Israel mabbelengnga ringannu Mawu Ruatan mangitou, wuṛṛu ringannu ratun mangitou wuassu papapulunni Daud. Ana see i mangitou sarun mata'utta wuṛṛu mangadatta Mawu, see manengkamma manga al᷊aman-Ne.

YEREMIA 31:4

Walahannu sarun ta'u olaanna tumelengnga ere dorone. Paassa lai i yamiu sarun manganu rebana, wuṛṛu massal᷊aingnga ringannu lulluassa.

YEREMIA 26:6

Amungkangngu i yamiu sidutu uatatana'a lullawangnga, wal᷊en patataṛṛamawuanna indi sarun Ta'u olanna ere Silo, na'oman sara anambon araratuanna su runia mappaattu arannu soan Yerusalem indi maola'a wawontoga.”

YESAYA 62:12

I mangitou sarun isaggo: ‘Umatta susi’; ‘Umatta apan nisal᷊amattu Mawu’. Yerusalem sarun isaggo ‘Soa apan nisal᷊o'u Mawu’, ‘Soa apan tate lai itantangngu Mawu’.

DARALO 40:3

I Tou namatunna si ya'u wuassu loṛṛangnga apan maasilaka, wuassu labbon lota. I Tou nangaddo'u su wowon wuiddu watu, na'oman sara lempangku naatokka.

ZAKARIA 12:2

“Yerusalem naal᷊ihidda piala apan lal᷊oṛṛoannu anggore; manga wanua al᷊indonganne sarun ma'inumma wuṛṛu sumassendekka ere taumata wu'anna. Wuṛṛu napawe Yerusalem pangaloanna, manga soa wanua Yehuda apan lambene, sarun pangaloanna lai.

YEREMIA 44:8

Anio i yamiu ma'ola'a manga inolaanna apan maasa'u si Ya'u? I yamiu nirumanta wuṛṛu natana'a su Mesir, wanua apan awaganannu udde, wua'udde i yamiu nassubbate pa'al᷊uanna wuṛṛu nangonggollu sasamba su manga mongannu wanua udde! Apa i yamiu mappulu makkimunsa'a watangannu sassane tadea'u i yamiu heloannu anambon balahanna su runia wuṛṛu arannu ipaatta ipammontoga?

YEREMIA 29:1

I ya'u namoṛṛettu suratta su manga imam, manga nabi, manga piaṛṛa'u walahanna apan ta'e wiakka, wuṛṛu su anambon taumata waine apan buatte niapiddi Nebukadnezar wuassu Yerusalem watukku Babel.

YEREMIA 3:17

Sutempo udde soan Yerusalem sarun isaggo, ‘Aianannu Mawu’, wuṛṛu anambon walahanna sarun ma'ammulla su soa udde massubba Mawu. I mangitou tate lai tumuṛṛutta apulu naungngi mangitou apan maattikka wuṛṛu lal᷊eo udde.

ESTER 8:17

Wuṛṛu lai suapan soa see propinsi, su al᷊awo'u tampa suratta parentan datu niwasa, manga taumatan Yahudi lullala'a, mallal᷊umanna'a wuṛṛu naandeangnga. Ewe'e lai manambo wuassu tumana'a apan naola'a walahannu Yahudi, ana waugu i mangitou matta'uttu walahanna udde.

2 TAWARIKH 20:29

Anambon araratuanna waine nata'utta napawe naaringikka ereapa Mawu namaddon manga seettu Israel.

DARALO 130:4

Arawe I'o sidutu maapulu mangampunga, tadea'u taumata mabbal᷊i ma'imanna.

YESAYA 55:13

Alu cemara sarun mangganti aputta ṛoaanna sasuanna bunga mangganti manga pal᷊ampungnga. Udde mariaddi tadea'u i Ya'u tumelengnga; maola'a tatiala sarangkal᷊o'enge apan tawe mawul᷊i.”

YESAYA 62:4

Arannu wal᷊ine lai ‘Apan Nitantangnga’, wanuanu wal᷊ine lai ‘Apan Mal᷊annabba’. I'o sarun isaggo, ‘Apan Arangnguannu Ruata’, wuṛṛu wanuanu sarun isaggo, ‘Apan Buatte Naawingnga,’ ana waugu Mawu mappulunu, i Tou ere sangkatou awingnga su wanuanu.

YESAYA 64:2

naal᷊ihidda putungnga mappaṛṛenggamu alu wuṛṛu napahoggokku ua'e. Papal᷊iattaa'e taṛṛino-Nu su manga seen-Nu, na'oman sara manga walahanna mangngiladda su saruan-Nu.

