YEREMIA 30:14 - WUKE SUSI WATTI'U AL᷊AL᷊USASSA

¹⁴ Anambon hawenu arangnguannu naabul᷊inute; i mangitou maddirite maṛṛingiddu watangannu. Naal᷊ihidda seetta i Ya'u buatte namangalo wuṛṛu nakkuumanni yamiu ringannu maṛṛagissa, ana waugu tumanite manambo rosanu wuṛṛu wahewalla pasasal᷊anu.

YEREMIA 30:14 Referans Kwoze

LAL᷊ALLU 1:2

Su al᷊o'engngu ṛabbi i tou lulluai massusa, allon matane mangngelekka su wambala. Tawe saran sangkatou wuassu arangnguanne apan mappulu maminalatta si tou. I tou nil᷊al᷊eon manga hawene apan nabbal᷊i'e nabbal᷊i ro'appa.

YEREMIA 5:6

Ana waugu i mangitou sarun pateannu singa wuassu mahurangnge, wuṛṛu ringanna wangngasannu serigala wuassu wadda'u anne. Macan tutul sarun mammal᷊intadda maddea'a inassa maranin manga soa mangitou, wuṛṛu suapan taumata apan sumabbangnga sarun tamboanne. Sarangkanambone udde mariaddi ana waugu i mangitou manambote rosane, wuṛṛu masokka-sokka tumal᷊i'udda Ruata.

AYUB 30:21

I'o tumaniten maṛṛagissa si ya'u, I'o mannasa'u ringannu anambon auatan-Nu.

YEREMIA 22:20

Mawu nabbisara, “Ei tumana'u Yerusalem, roote watukku Libanon wuṛṛu watukku Basan, wuṛṛu pangintul᷊ite poiaroddi. Pangikkuitte su panenteannu Moab, ana waugu anambon hawenu buatte niawaddo.

YEREMIA 30:15

Imbaṛṛangnga sumal᷊iomanna su ola'u manga lessanu, ana waugu i yamiu tawe antimma mapia. I yamiu Ta'u iṛṛuumanna aroddi ana waugu manambote rosanu wuṛṛu wahewalla pasasal᷊annu.

YEREMIA 22:22

Ana waugu udde, manga piaṛṛangngu sarun mawul᷊i tiupannu anginna. Manga hawenu sarun ṛootanna maola'a tawananna, wuṛṛu soanu heloanna wuṛṛu pansilianna ana waugu anambon al᷊al᷊eonu.

YEREMIA 4:30

Ei Yerusalem, i'o buatte nitantangnga wuṛṛu mangke tawe napa'ola'a apa-apa! Ipa'ura malluṛṛen laubba maṛṛamu wuṛṛu mallogakka watangannu ringannu wul᷊awanna wuṛṛu sal᷊a'a, se'e lai namuṛṛa mata ringannu wawuṛṛa? Tawe gunane i'o malloggakka watangannu, ana waugu manga apulunu maddirinute, ewe'e lai i mangitou mappulu manawutta niawanu.

YEREMIA 2:36

Mal᷊ihakka atonna i yamiu inai ringannu manga mongannu walahannu waine tadea'u maiontolla! I yamiu sarun iapasassillu taumata Mesir, ere lai i yamiu niapasassillu Asyur.

AYUB 19:11

Asasa'un Duata si ya'u mangke lukkenggamma; i ya'u aellehan-Ne ere seen-Ne.

HOSEA 5:14

Naal᷊ihidda singa apan tumambo, aroddi lai i Ya'u sarun mamangalo taumatan Israel wuṛṛu Yehuda. I Ya'u sassane sarun manggesa'a si mangitou, ana see Ta'u itantangnga. Napawe i Ya'u mamol᷊engnga si mangitou inai, tawe saran sangkatou apan wotongnge mamallossi mangitou.

