ROMA 3:25 - WUKE SUSI WATTI'U AL᷊AL᷊USASSA

²⁵ Ruata nanantillu Mawu Yesus tadea'u ringannu papate-Ne udde taumata iapaal᷊iatta'a mapallosa wuassu pasasal᷊a amungkangngu i mangitou mangngimanna si tou. Ruata na'ola'a aroddi ana mapaal᷊iatta'u atatul᷊ide. Ana waugu su tempo nal᷊iu Ruata buatte nanabare manga rosan taumata, na'oman sara i Tou tate naṛṛuumanni mangitou.

ROMA 3:25 Referans Kwoze

1 YOHANES 4:10

Ete indi aakkanna: Wal᷊ine i ite apan suete niumakkannu Ruata, arawe Ruata apan niumakkanni ite wuṛṛu nandolokku Anang-Nge tadea'u wuassi Tou i ite maasomba aampungu rosan kite.

1 YOHANES 2:2

Ringannu pamamanaran Yesus Kristus uddewe manga rosan kite niampunganna. Wuṛṛu wal᷊ine tumba'u manga rosan kite sassane, ewe'e rosan anambon taumata lai.

ROMA 5:9

Orassa indi i ite naaukke apia ringannu Ruata sulal᷊ummu papaten Kristus; ana waugu udde sulal᷊ummete i ite masal᷊amatta lai wuassu asasa'un Ruata ana waugu Kristus.

WATTI'U MANGA RASUL 17:30

Tempon awawodong kite suete tinimbul᷊ianannu Ruata, arawe orassa indi i Tou nandolokku taumata su ahewallu runia tadea'u mawal᷊u wuassu manga rosa mangitou.

IBRANI 10:4

ana waugu atonna ṛaṛṛan sapi wuṛṛu ṛaṛṛang kambinga esakka tawe maatubusa rosa.

SONDAPPA 13:8

Winatangnga udde sarun subbannu anambon taumata apan mabbiakka su wowon runia indi, tabbene'e manga taumata apan aranne niwoṛṛeta tantal᷊anna runia indi taambe nariaddi, sulal᷊ummu wuken taumata wiakka pussa'an Ana'u Domba apan suete nipototta.

IBRANI 11:7

Ana waugu mangngimanna, ne i Nuh niapasingkatannu Ruata su ola'u apa apan sarun mariaddi su allo murine, apan tawe asiloanni tou. I Nuh tinumuṛṛuta Ruata na'oman sara i tou nallanginnu apalla apan sal᷊immurine niasingkatanna napanal᷊amatta wadangnge wuṛṛu lal᷊oṛṛon bal᷊ene. Ringannu aroddi runia niṛṛuumanna, arawe i Nuh sassane ana waugu pangangimanne niapaal᷊iatta'u Ruata ere sangkatou taumata apan mapia.

DARALO 22:31

Papapulunna manansunna sarun mattaṛṛamawu Mawu, i Tou sarun iwatti'a su pallal᷊awanna see lai papapulunna.

IMAMATTA 16:15

Wua'udde i Harun ṛinone mamototta ambinga maola'a sasamba ipangampungnga rosan balagu Israel. Daṛṛan ambinga udde ṛinone iapiddi tou watukku Wabbo'a Lembon Susi, ana see iwokka su wageangngu saruannu lal᷊uubbu Wantallu Pa'aire wuṛṛu su saruannu Wantalla, ere buatte niola'i tou su daṛṛan sapi esakka.

ROMA 5:1

Orassa indi i ite naaukka apia ringannu Ruata, ana waugu i ite mangngimanna. Wuṛṛu ana waugu udde i ite mabbiakka sulal᷊ummu paddarame ringannu Ruata sulal᷊ummu Mawun kite Yesus Kristus.

SONDAPPA 20:15

Manga taumata apan aranne tawe uawoṛṛetta sulal᷊ummu Wuken Taumata Wiakka, iramme sulal᷊ummu tahal᷊oangngu putungnga.

SONDAPPA 5:9

I mangitou mangngantarin sambau antari apan bakku: “I'o wotongnge manganu wuke udde wuṛṛu mamesangnga manga segelene. Ana waugu I'o suete nipate, wuṛṛu ringannu papate-Nu, taumata wuassu al᷊awo'u ṛuanganna wahasa, araratuanna, wuṛṛu walahanna suete niwallian-Nu hunane su Ruata.

