YEREMIA 17:4 - WUKE SUSI WATTI'U AL᷊AL᷊USASSA

⁴ I yamiu sarun ipabbawata'a manantillu leta'a apan buatte Ta'u nionggolla si yamiu, wuṛṛu i Ya'u sarun ma'ola'a si yamiu mattaṛṛamawu su seennu su wanua apan mangke awaganannu. I Ya'u na'ola'a sarangkanambone udde ana waugu asasa'u-U sinumopate ere putungnga apan lukkenggamma tawe iapaddumma.”

YEREMIA 17:4 Referans Kwoze

YEREMIA 15:14

Su wanua waine apan awagananni mangitou, i Ya'u sarun ma'ola'a si mangitou allangngu manga seetti mangitou, ana waugu asasa'u-Ku nilumambalante ere putungnga sussal᷊oi wuṛṛu tawe iapaddumma.”

LAL᷊ALLU 5:2

Pussa'an kami nanawote su liman taumata waine, manga wal᷊en kami niatanaannu taumata lo'a.

YEREMIA 7:20

I Ya'u, Mawu Apan Atanggaṛṛanne, sarun mangema'u asasa'u-U apan bahewalla su wal᷊en patataṛṛamawuanna indi, su taumata wuṛṛu su winatangnga, see lai su manga aaluanna wuṛṛu hessin bawail᷊anna. Asasa'u-U sarun ṛumenggamma ere putungnga apan tawe iapaddumma.”

YESAYA 5:25

Mawu nasa'u su pabbawala-Ge. I Tou nariahite makkuumanni mangitou. Manga wowone sarun umio'a; manga winal᷊unanna uatal᷊eṛṛonga naal᷊ihidda sapadda su manga lal᷊anna. Arawe Mawu ta'e massa'u wuṛṛu sidutu sarun makkuumanna.

YEREMIA 16:13

Ana waugu udde, i yamiu sarun Ta'u limbuaṛṛanna wuassu wanua indi wuṛṛu Ta'u iramme su sambau wanua apan awagananni yamiu wuṛṛu al᷊amonanu. Poiaroddi i yamiu sarun mattaṛṛamawu allo ṛabbi su manga mawu waine, wuṛṛu i Ya'u tate umakkanni yamiu. ’ ”

YESAYA 14:3

Mawu sarun mamallossu taumatan Israel wuassu atataddu'a wuṛṛu asasusane, wuṛṛu wuassu manara mawakkatta apan iwabbata'a si tou.

YEHEZKIEL 21:31

I Ya'u sarun mapassabbangu asasa'u-U apan lukkenggamma si yamiu. Wuṛṛu i yamiu sarun Ta'u itantilla su manga taumata apan maṛṛagissa wuṛṛu nal᷊atite mammate.

LAL᷊ALLU 1:12

“Ei manga taumata apan niumamatta su lal᷊anna, pa'ellege wuṛṛu panutukke! Piawe asasusa apan ahewalle ere papasannanangku orassa indi, asasusa apan niṛṛia'u Mawu si ya'u, ana waugu asasa'u-Ne apan tumatine nilumambalanna udde?

YEREMIA 12:7

Mawu nabbisara, “Tampa atatanaang-Ku tate lai iṛṛingi-U, wanua apan maola'a pussa'a-U buatte nitantang-Ku, wuṛṛu uma-U apan arangnguang-Ku buatte Ta'u nitantilla su lima manga seenne.

YEREMIA 5:29

Arawe, i Ya'u, Mawu, sarun makkuumanni mangitou ana waugu sarangkanambone udde; i Ya'u sarun mabbal᷊issa manga inolaannu walahanna indi.

YESAYA 66:24

Sutempo umamatte, i mangitou sarun maasilo winal᷊unannu manga taumata apan buatte nilumawangnga si Ya'u. Ul᷊idda apan u'inassa winal᷊unanni mangitou sarun tawe mate, wuṛṛu putungnga apan mannoṛṛobba si mangitou tawe mappadumma; sambau inolaanna aellehanna apan maata'utta su anambon taumata.”

