ROMA 2:29 - WUKE SUSI WATTI'U AL᷊AL᷊USASSA29 Arawe sangkatou Yahudi apan tutune eteudde taumata apan naungnge naungngu Yahudi; wuṛṛu sunatta apan tutune eteudde sunatta su naungnga apan mammanarannu Ghaṛṛahon Duata, wal᷊inewe niwoṛṛetta sulal᷊ummu wuke. Taumata ereudde, mannengkamma daralo wuassu Ruata, wal᷊ine wuassu taumata. Gade chapit la |
Sumbal᷊i ete i ite manga taumata apan suete nanarimmattu sunatta apan tutune, wal᷊inewe i mangitou. I ite massubba Ruata ringannu aehettu Ghaṛṛahon Duata sassane, wuṛṛu i ite maadiangkamanna ana waugu i ite mabbiakka su sambau ringanni Kristus Yesus. I ite tawe uatundeeta su manga inolaanna apan a'olaannu taumata.
Agasse pa'airenu si Ya'u, Mawunu, wuṛṛu ṛaea'e watangannu tumba'u huna-U, ei tumana'u Yehuda wuṛṛu Yerusalem. Amungkangngu tawe, ne asasa'u-U sarun ṛumopa wuṛṛu manoṛṛobba ere putungnga apan tawe iapaddummu isai-sai. Sarangkanambone udde sarun maṛṛia'a su watangannu ana waugu manga inolaannu apan dal᷊eo.”
Ana waugu udde, amungkangu taambe tempone, arie i yamiu mal᷊iha-l᷊ihakka manantunna manungku sangkatou nassal᷊a ara'e tawe. Paṛṛadote Ruata rumanta. Ete i Tou sarun mamu'a al᷊awo'u addapingnga apan uawuni sulal᷊ummu ararandumma. Ete i Tou apan mamongkakku anambon pandumanna apan uawuni sulal᷊ummu naungngu taumata. Su tempo udde suapan taumata wakkute udde maasengkamma daralo wuassu Ruata apan wotongnge sengkamanni tou.
Arawe orassa indi i ite tate lai aiitannu titan agama Yahudi. I ite natete wuassu tita apan dorone uaparenta si ite. I ite tate lai tumuṛṛutta ere tatuṛṛuta apan dorone, tuttuṛṛutta tita apan uawoṛṛetta. Orasa indi i ite tumuṛṛutte ringannu ta tuṛṛutta wakku apan nipantingiddu Ghaṛṛahon Duata si ite.
I ya'u masingkatta I'o mannal᷊u'atta naungngu taumata wuṛṛu maapulun taumata apan naungnge waresi. Ringannu asasaṛṛionto'a wuṛṛu al᷊al᷊uassu naungnga sarangkanambone indi ta'u ionggolla Si'o. I ya'u buatte na'ellega ereapa al᷊aṛṛanang-Ngu apan uasemodda isindi uaapiddu aonggolli mangitou Si'o ringannu al᷊al᷊uassu naungnga.
Mawu nabbisara, “Sarun a'omanna tempone i Ya'u makkuumannu taumata Mesir, Yehuda, Edom, Amon, Moab wuṛṛu tumana'u wadda'u anne apan namol᷊o utangnge. I mangitou sarangkanambone sunatanna ere taumatan Israel, arawe mawae i mangitou ara'e walahannu israel maola'a ere manga taumata apan tawe nisunatta, ana waugu i mangitou tawe tumuṛṛutta su pa'aire apan niwal᷊on sunatta udde.”