IBRANI 11:14

Taumata apan nabbisara aroddi mapaal᷊iatta'a ringannu masemakka, manungku i mangitou tantal᷊anna maddea'a wanua apan maola'a leta'a pussa'a atatanaanni mangitou.

DARALO 119:142

Atatul᷊iddu Mawu mattaṛṛangnga sarangkal᷊o'engnge, wuṛṛu tita-Nu sidutu naṛṛino.

1 YOHANES 1:10

Arawe amungkangu i ite mabbisara manungku i ite tawe paddarosa, i ite maṛṛangngo manungku Ruata udde taṛṛa awusu wuṛṛu i ite tawe uaraddon wisaran Duata sulal᷊ummu naungngi ite.

IBRANI 11:17

Ana waugu mangngimanna lai, i Abraham nanantilli Ishak maola'a sambau sasamba su tempo i tou niannamannu Ruata. Ete tumba'u si Abraham Ruata nangonggolu pa'aire-Ne, arawe i Abraham ma'apulu nanantillu anangnge apan man sambau udde.

IBRANI 9:5

Su wowom wantala udde pia darua mala'ekatta, eteudde riadianna pia papaidde apan mammasingkata manungku Ruata uatana'a isudde lai. Papaiddu mala'ekatta darua udde uasiappakka su wowon lal᷊uubu Wantala, eteudde tampam pangangampunganna rosa. Arawe sarangkanambone udde tawe iatal᷊a'a orassa indi sambau-sambau.

1 TIMOTIUS 1:15

Mangke atonna wisara indi – ana waugu udde ṛinone sengkamanna wuṛṛu pangimananna – : “Kristus Yesus nirumanta su runia indi ana waugu manal᷊amatta taumata marosa.” Wuṛṛu ete i ya'u taumata marosa apan lembon al᷊al᷊eoanne.

ROMA 5:11

Wuṛṛu nangillembo wua isudde, i ite lai lullala'a ana waugu apapian Duata sulal᷊ummu Mawun kite Yesus Kristus. Ana waugu sulal᷊ummu Mawu Yesus, i ite orassa indi naapendampe paa'aukki ite apan mapia udde ringannu Ruata.

ROMA 3:26

Arawe orassa indi i Tou mammangalo rosa ana mapaal᷊iatta'u atatul᷊idda. Ringannu olangnge aroddi i Tou mapaal᷊iatta'a manungku watangan-Ne tawe bahiane; wuṛṛu anambon taumata mangngimanna Mawu Yesus, nareengnga taumata apan naaukke apia ringannu Ruata.

ROMA 2:4

Ara'e i yamiu mangngadio'a darangngu Duata wuṛṛu ahewallu naung-Nge see asasabare-Ne apan aroddi ahewalle? I yamiu masingkatta manungku Ruata mapaal᷊iatta'u apapia naung-Nge ana waugu i Tou maapulu tadea'u i yamiu mawal᷊u wuassu manga rosanu.

WATTI'U MANGA RASUL 4:28

I mangitou naaukka ma'ola'a al᷊awo'u manara, apan suete tinantunna ro'en paarorone manungku udde sarun matippussa. Wuṛṛu I'o sarun manantunnu udde wuassu taṛṛino wuṛṛu apulu-Nu sassane.

WATTI'U MANGA RASUL 3:18

Wuṛṛu ana waugu eteudde natipusse apa apan suete niapaasingkattu Ruata ro'en al᷊amonane sulal᷊ummu manga nabi-Ne, manungku Ratum Punnu Sal᷊amatta apan pina'ire udde ṛinone matataṛṛangnga.

WATTI'U MANGA RASUL 15:18

apan suete namasingkattu olangnge udde ro'em paarorone.”

WATTI'U MANGA RASUL 2:23

Ere su ṛingiṛṛan-Ne sassane, Ruata naṛṛawessa, i Tou manantillu Mawu Yesus si yamiu. Wuṛṛu su tempo i Tou tinantilla, i yamiu namate si Tou ringannu namala manga taumata lal᷊eo nangarussan Tou.

