MATIUS 12:28 - WUKE SUSI WATTI'U AL᷊AL᷊USASSA

²⁸ Arawe i Ya'u mallimbuakka ghaṛṛaho lal᷊eo ringannu taṛṛinon Ruata. Wuṛṛu udde atappasanne manungku Ruata mannattakke mamarenta su pattangnganni yamiu.

MATIUS 12:28 Referans Kwoze

LUKAS 11:20

Arawe i Ya'u mallimbuakka ghaṛṛaho lal᷊eo ringannu taṛṛinon Ruata, wuṛṛu udde atappasanne manungku Ruata mannattakke mammarenta su pattangnganni yamiu.

DANIEL 7:14

I tou nionggol᷊annu aaddata wuṛṛu taṛṛino ere sangkatou ratu, na'oman sara manga taumata wuassu al᷊awo'u walahanna, ṛuangannu walahanna wuṛṛu wahasa mattaṛṛamawu si tou. Taṛṛinone sarun mattaṛṛangnga saran mal᷊annu-l᷊annu, pamamarentane tawe iawaddo.

MATIUS 21:43

“Nariaddi paanaunge,” unnu Mawu Yesus, “anambon taṛṛino su al᷊aṛṛana'u Ruata sarun ul᷊eanna wuassi yamiu wuṛṛu ionggolla su walahanna apan mapaamattu manga parenta Ruata. [

MATIUS 6:33

Nariaddi paddea'e dorone tadea'u Ruata mamarenta sulal᷊ummu wiakku wuṛṛu tuṛṛutte apulu-Ne. Ne al᷊awo'u darotongnga waine lai sarun ionggolu Ruata si yamiu.

WATTI'U MANGA RASUL 10:38

Yamiu masingkatta manungku Ruata suete namile Mawu Yesus taumata Nazaret udde wuṛṛu nangonggolu Ghaṛṛaho Ruata wuṛṛu taṛṛino si Tou. I yamiu masingkatta lai manungku Mawu Yesus u'amatta su al᷊awo'u tampa ma'ola'a apapia; i Tou mapaapian taumata apan niasuttannu Setanna, ana waugu Ruata uatantalongnga si Tou.

KOLOSE 1:13

I Tou suete namallosi ite wuassu taṛṛinon araranduma wuṛṛu nangingkati ite sulal᷊ummu araratuannu Anang-Nge apan arangnguan-Ne.

ROMA 14:17

Ana waugu amungkangngu Ruata mangatokku pabbawiakku sangkatou, apa apan wotongnge annananni tou ara'e inumanne, tawe tumanin mahuna. Ahunanne eteudde manungku taumata udde tuttuṛṛutta apulun Ruata, maapendamma al᷊al᷊uassu naungnga wuṛṛu mannengkamma al᷊al᷊uassa apan nionggolu Ghaṛṛahon Ruata.

LUKAS 16:16

Tita apan nionggolli Musa wuṛṛu al᷊aṛṛa'u manga nabi, sidutu ta'e ipappaatta na'oman sara tempon Yohanes Mananaṛṛani. Wuassu tempo udde Watti'u Al᷊al᷊uassa su ola'u ereapa Ruata mamarenta ere sangkatou Ratu sidutu iwabbatti'a. Wuṛṛu taumata mammata'en dirine tadea'u maola'a lal᷊oṛṛon araratuannu Ruata.

MARKUS 1:15

Wisara-Ne, “Tempone nia'omante Ruata mamarenta. Awal᷊ute wuassu manga rosanu, wuṛṛu pangimante Watti'u Al᷊al᷊uassa wuassu Ruata!”

MATIUS 21:31

Ne su wallattu ana'a darua indi, suapane apan tinumuṛṛutta apulun iamangnge?” “Iapa pahul᷊une,” sinimbakku manga imam tembonanne wuṛṛu piaṛṛa'u Yahudi udde. Ne Mawu Yesus nabbisarate si mangitou, “Pangimante: Maddarorongnga wose wuṛṛu manga wawine masandaga sarun maola'a lal᷊oṛṛon araratuannu Ruata rorone wuassi yamiu.

LUKAS 9:2

Wua'udde i Tou nandolokke mangitou inai mapaapian taumata marada'a wuṛṛu mamasingkattu watti'a su ola'u ereapa Ruata mamarenta ere sangkatou Ratu.

MARKUS 16:17

Maola'a sambau tatiala manungku i mangitou mangngimanna, manga taumata udde sarun mallimbuakka ghaṛṛaho lal᷊eo ringannu arang-Ku; i mangitou sarun mabbisara sulal᷊ummu al᷊awo'u wisara apan taambe niasingkatanni mangitou.

DANIEL 2:44

Sutempo pamamarentan manga ratu udde, Ruata su surga sarun mapararisikku sambau araratuanna apan mattaṛṛangnga saran mal᷊annu-l᷊annu wuṛṛu sarun tawe iawaddon al᷊awo'u walahanna su al᷊awo'u tampa. Araratuanna udde sarun makkimunsa'a al᷊awo'u walahanna su al᷊awo'u araratuanna waine udde.

IBRANI 12:28

Ana waugu udde, ṛinone i ite ma'adiangkamanna su Ruata, ana waugu i ite nanengkamma wuassi Tou sambau araratuanna apan tawe umio'a. Ṛinone i ite ma'adiangkamanna wuṛṛu mattaṛṛamawu Ruata ringannu addata wuṛṛu atata'utta, tumuṛṛuttu pallal᷊agu apan ipa'apulu-Ne sassane.

LUKAS 10:11

‘Ewe'e sara lai awu su soanu apan uareetta su leddang kami, itontongngi yami maola'a sambau pananaunganna si yamiu. Arawe ṛinone i yamiu maasingkatta manungku maranite tempone Ruata mamarenta ere sangkatou Ratu su pattangnganni yamiu!’

MARKUS 11:10

Nial᷊amatante araratuan-Ne apan sarun dumanta – araratuanni Ratu Daud, iupungngu al᷊amonang kite! Dalo su Ruata Apan Atanggaṛṛanne!”

MATIUS 12:18

“Ete indi ralol᷊oṛṛang-Ku apan Ta'u pinile taumata apan arangnguang-Ku wuṛṛu natataṛṛino su naung-Ku. Ghaṛṛaho-U sarun ionggolla si Tou, atatul᷊i-U sarun iapasingkattati si Tou su manga walahanna.

MATIUS 4:24

Watti'a su ola'u Mawu Yesus udde naddingikke su al᷊awo'u wanua su Siria, na'oman sara taumatanambo rudanta ringanni Tou. I mangitou uaapiddu manga taumata apan uatataṛṛangnga al᷊awo'u hatin radda'a wuṛṛu asasusa. Manga taumata apan niasuttannu ghaṛṛaho lal᷊eo, apan raddangnge pua, wuṛṛu lome, sarangkanambone udde niapaapia Mawu Yesus.

MATIUS 12:29

Ereapa taumata wotongnge maasutta sulal᷊ummu wal᷊en sangkatou apan matohassa wuṛṛu mangaṛṛo darotongnge, amungkangngu i tou tawe maṛṛapussa dorone taumata matohassa udde? Wua'udde i tou wotongngete mangaṛṛo darotongnge.

1 YOHANES 3:8

Arawe taumata apan matatana'a ma'ola'a rosa, ete i tou uddewe ana'u Setanna, ana waugu Setanna marosa ro'en al᷊amonane. Ana waugu udde Ana'u Ruata nirumanta, eteudde makkimunsa'a manaran Setanna.