RUT 4:6 - WUKE SUSI WATTI'U AL᷊AL᷊USASSA

⁶ Taumata udde sinumimbakka, “Amungkangngu aroddi, ne i ya'u tawe maasuungnga. Orassa indi mappianne ta'ute ipallosa hakka'u eteudde taumata apan paarorone mamalli leta'a udde. Tawe gunane i ya'u mamalli leta'a ana waugu leta'a udde sarun mabbal᷊i tatahuanannu papapulungku. Mappianne i'ote pamalli leta'a udde.”

RUT 4:6 Referans Kwoze

RUT 3:13

Ṛabbi indi i'o atana'e isindi asuene. Tiṛṛabbi marua'allo i ya'u maiwal᷊o tanne i tou mappulu mappaamattu manarane udde si'o ara'e maddiri. Amungkangngu mappulu, apianne; arawe amungkangngu i tou maddiri, ne i ya'u maddiandi sulal᷊ummu arannu Ruata apan biakka, i ya'u sarun mapaamattu manara udde. Orassa indi atiille isindi ma'oman sara marua allo.”

IMAMATTA 25:25

Amungkangu sangkatou Israel nabbal᷊i asiangnga na'oman sara i tou nabbal᷊u'u latangnge, manga tuṛṛange apan aranianne ṛinone manubbussa leta'a udde.

TAHIUL᷊E 25:7

Amungkangngu taumata udde maddiri ma'awingngu wawine inawal᷊uannu tuṛṛangnge, wawine udde ṛinone inai sumaruanna manga tembonannu soa wuṛṛu mabbisara, ‘Ipa'u maddiri ma'awingku, tadea'u tuṛṛangnge pia pangangawanne suwallatu walahannu Israel.’

PANDARIADDI 38:8

Ana see i Yehuda nabbisara si Onan tuarin i Er, “Roote ringannu inawal᷊uannu iaangngu, wuṛṛu atiille ringanni tou. Suunga'e manaranu ringanni tou, ana waugu i'o tuarin awingnge; ringannu aroddi iaangngu wotongnge maasomba pallaṛṛite.”

TAHIUL᷊E 25:8

Ana see manga tembonannu soa mamago taumata udde wuṛṛu maggahatton tou. Amungkangngu i tou mangke maddiri,

TAHIUL᷊E 25:9

awingngu tuṛṛangnge apan nate udde ṛinone mangundanin tou su saruannu manga tembonannu soa, malluatta silopen taumata udde, mangaddu hatine wuṛṛu mabbisara, ‘Arendi ṛinone ola'anna su taumata maddiri mangonggolu pangangawanna su tuṛṛangnge.’

RUT 2:20

“Ana'a, taumata udde tuṛṛangngi ite ta'e ṛepessa,” unni Naomi. “Ete i tou apan ṛinone mabiakka si ite. Antimanna Mawu mangal᷊amatta si tou. Mawu sidutu manipussa pa'aire-Ne, mawae ete su taumata apan ta'e wiakka ara'e lai si mangitou apan natete.”

RUT 3:9

“Isai i'o?” aiwal᷊on Boas. “I ya'u i Rut, Papa!” sasimbakki Rut. “Papa udde tuṛṛangngi yami ṛepessa apan ṛinone mamadul᷊i si ya'u. Doronganna i Papa mappulu'u olaanna awingngi Papa.”