YEREMIA 16:19 - WUKE SUSI WATTI'U AL᷊AL᷊USASSA

¹⁹ Mawu, ete I'o apan ual᷊u'adda si ya'u wuṛṛu nangonggollu atatohassa si ya'u; I'o nantul᷊ungku sutempon asasusa. Manga walahanna wuassu pentakku runia sarun dumanta ringan-Nu wuṛṛu mabbisara, “Al᷊amonan kami tumba'u pia mawu awusu apan mangke tawe gunane.

YEREMIA 16:19 Referans Kwoze

YESAYA 25:4

Ana waugu I'o nabbal᷊i tatal᷊angannu taumata lome, tampa apan mal᷊annabba su taumata asiangnga sulal᷊ummu asasusa. Ete I'o pattilindumanna su anginna al᷊isusu, pattillummanna su paddissa masal᷊ihangnga. Ana waugu taumata maṛṛagissa namangalo naal᷊ihidda anginna al᷊isusu sutempo mangnguranna

NAHUM 1:7

Mawu udde mapia, i Tou uasirungnga uman-Ne sutempo i mangitou susa, i Tou uariaga taumata apan uasirungnga si Tou.

YEREMIA 17:17

Ariewe I'o maolaa maata'utta naungku. I'o tampan tatal᷊angangku sutempo rumanta asasusa.

1 PETRUS 1:18

I yamiu masingkata apa apan buatte nipamaekka tadea'u ipamallosi yamiu wuassu pabbiaṛṛanna apan tawe gunane apan tinantillu iupungngu al᷊amonanu. Bawaekke wal᷊inewe saranapa apan wotongnge mawulle ere inai sal᷊a'a ara'e wul᷊awanna,

YEREMIA 10:5

Manga paal᷊uanna sassubbanna udde naal᷊ihidda saṛṛen taumata su waillu katimu. I mangitou tawe maawisara, wuṛṛu tawe maal᷊empangnga, wuṛṛu ṛinone a'bengketanna. Arie mata'utti mangitou, ana waugu i mangitou tawe ma'ola'a al᷊al᷊eo si yamiu; ma'ola'a apapia lai i mangitou tawe maaola'a.”

YEREMIA 2:11

Taambe saran paassa nariaddi sambau walahanna nanu'addu mawune salaiwe udde wal᷊ine Ruata apan atonna. Arawe uma-U buatte nanal᷊iu-U, apan ma'aluassa si mangitou ringannu sambau saranapa apan tawe maaola'a apa-apa.

YESAYA 44:10

Tawe gunane mallanginnu paal᷊uanna iwoso wuṛṛu masubba si tou naola'a monganna!

DARALO 86:9

Anambon walahanna apan niolang-Ngu sarun rumanta, oh Mawu, tadea'u massubba Si'o wuṛṛu maddalo awawantu-Gu.

MALEAKHI 1:11

I Ya'u aaddatannu manga walahanna su ahewallu runia. Suapan tampa itattambunna amania iapangaddatta arang-Ku wuṛṛu nionggolla manga sasamba apan suṛṛinone, ana waugu anambon balahanna mangngaddatta si Ya'u!

ZAKARIA 2:11

Sutempo udde manambo walahanna sarun dumanta ringannu Mawu tadea'u maola'a uman-Ne. I Tou sarun matana'a suwallatti yamiu, wuṛṛu i yamiu sarun maasingkatta manungku Mawu buatte nandolo'u ringanni yamiu.

HABAKUK 3:19

I'o nangonggollu atatohassa si ya'u ere leddan rusa, ledda'u nitohan-Nu. I'o mangngehetta si ya'u tadea'u matammudda sutempo umamatta su panenteanna.

YEHEZKIEL 11:16

Ana waugu udde, wal᷊oa'e tanata-U indi su manga hawenu sulal᷊ummu pamamuanganna, manungku ete i Ya'u apan mangapiddi mangitou marau-rau wuassu wallattu manga walahanna wuṛṛu manal᷊iawukki mangitou su manga wanua udde. Arawe tantal᷊anna i mangitou poiaroddi, i ya'u sarun uarundinganna si mangitou.

