YEREMIA 18:16 - WUKE SUSI WATTI'U AL᷊AL᷊USASSA

¹⁶ Wanua indi buatte niola'i mangitou tampa apan maata'utta, wuṛṛu sarangkal᷊o'enge maola'a aal᷊uandaga. Sarangkanambone apan umamatta sarun mapapa'ilingngu pua ana waugu matta'utta.

YEREMIA 18:16 Referans Kwoze

DARALO 22:7

Arawe i ya'u indi lal᷊uati, wal᷊ine taumata, aal᷊uandahanna wuṛṛu lallobosannu awadaalla.

YEREMIA 25:9

‘I Ya'u sarun mamaggo anambon balahanna wuassu sawannakka, wuṛṛu lai allang-Ku, i Nebukadnezar ratun Babel. I mangitou sarun Ta'u parentanna iapapangalo mando'appa Yehuda wuṛṛu tumanangnge see lai al᷊awo'u walahanna maranine. Walahannu Yehuda suadio'a ringannu manga walahanna al᷊indonganne sarun Ta'u pateanna wuṛṛu Ta'u iwala maṛṛimunsa'a saran mal᷊annu-l᷊annu. Manga taumata apan naasilo udde sarun ṛumindu'a wuṛṛu maapendamma atata'utta. I Ya'u, Mawu, buatte nabbisara.

YEREMIA 19:8

I Ya'u sarun maṛṛia'u asasilaka apan wahewalla su soa indi, ma'oman sara suapan taumata apan sumabbi isudde sarun ṛumindu'a wuṛṛu mata'utta.

MATIUS 27:39

Manga taumata apan sinumabbi isudde mangke uapapa'ilingnga wuṛṛu mangngaddio'a Mawu Yesus.

MIKHA 6:16

Sarangkanambone udde mariaddi ana waugu i yamiu tuttantalongnga manga inolaanni Ratu Omri wuṛṛu anangnge apan dal᷊eo, eteudde Ratu Ahab. I yamiu mattanno manga pallal᷊aghun mangitou. Ana waugu udde i Ya'u sarun makkimunsa'a si yamiu, wuṛṛu i yamiu sarun al᷊uandahanna wuṛṛu lobbosannu al᷊awo'u walahanna.”

YEREMIA 50:13

Ana waugu i Ya'u nasa'u, ne Babel sarun mallambe ete tuidda wuṛṛu taweddu matana'a. Sarangkanambone apan sumabbi isudde sarun ṛumoro wuṛṛu mata'utta.

YEREMIA 49:13

I Ya'u massalu ringannu arang-Ku sassane manungku soa Bozra sarun maola'a tampa apan ma'ata'utta apan nitantangngu taumata. Taumata sarun lumagene wuṛṛu mappaattu aranne maola'a wawontoga. Anambon ampungnga maranine sarun mabbal᷊i winal᷊alanna saran mal᷊annu-l᷊annu. I Ya'u, Mawu, buatte nabbisara.”

1 MARARATU 9:8

Wal᷊en patataṛṛamawuanna indi sarun maola'a ere winal᷊al᷊anna niomboanna na'aman sara suapan taumata apan sumabbi isudde sarun ṛumindu'a wuṛṛu mata'utta. I mangitou sarun mabbisara, ‘Anio Mawu na'ola'a aroddi su wanua wuṛṛu su wal᷊en indi?’

MARKUS 15:29

Manga taumata apan sussabbi isudde mangke uapapa'ilingnga wuṛṛu manggal᷊usa'a Mawu Yesus. I mangitou nabbisara, “Ei, I'o apan manggohakku Wal᷊en Ruata wuṛṛu mapaarisikka sulal᷊ummu tallu allo.

YESAYA 37:22

Mawu nabbisara, “Soan Yerusalem lullage wuṛṛu mallobbossa si'o, Sanherib!

YEHEZKIEL 12:19

Pasingkata'e su anambon balahanna apa apan i Ya'u, Mawu Apan Atanggaṛṛanne nabbisara su tumana'u Yerusalem apan ta'e uatana'a su leta'i mangitou. I mangitou sarun mangiladda sutempo umanna wuṛṛu mangngindon atata'utta sutempo ma'inumma. Leta'i mangitou sarun mabbal᷊i maṛṛasa, ana waugu anambon taumata apan uatana'a isudde sidutu lullawangnga tita.

YEHEZKIEL 6:14

Ore, i Ya'u sarun mamaten lima-U wuṛṛu makkimunsa'a wanua mangitou, ma'oman sara maola'a mal᷊annaba, manattakka wuassu Wadda'u Timukka maddatingngu soa Ribla su sawannakka. Wuassu manga tampa apan wawanuannu taumatan Israel, taweddu saran sambau apan iapaasal᷊amatta. Ne anambon taumata masingkatte manungku ete i Ya'u Mawu.”

YEREMIA 9:11

Mawu nabbisara, “Yerusalem Ta'u olaanna napapussa'a tampa pa'imbuniannu asun ahuranganna. Manga soan Yehuda sarun mabbal᷊i mal᷊annabba, tampa apan tate lai atanaanna.”