HOSEA 2:5

Inangngu sumasandaga apan tawe masili. I tou mabbisara, ‘I Ya'u sarun inai ringannu manga arangnguangku apan mangngonggolla si ya'u anna wuṛṛu ua'e, wol wuṛṛu linen, lanan zaitun wuṛṛu anggore.’

YEHEZKIEL 23:22

Mawu Apan Atanggaṛṛanne nabbisara, “Ei Oholiba, i'o nawusate ringannu manga arangnguannu, arawe i Ya'u sarun mamono'a tadea'u i mangitou masa'u si'o wuṛṛu mamangalo si'o.

YEHEZKIEL 23:9

Ana waugu udde Ta'u nitantilla i tou su manga arangnguanne, manga taumatan Asyur apan tumaniten ipaapulune udde.

LAL᷊ALLU 1:19

I ya'u namaggo manga hawe'u ate arawe i mangitou namontol᷊osanna si ya'u. Manga imam wuṛṛu piaṛṛa'u walahanna sarangkanambone natete su manga lal᷊annu soa. Sutempo maddea'a wiakka ipandalukka niawa.

YEREMIA 38:22

Sulal᷊ummu aellega udde i ya'u naasilo anambon bawine apan ta'e su wal᷊en araratuannu Yehuda niapasabbangnga su liudde ṛattangannu manga tembonannu Babel. Lapiddu u'amatta i mangitou mabbisara, ‘Ratu niaawusuante manga hawene ate, wuṛṛu paparentanni mangitou. Orassa indi, napawe leddane nal᷊ioṛṛo'a sulal᷊ummu labbo, i mangitou sarangkanambone sinumoṛṛotta.’ ”

YEREMIA 6:23

Ahiddi mangitou ana'anna wuṛṛu sambeangnga; i mangitou maṛṛagissa wuṛṛu wagga mangonggollu ampungnga. Ere tingikku tahal᷊oangnga apan mattandi'a etearoddi tingikku lal᷊empangngu awal᷊o mangitou apan tantal᷊anna iappatal᷊angnga inai mamangalo Yerusalem.”

AYUB 16:9

Ringannu araṛṛagissa Ruata nanggesa'a waddangku; ringannu lembon maddantinna i Tou ua'ellega si ya'u.

DARALO 107:17

Piaddu longonna wuṛṛu uatataṛṛangnga ana waugu manga rosan mangitou, wuṛṛu nisansaranna ana waugu pasasal᷊an mangitou.

YESAYA 57:13

Napawe i yamiu mangintul᷊i, wala'e manga paal᷊uanna udde manal᷊amatta si yamiu! I mangitou sarun mawul᷊i italla'u anginna wuṛṛu mahangginna ringannu tiupanna paassa sumangngo! Arawe taumata uatullindumma si Ya'u sarun maapussa'a wanua udde wuṛṛu massubba Si ya'u su Wal᷊e-U.”

YEREMIA 14:17

I ya'u nirolokku Mawu mamasingkattu asasusa'u su uman-Ne. I ya'u ṛinone mabbisara arendi, “Wala'ewe i ya'u lumuai tawe illol᷊one, allo ṛabbi mangngelekka allom mata. Ana waugu walahangku nal᷊essa wahewalla wuṛṛu tumaniten uatataṛṛangnga.

YEREMIA 32:30

Ro'en pinanattaṛṛannu watti'i mangitou, taumatan Israel wuṛṛu taumatan Yehuda buatte na'ola'a si Ya'u tawe mal᷊uassa. I mangitou mapasabbangngu asasa'u-U ringannu manga inolaanni mangitou apan dal᷊eo.

YEREMIA 44:22

Mawu tate maataṛṛangnga lai ma'ellega si yamiu mangngonggollu sasamba su manga mawu waine. Pallal᷊agunu udde lal᷊eo maarantinna. I yamiu narosa su lantakku hati Mawu wuṛṛu tawe tumuṛṛutta manga parenta-Ne. Ana waugu udde orassa indi lai wanuanu naṛṛimunsa'e na'oman sara tate atanaanna apia, wuṛṛu aranne iapaatta maola'a wawontoga. Taumata apan naasilo naapendamma atata'utta.”