YESAYA 49:6

Mawu nabbisara si ya'u, “Manara apan ahewal᷊anne uaṛṛaddo si'o, ei allang-Ku; i'o tawe tumba'u mapaapul᷊en tantangngu papapulunni Yakub wuṛṛu mamelengngu awawantugu manga ṛuangannu Israel, arawe Ta'u niola'a lai asasemakku manga walahanna, tadea'u ahewallu runia iapaasal᷊amatta.”

DARALO 62:2

Ringannu matammuda niawa'u uaṛṛaddo Ruata, tumba'u wuassi Tou sassane asasal᷊ama'u.

SONDAPPA 11:15

See mala'ekatta appitune nattiuppe trompeti tou, ne su surga niaṛṛingiṛṛante manga tingikka ma'ikkatta apan mabbisara, “Taṛṛino ipamarenta runia orassa indi sulal᷊ummu lima Mawung kite wuṛṛu Ratum Punnu Sal᷊amatta apan suete pina'ire-Ne. I Tou sarun mamarenta saran mal᷊annu-l᷊annu!”

YEREMIA 3:23

Mangke suadio'a i yami mangngelekka massubba paal᷊uanna su manga puiddu wowone! Aontolla su Israel tumba'u darantane wuassu Mawu Ruatang kami.

YESAYA 62:2

Ei Yerusalem, manga walahanna naasilote auntungannu, manga ratu ua'ellegga awawantugu. I'o sarun isaggo ringannu aranna wakku, Mawu sassane apan mangonggollu aranna udde.

YESAYA 32:2

I mangitou sangkatou-sangkatou naal᷊ihidda tampa pattillummanna wuassu anginna wuṛṛu tandi'a. I mangitou ere sal᷊ukku apan mangngelekka su wadda'u anne, ere lumman batu wahewalla su leta'a maṛṛasa.

AMSAL 18:10

Mawu udde naal᷊ihidda menara apan matohassa; ete poiaroddi taumata matul᷊idda inai wuṛṛu maasomba tampa apan mal᷊angnganna.

DARALO 68:31

Limbuaṛṛete Mesir, winatangnga mal᷊aṛṛaga udde wuassu pattangngannu tiwo. Tagguete manga walahanna, ammul᷊annu bantenga udde ringannu al᷊aṛṛanangnge, apan ual᷊aṛinda tadea'u maasomba sal᷊a'a. Ruata nanal᷊iawukku manga walahanna apan apulune uapapangalo.

DARALO 62:7

Tumba'u i Tou ual᷊u'adda wuṛṛu nanal᷊amatta si ya'u; i Tou mananahe'u, i ya'u tawe umio'a.

DARALO 46:11

Wisara-Ne, “Pangillol᷊ote mapapangalo; asingkatawe, i Ya'u indi Ruata, i Ya'u mawantuga suwallatu manga walahanna, mawantuga su ahewallu runia.”

DARALO 46:7

Ruata nirumallu'a, ne runia naṛimunsa'a; manga walahanna nata'utta, manga araratuanna nanawo.

DARALO 46:1

Daralon ṛuanganni Korah. Su piaṛa'u mangangantari. Ringannu ronsin Alamot.

DARALO 27:5

Mawu ual᷊u'adda si ya'u sutempon asasusa; I Tou namuni'u sulal᷊ummu Wal᷊en-Ne, wuṛṛu namatunna si ya'u watukku wowon batu.

DARALO 19:14

Paarauaawe i ya'u wuassu rosa apan nipattatudda, ariewe pabbala'a i ya'u tataṛinoanne. Ne i ya'u naola'e tawe sangkulle, wuṛṛu nal᷊iute wuassu pasasal᷊a mawakkata.

ROMA 1:25

Ruata apan naṛṛino, nihantianni mangitou ringannu sarannapa awusu. Wal᷊ine mandariaddi ewe'e apan niriaddine udde sassubanna wuṛṛu a'imbeanni mangitou. Sumbal᷊i iapa nandiaddi udde apan ṛinone raloanna sarangkal᷊o'engnge! Amin.

1 MARARATU 20:23

Manga piaṛṛa'u tantaran Ratu Benhadad nabbisara si Benhadad, “Manga mawu sassubbannu walahannu Israel uataṛṛino su panenteanna, ana waugu udde i ite wotongnge iawaddon balahanna udde. Arawe i ite atonna sarun maawaddo si mangitou amungkangngu i ite mapapangalo su leta'a ratakke.

