YEHEZKIEL 37:23 - WUKE SUSI WATTI'U AL᷊AL᷊USASSA

²³ I mangitou tate mandal᷊eo watanganni mangitou ringannu ma'ola'a rosa wuṛṛu massubba manga paal᷊uanna apan maarantinna. I Ya'u sarun mamallossi mangitou wuassu al᷊awo'u tal᷊engko apan naaola'a si mangitou nangal᷊uandaga si Ya'u. I Ya'u sarun mapaasusi mangitou; i mangitou sarun maola'a uma-U, wuṛṛu i Ya'u Ruatan mangitou.

YEHEZKIEL 37:23 Referans Kwoze

1 YOHANES 1:9

Arawe amungkangu i ite manga'u al᷊awo'u rosan kite su Ruata, i Tou sarun manipussa paaire-Ne wuṛṛu ma'ola'a atatul᷊idda. I Tou sarun mangampunga manga rosan kite wuṛṛu mangukkasa si ite wuassu al᷊awo'u al᷊al᷊eon kite.

SONDAPPA 21:7

Manga taumata apan naauntunga sarun manengkama manga wawal᷊issu inolaanne udde wuassia-U. I Ya'u sarun maola'a Ruatane, wuṛṛu i tou sarun maola'a ana-U.

1 YOHANES 1:7

Arawe amungkangu i ite mabbiakka sulal᷊ummu asasemakka ere lai Ruata sulal᷊ummu asasemakka, ne i ite mabbiakka uaaukka atonna, uasangkapia sangkatou ringannu waine, wuṛṛu ṛaṛṛan Mawu Yesus, Anang-Nge, namaresi si ite wuassu al᷊awo'u rosa.

HOSEA 14:8

I mangitou sarum mabbelengnga ringang-Ku wuṛṛu matana'a sulal᷊ummu lal᷊u'arang-Ku. Ringannu mal᷊ihakka i mangitou sarun aatambanna lal᷊umanangnge, naal᷊ihidda gandumma apan tinumuwo su wawail᷊anna apan masuwukka wuṛṛu naal᷊ihidda wawail᷊annu anggore. Naal᷊ihidda ua'en anggore Libanon aranni mangitou tinumelengnga.

ZAKARIA 14:21

Anambon awali su Yerusalem wuṛṛu su ahewallu Yehuda sarun iṛṛae maola'a pussa'an Mawu Apan Lembontaṛṛino. Tumanangnge apan mangonggollu sasamba sarun mappaattu awali udde pallahanna ṛemessu sasamba. Napawe tempo udde nio'omante, tate lai mabbawal᷊u'a su Wal᷊en Mawu Apan Lembontaṛṛino.

MIKHA 7:14

Oh Mawu, lu'arawe uman-Nu, umatta nipile-Nu. I mangitou uatana'a marau su mahurangnge, su pattangngannu leta'a apan masuwukka. Wala'ewe i mangitou maasomba anna su wadda'u nannal᷊on Basan wuṛṛu su Gilead ere sutempo dorone.

HOSEA 1:10

Walahannu Israel sarun maola'a anambone ere anne su tahal᷊oangnga, na'oman sara i tou tawe iauukka ara'e iareengnga. Orassa indi Ruata nabbisara si mangitou, “I yamiu wal᷊ine uma-U,” arawe sarun a'omanna tempone i Tou sarun mabbisara si mangitou, “Ete i Ya'u Ruata apan wiakka wuṛṛu i yamiu al᷊aṛṛana-U!”

YEHEZKIEL 39:22

Manattakka orassa udde taumatan Israel sarun maasingkatta manungku ete i Ya'u Mawu Ruata mangitou.

YEHEZKIEL 37:27

I Ya'u sarun manata'a suadio'a ringanni mangitou, i Ya'u sarun maola'a Ruata mangitou wuṛṛu i mangitou uma-U.

YEHEZKIEL 36:31

I yamiu sarun maanaungnga pallal᷊agunu apan dal᷊eo wuṛṛu inolaannu apan tawe suṛṛinone udde, ana see i yamiu mabbal᷊i mammuta batangannu sassane ana waugu manga rosa wuṛṛu al᷊al᷊eonu udde.

YEHEZKIEL 20:43

Poiaroddi i yamiu sarun maanaungnga anambon inolaanna apan maarantinna apan buatte naarosa watangannu. Ne i yamiu sarun maddantinna maanaungnga anambon arariadianna udde.

YEREMIA 31:33

Eteindi pa'aire wakku apan Ta'u niola'a ringannu umattu Israel: Manga tita-U sarun Ta'u iaddo sulal᷊ummu naungngi mangitou, wuṛṛu Ta'u iwoṛṛetta sulal᷊ummu ate mangitou. I Ya'u sarun maola'a Ruatan mangitou, wuṛṛu i mangitou sarun maola'a uma-U.

YEREMIA 31:1

Mawu nabbisara, “Sarun a'omanna tempone i ya'u maola'a Ruata anambon ṛuangannu Israel, wuṛṛu i mangitou mabbal᷊i uma-U.

YESAYA 2:18

Manga paal᷊uanna sarun mawul᷊i abbi-abbi.

DARALO 68:35

Panga'ute taṛinon Duata apan uaparenta su Israel, taṛino-Ne naddatingngu langitta.

DARALO 68:20

Paddalote Mawu, ana waugu ete i Tou Ruata apan nanal᷊amatta si ite; wuassu allo maddatingu allo i Tou uapasanna winabbawan kite.

ZAKARIA 13:9

Tumba'u sepeṛṛe tatallu apan masal᷊amatta. Wuṛṛu i mangitou sarun Ta'u iapaasusi ere taumata mannal᷊u'attu wul᷊awanna. Wua'udde i mangitou sarun umal᷊iomanna si Ya'u, wuṛṛu i Ya'u sarun sumimbakka si mangitou. I Ya'u sarun mabbisara si mangitou manungku i mangitou uddewe uma-Ku, wuṛṛu i mangitou lai sarun manga'u manungku ete i Ya'u Mawu Ruata mangitou.”

TITUS 2:14

I Tou suete nanantillu watangan-Ne ana waugu i ite wuṛṛu ana waugu mamallosi ite wuassu al᷊awo'u al᷊al᷊eo, wuṛṛu na'ola'a si ite sambau walahanna apan nal᷊iu wuassu al᷊awo'u rosa wuṛṛu tumba'u naola'a pussa'a-Ne sassane, wuṛṛu maṛṛimadda ma'ola'a apapia.

YEHEZKIEL 11:18

Napawe i mangitou mapul᷊ete, i mangitou sarun mandammen anambon paal᷊uanna apan dal᷊eo wuṛṛu ma'arantinna apan niasombanganni mangitou.

YEHEZKIEL 14:11

Sarangkanambone udde Ta'u olaanna tadea'u taumatan Israel tate mangindau-U wuṛṛu lai tate malluhudda watanganne ringannu rosa. Ringannu aroddi i mangitou sarun maola'a uma-U, wuṛṛu i Ya'u maola'a Ruata mangitou.” I Ya'u, Mawu Apan Atanggaṛṛanne buatte nabbisara.

YEHEZKIEL 11:20

Ne i mangitou sarun matuṛṛutta su manga atorang-Ku wuṛṛu mararingikka anambon parenta-U. I mangitou sarun maola'a uma-U wuṛṛu i Ya'u sarun maola'a Ruata mangitou.