YEREMIA 17:10 - WUKE SUSI WATTI'U AL᷊AL᷊USASSA

¹⁰ I Ya'u, Mawu, mannaṛṛassidda naungnga, naungngu taumata Ta'u i uji. Suapan taumata sarun Ta'u wal᷊isanna tumuṛṛuttu pallal᷊agune, wuṛṛu Ta'u olaanna uasul᷊ungngu inolaanne.”

YEREMIA 17:10 Referans Kwoze

1 SAMUEL 16:7

Arawe Mawu nabbisara si Samuel, “Arie i'o umanggangu al᷊aṛṛamage wuṛṛu wadangnge mal᷊angkassa; wal᷊ine i tou Ta'u pileanna. I Ya'u tawe ma'ellega wa'ikke, arawe i Ya'u ma'ellega naungnge.”

ROMA 8:27

Ne Ruata, apan masingkatu lal᷊oṛṛo naungngu taumata, maasunna apulun Ghaṛṛaho udde; ana waugu Ghaṛṛaho udde sussal᷊ande Ruata hunan al᷊aṛṛana'u Ruata wuṛṛu nassul᷊ungngu apulun Duata.

SONDAPPA 2:23

Manga mallal᷊aṛṛenggenne sarun Ta'u pateanna lai tadea'u anambon jamaatta maatutukka manungku ete i Ya'u, i Tou apan masingkatu ṛingiranna wuṛṛu naungngu taumata. I yamiu sarun Ta'u wal᷊isanna tumuṛṛuttu inolaannu sangkatou-sangkatou.

YEREMIA 11:20

Ana see i ya'u inumal᷊iomanna, “Oh Mawu Apan Lembontaṛṛino, I'o mallaṛṛuungnga apan matul᷊idda; ete I'o apan masingkattu ṛingidda wuṛṛu naungngu taumata. Hatto'u indi ta'u itantilla Si'o. Doronganna i ya'u wotongnge maasilo Si'o mabbal᷊issa inolaannu manga taumata udde.”

YEREMIA 32:19

Manga ṛiin-Nu tawe sul᷊ungnge, wuṛṛu manga inolaannu maatiangnga; I'o maasilo al᷊awo'a apan a'olaanu taumata, wuṛṛu mabbal᷊issa si mangitou uasul᷊ungngu inolaanni mangitou.

YEREMIA 20:12

Arawe, oh Mawu Apan Lembontaṛṛino, ringannu atatul᷊idda I'o nanal᷊u'atta taumata; I'o masingkattu naungnga wuṛṛu ṛingiranni mangitou. Ana waugu udde walaawe i ya'u ma'ellega Si'o mabbal᷊issa al᷊al᷊eon seetta ana waugu tumba'u Si'o ta'u itantilla hatto'u.

1 TAWARIKH 28:9

Ana see si Salomo, i Daud nabbisara, “Ana'u, ṛinone Ruata apan sassubbannu iamangngu, a'uannu lai maola'a Ruatanu. I'o ṛinone mangngimanna si Tou ringannu mal᷊uassa wuṛṛu awawiran naungnga. Ana waugu i Tou masingkatta anambon ṛingiranna wuṛṛu apulun naungngi ite. Amungkangu i'o maddea'a si Tou, i Tou sarun asombangannu, arawe amungkangu i'o manantangngi Tou, i Tou saran manantangngu saran mal᷊annu-l᷊annu.

SONDAPPA 22:12

“Panutukke indi” wisara Mawu Yesus, “Tate mal᷊annu lai I ya'u sarun rumanta ringannu uaapiddu lal᷊antakke ipabbal᷊issa al᷊awo'u taumata tumuṛṛuttu inolaannu sambau-sambau.

MATIUS 16:27

Tate mal᷊annu lai Ana'u Taumata, su sampunna ringannu manga mala'ekanNe, sarun dumanta ringannu taṛṛinon IamangNge. Su tempo udde i Tou sarun mabbal᷊issa manga taumata tumuṛṛuttu inolaannu sangkatou-sangkatou.

DARALO 62:12

Paapirate i ya'u naaringikka Ruata mabbisara manungku taṛṛino darantane wuassi Tou,

AMSAL 17:3

Wul᷊awanna wuṛṛu sal᷊a'a iannamma su auntupanna, arawe naungngu taumata iannammu Mawu.

SONDAPPA 20:12

Wuṛṛu i ya'u naasilo manga taumata nate, timmade dario'a, uarisikka su saruannu adderan araratuanna udde. Ne manga wuke niwu'ate. See sambau wuke apan baine niwu'ate, eteudde Wuken Taumata Wiakka. Wua'udde ṛuumanna niema'a su taumata nate, uasul᷊ungngu pallal᷊agune tumuṛṛuttu apan uawoṛṛetta sulal᷊ummu manga wuke udde.

2 TAWARIKH 6:30

antimanna I'o sulal᷊ummu atatanaan-Nu su surga maddaringikka lapiddu mangampungnga si mangitou. Tumba'u I'o masingkattu lal᷊ummu naungngu taumata. Ana waugu udde ṛuumana'e suapan taumata tumuṛṛuttu manga inolaanne,

YOHANES 2:25

Taumata salaiwe tate manal᷊a'a si Tou su ola'u isai-sai, ana waugu i Tou sassane masingkatta apa apan uataṛṛo su naungngu taumata.

