YEREMIA 29:8 - WUKE SUSI WATTI'U AL᷊AL᷊USASSA

⁸ I Ya'u Mawu, Apan Lembontaṛṛino, Ruatan Israel, mapanaungnga si yamiu tadea'u arie mamala batangannu awusuannu manga nabi apan uatana'a su pattangnganni yamiu ara'e isai-sai lai apan mabbisara manungku i mangitou wotongnge mani'attu tempo addantane. Ariete maṛṛingiddu manga wal᷊iawa mangitou.

YEREMIA 29:8 Referans Kwoze

EFESUS 5:6

Iambaṛṛanga i yamiu awusuannu manga hatto awusu. Ana waugu, ete manga hatto indi, apan maasa'u Ruata su saruannu manga taumata apan mal᷊awangnga si Tou.

YEREMIA 5:31

manga nabi mangngawusu, manga imam mangngimbe tumuṛṛuttu apulun naungnge sassane wuṛṛu i yamiu uma-U mappulun inolaanna udde. Arawe apa apan sarun olaanni yamiu napawe nia'omante allo panginsueanne?”

2 TIMOTIUS 3:13

arawe manga taumata lal᷊eo wuṛṛu manga taumata taṛṛa l᷊inga sarun mabbal᷊i lembon al᷊eoanne. I mangitou mallinga taumata waine, wutte'e i mangitou sassane nial᷊inganna lai.

YEREMIA 28:15

Sarangkanambone udde ta'u niapasingkatta si Hananya, ana see i ya'u nabbisara apia, “Paddaringikka, ei Hananya! I'o tawe nirolokku Mawu; i'o buatte na'ola'a manga walahanna indi mangngimanna wisara awusu.

YEREMIA 27:9

Imbaṛṛangnga maddaringikka manga nabi ara'e isai-isai lai apan maningaddi yamiu massuṛṛubbawa su ratu Babel, salaiwe i mangitou manga'u buatte nanarimmattu tatantiro wuassu wal᷊iawa, manga ghaṛṛaho al᷊ussa, ara'e ringannu mappaattu wal᷊i'in mata.

YEREMIA 14:14

Arawe Mawu sinumimbakka, “Manga nabi udde mangapiddu watti'a awusu ringannu arang-Ku; i Ya'u tawe nandolokki mangitou, wuṛṛu tawe lai nangonggollu parenta ara'e naggahatto mangitou. Manga aellegga apan iwabbatti'i mangitou wal᷊ine wuassia-U; i mangitou maṛṛangngo manga inolaanna tawe gunane apan iaarangnga sassane.

SONDAPPA 19:20

Ne winatangnga udde niasametta suadio'a ringannu nabi awusu apan suete na'ola'a manga al᷊aṛṛindu'a su saruannu winatangnga udde. (Ringannu manga al᷊aṛṛindu'a uddewe winatangnga udde nangawusu manga taumata apan uatahuanna tatialam binatangnga udde, wuṛṛu manga taumata apan massubba paal᷊uannu winatangnga udde.) See winatangnga udde wuṛṛu nabi awusu udde niramme ta'e wiakka sulal᷊ummu tahal᷊oangngu putungnga apan lukkenggama ringannu belerangnga.

SONDAPPA 13:14

Wuṛṛu anambon taumata apan mabbiakka su runia niawusuanne ringannu manga al᷊aṛṛindu'a apan botongnge olaanne su saruannu winatangnga apan paarorone udde. Wuṛṛu i mangitou sarangkanambone nirolokka mandarisikku sambau paal᷊uanna wuassu winatangnga apan suete nilessan hal᷊ele, arawe ta'e wiakka.

2 TESALONIKA 2:3

Salaiwe ereapa, arie mapaawalan taumata mangawusu si yamiu. Ana waugu tantal᷊anna taambe nia'omanna allo udde, ṛinone mariaddi dorone olangnge indi: Manambo taumata sarun massinaadda, maddandilli Kristus; wuṛṛu Taumata Lal᷊eo apan suete nitantuna iapaasutta su naraka, sarun mamasilon batanganne.

ROMA 16:18

Ana waugu manga taumata inolaanne aroddi, wal᷊inewe mammanara manaran Kristus Mawun kite, ewe'e tumba'u mappaal᷊uassu apulu naungngi mangitou sassane. Ringannu sasal᷊o'a wuṛṛu manga wisara apan mapia, i mangitou mammahia manga taumata apan waggan apa-apa.

LUKAS 21:8

Mawu Yesus nabbisara, “Paatehamma, arie i yamiu awahianna. Manambo taumata sarun rumanta ringannu arang-Ku, wuṛṛu mabbisara, ‘Ete i Ya'u i Tou!’ wuṛṛu ‘Nia'omante tempone.’ Arawe arie i yamiu tumantalongnga si mangitou.

LUKAS 6:26

Nasilakate i yamiu, amungkangngu anambon taumata maddalo si yamiu; ana waugu aroddi lai iupungnga al᷊amona mangitou maddalo manga nabi awusu su tempo rorone.”

