MARKUS 4:39 - WUKE SUSI WATTI'U AL᷊AL᷊USASSA

³⁹ Mawu Yesus napu'ote see namul᷊o anginna udde, wuṛṛu nabbisarate rano, “Paal᷊annaba, al᷊enakke!” Ne anginna nol᷊ote, wuṛṛu rano nal᷊enakke atonna.

MARKUS 4:39 Referans Kwoze

DARALO 107:29

Tandi'a apan mandasakka nirolokku Mawu niapal᷊enakka, manga lua'a lai nallannabba.

DARALO 89:9

Mawu, Ruata Apan Lembontaṛṛino, isai pia atohassa ere I'o? I'o mapia sulal᷊ummu al᷊awo'a oh Mawu.

DARALO 65:7

Ringannu atatohan-Nu I'o napararisikku manga wowone, tadea'u mapal᷊iatta'u taṛṛino-Nu apan matohassa.

DARALO 29:10

Mawu uataṛṛino su manawangnga wahewalla, I Tou uaparenta naola'a Ratu saran mal᷊annu-l᷊annu.

YEREMIA 5:22

Ete i Ya'u Mawu; anio i Ya'u tawe iata'utti yamiu? Ṛinone i yamiu mangngindo su saruang-Ku! Ete i Ya'u apan nallanginnu apanne apan naola'a sasaran tahal᷊oangnga apan tawe al᷊iuanna saran mal᷊annu-l᷊annu. Tahal᷊oangnga wotongnge mattandi'a wuṛṛu walladde mandi'uṛṛungnga, arawe tawe maal᷊iu passaranne udde.

AMSAL 8:29

sutempo i Tou namarenta ua'en tahal᷊oangnga tadea'u imbaṛṛangnga lumewessa manga passaranne. I ya'u lai isudde sutempo apampakku runia niwilan-Ne.

DARALO 148:8

ei sawallo wuṛṛu uranna eisse, salju wuṛṛu winabbawa, anginna ma'ikkatta apan tuttuṛṛutta parentan Mawu!

AYUB 38:11

Wisara-U si tou, ‘Eteindi passaranne. Arie i'o lumewessa! Ete isindi manga tahal᷊oangnga apan matohassa ṛinone mattaalla.’

SASABANGNGA 14:22

Ua'e natahia darua, wuṛṛu taumatan Israel tinumumbete tahal᷊oangnga, i mangitou u'amatta su wantane apan mamara, wuṛṛu ua'e su aikatanna wuṛṛu aiṛṛi naal᷊ihidda darandungnga.

MARKUS 9:25

Napawe Mawu Yesus naasilo manungku taumata mannattakke rudanta maṛṛimpulunna, i Tou namarenta ghaṛṛaho lal᷊eo udde ringannu nabbisara, “Ghaṛṛaho wengella wuṛṛu mou, i Ya'u mandolokku; sabbangnga wuassu ana'a indi wuṛṛu ariete passutta si tou apia.”

SASABANGNGA 14:16

Wattea'a ta'innu su wowon tahal᷊oangnga. Ne ua'e sarun matahia darua wuṛṛu taumatan Israel wotongnge lumewessa tahal᷊oangnga ringannu umamatta su wantane apan namarate.

LUKAS 4:39

Mawu Yesus inaite nattudan lallowanganne, see nallimbuakka sal᷊ihamma udde. Sal᷊ihamma udde nawul᷊i, wuṛṛu la'iananni Simon lapiddu nabangunna wuṛṛu nangimbe si mangitou.

NAHUM 1:4

I Tou namansagu tahal᷊oangnga wuṛṛu naapamarane, al᷊awo'u sal᷊ukka niapaatti ua'ene. Wowon Karmel wuṛṛu manga wadda'a su Basan nabbal᷊i lol᷊okka wuṛṛu su Libanon tinumolangke al᷊awo'u wantin bunga.

LAL᷊ALLU 3:31

Ana waugu, Mawu sarun tawe manol᷊a'i ite saran mal᷊annu-l᷊annu.

MATIUS 8:26

“Anio i yamiu matta'utta?” unnu Mawu Yesus. “Pangangimanni yamiu si Ya'u mattul᷊ungnga!” Wua' udde Mawu Yesus dirumarisikka wuṛṛu nandona anginna wuṛṛu rano udde. See rano udde nabbal᷊ite nal᷊enakka atonna.

MARKUS 4:38

Su pangangul᷊inannu saalanna udde Mawu Yesus tantal᷊anna mattiilla uaillul᷊unna su apepessa. Mallal᷊aṛṛenggen-Ne namu'o si Tou. I mangitou nabbisara, “Iamangnga Huru, apa Iamangnga tawe maṛṛingidda i ite masilakate?”

LUKAS 4:35

“Paal᷊annaba!” Mawu Yesus nandona ghaṛṛaho lal᷊eo udde, “Sabbangke wuassu taumata indi!” See ghaṛṛaho lal᷊eo udde namantingngu taumata udde su saruanni mangitou sarangkanambone wuṛṛu wua'udde sinumabangnga wuassu taumata udde ringannu tate napaaradange.

LUKAS 8:24

Mallal᷊aṛṛenggennu Mawu Yesus inaite ringan-Ne wuṛṛu namu'o si Tou. I mangitou nabbisara, “Iamangnga Huru, Iamangnga Huru, i ite masilakate!” Mawu Yesus napu'o see nandona anginna wuṛṛu lua'a apan mattandi'a udde. Anginna wuṛṛu lua'a udde nol᷊ote, see rano nabbal᷊ite mal᷊enakka atonna.