YEREMIA 29:18 - WUKE SUSI WATTI'U AL᷊AL᷊USASSA

¹⁸ I mangitou sarun Ta'u enggenanna ringannu pangalo, ṛutumma, wuṛṛu al᷊aṛṛusa'itta ma'oman sara al᷊awo'u walahanna su ahewallu runia sarun maapendamma atata'utta maasilo ola'i mangitou. Sauapan tampa i Ya'u manal᷊iawukki mangitou, taumata sarun maapendamma atata'utta maasilo apa apan buatte nariaddi si mangitou. I mangitou sarun al᷊uandahanna, wuṛṛu aranni mangitou ipaatta maola'a wawontoga.

YEREMIA 29:18 Referans Kwoze

YEREMIA 42:18

Su ereapa i Ya'u, Mawu Ruatan Israel napasabbangngu asasa'u wuṛṛu araṛṛagi-U su tumana'u Yerusalem, aroddi lai Ya'u mapasabbangngu araṛṛagi-Ku si yamiu apan inai watukku Mesir. Taumata sarun marantinna maasilo si yamiu; i yamiu sarun heloanna, wuṛṛu arannu tate ipaatta maola'a wawontoga. I yamiu tate maasilo apia leta'a niariaddiannu indi.”

YEREMIA 15:4

I Ya'u sarun ma'ola'a anambon balahanna su runia matta'utta maasilo si mangitou. Sarangkanambone udde Ta'u olaanna ana waugu inolaanni Manasye ana'i Hizkia su Yerusalem sutempo i tou naola'a ratun Yehuda.”

2 TAWARIKH 29:8

Ana see Mawu sulal᷊ummu asasa'u-Ne nakkuumannu taumatan Yehuda wuṛṛu Yerusalem. Wuṛṛu i yamiu sarangkanambone masingkatta aroddi inolaannu Mawu maaṛindu'a wuṛṛu maata'utta.

YEREMIA 24:9

I Ya'u sarun manilaka si mangitou aroddi olangnge na'oman sara al᷊awo'u walahanna su ahewallu runia mabbal᷊i mata'utta. Suapan tampa i mangitou Ta'u itantilla, i mangitou sarun al᷊uandahanna, maola'a ilallage wuṛṛu lallobbosanna. Aranni mangitou sarun ipaatta maola'a wawontoga.

TAHIUL᷊E 28:25

Amungkangngu i yamiu tawe maddaringikka Mawu Ruatanu, i Tou sarun ma'ola'a si yamiu mawaddo su manga seennu. I yamiu sarun mamangalo ringannu uaatokka arawe tumal᷊angnga ringannu uasongkakka. Anambon balahannu su runia sarun maapendamma atata'utta maasilo asasusanu.

YEHEZKIEL 12:15

Sutempo i mangitou Ta'u isal᷊iawukka su pattangngannu manga walahanna waine su manga wanua awagananna, i mangitou sarun maasingkatta manungku ete i Ya'u Mawu.

YEREMIA 25:9

‘I Ya'u sarun mamaggo anambon balahanna wuassu sawannakka, wuṛṛu lai allang-Ku, i Nebukadnezar ratun Babel. I mangitou sarun Ta'u parentanna iapapangalo mando'appa Yehuda wuṛṛu tumanangnge see lai al᷊awo'u walahanna maranine. Walahannu Yehuda suadio'a ringannu manga walahanna al᷊indonganne sarun Ta'u pateanna wuṛṛu Ta'u iwala maṛṛimunsa'a saran mal᷊annu-l᷊annu. Manga taumata apan naasilo udde sarun ṛumindu'a wuṛṛu maapendamma atata'utta. I Ya'u, Mawu, buatte nabbisara.

YESAYA 65:15

Manga taumata nipile-U sarun mappaattu arannu maola'a wawontoga; ‘Antimanna Mawu Apan Atanggaṛṛanne mamate si yamiu ere lai si mangitou!’ Arawe taumata apan matuṛṛutta si Ya'u sarun Ta'u onggol᷊annu aranna wakku.

LUKAS 21:24

Piaddu pateannu hal᷊ele, pia lai apan sarun iapidda ere taumata niatawanna watukku manga wanuan taumata; wuṛṛu manga taumata apan tawe maaillal᷊a Ruata sarun maṛṛinda Yerusalem ma'oman sara masue tempone apan suete tinantunnu Mawu si mangitou.”