MATIUS 24:24

Ana waugu sarun dumanta manga mananal᷊amatta awusu wuṛṛu manga nabi awusu. I mangitou sarun ma'ola'a al᷊awo'u inolaanna apan bahewalla, wuṛṛu manga al᷊aṛṛindu'a ipangawusu, amungkangngu wotongnge, al᷊aṛṛana'u Ruata lai.

ZAKARIA 13:4

Su allo udde, manga nabi sarun maapendamma asasili ma'ola'a manaran sangkatou nabi. I mangitou tate malluṛṛen laubbu nabi ipamahia wuṛṛu ipamarabungan manga sondamme.

MIKHA 2:11

I yamiu mappandumma nabi apan apulune mammahia wuṛṛu mallinga see mammasingkatta manungku i yamiu sarun maatahuanna anggore wuṛṛu ua'e apan maawu'anna nilumambalanna.”

YEREMIA 23:21

Mawu nabbisara, “Maṛṛimadda atonna manga nabi udde, sumbal᷊i i mangitou tawe Ta'u nirolokka. Ringannu arang-Ku i mangitou mabbatti'u watti'a, sumbal᷊i tawe tanata apan Ta'u nionggolla si mangitou.

EFESUS 4:14

Ne i ite tate maola'a lai al᷊aṛṛana'a apan nial᷊iwune, wuṛṛu iaapiddu al᷊awo'u hatin al᷊aṛṛa'u manga taumata apan taṛṛa awusu. I mangitou mangngal᷊iwun taumata ringannu wawahian mangitou.

YEREMIA 23:27

I mangitou maṛṛingidda manungku ringannu manga wal᷊iawa apan iwabbatti'i mangitou udde, uma-U wotongnge maabul᷊i-U ere lai al᷊amona mangitou naabul᷊i-U wuṛṛu nassubba si Baal.

1 YOHANES 4:1

Manga tuṛṛangnga apan arangnguanna! Arie pangimanna anambon taumata apan mangnga'u Ghaṛṛahon Duata, arawe annama'a asuene i mangitou tanne ghaṛṛaho mangitou udde niarantanne wuassu Ruata ara'e tawe. Ana waugu manambonabi awusu apan u'amatta su al᷊awo'u tampa.

YEREMIA 23:25

Sarangkanambone apan niwisara manga nabi udde i Ya'u masingkatte. Ringannu arang-Ku i mangitou mangngawusu manungku tanata-U buatte nisengkammi mangitou wuassu wal᷊iawa.

YEREMIA 29:1

I ya'u namoṛṛettu suratta su manga imam, manga nabi, manga piaṛṛa'u walahanna apan ta'e wiakka, wuṛṛu su anambon taumata waine apan buatte niapiddi Nebukadnezar wuassu Yerusalem watukku Babel.

YEREMIA 29:21

Mawu Apan Lembontaṛṛino, Ruatan Israel, buatte nabbisara su ola'i Ahab ana'i Kolaya, wuṛṛu su ola'i Zedekia ana'i Maaseya apan nappaattu arannu Mawu ipamasingkattu manga inolaanna awusu. Mawu nabbisara manungku i Tou sarun manantilli mangitou su taṛṛino Nebukadnezar ratun Babel, apan sarun mamate si mangitou su saruannu matanu.

YEREMIA 29:23

Etearoddi ola'u wiakki mangitou ana waugu buatte na'ola'a manga rosa wahewalla su Israel: i mangitou sussandaga, wuṛṛu nappaattu arannu Mawu ipabbatti'u manga inolaanna awusu. Udde napapaṛṛalan apulu Mawu. I tou masingkattu apa apan a'olaanni mangitou, wuṛṛu i tou sassane nabal᷊i tialane lumawangnga si mangitou. Mawu buatte nabbisara.”

YEREMIA 37:9

I Ya'u, Mawu, mapanaungnga si yamiu, tadea'u arie pamahia watangannu ringannu maṛṛingidda manungku taumatan Babel napul᷊ete wuṛṛu tate mabbelengnga apia.

LAL᷊ALLU 2:14

Apan niapasingkattu manga nabi si'o, tumba'u aawusu wuṛṛu wawahia sassane. I mangitou taambe naasi'attu rosanu, na'oman sara ana waugu udde i'o maddiri mawal᷊u. Nawal᷊i'a i mangitou tumba'u mammasingkatta si'o manga wisara awusu apan maasarootta.

YEHEZKIEL 13:6

Manga aellegi mangitou awusu, wuṛṛu manga pani'atti mangitou tumba'u wawahia. I mangitou mangnga'u uaapiddu tanata wuassia-U, sumbal᷊i Ya'u tawe nandolokki mangitou. Ereapa wotongnge i mangitou mangngantimma pani'atti mangitou udde sarun mariaddi?

YEREMIA 23:16

Su tumana'u Yerusalem, Mawu Apan Lembontaṛṛino nabbisara, “Imbaṛṛangnga maddaringikka wisara manga nabi apan sidutu tumba'u mangngonggollu antimma apan tawe loṛṛone. I mangitou tumba'u mammasingkattu wal᷊iawa mangitou sassane wuṛṛu wal᷊ine tanata-U.

YEREMIA 29:15

Tumuṛṛuttu yamiu, Mawu buatte nangonggolla si yamiu manga nabi su Babel.