YOHANES 6:47

Paanaunge: Taumata apan mangngimanna, maatahuanna wiakka tutune wuṛṛu saran mal᷊annu-l᷊annu.

YESAYA 53:11

Ana waugu udde Mawu nabbisara, “Napawe buatte natataṛṛangnga sansara i tou sarun su lal᷊umanna'a wuṛṛu ma'al᷊uassa. Allang-Ku udde, apan ma'al᷊uassa naung-Ku, buatte namasanna ṛuumannu taumata nambo; sulal᷊ummi tou i Ya'u sarun mangampungnga si mangitou.

DARALO 97:6

Langitta mammasingkattu atatul᷊iddu Mawu, wuṛṛu anambon walahanna naasilo awawantu-Ge.

DARALO 50:6

Langitta mammasingkatta manungku Ruata nakkuungngu al᷊aṛṛanang-Nge, wuṛṛu manungku i Tou sassane mallaṛuungnge.

DARALO 40:10

Sulal᷊ummu ammul᷊annu al᷊aṛṛanang-Ngu i ya'u mammasingkatu watti'u al᷊al᷊uassa manungku I'o buatte nanal᷊amatta si yami. Ringannu tawe illil᷊one olangnge udde iapasingkata, I'o masingkatu sarangkanambone udde, oh Mawu.

IMAMATTA 16:10

Ambinga apan niapile si Azazeel ṛinone iapidda ta'e wiakka su saruannu Mawu ana see limbuaṛṛanna watukku wadda'a maola'a wuatti Azazeel, tadea'u manga rosan Israel pappasanna.

DARALO 98:2

Mawu nabbatti'u auntungan-Ne; i Tou napal᷊iatta'u atatul᷊iddu Mawu su manga walahanna.

WATTI'U MANGA RASUL 14:16

Su tempo nal᷊iu Mawu namala manga walahanna tuttuṛṛutta apulune sassane.

ROMA 5:18

Nariaddi, su ereapa lal᷊awangngu sangkatou taumata nangeṛṛon anambon taumata iṛṛuumanna, aroddi lai inolaannu sangkatou taumata apan tuttuṛṛutta apulun Duata, na'ola'a anambon taumata nal᷊iu wuassu pasasal᷊a wuṛṛu nionggol᷊annu wiakka.

1 KORINTUS 5:7

Rammea'a asuene ragi tabbe udde, eteudde ragin paddarosa, tadea'u i yamiu maola'a ere ompengu taponna apan wakku, waresi wuassu ragin paddarosa apan tabbe, wuṛṛu i ya'u masingkata manungku i yamiu atonna aroddi. Ana waugu, ramean Paskahn kite nasaddiate, ana waugu Kristus apan naola'a ere domban Paskahn kite suete niola'a sasamba.

2 KORINTUS 5:21

Kristus tawe pasasal᷊ane, arawe Ruata na'ola'a si Tou uapasanna rosan kite, tadea'u i ite maaukka apia ringannu Ruata ana waugu susambau ringanni Kristus.

EFESUS 1:7

Ana waugu wuassu papaten Kristus, i ite nipallosu Ruata, atappasanne manungku i Tou buatte nangampunga si ite wuassu manga rosan kite.

EFESUS 2:13

Arawe orassa indi, ana waugu i yamiu suete naaukka ringanni Kristus Yesus, i yamiu apan dorone marau, buatte niapaarani ana waugu papaten Kristus.

IBRANI 9:28

Aroddi lai i Kristus tumba'u paassa tinantilla maola'a sasamba ipanubussa rosan anambon taumata. I Tou sarun dumanta apia su aruane, wal᷊ine manginsue hatton paddarosa, arawe manal᷊amatta manga taumata apan uaraṛṛaddo daranta-Ne.

SONDAPPA 1:5

wuṛṛu wuassi Yesus Kristus, mattatiala apan matuṛṛuta. Ete i Tou apan paarorone niapaawiakka apia wuassu papate wuṛṛu ete i Tou ahebbal᷊anne uaparenta manga ratun runia. Mawu Yesus mandangngu si ite, wuṛṛu ringannu papate-Ne, i Tou napaal᷊iung kite wuassu manga rosang kite,