YEREMIA 50:42

Ahiddi mangitou anaanna wuṛṛu tambakka; i mangitou maṛṛagissa wuṛṛu wagga mangampungnga. Ere tingikku tahal᷊oangnga mattandi'a aroddi lai tingikku lempangngu awal᷊o i mangitou apan tantal᷊anna sassasanna inai mamangalo Babel.

OBAJA 1:7

I'o niawusuannu manga hawenu, wuṛṛu nilimbuaṛṛanna wuassu wanuanu. I'o niwaddon manga hawenu, nihauannu taumata apan niumanna suadio'a ringannu. I mangitou ma'iwal᷊o su ola'u watangannu, ‘Suapate orassa indi al᷊awo'u apapandene?’

YEREMIA 5:5

Mappianne i ya'u inaite ringannu manga tembonanne, wuṛṛu maggahatto mangitou. I mangitou sarun maasingkatta apa apan ipaapulu wuṛṛu raddorongannu Mawu Ruata wuassi mangitou.” Arawe, i mangitou sarangkanambone lai maddiri parentannu Mawu; i mangitou maddiri tumuṛṛutta si Tou.

YEREMIA 32:29

wuṛṛu manoṛṛobba na'oman sara masue suadio'a ringannu manga wal᷊en manga taumata ma'asabbangngu asasa'u-U, ana waugu su wowon atuppu manga wal᷊en udde i mangitou mannambunnu amania si Baal wuṛṛu mallal᷊innu ua'e anggore ipassubba manga monganna.

YEREMIA 32:34

Ewe'e lai wal᷊en apan niola'a hunan tampan patataṛṛamawuanna si Ya'u buatte niluhuranni mangitou ringannu pinangaddoannu manga paal᷊uanni mangitou apan maarantinna su tampa udde.

YEREMIA 32:35

I mangitou napararisikku manga mezbah hunam Baal su Wawal᷊annu Hinom, wuṛṛu nangonggollu manga ana'i mangitou si Dewa Molokh. Sumbal᷊i, i Ya'u taambe saran paassa nandolokki mangitou ma'ola'a inolaanna udde, ewe'e lai tawe nilumapputa sulal᷊ummu ṛingirang-Ku manungku i mangitou ma'ola'a inolaanna al᷊al᷊eone udde wuṛṛu naarosa taumatan Yehuda.”

LAL᷊ALLU 2:1

Mawu nammanara sulal᷊ummu asasa'u, Sion nioossu Mawu ringannu ararandumma. Awawantugu Israel atanggakke ere langitta, buatte niemang-Nge su runia. Sutempo Mawu nasa'u, Wal᷊en-Ne su Sion tate lai nipanduman-Ne.

DANIEL 9:5

I yami narosate, i yami buatte na'ola'a alaleo, wuṛṛu na'ola'a pasasal᷊a. I yami buatte namangalo wuṛṛu nilumawangnga parenta-Nu see sinumewadda wuassu manga atoran-Nu.

DANIEL 9:11

Ahewallu Israel buatte nilumawangnga manga tita-Nu wuṛṛu maddiri maddaringikka tingik-Ku. I yami narosate su saruan-Nu, wuṛṛu ana waugu udde I'o nandantan wawotoga si yami apan uawoṛṛetta sulal᷊ummu Buken Musa, allang-Ngu.

DANIEL 9:13

Al᷊awo'u asasilaka apan uaweoṛṛetta sulal᷊ummu Titan Musa buatte niapaṛṛia'u Mawu si yami. Arawe salaiwe aroddi, oh Mawu Ruatan kami, i yami ta'e lai mannol᷊a'a malluassa naung-Nu. I yami sidutu maddiri manantangngu manga rosan kami wuṛṛu maddiri lai maddaringikka manga al᷊aṛṛang-Ngu.