ZAKARIA 7:14

Naal᷊ihidda tandi'a, i Ya'u nanahangginna si mangitou na'oman sara i mangitou niwata'a mamanua su manga wanua waine. Leta'a apan masuwukka indi nabbal᷊ite mal᷊annabba tawe tumatanangnge wuṛṛu lol᷊okka.”

AMOS 9:9

I Ya'u sarun mangonggollu parenta wuṛṛu mattappa walahannu Israel ere taumata mattappa gandumma sulal᷊ummu niṛṛu. Su ipanahangginna sarangkanambone apan tawe gunane suwallatti yamiu, i Ya'u sarun malluakki mangitou suwallattu manga walahanna.

YEHEZKIEL 36:19

I mangitou Ta'u niṛṛuumanna uasul᷊ungngu ringannu ola'u pabbiaṛṛanna wuṛṛu ala'uanni mangitou, ana see i mangitou Ta'u nisal᷊iawukka watukku manga wanua waine.

YEHEZKIEL 22:15

I Ya'u sarun manal᷊iawukku tumanangngu su ahewallu wanua wuṛṛu walahanna, wuṛṛu i Ya'u sarun mapaaddon inolaannu apan dal᷊eo udde.

YEHEZKIEL 6:8

Sangkawageanganna addio'a wuassi mangitou sarun Ta'u iapaal᷊iu wuassu pamamate udde, arawe i mangitou sarun isal᷊iawukka su wallattu manga araratuanna;

YEREMIA 29:22

Ne amungkangngu manga taumata apan buatte niapidda wuassu Yerusalem watukku Babel mappulu mamontoga sangkatou taumata, i mangitou sarun mabbisara, ‘Antimanna Mawu ma'ola'a si'o ere i Zedekia wuṛṛu i Ahab, apan buatte nitambunnu ratun Babel ta'e wiakka.’

YEREMIA 26:6

Amungkangngu i yamiu sidutu uatatana'a lullawangnga, wal᷊en patataṛṛamawuanna indi sarun Ta'u olanna ere Silo, na'oman sara anambon araratuanna su runia mappaattu arannu soan Yerusalem indi maola'a wawontoga.”

YEREMIA 19:8

I Ya'u sarun maṛṛia'u asasilaka apan wahewalla su soa indi, ma'oman sara suapan taumata apan sumabbi isudde sarun ṛumindu'a wuṛṛu mata'utta.

DARALO 44:11

I'o namalan kami tinumal᷊angu watanganni yami wuassu seetti yami, wuṛṛu i mangitou nangaṛṛo darotongngi yami.

TAHIUL᷊E 28:64

Mawu sarun manal᷊iawukki yamiu suwallatu manga walahanna su ahewallu runia. Poiaroddi yamiu sarun massubba manga Mawu apan niola'a wuassu alu wuṛṛu watu, manga Mawu apan awagananni yamiu wuṛṛu awaganannu iupungngu al᷊amonanu.

IMAMATTA 26:33

I Ya'u sarun mandantan papangalo su wanuanu wuṛṛu manal᷊iawukki yamiu su manga wanua waine. Manga wawail᷊annu tate lu'aranna, wuṛṛu manga soanu niwalate naola'a tuidda.

REENGANNA 5:27

Unnu wisara wawine udde buatte sinumandaga, ua'e udde mangke maataddu'a si tou; tianne maggandalla wuṛṛu punnu palangnge maaṛṛuangkinna. Aranne sarun maola'a sasalun bontoga sulal᷊ummu walahanne.

TAHIUL᷊E 28:37

Su manga wanua tampan kamiu nisal᷊iawukku Mawu, manga taumata sarun mata'utta maasilo si yamiu; yamiu sarun al᷊uandahanna wuṛṛu ilagge mangitou.

YEREMIA 27:8

Walahanna wuṛṛu araratuanna apan tawe tumuṛṛutta si Nebukadnezar sarun Ta'u iṛṛuumanna ringannu pangalo, ṛutumma, wuṛṛu al᷊aṛṛusa'itta, ma'oman sara panginsueanne tumuṛṛutta si tou.

