YEREMIA 25:29 - WUKE SUSI WATTI'U AL᷊AL᷊USASSA

²⁹ I Ya'u sarun manattakku panganguno udde su soa-U sassane. Arie ma'oman sara i mangitou massunna manungku i mangitou tawe iṛṛuumanna. I mangitou sarun iṛṛuumanna ana waugu i Ya'u sarun mandantan pangalo su al᷊awo'u walahanna su ahewallu runia. I Ya'u, Mawu Apan Lembontaṛṛino, buatte nabbisara.

YEREMIA 25:29 Referans Kwoze

1 PETRUS 4:17

Nia'omante tempone Ruata mamarikissa runia. Wuṛṛu ete walahannu Ruata sassane apan sarun parikisanna paarorone. Ne, amungkangu Ruata manattakke mamarikissa si ite, ereapate manga taumata apan tawe mangngimanna Watti'u Al᷊al᷊uassa wuassu Ruata udde?

YEHEZKIEL 38:21

Ana see i Gog Ta'u enggenanna rinangnu al᷊awo'u asasilaka. I Ya'u, Mawu Apan Atanggaṛṛanne buatte nabbisara. Tantarane sarun mapapangalo ringannu hal᷊ele mangitou.

AMSAL 11:31

Amungkangngu su runia indi taumata mapia lai sarun manarimmattu wawal᷊inne, natantunte taumata lal᷊eo wuṛṛu marosa sarun maasomba ṛuumanna.

1 MARARATU 8:43

antimanna wuassu atatanaan-Nu su surga I'o maddaringikka aal᷊iomanne wuṛṛu mangonggollu darorongnge. Ringannu aroddi al᷊awo'u walahanna su ahewallu runia maaillal᷊a Si'o wuṛṛu matuṛṛutta Si'o ere uman-Nu Israel. I mangitou sarun maasingkatta manungku wal᷊en apan ta'u niola'a indi uddewe tampa patataṛṛamawuanna Si'o.

OBAJA 1:16

Su puiddu wowone-U apan susi uma-U buatte na'inumma ua'e apan nammasingkattu ṛuumanne. Arawe ua'en manga walahanna su runia indi mappetanna lai. Ṛuumanna udde tawe ial᷊asso'i mangitou. I mangitou sarun ma'inumma ma'iman sara masue, wua'udde i mangitou sarun mawul᷊i tawe lannangnge.”

YEHEZKIEL 9:6

Patete anambon taumata esakka wuṛṛu wawine, timmade wuṛṛu dario'a, hagurangnge wuṛṛu al᷊aṛṛanangnge. Arawe arie waṛṛani mangeṛṛetta sangkatou apan pia tatiala su pakkanne. Panattakke wua isindi, wuassu Wal᷊e-U indi.” Ne i mangitou nanatakke manara mangitou ringannu mammate manga piaṛṛa'u Israel apan tantal᷊anna uarisikka su Wal᷊en Mawu.

YEREMIA 49:12

Taumata apan ṛinone tawe iṛṛuumanna, aṛṛiaannu ṛuumanna lai, ṛatadde i yamiu tawe? I yamiu natantunte sarun iṛṛuumanna!

LUKAS 23:31

Ana waugu amungkangngu matataṛṛino su alu ta'e wiakka, taumata suete na'ola'a ereindi, apa lai sarun olaanni mangitou su alu apan naṛṛangute!”

ZAKARIA 13:7

Mawu Apan Lembontaṛṛino nabbisara, “Darisikke, ei hal᷊ele, wuṛṛu pangaloite mallal᷊u'adda apan mammanara ringang-Ku! Patete i tou, ne manga domba sarun massal᷊iawukka. I Ya'u sarun mamangalo uma-U,

YEHEZKIEL 14:21

Mawu Apan Atanggaṛṛanne nabbisara, “I Ya'u mangema'u appatta ṛuumang-Ku apan asaddatanne su Yerusalem ipamate mawae taumata aroddi lai winatangnga. Ṛuumanna udde eteudde: pangalo, al᷊aṛṛutumma, winatangnga mal᷊aṛṛaga wuṛṛu ṛiwutta.

YEHEZKIEL 14:17

Wotongnge mariaddi i Ya'u mandantan pangalo su wanua udde, wuṛṛu i Ya'u mangirimmu manga ahidda lutangnga apan apianne ipamate mawae taumata aroddi lai winatangnga.

YEREMIA 46:28

Nariaddi ariete mata'utta, ei uma-U, i Ya'u sarun dumanta manal᷊amatta si yamiu. Manga walahanna, su tampa i yamiu Ta'u nisal᷊iawukka, sarangkanambone Ta'u pateanna, arawe i yamiu tawe Ta'u olaanna aroddi. Atonna i yamiu tawe mal᷊iu wuassu ṛuumanna arawe ṛuumang-Ku si yamiu udde matul᷊idda uasul᷊ungngu atoranna. I Ya'u, Mawu, buatte nabbisara.”

YEREMIA 30:11

I Ya'u sarun dumanta wuṛṛu i yamiu Ta'u iapaasal᷊amatta. Manga walahanna, su tampa i yamiu Ta'u nisal᷊iawukka sarangkanambone sarun Ta'u pateanna, arawe i yamiu tawe Ta'u olaanna aroddi. Atonna i yamiu tawe maal᷊iu wuassu ṛuumanna arawe ṛuumang-Ku si yamiu udde matul᷊idda uasul᷊ungngu atoranna. I Ya'u, Mawu, buatte nabbisara.”

YEREMIA 13:13

Ne wal᷊oa'e si mangitou manungku manga taumatan wanua indi, manga ratune papapulunni Daud, manga imam, nabi, wuṛṛu anambon tumana'u Yerusalem sarun Ta'u loṛṛoannu anggore ma'oman sara mapene tadea'u iwu'anne.

YESAYA 10:12

Arawe Mawu nabbisara, “Amungkangngu apa apan Ta'u olaanna su Wuiddu Sion wuṛṛu Yerusalem udde nuddusse, i Ya'u sarun makkuumannu ratun Asyur ana waugu awawungane wuṛṛu atatanggakke.”

AMSAL 17:5

Isai mangngal᷊uandaga taumata masa'ina, mallobbossa taumata Ruata mandariaddine. Isai apan lulluassu asasilakan taumata waine, sarun maasomba ṛuumanna.

AMSAL 11:21

Taumata lal᷊eo ṛinone iṛṛuumanna; taumata mapia sarun masal᷊amatta.

YEREMIA 19:3

I Ya'u ṛinone mabbisara arendi, “Ei manga ratun Yehuda wuṛṛu tumana'u Yerusalem! Paddaringikka si Ya'u, Mawu Apan Lembontaṛṛino, Ruatan Israel, apan mabbisara si yamiu. I Ya'u sarun mandantan asasilaka apan bahewalla su tampa indi ma'oman sara taumata apan maaringikka ṛumindu'a.