YEREMIA 3:19

Mawu nabbisara, “Israel, i Ya'u mappulu manengkamma si'o maola'a ana-U, wuṛṛu mangonggolla si'o wanua apan ma'al᷊uassa, wanua apan apianne su ahewallu runia. I Ya'u mappulu tadea'u i'o mamaggo si Ya'u iamangnga, wuṛṛu tate mangingkatta apia wua dingang-Ku.

YEREMIA 4:2

Amungkangngu i yamiu massalu ringannu arang-Ku wuṛṛu i yamiu mabbiakka su atatul᷊idda su apapia wuṛṛu atonna, ne anambon balahanna sarun sumal᷊ande si Ya'u tadea'u i Ya'u mangal᷊amatta si mangitou, wuṛṛu i mangitou sarun maddalo si Ya'u.”

YEREMIA 16:19

Mawu, ete I'o apan ual᷊u'adda si ya'u wuṛṛu nangonggollu atatohassa si ya'u; I'o nantul᷊ungku sutempon asasusa. Manga walahanna wuassu pentakku runia sarun dumanta ringan-Nu wuṛṛu mabbisara, “Al᷊amonan kami tumba'u pia mawu awusu apan mangke tawe gunane.

YEREMIA 24:6

I Ya'u sarun mallu'adda si mangitou wuṛṛu mangapiddi mangitou apia su wanua indi. I Ya'u sarun mapararisikka, tawe makka'an mangitou; i Ya'u sarun massuanna, wal᷊ine mangabbutta si mangitou.

YEREMIA 32:42

Su ereapa i Ya'u buatte nandantan asasilaka su walahanna indi, aroddi lai Ya'u sarun mangonggollu sarangkanambone apan mapia apan buatte Ta'u pina'ire si mangitou.

YEREMIA 33:14

Mawu nabbisara, “Sarun a'omanna tempone i Ya'u manipussu paaire apan buatte Ta'u niola'a ringannu Israel wuṛṛu Yehuda.

YEREMIA 49:25

Soa tinumelengnga wuṛṛu napenen lul᷊uassa udde orassa indi mal᷊annabbe tate taumatane.

YEHEZKIEL 26:20

Ana see i'o Ta'u iiringnga watukku runian taumata nate tadea'u iapaammulu manga taumata wuassu tempon al᷊amona. Ta'u iwala i'o mamanua su runian taumata nate udde, su pattangngannu lanna'u winalalanna sarangkalo'engnge, suadio'a ringannu taumata nate. Ne letangngu tate atanaanna apia, wuṛṛu i'o tate ireengnga suwallattu taumata wiakka.

YEHEZKIEL 39:13

Anambon tumana'u wanua sarun massumbala manara pallal᷊abinga udde; wuṛṛu ringannu udde i mangitou sarun manengkamma lal᷊antakke su allo sutempo i Ya'u naauntunga. I Ya'u, Mawu Apan Atanggaṛṛanne buatte nabbisara.

TAHIUL᷊E 30:5

Ne i yamiu wotongnge maatahuanna apia leta'a dorone wawanuannu iupungngu al᷊amonanu. Wuṛṛu wiakki yamiu olaanna lembon ala, wuṛṛu reengannu mannamboanna wuassu al᷊amonanu.

YESAYA 43:21

Ete i mangitou walahanna apan Ta'u niola'a wuassu watangang-Ku, tadea'u wotongnge magion daralo si Ya'u.”

YESAYA 62:1

Ana waugu Yerusalem i Ya'u sarun mabbisara, ana waugu Sion i Ya'u tawe uatatana'a mal᷊annabba, maddatingngu i tou iapaasal᷊amatta wuṛṛu auntunganna mabbanala ere sasol᷊oanna sutempo ṛabbi.

YEREMIA 31:14

Manga imam sarun Ta'u wusannu anna apan manambo; wuṛṛu anambon apan pappandumannu uma-U sarun Ta'u ionggolla. I Ya'u, Mawu, apan nabbisara.”

YEHEZKIEL 36:35

Ne anambon taumata sarun tumiangnga, ana waugu leta'a apan tanginna maṛṛasa udde orassa indi nawal᷊ute nabbal᷊i wawail᷊annu Eden, wuṛṛu manga soa apan tanginna mal᷊annabba, naṛṛimunsa'a wuṛṛu naola'e manga winalal᷊anna, orassa indi naola'e manga soa apan matohassa taṛṛapane wuṛṛu manambo tumanangne.

ZAKARIA 1:17

Mala'ekatta udde nandolo'u mamasingkattu tanata indi lai, “Mawu Apan Lembontaṛṛino naddiandi manungku manga soa-Ne sarun mabbal᷊i su lal᷊umanna'a apia wuṛṛu manungku paasa lai i Tou sarun mantul᷊ungngu Yerusalem wuṛṛu manga'u maola'a pussa'a-Ne sassane.”