YEHEZKIEL 14:6 - WUKE SUSI WATTI'U AL᷊AL᷊USASSA

⁶ Pasingkata'a lai su taumatan Israel manungku i Ya'u, Mawu Apan Atanggaṛṛanne nabbisara si mangitou, ‘Awal᷊ute wuassu manga rosanu, wuṛṛu tantanga'e manga paal᷊uannu apan ma'amuta udde.’

YEHEZKIEL 14:6 Referans Kwoze

YEHEZKIEL 18:30

Mawu Apan Atanggaṛṛanne nabbisara, “Ei manga taumatan Israel, i Ya'u sarun makkuungngu suapan taumata uasul᷊ungngu inolaanne. Awal᷊ute wuassu manga rosanu. Arie pabbala'a rosanu makkimunsa'a watangannu.

YESAYA 30:22

Manga paal᷊uanna sassubbannu apan aoosannu sal᷊a'a wuṛṛu wul᷊awanna sarun irammen kami naal᷊ihidda sapadda, lapiddu mabbisara, “Paaraute wua dingangku!”

ROMA 6:21

Su tempo udde auntunganna apa apan nisengkammi yamiu wuassu manga inolaanna apan orassa indi maasili si yamiu amungkangngu olaanna? Manga inolaanna udde tumba'u mangapidda su papate!

HOSEA 14:8

I mangitou sarum mabbelengnga ringang-Ku wuṛṛu matana'a sulal᷊ummu lal᷊u'arang-Ku. Ringannu mal᷊ihakka i mangitou sarun aatambanna lal᷊umanangnge, naal᷊ihidda gandumma apan tinumuwo su wawail᷊anna apan masuwukka wuṛṛu naal᷊ihidda wawail᷊annu anggore. Naal᷊ihidda ua'en anggore Libanon aranni mangitou tinumelengnga.

YEHEZKIEL 14:4

Ana waugu udde, wal᷊oa'e si mangitou manungku i Ya'u, Mawu Apan Atanggaṛṛanne nannanata arendi, ‘Suapan taumatan Israel apan buatte nanantillu watanganne su paal᷊uanna wuṛṛu namala batanganne manawo sulal᷊ummu rosa, ana see rumanta maddorongnga tatantiro su sangkatou nabi, sarun Ta'u simbaṛṛanna sassane ringannu sasimbakke apan suṛṛinone su manga paal᷊uanne apan manambo udde!

1 SAMUEL 7:3

Ana see i Samuel nabbisarate walahannu Israel, “Amungkangu i yamiu mabelengnga ringannu Mawu wuṛṛu massubba si Tou ringannu ahewallu naungngu, ṛinone i yamiu mandammen anambon monganna wakku, wuṛṛu paal᷊uanni Dewi Asytoret. Tantil᷊a'e watangannu sarangkanambone udde su Mawu wuṛṛu tumba'u pattaṛṛamawu si Tou sassane, ne i yamiu sarun ipallossu Mawu wuassu taṛṛinon taumatan Filistin.”

WATTI'U MANGA RASUL 26:20

Ringannu uahahatti ya'u namasingkatta su manga taumata manungku i mangitou ṛinone mawal᷊u wuassu manga rosa mangitou, wuṛṛu manantillu wadangngi mangitou su Ruata see lumiatta'a sulal᷊ummu wiakki mangitou manungku i mangitou nawal᷊ute wuassu manga rosa mangitou. I ya'u namasingkattu watti'a udde paarorone su Damsyik, wua'udde su Yerusalem wuṛṛu su ahewallu Yudea wuṛṛu su wallattu manga taumata apan wal᷊ine Yahudi.

WATTI'U MANGA RASUL 17:30

Tempon awawodong kite suete tinimbul᷊ianannu Ruata, arawe orassa indi i Tou nandolokku taumata su ahewallu runia tadea'u mawal᷊u wuassu manga rosa mangitou.

WATTI'U MANGA RASUL 3:19

Ana waugu udde manga tuṛṛangnga, awal᷊ute wuassu manga rosanu wuṛṛu pabelengke ringannu Ruata tadea'u i Tou mamapassa manga rosanu.

ZEFANYA 3:11

Sutempo udde, ei uma-U, i yamiu ariete paasili lai ana waugu buatte nilumawangnga si Ya'u. I Ya'u sarun mallimbuakka suapan taumata mawunga wuṛṛu matanggakka, wuṛṛu i yamiu tate lumawangnga apia si Ya'u su wui-U apan susi.

YEHEZKIEL 16:63

I Ya'u sarun mangampunga al᷊awo'u pasasal᷊anu, arawe i'o tawe maabul᷊ine wuṛṛu i'o sarun maapendamma asasili amungkangu mabbisara manga apa. I Ya'u Mawu Apan Atanggaṛṛanne buatte nabbisara.”

YEHEZKIEL 8:16

I ya'u niapid-De watukku rallakka sulal᷊ummu Wal᷊en Mawu. Marani ngara sasuttanna watukku wabbo'a susi, suwallattu mezbah wuṛṛu lal᷊anna, pia duan pul᷊o l᷊ima su atoune taumata. I mangitou uatal᷊iudda wabbo'a na'ukkassa, wuṛṛu ual᷊intudda watukku ra'i massubba matannallo sumabbangnga.

YEREMIA 13:27

I Ya'u buatte naasilo si yamiu ma'ola'a manga apa apan iaaranting-Ku. I Ya'u naasilote si yamiu mangngenggenna manga nawu waine su wuidda wuṛṛu su wawail᷊anna, ere sangkatou esakka mabbewan awingngu taumata waine ara'e ere awal᷊o esakka mabbewan awal᷊o wawine. Tumana'u Yerusalem, nasilakate i yamiu! Tingngera i yamiu mapallossa wuassu al᷊al᷊eo?”

2 TAWARIKH 29:6

Al᷊amonan kite mal᷊awangnga Mawu Ruatan kite wuṛṛu inolaanni mangitou tawe maal᷊uassa naungngu Mawu. I mangitou tawe maddaringikka si Tou wuṛṛu tawe manaile tampa atatanaan-Ne.

YEHEZKIEL 8:6

Ruata nabbisara si ya'u, “Ei taumata apan mattate, i'o maasilo apa apan tantal᷊anna nariaddi? Panutukke manga inolaanna apan maarantinna apan niola'u taumatan Israel, apan mapaarau-U wuassu Wal᷊e-U! Wette, sarun Ta'u ita'e si'o manga inolaanna apan lembon maarantinna lai.”

ZAKARIA 1:4

Ariewe ere iupungngu al᷊amonanu. Sutempon dorone manga nabi mammasingkattu tanata-U si mangitou tadea'u i mangitou tate lai ma'ola'a al᷊al᷊eo wuṛṛu ma'ola'a rosa. Arawe i mangitou tawe maddaringikka wuṛṛu maddiri tumuṛṛutta si Ya'u.