YESAYA 6:11

I ya'u naiwal᷊o, “Pira al᷊annune olangnge sarun iapaamatta, Mawu?” I Tou sinumimbakka, “Ma'oman sara manga soa mahohakka abbi sara tate tumatanangnge, manga wal᷊en tate atanaanna lai, wuṛṛu leta'a naola'a tawe loṛṛone wuṛṛu lol᷊okke,

DARALO 44:14

I'o na'ola'a si yami aal᷊uandahannu manga al᷊indonganna i mangitou mallobbosa wuṛṛu lullaggen kami.

TAHIUL᷊E 29:23

Manga wawail᷊annu sarun maola'a wadda'a lol᷊okka tataapannu belerangnga wuṛṛu asimma. Letangnge tate asuananna wuṛṛu manga ahuranganna maddirite tumuwo isudde. Wanuanu sarun maola'a ere manga soa Sodom wuṛṛu Gomora, Adma wuṛṛu Zeboim apan nihohakku Mawu su tempo i Tou mangke nasa'u.

TAHIUL᷊E 28:59

Mawu sarun mandanta si yamiu wuṛṛu papapulunnu manga radda'a apan tawe mapia wuṛṛu manga riwutta apan masahadda pangundamanne.

IMAMATTA 26:43

Arawe leta'a udde ṛinone iapasal᷊iu asuene tumanange, tadea'u atonna-tonna maaillol᷊o. Wuṛṛu al᷊aṛana-U sarun maapendamma anambon ṛuumanna apan Ta'u iaparanta si mangitou ana waugu maddiri tumuṛutta manga atoranna wuṛṛu manga parenta-U.

IMAMATTA 26:32

Wanuanu sarun Ta'u ṛimunsaanna atonna, na'oman sara manga seetta apan matana'a ṛumindu'a maasilo ahewallu asasilaka udde.

DARALO 109:25

Manga taumata apan naasilo si ya'u mallobbossa si ya'u lapiddu uapapa'ilingu pua.

YEREMIA 42:18

Su ereapa i Ya'u, Mawu Ruatan Israel napasabbangngu asasa'u wuṛṛu araṛṛagi-U su tumana'u Yerusalem, aroddi lai Ya'u mapasabbangngu araṛṛagi-Ku si yamiu apan inai watukku Mesir. Taumata sarun marantinna maasilo si yamiu; i yamiu sarun heloanna, wuṛṛu arannu tate ipaatta maola'a wawontoga. I yamiu tate maasilo apia leta'a niariaddiannu indi.”

YEREMIA 44:12

Wuṛṛu amungkangngu wuassu taumatan Yehuda apan nallambe piaddu mappulu inai watukku Mesir wuṛṛu matana'a poiaroddi, i mangitou sarun mate abbi. I mangitou sarangkanambone, wahewalla addio'a, sarun nate su Mesir sulal᷊ummu pangalo ara'e ana waugu ṛutumma. Taumata sarun maapendamma atata'utta maasilo si mangitou wuṛṛu sarun mallobbossa si mangitou. Aranni mangitou sarun ipaatta maola'a wawontoga.

YEREMIA 48:27

Wal᷊inewe dorone taumatan Israel buatte nilaggen taumata Moab wuṛṛu ipaggahatto ereola'u i mangitou niasametta suadio'a ringannu manga taṛṛa ta'o?

YEREMIA 49:17

Mawu nabbisara, “Asasilaka apan naṛṛia'a su Edom sarun aroddi ahewalle na'oman sara suapan taumata apan umamatta isudde sarun ṛumindu'a wuṛṛu mata'utta.

LAL᷊ALLU 1:12

“Ei manga taumata apan niumamatta su lal᷊anna, pa'ellege wuṛṛu panutukke! Piawe asasusa apan ahewalle ere papasannanangku orassa indi, asasusa apan niṛṛia'u Mawu si ya'u, ana waugu asasa'u-Ne apan tumatine nilumambalanna udde?

YEHEZKIEL 27:36

I'o nawul᷊i tawe baddi'a saran mal᷊annu-l᷊annu. Manga mabbawal᷊u'a su ahewallu runia nabbal᷊i niṛṛumindu'a ana waugu matta'utta sarun aṛṛiannu pal᷊addu wiakka ereudde.”

2 TAWARIKH 29:8

Ana see Mawu sulal᷊ummu asasa'u-Ne nakkuumannu taumatan Yehuda wuṛṛu Yerusalem. Wuṛṛu i yamiu sarangkanambone masingkatta aroddi inolaannu Mawu maaṛindu'a wuṛṛu maata'utta.

YEREMIA 29:18

I mangitou sarun Ta'u enggenanna ringannu pangalo, ṛutumma, wuṛṛu al᷊aṛṛusa'itta ma'oman sara al᷊awo'u walahanna su ahewallu runia sarun maapendamma atata'utta maasilo ola'i mangitou. Sauapan tampa i Ya'u manal᷊iawukki mangitou, taumata sarun maapendamma atata'utta maasilo apa apan buatte nariaddi si mangitou. I mangitou sarun al᷊uandahanna, wuṛṛu aranni mangitou ipaatta maola'a wawontoga.

YEREMIA 51:37

Wanua udde sarun maola'a wil᷊alanna, tampa pa'imbuniannu asun ahuranganna. Taumata matta'utta maasilo udde, wuṛṛu tawe saran sangkatou apan mappulu matana'a poiaroddi.

YEREMIA 51:43

Manga soane nabbal᷊i tampa apan maata'utta, ere wadda'u anne apan maṛṛasa. Tawe taumata apan mappulu matana'a ara'e sumabbi isudde.