ROMA 14:13 - WUKE SUSI WATTI'U AL᷊AL᷊USASSA

¹³ Ana waugu udde arie i ite mapaasal᷊an sangkatou ringannu sangkatou. Arawe padea'e tadea'u i yamiu tawe ma'ola'a inolaanna apan ma'aola'a tuṛṛangngu su pangangimanna sambau awono'anna wuṛṛu marosa.

ROMA 14:13 Referans Kwoze

2 KORINTUS 6:3

I yami maddiri manaran kami iapaasal᷊a. Ana waugu udde i yami tawe mangonggolu pinangiananne su sangkatou ipa'ola'a olangnge udde.

YAKOBUS 4:11

Manga tuṛṛangnga, arie i yamiu uaal᷊uandaga ara'e mapaasal᷊an sangkatou ringannu waine. Taumata apan mangal᷊undaga wuṛṛu mapaasal᷊an tuṛṛange sansul᷊unga Saṛṛani, i tou mangngal᷊uandaga wuṛṛu mapaasal᷊an titan Duata. Wuṛṛu amungkangu i yamiu mapaasal᷊an titan Duata, udde atappasanne i yamiu tawe tumuṛṛutta manga tita udde, ewe'e maola'a lai mapaasal᷊an tita udde.

LUKAS 12:57

“Anio i yamiu tawe maṛṛawessa sassane apa apan naṛṛino?

MATIUS 7:1

“Imbaṛṛangnga maṛṛuungngu taumata waine, tadea'u i yamiu sassane lai tawe iṛṛuungngu Ruata.

YESAYA 57:14

Piaddu mabbisara, “Pa'ola'e wuṛṛu saddiate lal᷊annu uma-U, rammea'e al᷊awo'u hal᷊ahene.”

ROMA 16:17

Manga tuṛṛangnga! I ya'u sumal᷊ande ringannu lembone: Paatehamma su saruannu manga taumata apan ma'ola'a patatatiakka wuṛṛu mannongkakku pangangimannu taumata su Mawu. Olangnge udde uapapaṛṛala apa apan buatte niaṛṛa'a si yamiu. Arie paggawei taumata ereudde.

ROMA 14:10

Nariaddi, manga tuṛṛangnga! Apa hunane mapaasal᷊an tuṛṛangngu apan su pangangimanna sambau? Wuṛṛu apa hunane tuṛṛangnga mangngadio'a si tou? I ite sarangkanambone sarun sumaruanna Ruata tadea'u parikisanna.

LUKAS 17:2

Mappianne amungkangngu pia watun gahilinganna ii'itta su ullekkane, see i tou iwontolla su tahal᷊oangnga wuassu i tou mapaarosan sangkatou su wallattu manga taumata maradio'a indi.

SONDAPPA 2:14

Salaiwe aroddi pia manga pira inolaani yamiu apan tawe maal᷊uassa si Ya'u: Pia sangkadoanna taumata su wallatti yamiu apan mangngimanna al᷊aṛṛa'i Bileam. I Bileam nangaṛṛa'a si Balak ereapa mangema'u taumatan Israel su rosa; ringannu nassal᷊o'i mangitou umanna anna apan suete nionggolla su paal᷊uanna wuṛṛu ma'inolaanna sussandaga.

YAKOBUS 2:4

Ringannu ma'ola'a aroddi, yamiu na'ola'a palal᷊aṛṛae su wallatu sandingananni yamiu wuṛṛu ma'ellega taumata wuassu ṛingiranna apan lal᷊eo.

1 KORINTUS 11:13

Manga tuṛṛangnga paannama sassane maṛṛingiddu hatto indi: Apa mapia sangkatou wawine u'al᷊iomanna su Ruata su saruannu awadaalla, ringannu tawe uapaattu tatindunga?

1 KORINTUS 10:32

Pabbiakke aroddi olangnge ma'oman sara tuṛṛangnga tawe ma'ola'a taumata waine ma'ola'a rosa; apa i mangitou taumatan Yahudi ara'e taumata wal᷊ine Yahudi, ara'e lai jamaattu Ruata.

ROMA 14:4

Isai tuṛṛangnga, na'oman sara tuṛṛangnga mamarikissa allangngu taumata waine? Mawae ete allangnga udde nema'a ara'e dirumarisikka, udde singkaten mawune. Wuṛṛu atonna allangnga udde sarun dumarisikka matul᷊ida, ana waugu Mawu wotongnge mapararisikki tou matul᷊ida.

MATIUS 18:7

Silakawe eteapa runia indi ana waugu manga pallal᷊agu apan ma'arosa taumata. Atonna manga inolaanna ereudde ṛinone pia, arawe nasilakate taumata apan pallal᷊agune maarosa taumata waine!

MATIUS 16:23

Mawu Yesus nanaile see nabbisara si Petrus, “Roote passal᷊iu wua isindi, Mamamono'a! I'o mannal᷊are si Ya'u. Ṛingiddu udde ṛingiṛṛannu taumata; wal᷊ine ṛingiṛṛannu Ruata!”

1 YOHANES 2:10

Taumata apan marangngu tuṛṛangnge, mabbiakka sulal᷊ummu asasemakka na'oman sara wuassi tou tawe sarun mapaema'u taumata waine sulal᷊ummu rosa.

1 TIMOTIUS 5:14

Ana waugu udde i ya'u maapulu tadea'u manga wawine wal᷊u ta'e dario'a maawingnga apia, maasomba ana'a wuṛṛu mammadul᷊i lal᷊oṛṛon bal᷊e, tadea'u manga seetti ite tawe maasomba tempone mandal᷊eo aranni ite.

FILIPI 1:10

Ringannu aroddi yamiu masingkatta mamile apa apan apianne, wuṛṛu wiakku na'ukkassa wuassu angngo ara'e al᷊awo'u aansilla su allo Kristus rumanta apia.

2 KORINTUS 5:14

Ete darangngun Kristus apan uataṛṛino si yami; wuṛṛu i yami naatutukke manungku amungkangngu sangkatou buatte nate hunan taumata nambo, ne atappasanne manungku taumata sarangkanambone buatte nate.

ROMA 11:9

Daud nabbisara lai, “Wala'e manga andeangngi mangitou maola'a wal᷊ati'a si mangitou sassane, wuṛṛu maola'a loṛṛangnga, tampa mangitou manawo wuṛṛu maṛṛimunsa'a!

2 SAMUEL 12:14

Arawe ana waugu i Tuangnga buatte nangal᷊uandaga Mawu ringannu inolaannu udde, ana'i Tuangnga esakka apan wakkute niasungkanga udde sarun nate.”

YEHEZKIEL 14:3

“Ei taumata apan mattate, manga taumata indi buatte nanantillu watanganne su paal᷊uanna na'oman sara i mangitou nanawote sulal᷊ummu rosa. Manui mangitou maiwal᷊o si ya'u?

IMAMATTA 19:14

Imbaṛṛangnga mamontoga taumata wengella wuṛṛu arie mantaingngu watu su saruannu taumata wuta. Ṛinone i yamiu maaddatta si Ya'u wuṛṛu matta'u-U, ana waugu ete i Ya'u Ruatanu.

ROMA 14:3

Taumata apan u'anna tawe mamile, arie mangadio'a taumata apan u'anna tumba'u anna buatte tinantunne; wuṛṛu taumata apan tumba'u u'anna anna buatte tinantunne, arie lai mapaasal᷊an taumata apan u'anna alawo'u anna, ana waugu Ruata suete nanarimmatti tou.