YESAYA 44:20

Inolaanna udde nassul᷊ungngu niumanna awu. Taumata udde nial᷊iwun ṛingiranne apan boddo, na'oman sara i tou tate iatul᷊ungnga lai. I tou tawe maapanga'u manungku paal᷊uanna apan su limane udde tumba'u wawahia.

YESAYA 45:14

Mawu nabbisara su Israel, “Tahuanete hessin leta'u Mesir wuṛṛu auntungannu Sudan. Manga taumatan Syeba apan waṛṛani mabbal᷊i pussa'anu; i mangitou u'amatta su liuddi yamiu ringannu laṛṛapusanna. I mangitou sarun massubba wuṛṛu manga'u, ‘Ruata atonna-tonna su pattangngannu; tawe mawu wal᷊ine tumba'u i Tou!

YEREMIA 2:8

Manga imam taweddu maiwal᷊o suapa i Ya'u, Mawune. Manga mallaṛṛuungnga lai wagga isai Ya'u, manga tembonanne lai lullawangnga si Ya'u. Ringannu arannu Baal manga nabi mabbisara, wuṛṛu massubba paal᷊uanna apan tawe gunane.”

YEREMIA 4:2

Amungkangngu i yamiu massalu ringannu arang-Ku wuṛṛu i yamiu mabbiakka su atatul᷊idda su apapia wuṛṛu atonna, ne anambon balahanna sarun sumal᷊ande si Ya'u tadea'u i Ya'u mangal᷊amatta si mangitou, wuṛṛu i mangitou sarun maddalo si Ya'u.”

YEREMIA 12:16

Amungkangngu i mangitou ringannu ahewallu naungnga mappulu manengkamma agaman uma-U wuṛṛu mappulu massalu ringannu mabbisara, ‘Riangannu arannu Mawu apan biakka,’ – ere lai dorone i mangitou mangngaṛṛa'a uma-U massalu ringannu aranni Baal – ne i mangitou lai sarun mareengnga uma-Ku wuṛṛu maola'a ala.

YEREMIA 33:9

Yerusalem sarun maola'a al᷊al᷊uassa wuṛṛu ilallala-U. Al᷊awo'u walahanna su runia sarun mata'utta wuṛṛu matal᷊o see mangaddatta si Ya'u, napawe maaringikka ola'u apapia apan Ta'u niola'a su tumana'u Yerusalem, wuṛṛu su ola'u lal᷊umanna'a apan Ta'u nionggolla su soa udde.”

YOEL 3:16

Mawu u'ui wuassu Sion, wowonen Tou; wuasu Yerusalem nirumallu'a tingik-Ke. Langitta wuṛṛu runia niumio'a ana waugu i Tou. Arawe Mawu sidutu sarun mannamba'a wuṛṛu manirungnga Israel, uman-Ne.

AMOS 2:4

Mawu nabbisara, “Taumatan Yehuda masokkate ma'ola rosa, ana waugu udde i Ya'u sarun makkuumanni mangitou. I mangitou nilumawangnga manga parenta-U wuṛṛu tawe maddaringika manga al᷊aṛṛa-U. I mangitou nilamamiṛṛannu manga mawu waine apan sassubbannu al᷊amonan mangitou.

DARALO 18:3

Mawu naal᷊ihidda tanda'a watu apan matohassa tampa i ya'u uatullindumma. Ruata'u naal᷊ihidda wowon batu tampa i ya'u uasirunga. Naal᷊ihidda allunga i Tou, uataappa si ya'u, wuṛṛu ual᷊u'adda si ya'u tadea'u sidutu mal᷊angnganna.

DARALO 65:3

Ana waugu ete I'o naddaringikka aal᷊iomanna; anambon taumata nirumanta ringan-Nu ana waugu narosate.

YEREMIA 10:3

Addatta inanaramannu manga walahanna udde atonna-tonna tawe gunane. I mangitou mannuwangnga alu su mahurangnge, wuṛṛu mandolokku manga wasen kalu nirolokka niapamanara mallanginnu paal᷊uanna sassubbanna.

YEREMIA 14:8

Ete I'o sassa pangantimannu Israel, apan manal᷊amatta si yami wuassu asasilaka. Arawe anio I'o ere Taumata raho su wanuang kami, ere uma'amatta apan tumba'u niumotongnga saṛṛabbi see manantangnga?