YESAYA 30:33

Ro'en dorone buatte niriahi tampa panutunganna si ratun Asyur. Tampa udde mal᷊al᷊umma wuṛṛu mal᷊alakka, loṛṛone alum putungnga apan ua'ombo. Mawu sarun makkenggamma ringannu maniuppu singangu-Ne apan naal᷊ihidda sal᷊ukku belerangnga.

NEHEMIA 9:28

Arawe napawe wanuane matammudde apia, i mangitou na'ola'e rosa apia. Ne I'o nanantilli mangitou lai su seetta apan mangngallangnga si mangitou. Arawe, sutempo i mangitou maatutukka wuṛṛu sumassilla, i mangitou sumal᷊ande Si'o maddorongnga iapasal᷊amatta. Ne wuassu surga I'o naddaringikka, wuṛṛu masokka-sokka I'o nantul᷊ungnga, ana waugu I'o tuttal᷊antuppi mangitou wuṛṛu lembon marangngu.

2 MARARATU 25:21

su wageangu leta'u Hamat. Poiaroddi i mangitou nisansara wua'udde nipate. Etearoddi manga taumatan Yehuda niṛoota wuassu wanuan mangitou wuṛṛu niapidda watukku leta'a pamamuanganna.

1 MARARATU 9:7

ne i Ya'u sarun mallimbuakka uma-U wuassu wanua apan buatte Ta'u nionggolla si mangitou. I Ya'u lai sarun manantangngu wal᷊en indi apan buatte Ta'u nitantunna maola'a tampa patataṛṛamawuanna si Ya'u. Suapan tampa taumatan Israel sarun lobbosanna wuṛṛu ilallage.

TAHIUL᷊E 28:25

Amungkangngu i yamiu tawe maddaringikka Mawu Ruatanu, i Tou sarun ma'ola'a si yamiu mawaddo su manga seennu. I yamiu sarun mamangalo ringannu uaatokka arawe tumal᷊angnga ringannu uasongkakka. Anambon balahannu su runia sarun maapendamma atata'utta maasilo asasusanu.

YEREMIA 2:14

“Israel wal᷊ine allangnga, wal᷊ine lai papapulunnu manga allangnga. Arawe anio i tou nabbal᷊ite wiakku seenne?

YEREMIA 18:23

Arawe I'o, Mawu, masingkattu sarangkanambone apan ihagol᷊agi mangitou ipanginsue niawa'u. Ana waugu udde, arie mangampungnga si mangitou; arie pamappassa pasasal᷊a mangitou. Puulle i mangitou ma'oman sara manawo. Pandonate si mangitou sulal᷊ummu asasa'u-Nu.”

YEREMIA 22:28

I ya'u Yeremia nabbisara, “Apa i Ratu Yoyakhin buatte naola'a ere urinna napesangnga apan niramme wuṛṛu ipa'adirite lai? Ana waugu udde i tou wuṛṛu manga anangnge nilimbuaṛṛanna wuṛṛu niramme su wanua apan awagananni mangitou?”

YESAYA 50:11

Ei i yamiu apan mappandumma manilaka taumata waine, i yamiu sarun pateannu ṛiinni yamiu sassane. Ete Mawu apan ma'ola'a udde matipussa, i yamiu sarun sansaranna ringannu mawakkatta.

YEREMIA 5:19

Arawe amungkangngu i mangitou maiwal᷊o anio i Ya'u na'ola'a sarangkanambone udde su saruanni mangitou, wal᷊oa'e ei Yeremia, manungku ereapa i Ya'u buatte tinantangngi mangitou su wanua mangitou sassane huna mattaṛṛamawu manga mongannu walahanna waine, aroddi lai i mangitou sarun maola'a allangngu manga taumata raho su wanua waine.”

YEHEZKIEL 7:24

Manga walahanna apan aṛṛagisanne sarun Ta'u iaparanta iapaatana'a su manga wal᷊enu. Manga taumata awaṛṛanianne apan atohasanne sarun mangindo napawe manga walahanna udde Ta'u iwala manggohakka manga tampa patataṛṛamawuannu.