YEREMIA 21:14

arawe i Ya'u sarun makkuumannu ana waugu inolaannu. Wal᷊en araratuannu sarun Ta'u soṛṛowanna, wuṛṛu al᷊awo'a maranine sarun masoṛṛobba lai. I Ya'u, Mawu, buatte nabbisara.”

DARALO 7:9

I'o makkungngu umattu taumata; i ya'u onggol᷊eten atatul᷊idda, oh Mawu, ana waugu i ya'u tawe sal᷊ane.

ROMA 6:21

Su tempo udde auntunganna apa apan nisengkammi yamiu wuassu manga inolaanna apan orassa indi maasili si yamiu amungkangngu olaanna? Manga inolaanna udde tumba'u mangapidda su papate!

1 TAWARIKH 29:17

I ya'u masingkatta I'o mannal᷊u'atta naungngu taumata wuṛṛu maapulun taumata apan naungnge waresi. Ringannu asasaṛṛionto'a wuṛṛu al᷊al᷊uassu naungnga sarangkanambone indi ta'u ionggolla Si'o. I ya'u buatte na'ellega ereapa al᷊aṛṛanang-Ngu apan uasemodda isindi uaapiddu aonggolli mangitou Si'o ringannu al᷊al᷊uassu naungnga.

MIKHA 7:13

Arawe runia sarun mabbal᷊i lol᷊okka ana waugu al᷊al᷊eon tumanangnge.

MATIUS 6:4

Wala'e pallal᷊agunu udde tawe asingkatannu taumata, tumba'u Iamangngu su surga. I tou ma'asilo pallal᷊agunu apan uawuni udde wuṛṛu sarun mangonggolu lal᷊antakke si yamiu.”

WATTI'U MANGA RASUL 1:24

See i mangitou inumal᷊iomanna. I mangitou nabbisara, “Mawu, I'o masingkattu naungngu awadaalla. Yudas suete niaddo wuassu manarane sangkatou rasul wuṛṛu see natete. Nariaddi pantingira'a si yami isai wuassu wallattu ruang katou indi apan pileannu Mawu onggol᷊annu manara ipallol᷊ossa si Yudas.”

1 MARARATU 8:39

antimanna I'o wuassu atatanaan-Nu su surga maddaringikka see mangampungnga wuṛṛu mantul᷊ungngi mangitou. Tumba'u I'o apan masingkattu lal᷊ummu manga inolaanne,

DARALO 44:21

Unnu wisara i yami tate lai massubba Ruata, ewe'e u'al᷊iomante su mawu waine,

MANNANASE 9:3

Nariaddi, pal᷊addu pabbiaṛṛanna apan uasul᷊ungnga lai sarun maṛṛia'a si mangitou sarangkanambone. Wuṛṛu udde sambau inolaanna apan maasusa ere lai al᷊awo'u arariaddianna su runia. Su al᷊o'engngu pabbiaṛṛanne naungngu taumata napenen al᷊al᷊eo, wuṛṛu ṛingiranne lai napenen awawoddo. Ana see inaṛṛombanganne i tou naasomba papatene.

YESAYA 59:18

I tou nabbal᷊issa manga seen-Ne uasul᷊ungngu inolaanni mangitou. Ewe'e lai manga araratuanna su manga taṛṛanusa apan marau tawe mal᷊iudda wuassu ṛuuman-Ne.

YEREMIA 12:13

Walahang-Ku mangngasi'u ganduma, arawe ete ṛoa'a apan niitingnga. I mangitou mattinsahadda arawe sahadde udde tawe gessine. I Ya'u tumaniten nasa'u na'oman sara pangitinganni mangitou tawe loṛṛone.”

YEHEZKIEL 11:5

Wua'udde Ghaṛṛahon Mawu nangooppa si ya'u, wuṛṛu i ya'u nirolokku Mawu iapawisara su taumatan Israel, “Ei walahannu Israel, i Ya'u masingkatta apa apan iwabbisaran kamiu wuṛṛu ihaagolagi yamiu.

YEHEZKIEL 14:5

Anambon paal᷊uanna udde buatte napaaraun uma-Ku wua dingang-Ku, arawe antimanna ringannu sasimba-Ku udde uma-U sarun mabbelengnga ringang-Ku.’

AYUB 34:11

I Tou manggesekka taumata uasul᷊ungngu inolaanne, makkungnga si tou uasul᷊ungngu pallal᷊aghune.

DARALO 7:10

Illol᷊oa'e al᷊al᷊eon taumata mal᷊awanga wuṛṛu tohasse naungngu taumata mapia, ana waugu I'o Ruata apan matul᷊idda, apan masingkattu naunga wuṛṛu ṛingirannu taumata.

DARALO 44:22

Ruata sarun maasingkata, ana waugu i Tou maatutukka addapingu naungngi yami.

AMSAL 12:14

Suapan taumata maasomba lal᷊antakku manga wisara wuṛṛu inolaanne; sangkatou-sangkatou onggol᷊annu wawal᷊inne ere buatte niolangnge.