YEREMIA 29:17

Mawu Apan Lembontaṛṛino nabbisara, ‘I Ya'u sarun mandantan pangalo, ṛutumma, wuṛṛu al᷊aṛṛusa'itta si mangitou. I mangitou sarun Ta'u olaanna ere manga wuan ara apan tumanite mawukku'a na'oman sara tate iaanna.

YEREMIA 32:24

Manga taumatan Babel buatte napararisikku manga tanda'a batu palliwunanna mipamal᷊iwutta soa huna ipangaṛṛo, wuṛṛu orassa indi i mangitou mammangalote. Pangalo, ṛutumma, wuṛṛu al᷊aṛṛusa'itta maola'a pangillul᷊ennu soa indi manawo su lima mangitou. I'o maasilo manungku sarangkanambone apan niwisara-Nu nilumiatta'e.

YEREMIA 44:12

Wuṛṛu amungkangngu wuassu taumatan Yehuda apan nallambe piaddu mappulu inai watukku Mesir wuṛṛu matana'a poiaroddi, i mangitou sarun mate abbi. I mangitou sarangkanambone, wahewalla addio'a, sarun nate su Mesir sulal᷊ummu pangalo ara'e ana waugu ṛutumma. Taumata sarun maapendamma atata'utta maasilo si mangitou wuṛṛu sarun mallobbossa si mangitou. Aranni mangitou sarun ipaatta maola'a wawontoga.

YEREMIA 44:22

Mawu tate maataṛṛangnga lai ma'ellega si yamiu mangngonggollu sasamba su manga mawu waine. Pallal᷊agunu udde lal᷊eo maarantinna. I yamiu narosa su lantakku hati Mawu wuṛṛu tawe tumuṛṛutta manga parenta-Ne. Ana waugu udde orassa indi lai wanuanu naṛṛimunsa'e na'oman sara tate atanaanna apia, wuṛṛu aranne iapaatta maola'a wawontoga. Taumata apan naasilo naapendamma atata'utta.”

YEHEZKIEL 23:46

Mawu Apan Atanggaṛṛanne nabbisara, “Waggoite sangwiliṛṛana taumata iapasansara wuṛṛu iapaaṛṛo ruang katou sumasandaga udde.

MIKHA 6:16

Sarangkanambone udde mariaddi ana waugu i yamiu tuttantalongnga manga inolaanni Ratu Omri wuṛṛu anangnge apan dal᷊eo, eteudde Ratu Ahab. I yamiu mattanno manga pallal᷊aghun mangitou. Ana waugu udde i Ya'u sarun makkimunsa'a si yamiu, wuṛṛu i yamiu sarun al᷊uandahanna wuṛṛu lobbosannu al᷊awo'u walahanna.”

YEREMIA 18:16

Wanua indi buatte niola'i mangitou tampa apan maata'utta, wuṛṛu sarangkal᷊o'enge maola'a aal᷊uandaga. Sarangkanambone apan umamatta sarun mapapa'ilingngu pua ana waugu matta'utta.

YEREMIA 24:10

I Ya'u sarun mandanta si mangitou pangalo, ṛutumma, wuṛṛu sa'itta ma'oman sara i mangitou sarangkanambone mate wuṛṛu taweddu matantangnga su wanua indi apan buatte Ta'u nionggolla si mangitou wuṛṛu al᷊amona mangitou.”

YEHEZKIEL 5:15

Amungkangngu i Ya'u masa'u wuṛṛu mannaungnga lal᷊eo si'o see makkuumannu, anambon araratuanna uapal᷊iwutta si'o sarun maapendamma atata'utta. I mangitou sarun mangal᷊uandaga si'o wuṛṛu mammuta maasilo si'o.

ZAKARIA 8:13

Ei tumana'u Yehuda wuṛṛu Israel! Sutempo nanangkal᷊iu, amungkangngu manga taumata raho uawawontoga, i mangitou mabbisara, ‘Antimanna asasilaka apan naṛṛia'a su Yehuda wuṛṛu Israel maṛṛia'a si'o lai!’ Arawe i Ya'u sarun manal᷊amatta si yamiu, ma'oman sara manga taumata raho udde sarun mabbisara rundussa i mangitou, ‘Antimanna al᷊amatta apan nonto'a su Yehuda wuṛṛu Israel, umonto'a lai su watangannu!’ Ana waugu udde paatohasse naungu wuṛṛu arie paata'utta!”