YEREMIA 32:41 - WUKE SUSI WATTI'U AL᷊AL᷊USASSA

⁴¹ I Ya'u sarun mal᷊uassa ma'ola'a apapia si mangitou, wuṛṛu ma'ola'a si mangitou matatana'a su wanua indi saran mal᷊annu-l᷊annu.

YEREMIA 32:41 Referans Kwoze

YEREMIA 24:6

I Ya'u sarun mallu'adda si mangitou wuṛṛu mangapiddi mangitou apia su wanua indi. I Ya'u sarun mapararisikka, tawe makka'an mangitou; i Ya'u sarun massuanna, wal᷊ine mangabbutta si mangitou.

ZEFANYA 3:17

I yamiu lal᷊u'arannu Mawu Ruatannu apan matohassa. I yamiu naauntungnga ana waugu taṛṛino-Ne. Mawu lullassa wuṛṛu lullala'a ana waugu i yamiu, sulal᷊ummu darangngu-Ne i yamiu mabbiakka wakku. Ana waugu i yamiu, i Tou mangngantari lulluassa.

AMOS 9:15

I Ya'u sarun mapatana'u uma-U su wanua apan buatte Ta'u nionggolla si mangitou. I mangitou tate lai wambanganna wua poiaroddi. I Ya'u Mawu Ruatan mangitou buatte nabbisara.”

YESAYA 62:5

Ere sangkatou umbasanna nattunanga ana'a maṛṛuala, etearoddi Mandariaddinu sarun ma'awingngu. Ere sangkatou esakka mal᷊uassa naungnge ma'asilo awingnge, etearoddi Ruata sarun mandangngu si'o.

YESAYA 65:19

I Ya'u sassane sarun lumuassa ana waugu Yerusalem, wuṛṛu lumala'a ana waugu tumanangnge. Su soa udde tate lai lal᷊uai, wuṛṛu tate lai aintul᷊i ma'iontolla.

YEREMIA 31:28

Su ereapa dorone i Ya'u buatte nallu'adda si mangitou tadea'u wua'udde i Ya'u mangabbutta, maṛṛa'a wuṛṛu makkimunsa'a si mangitou, aroddi lai i Ya'u sarun mallu'adda si mangitou tadea'u i Ya'u manohassa wuṛṛu i mangitou mabbangunna apia.

YEREMIA 18:9

Mawal᷊i'a, napawe i Ya'u makkawessa mamangunna ara'e manohassa sambau walahanna ara'e araratuanna,

TAHIUL᷊E 30:9

Mawu Ruatanu sarun ma'ola'a inasaharannu mangke mahessi; yamiu sarun maatahuanna anna manambo, wuṛṛu winatangnga apan manambo; manga wawail᷊annu sarun mangonggolu hessine manambo-nambo. Mawu ringannu naungnga mal᷊uassa ma'ola'a si yamiu ala, ere lai i Tou mal᷊uassa nangonggolu pa'a'ala su iupungngu al᷊amonanu.

TAHIUL᷊E 28:63

Ere lai Mawu mal᷊uassa mangonggolu lal᷊umanna'a si yamiu wuṛṛu mannimu reengannu, i Tou sarun mal᷊uassa mamate wuṛṛu manginsue si yamiu. I yamiu sarun limbuaṛṛanna wuassu wanua apan tate mal᷊annu lai atanaanni yamiu.

DARALO 80:8

Oh Ruata Apan Lembontaṛṛino, uwusewe i yami; ellehe i yami ringannu naungnga mal᷊uassa, tadea'u i yami masal᷊amatta.

YESAYA 62:4

Arannu wal᷊ine lai ‘Apan Nitantangnga’, wanuanu wal᷊ine lai ‘Apan Mal᷊annabba’. I'o sarun isaggo, ‘Apan Arangnguannu Ruata’, wuṛṛu wanuanu sarun isaggo, ‘Apan Buatte Naawingnga,’ ana waugu Mawu mappulunu, i Tou ere sangkatou awingnga su wanuanu.

MIKHA 7:18

Tawe Duata waine ere I'o, oh Mawu, apan nangampungnga rosan umatta apan nipile-Nu apan lambene. Tawe saran mal᷊annu-l᷊annu I'o masa'u; arawe mawal᷊ia, I'o mal᷊uassa mapal᷊iatta'u darangngu-Nu apan tawe pattaal᷊anne udde.

YESAYA 60:21

Tumana'u soanu mammanara ringannu ṛinone, i mangitou sarun manahuanna wanua saran mal᷊annu-l᷊annu. I mangitou naal᷊ihidda ranna cangkokka apan nisuang-Ku sassane, tadea'u mapal᷊iatta'u awawantu-U.

YEHEZKIEL 36:36

Ne manga walahanna al᷊indonganne apan ta'e isudde sarun maasingkatta manungku i Ya'u, Mawu, buatte napararisikku apia manga soa apan naṛṛimunsa'e, wuṛṛu nammanara apia manga wawail᷊anna apan nal᷊ol᷊okke. I Ya'u, Mawu, buatte nabbisara wuṛṛu atonna sarun ma'ola'a udde.”

HOSEA 14:5

Mawu nabbisara, “Uma-U apan sinumewadda, Ta'u al᷊apanna apia wuṛṛu Ta'u iakkanna ringannu ahewallu naungnga; i mangitou tate Ta'u wul᷊oanna apia.